Filipi 1 - Kaa n Kəzə̀ n fəghə mə

Pɔl tûm itɔŋɔzow tə ghə̂ a Filipi ghə

¹ À màʼlə kən tɔ̀ɔ bə mə̀ Pɔl nsə Timoti, ghey loʼnə ghə̂ a kəfwaʼ a Yeso Klisto ghə. N tɔ̀ɔ bə tə̀ ghə̂ a Kəzə̀ a zow ghə, ghə loʼnə nə kəfə kəmɔʼ ghi Yeso Klisto n naʼ i Filipi. N tɔ̀ɔ bə soʼo tə̀ ghə̂ ghey ghə loʼnə tow wə n Ndaw Kəzə̀ nsə ghə̂ ghən ghə fuunə gaamə zə n Ndaw Kəzə̀.

² N nɔɔ ndow tə̀ Zə̀ kə tə loʼnə Bày saa nsə tə̀ Mûkəbii Yeso Klisto nə ghə fu ghaa n ndzuŋ nsə buulə zə.

Pɔl gɔŋŋə tə̀ ghə̂ a Filipi ghə

³ N fuu tsə kəzɔŋŋə tə̀ Zə̀ kuŋ kə nəŋə tədzəm abə n moʼlə tsunə ghaa.

⁴ Nəŋə tədzəm abə n gɔŋŋənə tə̀ ghaa, mə n gɔŋŋə tənə n duʼlə zə n fə̀ŋ zuŋ.

⁵ N fuu zɔŋŋə K-a-zə̀ nghee ghaa â gaamənə mə ni ghəŋə nə̀ n naʼa tûm Kəzə̀, ni ney nuu tsu n tsuʼ fey ghaa â bəghəm tûm i dzuŋu zə, bə kùm bə nya.

⁶ N khə soʼonu nə̀ Zə̀ kən kə â zey tsu fwaʼ kə dzuŋu kən n kôw ghaa, i tsəghə ndow kə n ghii kə isə, ni ndow kùm tsuʼ fey kə i maynə tii, tɔŋɔ, n tsuʼ fey Yeso Klisto î bəghə dzəŋŋənə tii.

⁷ À loʼnu ghə i dzuŋu zə tə̀ mə̀ ni moʼlə ghaa n ndzoʼo jii zən, boʼnə n khə ghaa n fə̀ŋ i dzuŋu zə̀. Abə n loʼ kə n ndaw tsaʼ nkee n təmənə tsam, təmi tiilə kùm tûm i dzuŋu zə̀, ghaa loʼ dzəŋi ghi mə̀ nə kəfə kəmɔʼ n ndzuŋ ə Kəzə̀ zən tə funə tə̀ mə.

⁸ Zə̀ kə loʼ ni tiillə dza nə̀ n dza isəŋə nə̀ ləghə zey n khənə n wɔ ghaa loʼ i zey i nuu bənə n wɔ Yeso Klisto n wû u wi wə.

⁹ N gɔŋŋə nə̀ ləghə zey ghaa khənə n wû i ghaa zə i nyîmmə kɔʼɔ ndòw naʼ idzəm. N gɔŋŋə soʼo nə ghaa i loʼ ni keeli isəŋə zey i loʼ nə bòʼ Kəzə̀ sey nə̀ ghaa loʼ ni keeli ghəə zey i kpiilənə nsə i zey i kpiilə way,

¹⁰ sey nə̀ ghaa i loʼ ni sày ghəə ghey a kpiilənə ni ghəŋə, nə̀ abə n tsuʼ fey Yeso Klisto î bənə tii ghaa i zow, khə way bwu i loʼ zə.

¹¹ Ghaa i khə muu i dzuŋu zey wù keelinə n bam i Yeso Klisto. Seynə nkɔʼlə nsə kali wə i loʼ tə̀ Zə̀ kə.

Pɔl muu ni fwaʼ tə̀ Klisto

¹² Waazə ghuŋ ghə, n ləghə nə̀ ghaa keeli tsu nə̀ ghəə ghən a shiənə n kôw mə, a ndzəmə gaamə ni ghəŋə nə̀ tûm i dzuŋu zən zaamə tə ndəm aghə̂.

¹³ Sey, təsawgoʼ tə tədzəm n tɔʼ n naʼ i Roma nsə ghə̂ ghən adzəm fa, ghə khənu nə n loʼ n ndaw tsaʼ boʼnə n loʼ wù kəfwaʼ a Klisto.

¹⁴ Doʼo zuŋ n ndaw tsaʼ zə n ghəŋə nə̀ ndəmə ghə̂ ghən ghə bəghəm tə Yeso a keeli tsu fə̀ŋ. Ghə nya naʼlə nduŋŋə ndòw ghɔɔmə i Kəzə̀ nə̀ ghə khə way tsəŋ zə n fə̀ŋ.

