Kəfwaʼ 24 - Kaa n Kəzə̀ n fəghə mə

Feliks wən tə loʼ gɔvənɔ saʼ Pɔl

¹ Ambə tsuʼu n tsəghə tsu ntaa, Ananyas wən tə â loʼ fɔɔngili u nii nii wə, n shi tsu bə n Kayserya ghi ngəd tə Təjuu tə loʼ tə nsə wù kəlaŋ u loʼ wə ghə â tɔŋŋə nə̀ a loʼ Tetulus. Ambə ghə bənə n səə Feliks, ghə ney dza ndow zuŋ key ghə kwu Pɔl tii tə̀ gɔvənɔ.

² Nghee ghə tɔŋɔ nyi bənə Pɔl, Tetulus n teyyə ndow saʼ a wi, dza nə̀, “Mûkəbii, ghey n ndəŋ doʼo dzɔb kɔʼ bə fa n tənə wɔ nə ibuulə, saʼ zə i dzuŋu zə u ghəŋə soʼonə nə̀ ghəə ghə i bwey dzɔbə fa n naʼ zən.

³ Mûkəbii Feliks, ghey ngii ləghənu jìi zey wə saʼanə tii nə təluʼu tədzəm nsə nə tənəŋə tədzəm.

⁴ À kee loʼ kə nə n ləghə way ni bəəbə nəŋə zə. N buʼu bə kəwɔɔ nə̀ wə nyaʼi kow tsu fə̀ŋ ni zəllə bə ghɔɔmə i ghey zən n gboolə khəələ kɔʼnə.

⁵ Ghey n koʼ nə̀ wù wən loʼ wù uchɔd. À loʼ wi tə soʼo kaabə tsənə chɔd wə n fəŋŋə kə ghə̂ a Təjuu fa n mbi idzəm. À loʼ soʼo wi tow kə n zəghə u loʼ wə ghə tɔŋŋə nə̀ a loʼ zəghə u Nazarin.

⁶ Tə â buʼu kəŋə soʼo jii ni dzəələ maʼa ndaw Kəzə̀ n Yerosalem, ghey n kwu nuu kɔʼ wi.

⁷ [Ghey â khənu ni saʼ wi tə laŋ kə ghey kə diinə. Tow kə təsawgoʼ wey ghə tɔŋɔ wi nə a loʼ Lishyas n kee bə bəkeeli nuu kɔʼ wi nə kədaʼa n wɔ ghey, dza nə̀ ghə̂ ghey ghə kwunə wi, ghə bə n səə wɔ.]

⁸ Abə wə tɔʼ bəb tsunə wi n ghəə ghə, wû wə, wə i loʼnu ni tɔʼ zow n wɔ wi nə̀ ghəə ghey, ghey kwunə wi tii loʼ isəŋə.”

⁹ Ngəd tə Təjuu tey n kuu kpiʼi ndow soʼo dzə̂ tə ghə tii dza nə̀ ghəə ghey adzəm Tetulus dzanə, a loʼ isəŋə.

¹⁰ Ambə Feliks tɔŋɔ gɔvənɔ sɔʼ ndow wɔ kə tə̀ Pɔl nə̀ tə ghɔɔmə, Pɔl n dza nə̀, “N khənu nə̀ wə n saʼ naʼ zən n ndəmə tənum, n duʼlənu ni tiilə dza bə n sə kə nə n ka ghəŋə bəəbə dzə ghə i loʼ zə.

¹¹ I taw way tə wɔ ni kəŋ keeli shi kɔʼ nə̀ tsuʼu n ka kam tsəghə dzə ighəm n ghi mə n bəghə tə̀ mə â kɔʼnə n Yerosalem ni ndow fuu nkɔʼlə tə Zə̀ kə.

¹² Ghə̂ ghən ka kam koʼ koʼ tsə mə n ghɔɔmə baalənə ghi wù loʼ n ndaw Kəzə̀, nkee n təəbənə ghə̂ ghə n ndaw kədzəŋi ghə̂ a Təjuu nkee n luʼu kə loʼ kə n fə̀ŋ inaʼ.

¹³ Ghə buʼ way soʼo ni dii ghəə zey ghə kwunə mə fa tii.

¹⁴ N kee bəghəmnu n sə kə nə̀ n ngɔɔmə Zə̀ kə ghə bày bày a saa tə a loʼ wù wey tə dzûmənə jìi zey i loʼnə i Mûkəbii zə. À loʼ jii tii ghə̂ ghən tɔŋŋə nə̀ a loʼ uzəghə. N bəghəm soʼonu n ghəə ghən adzəm laŋ kə dii, nsə ghəə ghən tûm tə Kəzə̀ tə â tɔ̀ɔ naŋanə.

