Kəfwaʼ 23 - Kaa n Kəzə̀ n fəghə mə

¹ Pɔl n sɔʼ laalə ndow ghə̂ a ndaw tsə sa, dza tə ghə nə̀, “Waazə ghə, fə̀ŋ zuŋ ngii zownu n jìi zey n muu kɔʼ bə tii n sə̂ K-a-zə̀ ni bə shi na.”

² Ananyas, tə a loʼnə fɔɔngili u nii nii wə, n tsəʼlə tsu kəlaŋ tə ghə̂ ghey ghə â kuʼ teynə ghi wi nə̀ ghə saa dzuu i wi nə kəsali.

³ Pɔl sey nuu dza ndownu tə wi nə̀, “Zə̀ kə nə saa soʼonu wɔ nə kəsali, kəbaŋadzəm tə̀ a loʼ wɔ! Wə doʼ ni saʼ mə nghee tə laŋ kə dii mɔ wə loʼ ni zaʼ kəlaŋ ni dza nə̀ ghə saa mə nə kəsali ə?”

⁴ Ghə̂ ghey ghə â kuʼlə teynə fu n bəb tə wi nə̀, “Wə kpaalə ndow fɔɔngili u nii nii u Kəzə̀ ə?”

⁵ Pɔl n dza nə̀, “Waazə ghə, n mə khə way nə̀ a wən loʼ fɔɔngili u nii nii wə, n təŋkey ghə tɔ̀ɔ naŋa n màʼlə K-a-zə̀ nə̀, ‘Wù khə way ni ghɔɔmə bəəbə ighəə tə wù wey tə laalə ghə̂ ghə.’”

⁶ Nghee Pɔl koʼ tɔb kɔʼ nə̀ dəŋə kə loʼ kə mə loʼ ghə̂ a Sadusi, kə loʼ kə n loʼ ghə̂ a tə Falasi, tə n buʼ shi kɔʼ kəbɔŋ n ndaw tsə nə̀, “Waazə ghə, n loʼ wù Falasi, ghə bày bày ghuŋ a loʼ ghə̂ a tə Falasi. Ghə mə fa saʼa nghee n bəghəmnə nə̀ Zə̀ kə i ghəŋŋənu nə̀ ghə̂ a kpuu a zhəm dzəŋŋə bə nə ivə.”

⁷ Ambə tə dza tsu ghəə ghən, ghə̂ a tə Falasi ghə n kaʼ ni tsowwə ghɔɔmə ghi ghə̂ a Sadusi ghə. Ndaw tii n nuu dzawwə doʼo tsu.

⁸ Ghə̂ a Sadusi a dza nə̀ ghə̂ a kpuu zhəm dzəŋŋə way nə ivə, dza soʼo nə̀ tsətəndəghə tə Kəzə̀ tə way, zày u bəbə wə u way soʼo. Ghə̂ a falasi ghə a kee bəghəm nə̀ ghəə ghən atəghə loʼnu.

⁹ Ndəm kə loʼ kə n daŋŋə nuu shi kɔʼ fu, ghə̂ a dii a kəlaŋ a tə Falasi a loʼ ghə n nuu təmi kɔʼ, dza n dzə̂ i taw zə nə̀, “Ghey ka koʼ dzə ghə i loʼ zə wù wən ghəŋə bəəbənə. À loʼ ni doʼo isəŋə nə zày kə bəbə kə loʼ kə nkee tsəndəghə ə Kəzə̀ u loʼ u mâ ndzəm ghɔɔmə tə wi.”

¹⁰ Ambə ndəm kə tii kə taw kɔʼ dzəŋi tsunə, tow kə təsawgoʼ wey n tsəŋə nə̀ ghə loʼ ni ney saalə tsu Pɔl nə usat. Tə n tsəʼlə tsu kəlaŋ tə̀ sawgoʼ tə nə̀ ghə tsu ney nuu kɔʼ wi nə kədaʼa n fəŋŋə kə ghə, ghə kɔʼ bə nə kəbali.