¹⁵ Ghə̂ a loʼ a naʼlə tûm ə Klisto bòʼ təŋkey ghə khə kəghoʼ, ləghə ni baŋŋə fəghəm tə. Ghə̂ a loʼ ghə a kee ndzəmə naʼlə tûm ə Klisto n fə̀ŋ i dzuŋu zə.

¹⁶ A ghən ghə naʼlə tûm n fə̀ŋ tə dzuŋu tə, ghə ghəŋŋə sey təŋkey ghə ləghə mə. Ghə khənu nə Zə̀ kə naŋa mə fa nə̀ n təm tsam ə tûm i dzuŋu zə.

¹⁷ Ghə̂ a loʼ ghey naʼlə dzə way tûm bòʼ Klisto n fə̀ŋ i dzuŋu zə, n təŋkey ghə ləghə nə̀ ghə̂ ghə i dzûmə bə ghə, moʼlə kə nə ghə kuu kpiʼi chɔd wuŋ nghee n loʼnə n ndaw tsaʼ.

¹⁸ Nə̀ ghə ghəŋə kə ngee, chɔd u way! N duʼlə kə nə̀ ghə naʼlə tûm kùm Klisto. Abə à loʼ kə n moʼlə tə dzuŋu tə nkee n moʼlə tə bəbə tə, mə î nam duʼlə kənu.

¹⁹ Mə i nam duʼlənu, n təŋkey, n khənu nə̀ gɔŋŋə i ghaa nsə gaamə zey Yeso Klisto fuunə, Zə̀ kə i bəghəshiənu mə.

²⁰ Moʼlə zuŋ nsə ləghə zuŋ i loʼ nə, kə n nə bwu koʼonə n fwaʼ kuŋ, nə̀ mə î fəd khə fə̀ŋ ni naʼlə tûm i dzuŋu zə, sey nə̀ wû wuŋ udzəm u loʼ ni fuu kɔʼləmə tə̀ Klisto nya nsə nə tənəŋə tədzəm, abə n loʼnə utaw nkee nə̀ mə n kpu.

²¹ Tə̀ mə, abə n muunə n muu bòʼ Klisto, nə̀ n kpuunu, à sey baa loʼ ndzuŋ tə̀ mə.

²² Abə n kee nam muunə fa mbi, n loʼ ni nam fwaʼ fwaʼ kə nii kə. Sey n way ni dza ghəə zey mə i sàynə.

²³ N maŋ loʼ n fə̀ŋ ə ghəə ghən abəghə. N ləghənu ni zəghə mbi zən N ndòw doʼo ghi Klisto, n təŋkey, a dzɔb tsəghə i tii zə.

²⁴ A kee loʼ nə̀ ghəə zey i baa kpiinə, a loʼ tə vən fə uwû fuŋ fə doʼo utaw fa n mbi n tow u ghaa.

²⁵ Nghee tə̀ i loʼnə sey, n khənu nə̀ mə î doʼlənu ghi ghaa, mə i muu ghi ghaa adzəm, tə̀ ghaa loʼ ni nyim n bəghəm i fə̀ŋ zey ghaa khənə, ghaa ndəŋ keeli soʼo iduʼlə n fə̀ŋ tə ghaa.

²⁶ Seynə abə mə i kəm bənə n səə ghaa, ghaa i ndəŋ khə zuŋ ni fuu nkɔʼlə tə̀ Klisto bòʼ ghəə ghey tə ghəŋənə nə tə tsəghə n kow mə.

²⁷ Abə i loʼ kə ngee, ghaa khə ni muu muu i ghaa zə tə̀ tûm i dzuŋu zə kùm Klisto diinə. I loʼ sey nə̀ abə n bənə n sə̀ə ghaa nkee n ka bə koʼ ghaa, nə̀ n zow kə ghaa nə kətuŋŋə, mə i khə nə̀ ghaa dzəŋi tey n fə̀ŋ imɔʼ, dzəŋi təmə tsam ə tûm i dzuŋu zə nə kəfə kəmɔʼ, ni ghəŋə nə̀ ghə̂ a keeli bəghəm i fə̀ŋ tə tûm i dzuŋu i diinə.

²⁸ Kə̂ ghaa nə̂ tsəŋənə ghə̂ a təngəmə a ghaa ghə, keeli tsu na fə̀ŋ. Abə ghaa ghəŋə nə̀ sey, ghə i loʼ ni koʼ n wû i ghə zə nə̀ ghə î ləŋi nu, a i keeli ghaa bəghəshi zə, kùmnə a loʼ Kəzə̀ tə təmə fuunə tsam ə tii tə̀ ghaa.

²⁹ Zə̀ kə ka kad fu kə ghaa n ndzuŋ ə wi nə̀ ghaa bəghəm fu tə̀ Klisto, tə fu soʼo ghaa n daʼa kə tii kə nə̀ ghaa khə ni fəghə bòʼ wi.

³⁰ Ghaa təmə kə tsam i mɔʼɔ zey ghaa â koʼonə mə n təmənə. Ghaa zow soʼonu nə̀ à nam loʼ kə tsam i tii zə n nam təmənə nya.