Hibru 9 - Kaa n Kəzə̀ n fəghə mə

Jìi zey ghə̂ a ngɔɔmənə Zə̀ kə idəŋ nsə a ghəlitsə

¹ Kaa n wey mən â khə laŋ wey u diinə nghee ghə̂ ghə Izree a khə ni ngɔɔmə Zə̀ kə a tii, mə n khə soʼo ndzoʼo fəə fey fə kpiinə tə̀ ghə̂ ghə ni ngɔɔmə Zə̀ kə fa tii n ghəlikətsə.

² Ghə a bəghə kɔʼ kəfəə n dzuu ghə abəghə. N dzuu i sə̂ isə zən ghə tɔŋŋə nə̀ a loʼ luʼu kə zow kə, ndaŋ ə kədaa nsə baŋŋə kən ghə â fuu tsə baa kə a tii tə̀ Zə̀ kə n loʼ fu.

³ N bàa kə̀ŋ kə loʼ key kə â loʼnə fu, â loʼ fəə fə loʼ fey n fə̀ŋ ghə â tɔŋŋə nə̀ à loʼ Luʼu key kə Zow tsəghəshinə Luʼu tə tədzəm.

⁴ Tsə zey ghə fəələnə maʼlə wə tii nə̀ ghə faalə nə itsàa n loʼ fu nə̀ ghə i kpəʼlə nəŋ zə a tii. Tətaalə kə ulaŋ kə n loʼ soʼo fu nə̀ ghə niilə tsəghə ndow nə itsàa. Bɔm ə itsàa n loʼ n fə̀ŋ ə tətaalə kə tii kə ghi Mana a tii (Mana loʼ fəzəə wən Zə̀ kə a fuu tsu bənə tə̀ ghə̂ ghə Izree ghə nghee ghə â loʼnə n mbvən ə ntsaŋ). Mbaŋ a Erɔn n loʼ tii nə kətətaalə nə̀ fəbə tə n kaʼ ni bənnə tii. Mgbaʼa wə atay wə n loʼ soʼo tii ubəghə nə̀ Zə̀ kə n tɔ̀ɔ naŋa laŋ u wi wə tii.

⁵ Ghə n bɔm nyaʼa naŋa kɔʼ fə u loʼ wə fu n tow k-a-tətaalə, u khənə ghaw tə ghə tɔŋŋənə nə̀ à loʼ təcherubim tə dii tsunə nə̀ Zə̀ kə loʼnu fu. Ghaw tə cherubim tən â tsəd keeli bə dzəə k-a-tətaalə kən n luʼu key Zə̀ kə neyzəənə ghəə a bəbə ghə tii. Ghey kee way ni tɔʼ tiilə may bə dzə ghəə a tii ghə tə̀ ghaa nya.

⁶ Abə ghə bayyə naŋa tsunə fə wə udzəm n jìi zən, fɔɔngili tə n nyiə zeeli fu n dzuu i sə isə zey nə fəfəə, ghə ndow fwaʼanə fwaʼ kə ghə key ghə khənə ni fwaʼ.

⁷ À kee may kə fɔɔngili u nii nii wə tə â nyiə tsənə n dzuu i kəfəə i fə̀ŋ zey nəŋə imɔʼ nə kənum. Tə n ney kɔʼ təkaŋ ni ndow fəələ tə̀ Zə̀ kə n tow kə wi nsə n ghəə a bəbə ghən ghə̂ a ghəŋŋə nə̀ ghə khə way nə̀ ghə sey ghəŋŋə bəəbənu.

⁸ Jìi zey fə wən a bayyə doʼonə tii udzəm, Zay kə Zow kə dii may bənu nə̀, jìi ni nyi tɔɔlə ndow n luʼu kən kə zow tsəghənə luʼu tə tədzəm fìi doʼonu abə ghə nam ngɔɔmənə Zə̀ kə n dzuu i sə isə zey nə kəfəə.

