Galeshia 4 - Kaa n Kəzə̀ n fəghə mə

¹ Ni kəm ney tsu, waa wən tə loʼnə nə a loʼ zəə kəbii, abə tə nam təbə nə̀, wi ghi wù kəfwaʼ, kweyyə kə loʼ kə way dzə, n təŋkey tə ka kam beyyə kpi dzə, nghee tə i tsəm loʼ kə nə a loʼ wi tə khənə fə wə udzəm.

² Tə khə ni ney kəlaŋ n wɔ wù wey tə laalənə wi, laalə soʼo kəbii, ni ndow kùm n nəŋə zey bày â təb naŋanə nə̀ tə loʼnu ni zə̂ fə u tii wə.

³ Nghee saa â nam loʼ tsə nə̀ saa kam khə way Klisto, saa â loʼ soʼo tə a loʼ aghinətəghə, loʼ ukɔd tə daʼa wən u saʼanə mbi.

⁴ Ambə nəŋə i kpi tsunə, Zə̀ kə n tûm bə waa wi. Waa tii n nyi bə fa n mbi nə a wi ji bə weyzən, tə n nyim kɔʼ bə tə laŋ kə ghə̂ Təjuu kə diinə.

⁵ Zə̀ kə â tûm bə wi nə tə bə kùmshi ghə̂ ghən ghə â loʼnə n tənnə kəlaŋ, ni ghəŋə nə̀ saa doʼo bə waa a Kəzə̀.

⁶ Zə̀ kə â kuu nyi bə Zay key kə â loʼnə n kow waa wi n fə̀ŋ tə saa, ni dii tsu nə saa loʼ waa a wi. À loʼ Zày kə tii kə, kə ghəŋŋənə nə̀ saa i tɔŋŋə wi nə̀, “Bày, dii tsu nə tə loʼ Bày saa.”

⁷ I sey dii nə̀ ghaa kəm way dzə ukɔd, ghaa nya loʼ waa a Kəzə̀. Nya wən ghaa loʼnə waa a wi ghə, i sey dii nə̀ Zə̀ kə i fuunu ghaa n fə wey tə â təb naŋanə tə waa a wi ghə.

Fə̀ŋ baŋa Pɔl n kow ghə̂ a Galeshya ghə

⁸ Nghee ghaa â buʼ loʼ tsə nə̀ ghaa kam khə way Zə̀ kə, ghaa n loʼ ukɔd tə fə u loʼ wey ghaa â tɔŋɔ nə̀ a loʼ uzə̀.

⁹ Nya wən ghaa keeli dzə Zə̀ kə, nkee, n loʼ ni dza nə̀ Zə̀ kə n ghaa keeli, a kəm loʼ kee ghaa dzəŋŋə ndownə ni doʼo ukɔd tə fəghə mə nzə̀ n lay n kənunu mən n saʼa mbi ə?

¹⁰ Ghaa say naŋa kɔʼ ntsuʼu, təndzɔŋɔ, tənəŋə nsə nùm tə loʼ tə nə̀ a loʼ nəŋə zey ghaa bamnə zə̀ kə a tii.

¹¹ Fə̀ŋ baŋa mə n kow ghaa! Fiilə kə sa tə n fa maŋ fəghə nay n kow ghaa kənunu.

¹² N buʼu bə kəwɔɔ tə ghaa waazə ghə, dzûmə bə na ghow kə ibwey kuŋ kə, n mâ doʼo soʼo tə a loʼ ghaa. Ghaa ka mə n ghə i bəb i ghəŋə dzə nghee mə â naʼlə tûm i dzuŋu zə tə ghaa.

¹³ Ghaa khənu nə̀ â ghəŋə dzaŋ zuŋ nə n keeli kəbuʼ ni bə naʼa tûm i dzuŋu zə fa tə ghaa n nəŋə i sə isə zə.

¹⁴ Dzaŋ zuŋ zə â loʼ tə a loʼ uchɔd tə̀ ghaa, n jìi zey ghaa â loʼnə ni tuu maʼa mə, ghaa n ka tuu maʼa mə, ka nyaŋ maʼa soʼo mə. Ghaa n fəd ngɔɔmə naŋa mə tə n loʼ tsəndəghə ə Kəzə̀ nkee Yeso Klisto n wû u wi wə.

¹⁵ À kəm shi kee ghi duʼlə zey ghaa â khənə n nəŋə zey ə? Abə â loʼ kə ni buʼ bɔʼi shi bə sə a ghaa, ghaa fuu bə tə mə n nəŋə i tii zə, tə ghaa â bɔʼi fu.

¹⁶ À loʼ nə̀ n nya kəm doʼo bə wù ngəmə ghi ghaa nghee n dza bə isəŋə tə ghaa a?

