Kəfwaʼ 28 - Kaa n Kəzə̀ n fəghə mə

Ghəə zey zə â shinə n kow Pɔl n Malta

¹ Ambə ghey nɔb shi kɔʼ bənə n nali kə dzuu, ghey n kəŋ keeli shi kɔʼ n wɔ ghə̂ ghey ghə muunə fu nə̀ ghə tɔŋɔ naʼa zey dzuu zey dzəŋ ngəə kɔʼnə a loʼ Malta.

² Ghə̂ ghə inaʼ a tii ghə n ngii dii ghey n ləghə zə, kpiney kɔʼ soʼo ghey. Ambə ghow i kaʼ tsunə ni tsu, ghə̂ inaʼ ghey n faalə kɔʼ uvələ nə ghey zɔy n təŋkey fəb wə â ngii loʼnu.

³ Pɔl n loʼ nə̀ tə n kûmmə kaabə bə dzə̀ghə̀ nkaʼ, tə n kpəʼlə nyiə ndow fu nə uvəllə. Nghee vəllə u nyiʼi kɔʼ fu nə nkaʼ, zuu n ndow tyi shi bə fu nə nkaʼ, tsow tsu Pɔl, zən doʼo kɔʼ n kpii kə wi.

⁴ Ambə ghə̂ a naʼ zən koʼ nghee zuu zey zənnə n kpii kə Pɔl, ghə n dza n wû i ghə nə̀, “Wù wən teeli loʼ wù wey tə weyyənə ghə̂ ghə. Nghee tə buʼ nɔb shi kɔʼ bə kənə n nali kə dzuu, zə̀ kən kə saʼanə ghə̂ ghə n jìi zey i loʼnə tsətsəghə, i bəghəm way nə̀ wù wən muu fa n mbi.”

⁵ Pɔl n kuŋŋə wəd maʼa nyi tsu kə zuu zey nə uvəllə nə̀ tə ka keeli chɔd u loʼ wə.

⁶ Ghə n ləmmə ni koʼ Pɔl tə maŋ nuu kaʼ tsunə ni mowwə shi ndow, nkee tə maŋ nuu bwu kpu bənə. Ambə ghə ndəŋ ləmə kəŋə ndownə, koʼ nə̀ ghə i loʼ i shiə way n kow wi, ghə n kweyyə kɔʼ moʼlə tə ghə, kaʼ ndow ni dza nə̀ tə loʼ fəzə̀.

⁷ Sum u loʼ wə n kuʼlə loʼ fu nə̀ a khə wù loʼ ghə â tɔŋŋə nə̀ à loʼ Poblus, tə â loʼnə wù nii n naʼ zey dzuu dzəŋŋə naŋa kɔʼnə. Tə n ney naŋa ghey n ndaw wi, ngii dii ghey n ləghə zə, laalə kɔʼ bə soʼo tə ghey nə ntsuʼu ntəghə.

⁸ Zə n bə shi kɔʼ nə̀ bày Poblus nyəŋ nə ukay n wû wə nsə tɔ̀ɔ fə, fə fəmmənə wi. Pɔl n tsəghə nyi ndow n dzuu i ndaw i wi, nyi gaʼ tsu awɔɔ n kow wi, gɔŋŋə tsu, baŋŋə kɔʼ wi.

⁹ Nghee ghəə ghən shi kɔʼnə, ghə̂ a dzaŋa ghey adzəm fu n naʼ zey dzuu dzəŋŋə naŋa kɔʼnə n ndow bə soʼo, Pɔl n baŋŋə kɔʼ ghə.

¹⁰ Ghə̂ a tii ghə n naamə ghey n ndəmə tə ufə tə. Ambə ghey nuulənə, ghə n kuu kɔʼ soʼo fə wey udzəm wə i gaamənə ghey n jii nə kəfən.

