Galeshia 3 - Kaa n Kəzə̀ n fəghə mə

À dzɔb tsəghə shi ni naŋa kəlaŋ mɔ ni bəghəm tə Klisto ə

¹ Ghaa ghə̂ a Galeshya ghən, ghaa ngii laʼlənu! À ghaa ləŋ naŋa ndee? N dza ghə mâ mgbaŋ tiilə dìi bə zuŋ key ghə â baa Yeso Klisto tii n zat kə fəkaʼ a?

² N dza n bəb bə tə ghaa nə̀, ghaa â keeli Zay kə Zow kə n wɔ Zə̀ kə nə ghaa naŋŋə kəlaŋ nkee â loʼ bòʼ bəghəm i fə̀ŋ i ghaa n tûm i dzuŋu zən ghaa â zownə ə?

³ Ghaa sa boʼo laʼlə nə a loʼ kee? Ghaa mâ mgbaŋ kaʼ dzɔb muu i ghaa zə tə a loʼ dzûmə tə Klisto n daʼa kə Zay kə Zow kə, à loʼ kee ghaa dza i kəm guŋ kɔʼ nya n daʼa kə ghaa a?

⁴ I sey dii nə̀ n ghəə ghən ghaa tsəghənə tii, ghaa maŋ fwaʼ nay nə kənunu ə? N moʼlə nə̀ ghaa â ka fwaʼ dzə nə kənunu!

⁵ N dza n bəb kpiʼi bə tə ghaa nə̀, Zay kə Zow kə kən Zə̀ kə â fuunə tə ghaa nsə faalə n mən tə fwaʼnə n fəŋŋə kə ghaa, â loʼ n təŋkey, ghaa naŋŋə ulaŋ nkee â loʼ n təŋkey ghaa â bəghəm tûm i dzuŋu zən ghaa â zownə ə?

⁶ Ney kɔʼ na Abraham, tə̀ màʼlə K-a-zə̀ kə dzanə nə̀, “Tə â ngii bəghəm tə Zə̀ kə, Zə̀ kə n ney naŋa kɔʼ wi nə a loʼ wù wey tə loʼ nə tsətsəghə.”

⁷ I sey dii nə̀ ghə̂ ghən ghə baa loʼnə waa a waa ghə Abraham ghə, loʼ ghə̂ ghey ghə khənə bəghəm i fə̀ŋ zə n kow Zə̀ kə.

⁸ I mâ tɔ̀ɔ doʼo zey n màʼlə K-a-zə̀ nə Zə̀ kə i ghəŋə ghə̂ ghən ghə way ghə̂ a Təjuu ghə, i doʼo bə tsətsəghə n bam i bəghəm i fə̀ŋ. Zə̀ kə mâ dza naŋa zey soʼo tûm i dzuŋu zə tə Abraham nə̀, “N bam zə, naʼa tədzəm tə i keeli ibuulə.”

⁹ Sey ghə̂ ghən ghə bəghəm nə tə Klisto, ghə i keeli soʼo buulə zən Abraham wən tə a bəghəm tə Zə̀ kə â keelinə.

¹⁰ Zə̀ kə i ləŋə naŋŋə ghə̂ ghən ghə muunə nə ghə naŋŋə kəlaŋ, n təŋkey i tɔ̀ɔ doʼo n màʼlə K-a-zə̀ nə̀, “Zə̀ kə i ləŋə naŋŋə wù wey tə ka naŋa laŋ wən u tɔ̀ɔ doʼo n màʼlə k-a-laŋ udzəm.”

¹¹ I sey dii tsu nə a way dzə kəlaŋ kə ghəŋŋənə wù doʼo tsətsəghə n sə K-a-zə̀, tə i tɔ̀ɔ doʼo n màʼlə K-a-zə̀ nə̀, “Wù wey tə loʼnə tsətsəghə n sə K-a-zə̀ n bam i bəghəm i fə̀ŋ, tə i keeli imuu.”

¹² Laŋ kə bwey dzəŋi way ghi bəghəm i fə̀ŋ zə, i fəd tɔ̀ɔ doʼo n màʼlə K-a-zə̀ nə̀, “Wù wey tə naŋŋənə laŋ wə udzəm, tə i muu soʼo tə laŋ u diinə.”

¹³ Klisto a kùmshi saa ghən saa loʼnə nə laŋ kə n saa ləŋ naŋa nghee tə â boʼonə ngoʼ ə saa n zat kə fəkaʼ, tə i tɔ̀ɔ doʼonə n màʼlə K-a-zə̀ nə̀, “Zə̀ kə i ləŋə naŋŋə wù wey ghə i kɔʼlə naŋanə vən i wi zə nə fəkaʼ.”

¹⁴ Zuŋ key tə a kùm shinə saa â loʼ ni ghəŋə nə̀ ghə̂ ghən ghə way ghə̂ a Təjuu ghə, ghə loʼ ni mbɔŋ keeli soʼo buulə zən Zə̀ kə â fuunə tə Abraham n bam i Yeso Klisto. Seynə saa loʼ ni keeli Zay kə Zow kən Zə̀ kə a təb naŋanə n bam i bəghəm i fə̀ŋ i saa.

Kəlaŋ nsə təb key Zə̀ kə â təbnə

¹⁵ Waazə ghə, ney kɔʼ na n muu zən saa muu nə a tii tsuʼ ndzəm. Abə aghə̂ a bəghə a bəghəm dzəŋi kɔʼnə nə ighəə, zə̂ kɔʼ nkaa tii, wù loʼ way ni tuu maʼa nkee ni kuu kpiʼi ghə i loʼ zə tii.