¹¹ N tsuʼ fə tii fə, n tsuʼu tə, Mûkəbii n bə təmi bə n səə Pɔl, dza tə wi nə̀, “Kuu tsu fə̀ŋ zə! Nghee tə wə təmi tiilə bòʼ mə fa Yerosalem, wə khə ni teeli ndow ghəŋə soʼo ghə i mɔʼɔ zə n Rom.”

Ghə kad tsəm ni wey Pɔl

¹² Abə tsuʼ u zow tsunə, ghə̂ a Təjuu a loʼ tə n kad tsu tsəm, zə̂ kɔʼ nkaa nə ghə i zə̂ way fə kə, ghə i mə̂ soʼo way fə kə, nə ghə ka wey tsu dzə Pɔl.

¹³ Ghə̂ ghey ghə â kad tsəm zən â tsəghəshinu ghə̂ ghə nghəm nkaykə.

¹⁴ Ghə n ndow koʼ ndow ghə fɔɔngili a nii ghə nsə ngəd tə inaʼ tə, dza tə ghə nə̀, “Ghey n zə̂ kaa mə nə ghey i gaʼ way fə kə nə idzuu nə ghey ka wey tsu dzə Pɔl.

¹⁵ Ghaa ghi ghə̂ a ndaw tsə ghə, ghaa khə ni ghəŋə tsu nə tow kə təsawgoʼ kə ney tsu bə Pɔl fa n səə ghaa, ghaa nəŋŋə dza ndow nə̀ ghaa dza i faalə tɔʼ laalə tsu saʼ a wi. Ghey n bayyə naŋa tən soʼo wû zə ni wey wi tə wi ni buʼ bə taa fa.”

¹⁶ Waa dzaamə ə Pɔl n tsɔŋ zow tsu tsəm ə ghə i tii zə, sey, tə n ndow nyi dza ndow tə Pɔl nə kəbali.

¹⁷ Pɔl n daŋŋə tɔŋɔ tsu wù nii təsawgoʼ umɔʼ, dza tə wi nə̀, “Ney kɔʼ ndow winətəghə wən n səə tow kə təsawgoʼ, tə khə ghə i loʼ zə ni dza tə wi.”

¹⁸ Wù nii təsawgoʼ wey n ney kɔʼ soʼo winətəghə wey, ghə n ndow koʼ ndow soʼo tow kə təsawgoʼ wey, dza ndow tə wi nə̀, “Pɔl wən n ndaw tsaʼ mə tɔŋɔ tsu mə, dza nə̀ n ney bə winətəghə wən n səə wə, nə tə khə ghə i loʼ zə ni dza tə wɔ.”

¹⁹ Tow kə sàʼ kə təsawgoʼ kən n kwu kɔʼ ghə̂ fey nə kəkpii, ghə n nyaʼi səŋ təmi tsu, tə n tsɔŋ bəb ndow tə wi nə̀, “À loʼ ghə i ghaa zə wə dza i dza tə mə ə?”

²⁰ Winətəghə wey n dza tə wi nə̀, “Ghə̂ a Təjuu ghə n bayyə naŋa nə̀ ghə dza bə tə wɔ nə̀ wə ney tsu bə Pɔl n ndaw tsə̂ tsətsə, nəŋŋə dza nə̀ ghə dza i tɔʼlə shi kɔʼ ghəə a loʼ ghə kuum wi.

²¹ Kə wə nə zow ghəə a ghə a tii ghə n təŋkey ghə̂ a loʼ a loʼ n jii nə ghə n tsəghəshi ghəm mə nkaykə, ghə bii doʼonə wi. Ghə n zə̂ kaa mə nə ghə i zə̂ way fə kə, kasə fə kə mə̂ə kə, ghə i mə̂ way nə ghə ka wey tsu dzə Pɔl. Ghə n bayyə naŋa wû zə, ghə nya bɔɔmə ləmmə kə dzə̂ zə.”

²² Tow kə sàʼ kə təsawgoʼ wey n dza nə̀ tə ndow kənu, dza ndow tə wi nə̀, “Bɔɔmə naŋa kə ghəə ghən n fə̀ŋ zə, kə̂ wə nə̂ kəm dzanə tə̀ wù loʼ nə̀ wə n dza ghəə ghən tə mə.”