⁹ Dzuu i sə isə zən loʼ tsəə i dii bənə tsuʼu mən saa loʼnə tii nya. I sey dii nə̀ fə wən nsə nyam tən ghə fəələ ndownə maʼlə wə tii tə̀ Zə̀ kə, way dzə ni ghəŋə nə̀ fə̀ŋ ə wù wey tə fuunə kɔʼlə n tii mə i kpii tə̀ Zə̀ kə.

¹⁰ Ghəə ghən adzəm ghə ghəŋŋənə, ghə ghəŋŋə ndow bòʼ ghəə a zə̂ə ghə, ghəə a məə ghə nsə ghəə a sow a wù ghə tə̀ laŋ kə Mushi kə diinə. À wən maŋ loʼ kə ghəə a gow uwû, zə i keeli kə kəfwaʼ nya nsə ni ndow kuum n nəŋə zey Zə̀ kə i kəm faalə tsu ghəə ghə.

¹¹ Klisto n kee bə tə̀ a loʼ fɔɔngili u nii nii wən tə fuunə fə u dzuŋu wən u loʼ zeynə fa. Fəə key tə fwaʼanə ghəə a wi ghə tii, tsəghəshinu, kpii tsəghəshi soʼo fəə u loʼ wən. À way dzə wù sɔŋtsuʼ tə khəmnə fəə fə tii fə, dii tsuu nə̀ fə way dzə n fə wey Zə̀ kə â bɔmnə fa n mbi.

¹² Tə â ka nyi dzə n luʼu kə zow kən n kaŋ tə ji tə nkee kaŋ tə mbɔŋ tə ni ndow fəələ umaʼlə tii, tə â fəd nyi ndow n kaŋ tə wi tə. Sey, tə n fuu saa n bəghəshi zən i nə may way.

¹³ Ghə fɔɔngili a loʼ ghey â ney kɔʼɔ tsə kaŋ tə ji, kaŋ tə mbɔŋɔlɔʼ nsə dzəm u waa mbɔŋɔlɔʼ wə, ghə n wədlə ndow n wû i ghə̂ ghən ghə loʼ nə̀ ghə n ghəŋə bəəbə, sey nə̀ ghə i zow tə laŋ u Mushi u diinə.

¹⁴ Abə ghə â loʼ ni sow maʼa ghəə a ghə̂ a bəbə ghə n ghəə ghən ghə â ghəŋŋənə, zə i boʼo doʼlə ngee ghi Klisto wən tə â fuunə wû u wi wə tə̀ a loʼ umaʼlə tə̀ Zə̀ kə n tow u saa. Tə â ghəŋə ghəə ghən n bam i Zay kə Zow kən kə loʼnə nəŋə tədzəm. Kaŋ tə wi tə sow maʼa fə̀ŋ tə saa n ghəə a bəbə ghən saa ghəŋŋənə nə̀ a ney bə ivə n kôw saa. Sey, saa khə ni fwaʼa kə tə̀ Zə̀ kən kə fuunə muu zə.

¹⁵ À wən loʼ ghəə zən i ghəŋənə nə̀ Klisto doʼo wù wey tə bayyənə kaa n fəghə mən sey nə̀, ghə̂ ghey Zə̀ kə â tɔŋɔnə ghə, i loʼ ni keeli ibuulə nəŋə tədzəm tə Zə̀ kə â təb naŋanə. Ghəə ghən i neynu bənə kə n təŋkey, Klisto mâ kpu ni kuum nuu shi bə tow u ghə n ghəə ghey ghə â ghəŋŋə tsənə nə̀ a kpiilə way n nəŋə zey kaa n sə isə mey â nam khə tsənə daʼa kə n kow ghə.

¹⁶ Təb kə keeli kə kədaʼa nə̀ ghə n teeli dii bə dzə nə̀ wù wey tə â təb naŋanə ghə i tii zə n kpu.

¹⁷ I loʼ sey n təŋkey, təb kə khə way fwaʼ kə loʼ kə abə wù wey tə təb naŋanə ghə i tii zə nam loʼnə utaw. Kə keeli kə kəfwaʼ abə wù tii kpu dzənə.

¹⁸ À wən loʼ ghə i tii zə kaa n sə isə mən a buʼ way ni ghəŋə ghə i loʼ zə nə̀ ghə ka fəələ kaŋ tə.

