Biblia Todo Logo
Bìoball air-loidhne

- Sanasan -

Kəfwaʼ 17 - Kaa n Kəzə̀ n fəghə mə


Pɔl ghi Silas naʼa tûm i dzuŋu zə n naʼ i Tesalonika

1 Ambə Pɔl ghi Silas zəghə tsunə n Filipi, ghə n tsəghə ndow jii n naʼ i Amfipolis nsə naʼ i Apolonia, ndow bə n naʼ i Tesalonika n luʼu key ndaw kədzəŋi ə ghə̂ a Təjuu â loʼnə tii.

2 Pɔl n ndow n ndaw kədzəŋi ə ghə̂ a Təjuu tə̀ tə â ghəŋŋə tsənə. Tə n ney tsuʼu mə inaʼ ntəghə nə tə ndow ghɔɔmə dzəŋi kə aghəə fu ghi ghə̂ ghə nə̀ tə sày tɔŋɔ shiə kɔʼɔ n màʼlə K-a-zə̀.

3 Tə n tiilə dza ghəə ghey a loʼnə n màʼlə K-a-zə̀ tə ghə, dii kɔʼ bə soʼo tə ghə nə̀ wù wey Zə̀ kə â dza naŋa nə̀ i tûm bənu â khənu ni fəghə, tə kpu, tə kəm zhəm dzəŋŋə bə nə̀ ivə. Tə n dza ndow tə̀ ghə nə̀, “Yeso wən n naʼlə bənə tə̀ ghaa, à loʼ wi tə loʼnə wù wey Zə̀ kə â dza naŋa nə̀ i tûm bənu.”

4 Ghə̂ a Təjuu a loʼ ghə n bəghəm ghɔɔmə i Pɔl, ghə təmdzəŋi ndow Pɔl ghi Silas ighələ tə ndəmə ghə̂ ghey ghə way ghə̂ a Təjuu ghə nə ghə n bəghəm tə Zə̀ kə. Gheyzən a nii a loʼ ghə n təmdzəŋi ndow soʼo ghə.

5 Ghə̂ a Təjuu a loʼ ghey n kee ghoʼo ghə i tii zə. Ghə n tɔŋɔ zuŋŋə bə ngaamə tə aghə̂ tə loʼ tə n jii, teyyə naŋa kɔʼ inaʼ nə ifuu. Ghə n kwɔɔ ndow n ndaw Jason, ghə kəŋə ndownə Pɔl ghi Silas ni ney fu shi bə ghə tə nɔɔ kə aghə̂ key.

6 Ambə ghə kəŋ kìi tsunə ghə, ghə kwu sìi shi bə Jason ghi dzûmə tə Klisto tə loʼ tey, ney ndow ghə n səə ghə̂ ghey ghə saʼanə naʼ zə, buʼlə shiə kɔʼɔ nbɔŋ dza nə̀, “À wən loʼ ghə̂ ghən ghə ghəŋŋənə nə̀ luʼu tədzəm tə i teynə ifuu. Ghə n bə soʼo fa.

7 Jason u ney naŋa tsu ghə n ndaw wi. Ghə tsayyə laŋ kə Kaysa dza nə̀, də̀ŋ kə nuu kə loʼnu ghə tɔŋɔ nə̀ a loʼ Yeso.”

8 Ambə nɔɔ aghə̂ key nsə ghə̂ ghey ghə saʼanə naʼ zə, zow tsunə sey, ghə i tii zə n ngii fəmmə.

9 Sey ghə n dza Jason ghi ghə̂ a loʼ ghey kùm shi wû i ghə. Ghə n daŋŋə zəghə maʼa ghə nə ghə nuu.


Pɔl ghi Silas naʼa tûm i dzuŋu zə n naʼ i Beria

10 Nghee tsuʼ u daŋŋə dzə̂ bənə, dzûmə tə Klisto tey tûm nuu ndow Pɔl nsə Silas n naʼ i Beria. Ambə ghə kûm tsu fu, ghə n ndow n ndaw kədzəŋi ghə̂ a Təjuu.

11 Ghə̂ a Təjuu ghey n naʼ i Beria â khə mwam u dzuŋu wə tsəghəshi a ghey n naʼ i Tesalonika, bòʼ nə̀, ghə â bəghəm naŋa tûm i dzuŋu zey Pɔl â naʼlənə n wû i nyûmə zə. Ghə n tɔʼɔ fwɔdlɔ nyiə tsu màʼlə K-a-zə̀ n tsuʼu ndzəm ni koʼ tsu nə̀ ghəə ghey Pɔl dzanə loʼ isəŋə.

