Kəfwaʼ 15 - Kaa n Kəzə̀ n fəghə mə

Pɔl nsə Banabas ghi ngəd tə Yeso tə n Yerosalem

¹ Ghə̂ a loʼ ghə n nuu bə n mboʼo Judeya ndow bə n naʼ i Antyɔk, zey ndow ni dii aghəə tə dzûmə tə Klisto tə, dza tə ghə nə̀, “Abə ghə ka səghə tyi u ghaa tə laŋ kə Mushi kə diinə, ghaa i keeli way bəghəshi zə.”

² Ghəə zən n ghəŋŋə nə̀ Pɔl nsə Banabas keeli izuu ghi ghə. Sey, dzûmə tə Klisto tey fu n baa say kɔʼ Pɔl, Banabas nsə dzûmə tə loʼ tə nə̀ ghə ndow bəb zow bə ghə i tii zə tə ngəd tə Yeso nsə ghə̂ a nii ghə n dzəŋi kə dzûmə tə Klisto key n Yerosalem.

³ Ghə̂ ghən dzəŋi kə dzûmə tə Klisto â tûmnə, n tsəghə ndow jii n mboʼo Fonishia nsə Samaria. Ghə n bəŋ koʼ daŋŋə tsə dzûmə tey fu n naʼa tə tii tə, tiilə dza ndow tə ghə nghee tə ghə̂ ghən ghə way ghə̂ a Təjuu a bəghəmnə tûm i dzuŋu zə a tii. Dzûmə tə Klisto tey fu tədzəm n ngii duʼlə nghee ghə zow tsunə ghəə ghən.

⁴ Ambə ghə bə nyi bənə n Yerosalem, ghə̂ a dzəŋi kə dzûmə tə Klisto nsə ngəd tə Yeso tey fu n kpii ney ghə. Sey, ghə n tiilə dza ndow tə ghəə ghey adzəm Zə̀ kə gaamənə ghə ni fwaʼ.

⁵ Dzûmə tə loʼ tə, tə â loʼ soʼonə ghə̂ a tə Falasi ghə, n nuu təmi kɔʼ dza nə̀, “Ghə khə ni teeli səghə tyi u ghə̂ ghən ghə way ghə̂ a Təjuu, ghə khə ni teeli naŋŋə soʼo laŋ u Mushi wə.”

⁶ Sey, ngəd tə Yeso nsə ghə̂ a nii ghey n dzəŋi kə dzûmə tə Klisto n kwu tsu kədzəŋi ni laalə nyi tsu ghɔɔmə i tii zə.

⁷ Ambə ghə ngii fə tsu dzuu ghə n ghə i tii zə, Pita n nuu təmi kɔʼ, dza tə ghə nə̀, “Waazə ghə, ghaa khənu nə̀ Zə̀ kə mâ buʼ sày mə n fəŋŋə kə ghaa nə̀ n bə naʼa tûm i dzuŋu zə tə ghə̂ ghən ghə way ghə̂ a Təjuu ghə, sey nə̀ ghə loʼ ni mbɔŋ zow, ghə bəghəm soʼo tə Klisto.

⁸ Zə̀ kən kə khənə nghee tə̀ fə̀ŋ ə wù loʼnə tii, n fuu ghə n Zay kə Zow kə, ighələ tə̀ tə â fuunə tə saa ni diinə tə n bəghəm naŋa soʼo ghə tə a loʼ ghə̂ a wi.

⁹ Tə n ney ghə ighələ tə̀ tə â neynə saa nghee tə sow maʼa tsu fə̀ŋ tə ghə tə n ghəə a bəbə ghey ghə â ghəŋŋənə bòʼ bəghəm i fə̀ŋ zey ghə khənə n kow Yeso.

¹⁰ À kee loʼ kee ghaa ləghə ni mɔm koʼ Kəzə̀ ə? Ghaa gaʼa ndow laŋ u dədlə wə n tow kə dzûmə tə Klisto nə ghə boʼo, loʼ sey nə̀ ghə bày bày a saa ghə a way ni boʼo, wû i saa, saa mâ dəm kii ni boʼo.

¹¹ Saa mgbaŋ khənu nə̀ à loʼ ndzuŋ ə Mûkəbii Yeso i ghəŋŋə nə̀ saa keeli ibəghəshi ighələ tə ghə̂ ghən ghə way ghə̂ a Təjuu a keelinə bəghəshi zə.”

¹² Ambə Pɔl nsə Banabas kaʼ tsu ni ghɔɔmə, ghə̂ ghey ghə â adzəm n nuu fuŋ doʼo tsu mɔŋ. Ghə tiilə kɔʼ ndow nghee tə Zə̀ kə ghəŋə nə̀ ghə ghəŋə ndəmə ghəə a faalə ghə nsə ghəə a zum ghə idzuu ghə n fəŋŋə kə ghə̂ ghən ghə way ghə̂ a Təjuu.