¹⁵ N ləmmə tənə tə Zə̀ kə ighələ tə ghə ləmmə tənə soʼonə nə̀ ghə̂ ghən ghə loʼnə tsətsəghə nsə ghə̂ ghən ghə way tsətsəghə, i zhəm dzəŋŋə bənu nə ivə.

¹⁶ À wən loʼ ghə i tii zə n dəmənə nə̀ fə̀ŋ zuŋ i zow n sə̂ K-a-zə̀ nsə n sə kə aghə̂.

¹⁷ Nya, nghee n muu tsəghə tsu a bii n ndəmə tənum, mə n ndow bənə n Yerosalem, nə n bə fu igaamə tə naʼ zuŋ zə nsə ni fu umaʼlə tə Zə̀ kə.

¹⁸ Ghə̂ a Təjuu ghən â bə koʼ bə mə nə̀ ghəŋŋə ghəə ghən n bii kə ndaw Kəzə̀, nə̀ mə n mayyə ni sow maʼa wû wuŋ tə laŋ kə diinə nə̀ mə i zow. Nɔɔ kə aghə̂ kə â way dzə ghi mə, mə n ka soʼ soʼo kəngəd.

¹⁹ Ghə̂ a Təjuu a loʼ ghə, ghə â nuu bənə n mboʼo Eshya â tsəm loʼnu fu. Wû i ghə, ghə mə khə ni loʼ fa n sə̂ kə, ghə kwu bə mə abə a kpaʼi loʼ nə̀ mə â ghəŋə bəəbənu ghə i loʼ zə.

²⁰ Nə a way sey, ghə̂ ghən ghə loʼnə fa n tiilə dza bə ghə i bəbə zey ghə â kwunə mə tii nghee ghə â saʼanə mə n ndaw tsə.

²¹ A may kə ighəə imɔʼ mə â taw shi kɔʼnə n ndzə̂ tii nə n loʼ ghi ghə n ndaw tsə̂. Mə â dza nə̀, ‘Ghə mə na fa saʼa boʼnə n naʼlə nə̀ ghə̂ a zhəm dzəŋŋənu nə ivə.’”

²² Feliks n kee loʼ nə tə tɔʼ khə soʼonu ghəə a Jìi zey i loʼnə i Mûkəbii zə, tə n tən naŋa ndow saʼ a tii isə, dza tə ghə nə̀, “Abə Lishyas, tow kə sàʼ kə təsawgoʼ wey i tsu bənə, mə i ndow n sə kə ni saʼ saʼ a ghaa.”

²³ Tə n daŋŋə dza ndow tə̀ sawgoʼ zey zə â keyyənə Pɔl nə̀ tə ney dzəŋŋə ndow wi n ndaw tsaʼ, tə nyaʼi zəghə tsu soʼo wi tə i ney kɔʼɔ kɔŋŋə kə. Tə n dza tsu soʼo nə tə ka dzum dzəŋŋə dzə fə̂ a wi ghə abə ghə bə ni bə fuu wi n gaamə zə.

Feliks ghi Drusila zəllə ghɔɔmə i Pɔl

²⁴ Ambə tsuʼu n loʼ n tsəghə tsu, Feliks n ndow shi tsu bə ghi wey wi tɔŋɔ Drusila. Drusila â loʼ zən ə Juu. Tə n dza tsu nə ghə ney bə Pɔl. Ambə ghə ney bənə wi, ghə n tɔʼ zəllə nghee tə tiilə dzanə jìi zey ghə̂ a loʼ ni keeli bəghəm i fə̀ŋ tii n kow Yeso Klisto.

²⁵ Ambə Pɔl tɔʼ tiilə dza ndow tə ghə nghee ghə̂ a khə ni loʼ tsətsəghə tii, zuŋu uwû, nsə nghee Zə̀ kə nə saʼanə ghə̂ ghə tii. Tsəŋ zə n kwu Feliks, tə n dza nə̀, “Khəə ndow nya, abə mə i ndzɔʼ keeli tsu nəŋə zə, Mə i kəm tɔŋɔ bə wɔ.”

²⁶ Tə â moʼlə tənə n fə̀ŋ nə̀ Pɔl i ghaʼa dzəə fuu bə wi n khəə wə ni zuulə saʼ. Sey, tə n tsuŋŋə kə nya nuu tɔŋɔ tsu Pɔl, ghi wi n ghɔɔmə tsu aghəə.

²⁷ Ambə num tə tsəghə tsu təbəghə, Pɔshius Festus n kɔʼ kɔʼ ndaŋ ə Feliks tə a loʼ gɔvənɔ. Feliks n naŋa taʼa tsu Pɔl n ndaw tsaʼ n təŋkey, tə â ləghə ni keeli tûm usə u dzuŋu wə ghi ghə̂ a Təjuu ghə.