¹⁶ Zə̀ kə â təb naŋa ghəə ghən tə Abraham ghi waa waa wi. Màʼlə K-a-zə̀ kə ka dza dzə nə̀, “Tə waa a waa a wi ghə.” Tə a i dza ghə loʼ n ndəm. Màʼlə K-a-zə̀ kə fəd dza, “Waa waa wi”, dii tsu nə a loʼ wù umɔʼ tɔŋŋə Klisto.

¹⁷ Ghəə zey n dzanə loʼ nə̀, Zə̀ kə a zə̂ nkaa ghi Abraham tə n təb naŋa tsu nə i naŋŋənu kaa n tii mə. Laŋ kən Zə̀ kə a fuunə n bam i tənum nbɔm kaykə nsə ghəm mə ntəghə, kə â ka kaa maʼa dzə nkaa mey tə â zə̂ naŋanə. Dii tsu nə̀, ghəə zey tə a bəghəm naŋa nə̀, nam teynu.

¹⁸ Abə a loʼ nə a keeli buulə i Kəzə̀ bòʼ nə̀ a naŋŋə kəlaŋ, i sey dii nə̀ buulə i tii i ka bə dzə n bam i təb kən Zə̀ kə â təb naŋanə. A kee loʼnə Zə̀ kə â fuu tə Abraham fə key tə â təb naŋanə tə wi.

¹⁹ Abə a loʼ sey, Zə̀ kə â fuu laŋ kən nə a loʼ kee? Zuŋ key Zə̀ kə â fuunə laŋ kə â loʼ ni dii tə ghə nə̀, ghə ghəŋŋə ghəə a bəbə ghə ni bə kuum bə n nəŋə zey Yeso, tɔŋɔ waa wey Zə̀ kə a dza naŋanə nə̀ i tûm bənu â bənə tii. À loʼ tsətəndəghə tə Kəzə̀ tə â bə fuunə laŋ kə tə Mushi tə loʼ wù wən tə təmə dzəŋi ghə̂ ghə ghi Zə̀ kə.

²⁰ Wù təmə dzəŋi wə aghə̂ wə khə kə kəfwaʼ abə ghə̂ a loʼnə abəghə nə ghə bəghəm dzəŋi way. A kee loʼ nə̀ Zə̀ kə â loʼ n nəŋə wi n nəŋə zey tə â fuunə təb kə.

Zuŋ key Zə̀ kə a fuu laŋ kə a tii

²¹ N dza n bəb bə nə̀, laŋ K-a-zə̀ kə nya ballə kɔʼɔ bə ghi təb K-a-zə̀ kə ə? Ngaŋ! Abə laŋ kə mə loʼ ni ghəŋə saa nə̀ a keeli imuu, ghə̂ adzəm a mə ndzəmə naŋŋə laŋ u tii wə, sey nə̀, ghə loʼ ni loʼ tsətsəghə n sə K-a-zə̀.

²² I fəd tɔ̀ɔ doʼo n màʼlə K-a-zə̀ nə̀, mbi idzəm neyyə doʼo n ghəə a bəbə ghə. A sey loʼ kə ghə̂ ghən ghə bəghəmnə tə Yeso Klisto, Zə̀ kə i fuunə ghə n naamə kən tə â dza naŋanə.

Saa doʼlə waa a Kəzə̀ n bam i bəghəm i fə̀ŋ

²³ Ni bə kuum n nəŋə zey ghey â kaʼ ni keeli bəghəm i fə̀ŋ tii n kow Klisto, â loʼ kəlaŋ kə â keyyənə ghey. Saa â loʼ tə a loʼ ghə̂ a ndaw tsaʼ ni ndow kuum n nəŋə zey saa â keelinə bəghəm i fə̀ŋ zə tii.

²⁴ Sey, à saa â keyyə kɔʼ bə kəlaŋ ni bə kùm n nəŋə zey Klisto â bənə tii. Zə â loʼ sey ni ghəŋə tsu nə saa doʼo tsətsəghə n sə K-a-zə̀ n bam i bəghəm i fə̀ŋ.

²⁵ Nya wən bəghəm i fə̀ŋ n kow Klisto i bə dzə nə̀, à kəm way dzə kəlaŋ kə keyyənə saa.

²⁶ Nya, à loʼ bəghəm i fə̀ŋ zən ghaa khə n kow Yeso Klisto, i ghəŋŋənə nə̀ ghaa doʼo waa a Kəzə̀.

²⁷ Ghə̂ ghən adzəm ghə doʼo bənə nə kəfə kəmɔʼ ghi Klisto n mmuu n Kəzə̀ mən ghə â ney kɔʼnə, nya doʼo bə tə a loʼ Klisto.

²⁸ Ghaa ghən ghaa bəghəm nə tə Yeso Klisto, ghaa nya loʼ kəfə kəmɔʼ ghi Yeso Klisto. Kweyyə kə loʼ kə way dzə a dza nə̀ u loʼ wù Juu nkee u way wù Juu, u loʼ kəkɔd nkee wù ngəŋ, u loʼ weyzən nkee weynum.

²⁹ Nya wən ghaa loʼ dzəŋinə nə kəfə kəmɔʼ ghi Klisto, ghaa saa loʼ waa Abraham ghən ghə i zəənə fə wən Zə̀ kə â təb naŋanə.