¹³ Ambə ghə ghɔɔmə may tsunə, Jems n nuu təmi kɔʼ dza nə̀, “Waazə ghə, ghaa zow!

¹⁴ Shimun n tiilə dza tə saa nghee Zə̀ kə â buʼ diinə ləghə i wi zə tə ghə̂ ghən ghə way ghə̂ a Təjuu ghə, sày shi bə aghə̂ n fəŋŋə kə ghə nə̀ ghə doʼo ghə̂ a wi.

¹⁵ Ghəə ghən a bɔɔmə bəghəm dzəŋi ndow ghi ghɔɔmə zey tûm tə Kəzə̀ tə â dzanə. I tɔ̀ɔ doʼo n màʼlə K-a-zə̀ nə̀,

¹⁶ ‘Abə ghəə ghən tsəghə tsu, mə i bə dzəŋŋə ibam, N bə bəghə dzəŋŋə kɔʼ muu kə fɔ̀ɔ Devid. Fɔɔ wən u loʼ nə wə n saʼa doʼo, N teyyə naŋa dzəŋŋə bə tsətsəghə.

¹⁷ Seynə ghə̂ a naʼa tə nuu tə loʼ ni kəŋ bə mə, tɔŋŋə ghə̂ ghən adzəm ghə way ghə̂ a Təjuu ghə, n sày shi bənə nə ghə doʼo ghə̂ ghuŋ.

¹⁸ À wən loʼ ghəə ghən Mûkəbii a ghəŋŋə nə̀ ghə̂ a keeli n num tə ibam tə.’”

¹⁹ Jems n ndow n sə̂ kə dza nə̀, “moʼlə zuŋ i loʼ nə kə saa nə fəmmə ghə̂ ghən ghə way ghə̂ a Təjuu, ghə loʼ nə̀ tə n bəghəm tə Zə̀ kə.

²⁰ Saa fəd tɔ̀ɔ dza ndow tə ghə nə̀ kə ghə nə zə̂ənə fə kə nə̀ ghə n fuu tə a loʼ umaʼlə tə muʼu mə, kə ghə nə ghəŋŋənə ghəə a laŋŋə ghə, kə ghə nə fəənə nyam nə ghə ka səghə, kə ghə nə zəə soʼonə kaŋ tə.

²¹ Ghə naʼlə tsə laŋ Mushi wən nə tənaʼa num tənum, tɔŋɔ soʼo n ndaw tə udzəŋi tə ghə̂ a Təjuu tədzəm n tsuʼu mə inaʼ.”

Ghə tûm kəmàʼlə tə̀ dzûmə Klisto tey tə way ghə̂ a Təjuu

²² Ngəd tə Yeso, ngəd tə dzəŋi kə dzûmə tə Klisto nsə dzûmə tə Klisto tə loʼ tey tədzəm n dzəŋi kə dzûmə tə Klisto, n saalə kɔʼ nə̀ ghə sày kɔʼ ghə̂ a loʼ ghə n fəŋŋə kə ghə, ghə tûm ndow n Antyɔk ghi Pɔl nsə Banabas. Ghə n sày shi bə aghə̂ abəghə ghə â loʼ soʼo nə a loʼ ghə̂ ghey ghə laalənə ghə fu n dzəŋi kə dzûmə tə Klisto. Ghə̂ a tii ghə â loʼ Judas ghə â tɔŋɔ soʼo nə a loʼ Basabas nsə Silas.

²³ Ghə n tɔ̀ɔ tsu màlə kən, fuu tsu n wɔ ghə nə ghə ndow n ghii kə. Màʼlə kə tii kə â dza nə̀, “À màʼlə kən tɔ̀ɔ bə ghey waazə a ghaa, ghey loʼnə ngəd tə Yeso tə nsə ghə̂ a nii ghə n dzəŋi kə dzûmə tə Klisto n Yerosalem. Ghey tɔ̀ɔ bə tə dzûmə tə Klisto tən tə loʼ nə̀ a way ghə̂ a Təjuu n Antyɔk, Sirya nsə n Silishya. Ghey tɔŋŋə zow bə ghaa.

²⁴ Ghey n zow nə̀ ghə̂ a loʼ ghə â shi kɔʼ fa n fəŋŋə kə ghey bə fuu ghaa n chɔd wə, fwɔd soʼo tɔb u ghaa nə̀ ghaa khə ni səghə utyi. Ghey dza i dza bə tə ghaa nə̀, â ka tûm dzə ghey ghə.