12 Ndəmə ghə̂ a Təjuu ghə n bəghəm, ighələ tə gheyzən a nii ghən nsə gheynum ghən ghə â way ghə̂ a Təjuu ghə â bəghəm soʼonə.

13 Ambə ghə̀ a Təjuu ghey n Tesalonika zow tsu nə̀ Pɔl naʼlə ghɔɔmə i Kəzə̀ n Beria, ghə a loʼ ghə n ndow soʼo fu, təəbə tsu aghə̂, teyyə naŋa kɔʼ naʼ i tii zə nə ifuu.

14 Sey, dzûmə tə Klisto tey n daŋŋə ney tûm nuu ndow Pɔl n nguŋ ə dzùu, Silas ghi Timoti n kee doʼo səə i tsu n naʼ i Beria.

15 Ghə̂ ghey ghə â dza i ndow tənə naŋa Pɔl n ndow tənə naŋa nay ndow wi n naʼ i Atens. Pɔl n dza ndow tə ghə nə̀ ghə dzəŋŋə ndow dza ndow tə Silas ghi Timoti nə̀ ghə mbad kwɔɔlə bə wi n naʼ i Atens.


Pɔl naʼlə tûm i dzuŋu zə n Atens

16 Ambə Pɔl sə loʼ n Atens tə ləmmənə Silas ghi Timoti, zə n ngii fəmmə wi n fə̀ŋ nghee tə koʼ tsunə nə̀ muʼu n ngii loʼ n naʼ i tii zə.

17 Tə sey kaʼnu ni ghɔɔmə dzəŋi ghi ghə̂ a Təjuu ghə nsə ghə̂ ghey ghə bəghəmnə tə̀ Zə̀ kə nə̀ a way ghə̂ a Təjuu n ndaw kədzəŋi ə ghə̂ a Təjuu. Tsuʼu n dzəm, tə n ghɔɔmə dzəŋi soʼo ghi ghə̂ ghey tə kpillənə ghi ghə n zeeli wə inaʼ.

18 Ghə̂ a dii a kəmàʼlə a loʼ ghə, ghə loʼnə n zəghə wə Epikurya nsə a Stɔyk n ndow bə fu, ghɔɔmə ballə ghi wi. A loʼ ghə bəbə nə̀, “Wù wən baa ləghə ni dza nə̀ ngee tə sə ndzaŋŋə luʼu tə fa nə ighɔɔmə ə?” A loʼ ghə n dza nə̀, “À loʼ kə tə̀ tə khəə ghəə a zə̀ u tətùm.” Ghə â ghɔɔmə sey n təŋkey, Pɔl â naʼlə tûm i dzuŋu zə kuum Yeso tə ghə nsə ghəə a zhəm dzəŋŋə ghə nə ivə.

19 Ghə n ney bə Pɔl n ndaw tsə, ghə â tɔŋŋə nə̀ a loʼ Areopagus, luʼu key tsə â bə kwɔɔ tsə tii, dza tə wi nə̀, “Ghey ləghə ni keeli fə key dii i fəghə zən wə diinə loʼnə ghii kə.

20 Ghəə ghey wə ghɔɔmə, a loʼ ghə a loʼ tii nə̀ a loʼ ghəə a fəghə ghə tə ghey, ghey ləghənu ni keeli fə key a fəghə ghey a diinə.”

21 Ghə̂ ghə Atens adzəm nsə ghə̂ a tətùm ghey ghə â muunə fu â ney naŋa tsu nəŋə i ghə idzəm ni khəə nsə ni zəllə soʼo ghəə a fəghə ghey a shiənə.

22 Pɔl sey nuu təmi kɔʼnu n sə kə tsə ə Areopagus, dza tə ghə nə̀, “Mə n ndzəm koʼ nə̀ ghaa ghə̂ ghə Atens ghə, ghaa ləghənu ghəə a Kəzə̀ ghə nə təjìi tədzəm.

23 N sey dza n təŋkey, nghee n bwey laalə kaabə bənə luʼu tey ghə fəələnə maʼlə wə tii, mə n ndow koʼ tsu bənə kə loʼ kə nə ghaa n tɔ̀ɔ naŋa tii nə̀, ‘Tə Zə̀ key ghey khə way.’ Zə̀ key ghaa maŋa bam fey nə ghaa tɔʼ khə way, a baa loʼ kə ghi n naʼlə bə tə ghaa fa nya.