¹⁹ Nghee tə Mushi â tiilə may ndownə laŋ u Kəzə̀ wə udzəm tə̀ ghə tɔ̀ɔ naŋanə nə kəlaŋ tə̀ ghə̂ ghə, tə n daŋŋə ney kɔʼ kaŋ tə waa mbɔŋɔlɔʼ nsə kaŋ tə ji tə nə̀ ghə n nyɔmmə kɔʼ ghi muu mə, tsùm nyiə tsu nyaŋi fə kpìi kə kaʼ fə loʼ fə ghə tɔŋŋə nə̀ à loʼ hisɔb nə̀ ghə n baŋ kɔʼ bad kə ndzə̂ kə baŋa kə tii, wədlə tsu n màʼlə key laŋ u tɔ̀ɔ doʼonə tii, wədlə ndow soʼo n kow ghə̂ ghə adzəm.

²⁰ Ambə tə wədlə ndownə, tə n dza tsu nə̀, “À wən loʼ kaŋ tə kaa mən Zə̀ kə dzanə nə̀ ghaa i naŋŋə.”

²¹ N jìi i mɔʼɔ zə, tə n wədlə kaabə bə kaŋ tə tii tə n fəə kə kaa mey nsə n fə wey udzəm ghə â fwaʼanə tii ni ngɔɔmə Zə̀ kə a tii.

²² I ndzəm loʼ n laŋ kə Mushi nə̀ à teeli loʼ kə təkaŋ tə ghəŋŋənə nə̀ ufə udzəm wə i zow nsə nə̀ abə ghə ka fəələ təkaŋ, ghə way ni neyzəə ghəə a ghə a bəbə ghə.

Klisto â kpu ni ney nuu ghəə a saa a bəbə ghə

²³ À wey loʼ ghə i tii zə ghə â khənə ni sow fə wən u fiilənə u wən u loʼnə idəŋ ni ghəŋə nə̀ wə i zow. A kee bə fə wən u loʼnə idəŋ, ghə khə ni sow maʼa nə̀ ghə fəələ maʼlə wən u tsəghəshinə u wən ghə fəələnə n kaŋ tə tənyam.

²⁴ I loʼ sey n təŋkey, Klisto â ka nyi dzə n luʼu kə zow kə nə̀ à faalə wù sɔŋtsuʼ, kə maŋa fiilənə luʼu kə zow key kə loʼnə idəŋ. Tə â ndzəm nyi ndow n dzəŋi kə dzûmə tə Klisto key kə loʼnə n bikighow. Tə nya loʼ n sə K-a-zə̀ ni buʼu wɔɔ kə tə wi n tow u saa.

²⁵ Fɔɔngili u nii nii u ghə̂ a Təjuu wə â nyiə tsə n luʼu kən kə zow tsəghəshinə luʼu tə tədzəm ghi kaŋ tə nyam tə nùm tədzəm. Klisto â ka kee nyi ndow dzə fuu ni ndow fəələ kaŋ tə wi tə̀ a loʼ umaʼlə nə̀ tə i kəm fəələ kuulə.

²⁶ Abə i mə loʼ sey, Klisto a sey khə ni fəghə n ndəmə tənəŋə ni ney nuu bə tə̀ mbi a kaʼnə. À kee loʼ nə̀ num tə nya bəghə ni bə may, tə u dii tən bənə wû u wi wə, ni ney nuu ghəə a bəbə ghə n bam i wû u wi wən tə fuu ndownə tə̀ a loʼ umaʼlə.

²⁷ Wù khə ni teeli kpu kə inəŋə imɔʼ, Zə̀ kə n daŋŋə saʼ wi.

²⁸ Sey, Klisto a fəələ kə wû u wi nəŋə imɔʼ ni ney nuu ghəə a bəbə ghə n tow u ndəmə aghə̂. Tə i kəm bəghə kpiʼinu, a i way dzə ni ney nuu ghəə a bəbə ghə, a i loʼ ni ney bə ibəghəshi tə̀ ghə̂ ghən adzəm ghə ləmmənə wi.