¹⁷ Ghə̂ a loʼ ghey ghə ləghə ni kwey tûm i dzuŋu zə khə kənu zày n kow ghaa, a kee loʼ nə̀ ghə khə moʼlə tə bəbə tə. Ghə ghəŋŋə sey ni khə̀mə nu fə̀ŋ tə ghaa, nə̀ ghaa ka zow tə mə, ghaa i zow bə kə tə ghə.

¹⁸ À loʼ kənu ghə i dzuŋu zə abə ghə khənə zày n kow ghaa abə a loʼ dzə nə ghə khə zày tii n moʼlə i dzuŋu zə. À kee loʼ nə̀, kə zày tii nə doʼlə kə nə n nəŋə zey n loʼnə ghi ghaa, i khə ni loʼ nəŋə tədzəm.

¹⁹ Waa ghuŋ a dzuŋu ghə! Fɔɔbə zey n zownə nya bòʼ ghaa, loʼ tə a loʼ fɔɔbə zey weyzən zownə abə tə sòʼonə waa. Mə i zow fɔɔbə i tii zə ni ndow kùm n nəŋə zey mə i koʼ bə nə̀ muu i ghaa i nya loʼ tə a loʼ muu i Klisto.

²⁰ Abə jii mə kpaʼi loʼ tə mə ni doʼo fey ghi ghaa nya, tə n mə keeli jìi zey n loʼ ni ghɔɔmə tii tə̀ ghaa, bòʼ nə̀ fə̀ŋ ngii baŋa mə n kow ghaa.

Ghəə zey doʼo i Sara nsə Haga i diinə

²¹ Ghaa ghən ghaa ləghə ni muu n tənə kəlaŋ, dza bə na tə mə, ghaa məghənu fə key laŋ kə tii kə diinə ə?

²² I tɔ̀ʼɔ doʼo n màʼlə K-a-zə̀ nə̀, Abraham a khə waa a num ghə abəghə. Umɔʼ nə a ji weyzən ə kəkɔd, u loʼ wey nə̀ a ji weyzən wən tə way kɔd kə.

²³ Waa wən weyzən ə kəkɔd â ji bənə, tə â ji bə nghee ghə jiənə waa ghə tii. Tə wən â ji bənə weyzən wən tə way kɔd kə, â loʼ waa wən Zə̀ kə â təb naŋanə.

²⁴ Gheyzən ghən abəghə tey ni dìi nkaa mey n bəghə Zə̀ kə â zə̂ naŋanə ghi ghə̂ ghə Izree ghə. Weyzən ə kəkɔd wən tɔŋŋə Haga, tey n kaa mey Zə̀ kə â zə̂nə n kaʼ u Sinay, n luʼu kən Zə̀ kə fuunə laŋ wə a tii. Wù wey tə loʼnə n tənə kəlaŋ sey loʼ kəkɔd

²⁵ Haga loʼ kaʼ u Sinay n mboʼo Arebya. Tə sey tey tə a loʼ naʼ i Yerosalem zən i loʼnə n tsuʼu n mən. Wi ghi waa a wi ghə dzəŋi loʼ ukɔd n tənə kəlaŋ.

²⁶ Weyzən u loʼ wən tə loʼnə nə a way zən ə kəkɔd tɔŋɔ Sara, kee tey tə a loʼ Yerosalem zən i loʼ idəŋ. Wi ghi waa a wi ghə, way dzə ukɔd n tənə kəlaŋ, à loʼ wi tə loʼnə này saa.

²⁷ I tɔ̀ɔ doʼo n màʼlə K-a-zə̀ nə̀, “I duʼlə a zən ə kəkaa! Wɔ wən wə ka kam ji koʼ waa. Fu zɔŋ wə tə bày! Wɔ wən wə ka kam soʼ koʼ waa. N təŋkey, wɔ wən num wə â key naŋanə wɔ, i keeli awaa n ndəm Tsəghəshi weyzən wey num â ka zəghə maʼa koʼ wi.”

²⁸ Nyisa waazə ghə, ghaa loʼ tə a loʼ Ayzik, tə loʼnə waa wən Zə̀ kə a təb naŋanə.

²⁹ Ghə̂ ghən ghə ləghənə nə̀ ghaa doʼo n tənə kəlaŋ, nya chɔdlɔ ghaa ighələ tə a loʼ Ismaye, waa kəkɔd wən tə â chɔdlɔnə Ayzik, waa wən ghə jinə n daʼa kə Zay kə Zow kə.

³⁰ Màʼlə K-a-zə̀ kə dza nə̀ ngee bòʼ ghəə ghən ə? Màʼlə K-a-zə̀ kə dza nə̀, “Dzum shi weyzən ə kəkɔd wən ghi waa wi, n təŋkey, waa kəkɔd wən way ni zə̂ dzəŋi dzə ufə ghi waa weyzən wən tə kɔd kə.”

³¹ Sey waazə ghə, ghəə ghən adzəm loʼ ni dii tsu nə saa way dzə waa a weyzən ə kəkɔd, saa fəd loʼ waa a weyzən wən tə way kɔd kə.