Ghə ney tûm ndow Pɔl tə Feliks tə loʼnə Gɔvənɔ

²³ Tow kə təsawgoʼ kən n tɔŋɔ tsu sawgoʼ tə nii tə təbəghə, dza tə ghə nə̀, “Bayyə tsu sawgoʼ tə nbɔm n bəghə, ghə̂ a nyəŋə ghə ukhinyam ghə nghəm nsəghəmbəghə nsə ghə̂ ghə nbɔm n bəghə, ghə saynə ghɔŋ ghə, ghə khə ni ndow n Kayserya na n tsuʼu tə nə tənəŋə tətaandzuu.

²⁴ Bayyə tsu soʼo n na khinyam u loʼ wə tə Pɔl ni nyəŋ ndow tii, ghaa ney ndow wi nə Feliks tə loʼnə gɔvənɔ nə̀ kaakaa fə ka wi mɔm.”

²⁵ Tə n daŋŋə tɔ̀ɔ ndow kəmàʼlə tə gɔvənɔ. Màʼlə kə tii kə â dzanə nə̀,

²⁶ “A loʼ mə Klodius Lishyas n tɔ̀ɔ bə màʼlə kən. Mûkəbii, n tɔŋɔ zow bə wɔ ə gɔvənɔ Feliks.

²⁷ Ngəd tə Təjuu tə â kwu kɔʼ wù wən, ghə n bayyə naŋa may tsu aghəə ni wey wi. Nghee n keeli shi kɔʼ nə̀ a loʼ wù Rom, mə n ney kɔʼ təsawgoʼ, ndow bəghəshi tsu wi n wɔ ghə.

²⁸ Mə n ləghə ni keeli chɔd wey tə â khənə tə ghə ni kwu wi, sey, mə n ney bə wi n ndaw tsə ə ghə.

²⁹ Mə n bə kəŋ keeli shi kɔʼ nə̀ ghə wi kwu kuum ghəə a laŋ kə ghə nə̀ a kee way dzə ighəə tə ghə loʼ ni wey wi tii nkee tə ghə loʼ ni kuu wi tii n ndaw tsaʼ.

³⁰ Nghee ghə bə tsɔŋ dza bənə tə mə nə̀ ghə n kad tsəm ni wey wi, mə n daŋŋə ney tûm bənə wi n səə wɔ. Mə n dza soʼo tə ghə̂ ghey ghə kwunə wi nə̀ ghə bə taŋŋə dza bə zuŋ key ghə kwunə wi tii tə̀ wɔ.”

³¹ Sawgoʼ tey n bɔɔmə dzûmə ndow laŋ wey ghə fuunə tə ghə. Ghə n ney kɔʼ Pɔl n tsuʼu tə, lɔʼlə ndow kùm ndow ghi wi n naʼ i Antipatris.

³² Tsətsə wey, sawgoʼ tey n tûm zəghə ndow wi ghi ghə̂ ghey ghə loʼnə nə̀ ukhinyam, kee dzəŋŋə ndow ibam nə kəbali.

³³ Ambə ghə̂ ghə ukhinyam ghən bə nyi bənə n Kayserya, ghə n fuu ndow màʼlə key tə̀ gɔvənɔ, fuu tsəghə ndow soʼo Pɔl tə wi.

³⁴ Ambə gɔvənɔ tɔŋɔ kɔʼ màʼlə kə tii kə, tə n bəb tə Pɔl nə tə shi n mboʼ i ghaa zə. Pɔl n beeli ndow nə̀ i shi n mboʼo Silishya.

³⁵ Tə n dza tə Pɔl nə̀, “Mə i zəllə kə saʼ zə abə ghə̂ ghey ghə kwunə wɔ i bənə.” Tə n daŋŋə tsəʼlə tsu kəlaŋ nə̀ sawgoʼ tə i keyyə tsu wi n tɔʼ zey Helɔd â bəghənə.