Pɔl zəghə tsu Malta ndow n Rom

¹¹ Ambə ndzɔŋɔ tə tsəghə tsu tətəghə, ghey ney kɔʼ fən kə loʼ kə, kə nuu bə n Alekzandra ghə â tɔŋŋə nə̀ a loʼ “Zə̀ u ghə Ngɔŋmbaa.” Fən kən â bə təmi bə fu bòʼ nə̀ â loʼ nəŋə zey fəb wə â ngii loʼ tsənə tii.

¹² Ghey n ndow nyi ndow n naʼ i loʼ zə ghə tɔŋŋə nə̀ a loʼ Sirakus. Ghə n doʼo tsu fu ntsuʼu ntəghə.

¹³ Ghey n zəghə tsu fu, daŋŋə nuu nyi ndow n Rejum. Ambə tsuʼ fə tsəghə tsu fəmɔʼ, gbəllə kə zəŋ kə loʼ kə n maŋ ndow nuu kɔʼ bə n bad kə itən kə. Tsətsə wey, ghey n bə nyi bə n Putyoli.

¹⁴ Ghey n bə koʼ bə dzûmə tə Klisto tə loʼ tə fu, ghə n dza nə̀ ghey muu doʼo tsu iwən ghi ghə. À wən loʼ nghee ghey â bweynə tii ni bə nyi n naʼ i Rom.

¹⁵ Dzûmə tə Klisto tey fu n zow tsu nə̀ ghey nya bəghənu, ghə n lɔʼlə bə taa bə n Bikiwən kə Apius nsə n luʼu kə bəŋə bweeli kə ghə â tɔŋŋə nə̀ a loʼ Utsə utəghə, ni bə koʼ ghey. Ambə Pɔl koʼ tsu ghə, tə n fuu zɔŋŋə K-a-zə̀, fə̀ŋ n daŋŋə nyi bə wi.

Pɔl ghɔɔmə ghəə a Kəzə̀ n Rom

¹⁶ Ambə ghey bə nyi bənə n Rom, ghə n zəghə tsu Pɔl nə tə muu n ngəŋ ə wi, kee naŋa tsu kə sawgoʼ imɔʼ nə zə i keyyə wi.

¹⁷ Ambə tsuʼu n tsəghə tsu ntəghə, Pɔl n tɔŋɔ naŋa bə ngəd tə Təjuu tey tə â loʼnə fu. Ambə ghə təmdzəŋi bənə, tə n dza tə ghə nə̀, “Waazə ghə, â loʼ n Yerosalem ghə â ney fuu nyi tsu mə n wɔɔ kə ghə̂ a Rom tə̀ a loʼ wù ndaw tsaʼ. Mə â kaʼ ghəŋə bəəbə dzə ghə i loʼ zə tə ghə̂ ghə inaʼ a saa ghə, nkee tə laŋ kə ghə bày a saa kə diinə.

¹⁸ Ambə ghə saʼnə mə, ghə n ləghə ni zəghə maʼa mə, n təŋkey, ghə â koʼ tsu nə̀ n ka ghəŋə bəəbə dzə ghə i loʼ zə tə ghə loʼ ni wey mə tii.

¹⁹ Ambə ghə̂ a Təjuu a ləghə way nə ghə zəghə maʼa mə, mə n khə kə ni dza nə̀ ghə tûm bə saʼ zuŋ tə də̀ŋ kə Rom kə. N buʼ khə dzə way moʼlə i loʼ zə ni kwu ghə̂ ghə inaʼ ghuŋ n ghəə zey ghə ghəŋə bəəbənə.

²⁰ À wən loʼ ghə i tii zə n tɔŋɔ naŋa bənə ghaa na fa, nə̀ n tiilə dza bə soʼo tə ghaa ghəə zey i tsəghənə. Ghə mə fa nə tətsaʼ kùm naŋa bòʼ wù wey Zə̀ kə â dza naŋa nə̀ i tûm bənu tə ghə̂ ghə Izree ghə.”