²⁵ À wey loʼ ghə i tii zə ghey saalə kɔʼ ni sày kɔʼ ghə̂ a loʼ ghey, tûm bə tə ghaa. Ghə dzəŋi bəghə ghi Banabas nsə Pɔl, ghə loʼnə fə a saa a dzuŋu ghə.

²⁶ À wən loʼ aghə̂ nə̀ ghə n bəghəm ni kpu n zəd i Mûkəbii Yeso Klisto.

²⁷ Ghey tûm bə Judas nsə Silas ghi màʼlə kən. À loʼ ghə, ghə i tɔʼɔ tiilə dza bənə n wû i ghə zə, ghəə zən ghey tɔɔnə n màʼlə kən.

²⁸ Zay kə Zow kə n ghəŋə nə̀ ghey koʼ nə̀ ghey khə way ni ngii fəmmə ghaa n ndəmə ndəmə tə ulaŋ, ghey u ndzəm koʼ soʼonə sey. Laŋ wey u kpiinə tə ghaa ni naŋa a loʼ kə nə̀,

²⁹ ghaa khə way ni zə̂ ufəzəə nə̀ ghə n fuu tə aloʼ umaʼlə tə muʼu mə, ghaa khə way ni zə̂ təkaŋ, ghaa khə way ni fə nyam nə ghə ka səghə, ghaa khə soʼo way ni ghəŋŋə ghəə a laŋŋə ghə. Abə ghaa loʼ ninaŋa laŋ u wən kələ, ghaa i khə way chɔd u loʼ wə. Ghaa doʼo kədzuŋ.”

³⁰ Ghə̂ ghən ghə â sàynə n ney kɔʼ màʼlə kən, nuu tsu ndow n Antyɔk. Ambə ghə ndow nyi ndownə fu, ghə n zuŋŋə bə dzûmə tə Klisto tey, fuu ndow màʼlə key tə ghə.

³¹ Nghee ghə tɔŋɔ kɔʼnə màʼlə kə tii kə, ghə n ngii duʼlə n təŋkey kə â ngii kuu fə̀ŋ tə ghə.

³² Judas nsə Silas, ghə â dzəŋi loʼ soʼonə tûm tə Kəzə̀ ghə, n ndəŋ ghɔɔmə kəŋə ndow ghi dzûmə tə Klisto tey, kuu fə̀ŋ tə ghə, təm tawwə soʼo ghə n bəghəm i fə̀ŋ i ghə.

³³ Ambə ghə dzə doʼo kəŋə ndownə fu, dzûmə tə Klisto tey n buulə tsu ghə dza ghə bwey kədzuŋ ni dzəŋŋə ndow ghə ibam n Yerosalem n səə ghə̂ ghey ghə mə tûm bənə ghə.

³⁴ [Ambə ghə nuu ndownə, Silas n kee doʼo səə tsu ibam.]

³⁵ Pɔl nsə Banabas n doʼo kəŋə ndow n Antyɔk. Ghə ghi ndəm ə dzûmə tə loʼ tə n naʼlə ndow tûm i dzuŋu zə, dii ndow soʼo aghəə bòʼ Mûkəbii.

Pɔl sàli ghi Banabas

³⁶ Ambə ghə dzə doʼo kəŋə ndownə, Pɔl n dza tə Banabas nə̀, “I mə dzɔbə nə̀ saa dzəŋŋə ndow ibam n naʼa tən saa â buʼ naʼa dzənə tûm i dzuŋu zə fu bòʼ Mûkəbii, saa bwey koʼ kaabə bə dzûmə tə Klisto tey fu nə̀ tə loʼ ngee.”

³⁷ Banabas n bəghəm kɔʼ, kee ləghə nə̀ ghə ney ndow Jɔn Mak ghi ghə.

³⁸ Pɔl n ka ləghə dzə way saalə kə tii kə, n təŋkey, ghə mâ buʼ shi ghi Jɔn Mak, tə n ndow khə̀mmə dzəŋŋə kɔʼ n jii n Pamfilya nə ghə ka mayyə fwaʼ kə ghə kə.

³⁹ Ghə n nûmə zuu tsu fu n wû i ghə, saʼ sàli nuu i tsu. Banabas n ney kɔʼ Jɔn Mak nyi kɔʼ nə kəfən, nuu daŋ ndow n Sayprus.

⁴⁰ Pɔl n kee sày kɔʼ Silas. Dzûmə tə Klisto tə loʼ tən n buulə tsu ghə, dza nə̀ ndzuŋ ə Mûkəbii i loʼ ghi ghə nghee ghə ndownə.

⁴¹ Tə n tsəghə ndow jii n Sirya nsə n Silishya, təmə tawwə ndow ghə̂ a dzəŋi kə dzûmə tə Klisto ghey fu.