24 Zə̀ key kə â bɔm mbi nsə fə wən udzəm tii, a loʼ wi Mûkəbii ə bikighow nsə ghəlikətsə kə. Tə muu dzə way n ndaw nə a faalə wù sɔŋtsuʼ.

25 Tə buʼu ləghə soʼo way fə kə loʼ kə wù sɔŋtsuʼ loʼ ni fwaʼ ntəŋkey a loʼ wi tə fuunə muu zə tə ghə̂ ghə adzəm, fuu soʼo kəzay nsə fə u loʼ wən udzəm tə ghə.

26 Tə â ney kɔʼ wù umɔʼ, bɔm tsu ghə̂ a naʼa tən tədzəm nə ghə muu n badla tə mbi tədzəm. À loʼ wi tə â bayyə naŋa zey nəŋə tə tey ghə̂ a khə ni muu tii, a loʼ soʼo wi tə a naŋa kaabə ndownə kpey tey ghə nə muulə kaabənə tii.

27 Zə̀ kə â ghəŋə tsu ghəə ghən sey nə̀ ghə loʼ ni kəŋə bə wi, ghə n koʼ wi, ghə nə nuu mbuŋŋə kɔʼɔ ni koʼ wi, ghə n koʼ tsu wi nghee tə Zə̀ kə loʼ nə̀ tə kuʼlə loʼ kə n səə saa.

28 I loʼ tə wù loʼ â dza tsunə nə̀, ‘Nghee tə saa loʼnə nə kəfə kəmɔʼ ghi wi, a wey loʼ i ghii saa muunə, bwey kaabə, loʼ soʼo fə key saa loʼnə ghii kə.’ Ghə̂ a ghaa a tɔ̀ɔ ghə umàʼlə a loʼ ghə â mgbaŋ tɔ̀ɔ naŋa soʼo nə̀, ‘Saa mbɔŋ loʼ soʼo waa a wi.’

29 Nghee tə saa loʼnə waa a Kəzə̀, saa khə dzə way ni moʼlə nə̀ Zə̀ kə loʼ fəmuʼu wù sɔŋtsuʼ moʼlə tsunə, fwaʼ shi kɔʼnə wɔɔ a wi nə itsaa, tsâa zə ishɔ̀lɔ̀ nkee itay.

30 Zə̀ kə ka sə̂ i naŋa n ghəə a bəbə ghey ghə̂ ghə â ghəŋŋə tsənə wɔkey ghə â khə tsə way wi, a sə bə nya, tə tsəʼlə kəlaŋ nə aghə̂ adzəm nə təluʼu tədzəm nə̀ ghə kwey nuu bə fə̀ŋ tə ghə n ghəə a bəbə ghə.

31 Tə â fu laŋ kən təŋkey tə n naŋa tsuʼ fey wù wən tə sày naŋanə i saʼanə mbi idzəm n jìi zey i loʼnə tsətsəghə. Tə n dii tsəə tə ghə̂ ghə adzəm nə̀ ghəə ghən loʼ isəŋə nghee tə â zhəm dzəŋŋə bənə wi nə ivə.”

32 Ambə ghə zow tsu Pɔl mɔm tsu buʼ kə zhəm dzəŋŋə kə nə ivə, ghə̂ a loʼ ghə n kaʼ ndow wi nə u sɔʼlə wə, a loʼ ghə n kee dza nə̀, “Ghey ləghə nə̀ wə i bə dzəŋŋə, wə faalə dza kpiʼi bə i zən tə ghey.”

33 Nghee ghə dza tsu sey, Pɔl n zəghə tsu dzəŋi key.

34 Ghə̂ a loʼ ghə n ngəŋŋə təmdzəŋi ndow kə Pɔl, bəghəm fu ndow. N ghə̂ ghey ghə â bəghəm fu, â loʼ wù loʼ ghə tɔŋŋə nə̀ a loʼ Dionisus wù Areopagus. Weyzən u loʼ wə ghə â tɔŋŋə nə̀ a loʼ Damaris n loʼ soʼo fu nsə ndəmə ghə̂ a loʼ ghə.

© 2022 CABTAL

Lean sinn:



Sanasan