Malakus 16 - Kaa n Kəzə̀ n fəghə mə

Yeso zhəm dzəŋŋə nə ivə

¹ Nghee tə tsuʼ inaʼ u tsəghə tsunə, Maliya Magdala ghi Maria nay Jems, ghi Salome ghə n zuu naŋa tsu mbvə n tsoʼlə mə ni ndòw tsoʼlə vən i Yeso tii.

² Ambə n tsuʼ fə sə̂ i sə fə nə iwən, ghə n bəd nuu kɔʼ n sə̀ kə tsə, nuu ndòw n dzuu zə isay i Yeso.

³ Nghee tə̀ ghə ndòwnə n jii, ghə n bəbə n wû i ghə nə̀, a i gaamə ndee ghey ni ney nuu tay i nii zey n dzuu zə isay ə.

⁴ Ghə n dza i laalə ndow, koʼ ndow nə̀ ghə n bəŋŋə nuu tay zey zə â loʼnə n dzuu zə isay i tii zə (â ndzəm loʼ tay i nii nii zə).

⁵ Ambə ghə nyi ndòwnə n say i tii zə, ghə n koʼ ndòw waa fəghaŋ u loʼ wə tə doʼnə n bad kə kpii kə zəə kə, nə̀ tə n dzəŋə keeli ndzə tə fəmə tə. Sey, ghə n kaʼ ni tsəŋ.

⁶ Tə n dza ndòw tə̀ ghə nə̀, “Kə̂ ghaa nə tsəŋənə, ghaa kəŋə Yeso wù Nazaled wən ghə â baanə wi n zat kə fəkaʼ ə? Tə mâ zhəm nə ivə, tə kəm way dzə fa. Koʼo na luʼu wey ghə â nyəŋi naŋanə wi tii.

⁷ Ndòw dza ndòw na tə̀ ngəd tə wi tə, nsə Pita nə̀ tə n ndòw isə n naʼ i Galili. À loʼ fu ghaa i koʼonə wi, tə̀ tə â dzanə.”

⁸ Wû wə n kaalə kɔʼ bə ghə, ghə bə tyi shi fu n dzuu zə isay, ghə n ka dza kìi shi ghə i loʼ zə tə̀ wù, n təŋkey, ghə â tsəŋənu.

Yeso dii wû u wi tə Maliya Magdala

⁹ Nghee tə̀ Yeso zhəm kɔʼnə nə ivə n tsuʼ fə sə̂ i sə fə nə iwən, tə n dii ndòw uwû tə̀ Maliya Magdala wən tə â dzùm shinə zay u bwu wə usəghəmbəghə n kow wi.

¹⁰ Maliya Magdala n ndòw dza ndòw tə̀ ghə̂ ghey ghə â loʼ tsə ghi Yeso, ghə n loʼ nə ghə dey ivə.

¹¹ Ambə tə bə dza bənə tə̀ ghə nə̀ Yeso loʼ utaw nsə nə̀ tə n wi koʼ, ghə n ka bəghəm ghəə zey tə dzanə.

Yeso dii uwû tə dzûmə tə wi tə̀ təbəghə

¹² Yeso n kəm dii soʼo uwû tə̀ dzûmə tə wi tə təbəghə n jii, ghə ndòwnə inaʼ

¹³ Ghə n dzəŋŋə ndòw, ndòw dza ndòw tə ghə̂ a loʼ ghey, ghə n ka nam bəghəm ghəə zey ghə dzanə.

Yeso dii uwû tə̀ ngəd tə wi tey ighəm n ghii zə imɔʼ

¹⁴ Yeso n baa bə dii bə uwû tə̀ ngəd tə wi tey ighəm n ghii zə imɔʼ, nə̀ ghə zəənu. Tə n kpaa ndòw ghə bòʼ nə̀, ghə â khə way bəghəm i fə̀ŋ zə nsə nə̀ ghə â way ni bəghəm fu tə̀ ghə̂ ghey ghə â koʼnə wi nə̀ tə n zhəm dzəŋŋə nə ivə.

¹⁵ Tə n dza tə̀ ghə nə̀, “Ndòw na n mbi idzəm, ghaa naʼa ndòw tûm i dzuŋu zə tə̀ ghə̂ ghə adzəm.

¹⁶ Wù wey tə bəghəmnə ghəə zey ghaa dzanə, ney kɔʼ mmuu n Kəzə̀, tə i keeli ibəghəshi. Wù wey tə ka bəghəm i keeli ngoʼ.

¹⁷ À wən loʼ tsəə tən tə i dzûmə ghə̂ ghey ghə i bəghəmnə ghəə ghey ghaa dzanə; Ghə i keeli kədaʼa ni dzùm shi zay u bəbə wə n zəd zuŋ, ghə i kaʼ ni ghɔɔmə ndəmə ghɔɔmə tə tətùm,

¹⁸ nə̀ ghə kwu kə zuu n wɔɔ, nkee ghə mə̂nə nəb, zə i ghəŋə dzə way ghə i loʼ zə n kow ghə, ghə i mɔm ndòw ghə̂ a dzaŋa ghə n wɔɔ, ghə n taw doʼo i bə.”

Yeso kɔʼ idəŋ

¹⁹ Ambə Mûkəbii Yeso ghɔɔmə may tsunə ghəə ghən tə̀ ghə, Zə̀ kə n ney nuu kɔʼ ndòw wi idəŋ, tə n ndòw doʼo tsu n kpii u Kəzə̀ u təmə kə.

²⁰ Ngəd tə wi tə n kaʼ ndòw ni naʼa tûm i dzuŋu zə nə təluʼu tədzəm. Mûkəbii n fwaʼa ghi ghə, gaamə ghə nə̀ ghə i ghəŋŋə faalə mə ni dii tsu nə̀ ghəə ghey ghə naʼlənə, a nuu bə n wɔ K-a-zə̀.