Hibru 11 - Kaa n Kəzə̀ n fəghə mə

Jìi zey ghə̂ a num tə ibam tə â bəghəmnə tə̀ Zə̀ kə

¹ Ni keeli bəghəm i fə̀ŋ n kow Zə̀ kə loʼ ghəə zey i ghəŋŋə nə̀ saa i khə tən nə̀ saa i keelinu fə wey saa ləmmənə. À loʼ bəghəm i fə̀ŋ i dii bənə nə̀ fə key saa koʼo way ndzəm loʼnu.

² A loʼ bòʼ bəghəm i fə̀ŋ zən ghə̂ a num tə ibam tə â khə tsənə, zə â ghəŋənə nə̀ Zə̀ kə ney ghə nə̀ à loʼ ghə̂ a dzuŋu ghə.

³ À loʼ bəghəm i fə̀ŋ zən saa khənə n kow Zə̀ kə, i ghəŋənə nə̀ saa zowkeeli nə̀ Zə̀ kə â maŋ dza tsu kə nə̀ mbi doʼo bə, mbi n doʼo bə. À wey loʼ ghə i tii zə Zə̀ kə â neynə fə wən saa koʼo way ni ghəŋə fə wən saa koʼonə.

⁴ A loʼ bəghəm i fə̀ŋ zən Ebel â khənə, zə â ghəŋənə nə̀ tə fəələ maʼlə wən u dzɔb tsəghəshinə u Ken wə. À loʼ n bam i bəghəm i fə̀ŋ i wi, Zə̀ kə â neynə wi nə̀ tə loʼ wù wən tə loʼnə tsətsəghə n təŋkey, Zə̀ kə n wû u wi wə â ney maʼlə wey tə â fəələnə nə̀ a loʼ maʼlə u dzuŋu wə. Nghee i buʼ loʼ kə nə̀ Ebel mâ kpu, saa nam zoʼlənu ghəə ghə na n wɔ wi kuum bəghəm i fə̀ŋ i wi n kow Zə̀ kə.

⁵ À loʼ bəghəm i fə̀ŋ zə â ghəŋənə nə̀ kə Enɔk i kpu. Zə̀ kə n ney nuu kɔʼ ndow wi idəŋ nə̀ tə ka kpu. I loʼ n màʼlə K-a-zə̀ nə̀, “Ghə â kəŋ kìi wi n təŋkey Zə̀ kə mâ ney nuu wi.” I loʼ sey n təŋkey, tə̀ Zə̀ kə ni ney nuu Enɔk, à n loʼ nə̀ tə n dza nə̀ Enɔk â ghəŋə nə̀ tə ngii duʼlə.

⁶ Sey, wù loʼ way dzə ni ghəŋə nə̀ Zə̀ kə i duʼlə ghi wi abə tə khə way bəghəm i fə̀ŋ zə, n təŋkey, wù wey tə bəghənə n səə Kəzə̀, tə khə ni teeli khə bəghəm i fə̀ŋ zə nə̀ Zə̀ kə loʼnu nsə nə̀ tə naamənu ghə̂ ghən ghə kəŋənə wi.

⁷ A loʼ bəghəm i fə̀ŋ zə â ghəŋənə nə̀ Noa zow tsə̂ i Kəzə̀ n chɔd wən wə â khə ni bə shi nə̀ tə koʼo way. Tə n bɔɔmə zow ndow ghəə ghey Zə̀ kə dzanə, bəghə kɔʼ fə̀n kən kə â bəghəshinə wi ghi sali ndaw i wi zə. À loʼ bəghəm i fə̀ŋ zən Noa â khənə, tə a dii ndownə tə̀ ghə̂ ghə nə̀ ghə̂ a mbi a loʼ ghə̂ a bəbə ghə. Zə̀ kə â ney Noa nə̀ tə loʼ wù wən tə loʼnə tsətsəghə n təŋkey, tə â bəghəm tə̀ Zə̀ kə.

⁸ A loʼ bəghəm i fə̀ŋ zən Abraham â khənə n kow Zə̀ kə, zə â ghəŋənə nə̀ tə zow tə̀ Zə̀ kə nghee Zə̀ kə â tɔŋɔnə wi nə̀ tə̀ ndow n luʼu key tə â təb naŋanə ni fuu tə̀ wi. Tə n zəghə tsu naʼ i wi, nuu ndow ni ndow nə kəluʼu nə̀ tə khə way luʼu key tə ndownə tii.