²¹ Ghə̂ ghey n dza tə Pɔl nə̀, “Ghey ka kam koʼ dzə màʼlə kə loʼ kə fa, kə nuu bə n Judeya kuum wɔ. Waazə a saa ghey ghə buʼu bəghə tsənə fa, u loʼ u ka kam bə naʼa koʼ tsə nkee ni dza koʼ tsə ghə i bəbə i loʼ zə kuum wɔ.

²² Ghey kee ləghənu ni zow moʼlə zə n təŋkey ghey khənu nə ghə tsəm ə khəə bəəbənu nə təluʼu tədzəm bòʼ zəghə wey wə loʼnə tii.”

²³ Ambə ghə̂ ghey ndzɔʼ bəghəm naŋa kɔʼ tsuʼ fə, ndəmə ghə n bə koʼ bə soʼo wi n luʼu key tə â muunə tii. Tə n tiillə ghə i tii zə tə ghə ni zey tsu n bələbələ tə ndow kuum ndow n nəŋə i fənə tə. Tə n tiillə dza ghəə a fɔɔ u Kəzə̀ tə ghə, tə n ney bə soʼo aghəə n laŋ kə Mushi nsə n ghəə ghey tûm tə Kəzə̀ tə â tɔ̀ɔ naŋanə ni dii ndow tə ghə nə̀ ghəə ghey tə dzanə bòʼ Yeso loʼ isəŋə.

²⁴ Ghə̂ a loʼ ghə n bəghəm fuu ndow soʼo ghəə ghey tə dzanə, a loʼ ghə n ka kee bəghəm.

²⁵ Ghə n nuu dzawwə doʼo tsu n wû i ghə, zey nə u nuulə wə nghee ghə zow Pɔl dza tsunə nə̀, “Zay kə Zow kə â ka nɔʼ dzə ni dza tə ghə bày bày a ghaa ghə n bam i wù tûm Kəzə̀ Ayzaya nə̀,

²⁶ ‘Ndow koʼo ndow ghə̂ ghən, wə dza ndow tə ghə nə̀, Ghaa nə mgbaŋa zow ndow ghəə ghə, kee zowkeeli way, Ghaa nə mgbaŋa koʼo ndow, kee koʼo keeli way.

²⁷ Fə̀ŋ tə ghə̂ ghən n fəŋsə doʼo, Tuŋŋə u ghə wə u taw ni zow aghəə, Ghə a kəmə naŋa tsu soʼo sə̂ a ghə ghə. Seynə kə ghə nə koʼo ghəə ghə n sə̂ a ghə, ghə nə zow soʼo, nə i kə ghə nə zowkeeli soʼo n fə̀ŋ tə ghə, i kə ghə nə baŋa koʼo bə mə tə n baŋŋə kɔʼ ghə.’

²⁸ Ghaa khə ni keeli tsu nə̀ ghə n ney tûm Kəzə̀ zən i ghəŋŋə nə̀ ghə̂ a keeli ibəghəshi, tûm nuu ndow tə ghə̂ ghən ghə way ghə̂ a Təjuu ghə. Ghə i zownu.”

²⁹ [Ambə Pɔl khəə may tsu ghəə ghən, ghə̂ a Təjuu ghey n zəghə tsu fu, fəə ndow asɔŋ n jii nə iwû.]

³⁰ Pɔl n muu fu nə tənum təbəghə nə tə tsəə ndaw wi n nəŋə wi. Tə n laalə dzɔbə tə ghə̂ ghey adzəm ghə â bə bweyyə koʼnə wi.

³¹ Tə n naʼlə tûm i dzuŋu zə bòʼ fɔɔ u Kəzə̀, dii ndow soʼo aghə̂ kuum Mûkəbii Yeso Klisto n mgbaŋ, nə tə tsəŋə way, wù loʼ n ka tsəm təʼlə soʼo wi.