⁹ Bòʼ bəghəm i fə̀ŋ, tə n muu nə kəluʼu ghə a təbnə tə wi tə̀ a loʼ wù wən tə nuu bənə n naʼ i kətûm. Tə n muu fu tii nə nfəə ighələ tə̀ a loʼ Ayzik nsə Yakɔb wən Zə̀ kə â fuunə ghə n təb kə mɔʼɔ kə.

¹⁰ I loʼ sey n təŋkey, Abraham â ləmmə ni muu n naʼ i zən tsə̂ u tii u loʼ nə a səd Kəzə̀, nə̀ a loʼ soʼo Kəzə̀ kə bəghənə naʼ i tii zə.

¹¹ À loʼ bəghəm i fə̀ŋ, zə â ghəŋənə nə̀ Abraham i loʼ ni doʼo bə bày waa nə̀ tə n ngii dən, Sara wən tə â loʼnə wey wi n loʼ soʼo nə̀ tə n dən tsəghə ni ji waa, n təŋkey, tə â khə bəghəm i fə̀ŋ nə̀ wù wey tə â təbnə təb kə tii kə, naŋŋənu dzuu i wi zə.

¹² Sey, ni ney nuu bə n kôw wù wən umɔʼ tə â loʼnə tə̀ tə n kpu, ghə n ji waa a waa ghə n ndəm tə a loʼ nsəghəbələ n bikighow nsə tə a loʼ kəsəsay n nguŋə dzuu nə̀ ghə way ni taŋ may.

¹³ Ghə̂ ghən adzəm â bə kpu nə̀ ghə nam khə kənu bəghəm i fə̀ŋ zə n kow Zə̀ kə. Ghə â ka keeli dzə fə key Zə̀ kə â təb naŋanə tə̀ ghə. Ghə mâ kee koʼ ndow kənu fə kə tii kə nə kədaa, ghə n khə tən nə̀ ghə i keelinu fə u tii wə. Ghə n bəghəm kɔʼ soʼo n mgbaŋ nə̀ ghə loʼ ghə̂ a tətùm nsə nə̀ ghə bwey nyi bənu fa a ghəlitsə.

¹⁴ Ghə̂ ghən ghə dza ndzoʼo ghəə ghən dii bənu n mgbaŋ nə̀ à loʼ ghə̂ ghey ghə kəŋənə naʼ zey i loʼnə nə̀ à loʼ i ghə zə.

¹⁵ Abə i mə loʼ nə̀ ghə â moʼlə ndow naʼ zey ghə nuu bənə tii, à mə loʼ nə̀ ghə n keeli buʼ kə ni ndow dzəŋŋə fu.

¹⁶ Ghə n fədlə mbuŋŋə ndow naʼ zey i dzɔb tsəghənə, tɔŋŋə naʼ zey i loʼnə idəŋ. Sey, Zə̀ kə dədlə way n tow kə abə ghə tɔŋŋənə wi nə̀ loʼ Zə̀ kə ghə bòʼ nə̀ tə n bayyə naŋa naʼ zə tə̀ ghə.

¹⁷ À loʼ bəghəm i fə̀ŋ zə â ghəŋənə nə̀ Abraham fuu waa wi Ayzik tə a loʼ umaʼlə tə̀ Zə̀ kə nghee Zə̀ kə â mɔm koʼonə wi. Wù mɔʼɔ wən Zə̀ kə â təb naŋanə wi n waa a waa ghə n ndəm, tə n tey tən ni fuu ndow sɔʼi fə waa wi tə̀ Zə̀ kə tə̀ a loʼ umaʼlə.

¹⁸ Loʼ sey nə̀ Zə̀ kə mâ dza naŋa tə̀ wi nə̀, “À i loʼ n bam i Ayzik wə i keelinə waa a waa ghən mə â təb naŋanə tə̀ wɔ.”

¹⁹ Abraham â ney tsu kə n fə̀ŋ ə wi nə̀ Zə̀ kə loʼnu ni zhəm dzəŋŋə bə Ayzik nə ivə. Saa loʼ ni dza tsu nə̀, Zə̀ kə â ney fuu dzəŋŋə bə Ayzik tə̀ Abraham nə̀ Ayzik mâ kpu.

²⁰ À loʼ bəghəm i fə̀ŋ zən Ayzik â khənə n kow Zə̀ kə, zə â ghəŋənə nə̀ Ayzik gɔŋŋə nə̀ Zə̀ kə buulə Yakɔb nsə Isaw n tsuʼu mən n loʼnə isə.

²¹ À loʼ bəghəm i fə̀ŋ zən Yakɔb â khənə n kow Zə̀ kə, zə â ghəŋənə nə̀ tə buulə waa a Yosef nghee tə â dza i kpu. Tə n zoʼo doʼo ndow n tow kə mbaŋ a wi i nyəllə zə, fuu ingɔɔmə tə̀ Zə̀ kə.

²² À loʼ bəghəm i fə̀ŋ zə â ghəŋənə nə̀ nghee Yosef loʼnə n ghəə a kpuu ghə, tə dza naŋa zey bə nghee ghə̂ ghə i Izree a nə nuulə shiə bənə tii n naʼ zə Ijip, nsə ghəə zey ghə khə ni ghəŋə n vən i wi zə.

²³ A loʼ bəghəm i fə̀ŋ zə â ghəŋənə nə̀ ghə bày a Mushi a nyì naŋa wi nə təndzɔŋɔ tətəghə tə̀ ghə ji tsunə wi. Ghə â koʼ tsu nə̀ tə ngii dzɔbənu, sey ghə n ka tsəŋ dzə ni zaʼ laŋ kən də̀ŋ kə Ijip kə tsəʼlə tsunə.

²⁴ À loʼ bəghəm i fə̀ŋ zə â ghəŋənə nə̀ nghee Mushi nyim kɔʼnə, tə tuu nə̀ kə ghə nə tɔŋŋənə wi nə̀ a loʼ waa waa Ferɔ wən tə â loʼnə də̀ŋ kə Ijip kə. Waa Ferɔ wən â loʼ waa u zən wə.

²⁵ Tə n sày kɔʼ ni fəghə dzəŋi ghi ghə̂ a Kəzə̀ ghə tsəghəshi ni zow kədzuŋ n ghəə a bəbə ghən gow uwû ləghənə n tɔŋɔ fə inəŋə.

²⁶ Tə â ney kɔʼ n fə̀ŋ ə wi nə̀, ni fəghə bòʼ wù wən Zə̀ kə â dza naŋa nə̀ i tûm bənu dzɔb tsəghəshinu fə u dzuŋu wey udzəm u loʼnə n naʼ zə Ijip, bòʼ nə̀, tə â laalə tənə ndow kə naamə key tə i keelinə isə.

²⁷ À loʼ bəghəm i fə̀ŋ zə â ghəŋənə nə̀ Mushi tyi nuu shi bə n naʼ zə Ijip nə̀ tə tsəŋə way nə̀ də̀ŋ kə Ijip kə i fəələnu n nəghə wə ghi wi. Tə n kow fə̀ŋ, ndow kə n sə kə ni tyi shi n təŋkey, tə â naŋa ndow kə isə n kow Zə key a koʼo way.

²⁸ À loʼ bəghəm i fə̀ŋ i Mushi zə â ghəŋənə nə̀ ghə̂ ghə Izree a naŋa Zə̂ kə taa zaʼa kə nsə nə̀ ghə tsoʼlə kaabə ndow təkaŋ n fuʼu n təndaw n ghə, sey nə̀ kə tsəndəghə ə ivə nə wey maʼanə waa a num a ghə̂ ghə Izree a sə̂ isə ghə.

²⁹ A loʼ bəghəm i fə̀ŋ zə â ghəŋənə nə̀ ghə̂ ghə Izree a daŋ dzuu i baŋa zə tə̀ ghə bwey n ghəlikətsə kə zûmmə kə. Ambə ghə̂ ghə Ijip a dza i mbɔŋ mɔm koʼ tsu soʼo ni dzûmə nyi ndow ghə, ghə n kuŋ ndow adzəm.

³⁰ A loʼ bəghəm i fə̀ŋ zə â ghəŋənə nə̀ ghə̂ ghə Izree a bwey ngəə tsəghə ndow mbàa naʼ i Jeriko nə ntsuʼu nsəghəmbəghə. Nghee ghə bwey tsəghə ndownə sey mbàa tii n beeli tsu bə aghəd.

³¹ À loʼ bəghəm i fə̀ŋ zən Rahab wən tə â loʼnə kpala kə, tə â khənə n kow Zə̀ kə, zə â ghəŋənə nə̀ kə Zə̀ kə nə wey dzəŋinə wi ghi ghə̂ ghən ghə â zow way tə̀ Zə̀ kə n təŋkey, tə â kpiney tsi tə Izree.

³² Ghaa ləghə nə̀ n ndow kə n sə kə ni taŋŋə kɔʼ bə fwaʼ kə bəghəm i fə̀ŋ ə? Nəŋə i way ni taŋŋə kɔʼ bə fwaʼ kən bəghəm i fə̀ŋ zə â ghəŋənə ghi Gidiɔn, Barak, Samsən, Jefta, Devid, Samwel nsə tûm tə Kəzə̀ tə.

³³ À loʼ bəghəm i fə̀ŋ zən ghə̂ ghən â khənə n kow Zə̀ kə, zə â ghəŋənə nə̀ wù umɔʼ n ghə̂ ghən təm zə̂ tənaʼa n tsam. Ghə â ghəŋə ghəə ghey ghə â kpiilənə n sə K-a-zə̀, Zə̀ kə n fuu tsu ghə n fə key tə â təb naŋanə tə̀ ghə. À loʼ soʼo bəghəm i fə̀ŋ zən ghə â khənə n kow Zə̀ kə, zə â ghəŋənə nə̀ ghə̂ a ghə a loʼ a fìi naŋa dzuu a tədəmow,

³⁴ ghə a loʼ a nəm maʼa vəllə n faalə mə, ghə a loʼ a tyi nuu nə̀ kɔb tə tsam tə ka ghə kwu. Nghee ghə a loʼ ghə â tsəm loʼ kə ghə̂ a lay ghə, Zə̀ kə n kee fuu ghə n daʼa kə. Ghə n loʼ ni keeli kədaʼa ni zuu tsam, təm zə̂ bə sawgoʼ tə tətùm.

³⁵ À loʼ bəghəm i fə̀ŋ zən gheyzən ghə â khənə n kow Zə̀ kə, zə â ghəŋə tsu nə̀ ghə̂ a ghə ghən ghə â kpuulənə nə̀ ghə zhəm dzəŋŋə bə nə ivə. A loʼ bəghəm i fə̀ŋ zə â ghəŋənə nə̀ a loʼ a tuu ni shi n ndaw tsaʼ, ghə n fəghə fu n ndaw tsaʼ, bə kpu daŋŋə soʼo, sey nə̀, ghə loʼ ni keeli muu zey i dzɔb tsəghənə i zən abə ghə i zhəm dzəŋŋə bənə nə ivə.

³⁶ Ghə n tsayyə a loʼ ghə, wədlə soʼo ghə nə təkwɔ̀ɔ. Ghə n kuum naŋa a loʼ ghə nə tətsaʼ, ney ndow ghə n ndaw tsaʼ.

³⁷ Ghə n təmmə wey ghə nə atay. Ghə n səʼlə khəələ a loʼ ghə nə təsɔɔ nə ukə̀m ubəghə, sawwə wey a loʼ ghə nə təkɔb. A loʼ ghə n laʼa bwey kaabə nə̀ ghə n dzəŋə keeli gow tə tənjì tə nsə gow tə təji tə nə uwû. Ghə n ngii laa soʼo, ghə̂ ghə n koʼo kìi ghə, chɔdlɔ soʼo ghə.

³⁸ Mbi zən n kəm way dzə luʼu kə dzuŋu kə tə̀ ghə ni muu tii. Ghə n laʼa bwey kaabə tsə n mbvən ə ntsaŋ nsə nə təkaʼa. Ghə n bweeli kaabə tsə n tənə unaa nsə n nə ubuʼ a ghəlitsə.

³⁹ Nghee Zə̀ kə â bùʼ dii kə tə ghə̂ ghən nə̀ tə duʼlənu ghi ghə bòʼ bəghəm i fə̀ŋ zey ghə khənə, ghə n ka nam keeli fə key Zə̀ kə â təb naŋanə tə̀ ghə.

⁴⁰ Zə̀ kə â ka fuu fə key tə â təb naŋanə tə̀ ghə n təŋkey, tə â bayyə naŋa ghəə ghey a dzɔb tsəghənə a ghən tə̀ saa. Tə â ləghə nə̀ bəghəm i fə̀ŋ i saa i teeli doʼo bə soʼo tə̀ a loʼ i ghə zə tə̀ ghə ni doʼo may bə ndzoʼo ghə̂ ghey tə ləghənə nə̀ ghə doʼo.