Efesus 3 - Kaa n Kəzə̀ n fəghə mə

Fwaʼ key Pɔl fwaʼanə tə̀ ghə̂ ghən ghə way ghə̂ a Təjuu ghə

¹ A loʼ boʼ ghəə ghey Zə̀ kə loʼ nə̀ kə n ghəŋŋə ni təmdzəŋi bə ghə̂ a Təjuu nsə ghə̂ ghən ghə way ghə̂ a Təjuu ghə nə kəfə kəmɔʼ, mə Pɔl, n loʼnə wù ndaw tsaʼ a Yeso Klisto n tow u ghaa ghən ghaa way ghə̂ a Təjuu ghə.

² Ghaa khənu nə̀ à loʼ bòʼ ndzuŋ ə Kəzə̀, tə ghəŋənə nə̀ n doʼo wù kəfwaʼ tə̀ ghaa ghən ghaa way ghə̂ a Təjuu ghə.

³ Zə̀ kə a chi dii ghəə a wi ghey tə â nyì naŋanə tə̀ mə, tə̀ n nyaʼi tɔ̀ɔ tsəələ tsunə fa.

⁴ Abə ghaa i tɔŋɔ kɔʼnə ghəə a tii ghə, ghaa i zoʼlə aghəə boʼ ghəə ghey n zowkeelinə n ghəə ghey Klisto â nyì naŋanə.

⁵ N tsuʼu n sə̂ i sə mə, Zə̀ kə â ka chi dii ghəə a tii ghə tə̀ ghə̂ ghə. Zə̀ kə chi dii bə ghəə a tii ghə nyisa n daʼa kə Zay kə Zow kə tə̀ tûm tə Kəzə̀ tə nsə ngəd tə Yeso tə zow tə.

⁶ Ghəə zey Zə̀ kə â nyi naŋanə loʼ nə̀, n bam i tûm i dzuŋu zə, ghə̂ ghən ghə way ghə̂ a Təjuu ghə, nya loʼ nə kəfə kəmɔʼ ghi ghə̂ a Təjuu ghə. Ghə nya loʼ tə̀ a loʼ wù umɔʼ. Sey, ghə i dzəŋi keelinu fə̂ key Zə̀ kə təb naŋanə tə̀ ghə̂ a wi ghə n bam i Yeso Klisto.

⁷ N bam i ndzuŋ ə Kəzə̀ nsə daʼa kə wi, n loʼ wù kəfwaʼ a wi ni naʼlə tûm i dzuŋu zən.

⁸ Abə a tɔʼ laalə tsunə n ghə̂ a kəfwaʼ a Kəzə̀ adzəm, n ka kɔʼ kpii dzə ni doʼo wù kəfwaʼ a wi n fwaʼ kən. N ndzuŋ ə wi, tə u nam fuu mə n kɔb k-a-fwaʼ kən ni naʼa tûm i dzuŋu zə, dii ndow ndzuŋ zən i loʼnə n bam i Klisto tə̀ ghə̂ ghən ghə way ghə̂ a Təjuu ghə.

⁹ Sey nə̀, n chi dii tə̀ ghə̂ ghə adzəm fa n mbi, ghəə ghən Zə̀ kən kə â bɔmnə fə wə udzəm â nyi naŋanə n num tə sə isə tə.

¹⁰ Moʼlə i wi zə â loʼ nə̀ ghə̂ a dzəŋi kə dzûmə tə Klisto ghə i loʼ ni dii tɔb u Kəzə̀ u nii wə tə̀ daʼa wey u saʼanə ghə̂ ghey ghə loʼnə n tənə ghə n luʼu tə idəŋ tə.

¹¹ Ghəə a tii ghə â loʼ tsənu n fə̀ŋ ə Kəzə̀ nə nzeyyə, tə u fwaʼ naŋa bənə nya tə̀ tə â bayyə naŋanə n bam i Yeso Klisto, Mûkəbii ə saa.

¹² Sey, saa loʼnu nyisa ni ndow n səə Kəzə̀ nə̀ saa khə way tsəŋ zə, tə i kpiney saa nghee saa loʼnə nə kəfə kəmɔʼ ghi Klisto nsə bəghəm i fə̀ŋ zən saa khənə n kow wi.

¹³ Waazə ghə, a wən loʼ ghə i tii zə n dzanə nə̀, i kə fə̀ŋ nə baŋanə ghaa bòʼ chɔd mən n keelinə n tow u ghaa. N saa fəʼlə nə̀ ghaa i keeli nkɔʼlə.

Ləghə zey Klisto khənə n kow ghə̂ ghə

¹⁴ À wən loʼ zuŋ key n təmənə nguʼ tə n tənə Bày saa, gɔŋŋə tə̀ wi.

¹⁵ Tə loʼ Bày tə bɔmnə fə̂ wən fa mbi udzəm, tɔŋŋə fə̂ wən u loʼnə idəŋ nsə fa aghəd.

¹⁶ N gɔŋŋə tə̀ Zə̀ kə nə̀ n ghaʼ i wi i nii zə, tə kuu bə daʼa kə wi n kow ghaa n bam i Zay kə Zow kə, nə̀ ghaa i taw n fə̀ŋ tə ghaa.

¹⁷ N gɔŋŋə soʼo nə̀ Klisto î muu n fə̀ŋ tə ghaa bòʼ bəghəm i fə̀ŋ zey ghaa khənə. Mə n gɔŋŋə soʼonə nə̀ ghaa səd doʼo dzɔb tsu n ləghə zey ghaa khənə n kow Zə̀ kə nsə n wû i ghaa.

¹⁸ N gɔŋŋə nə̀, ghaa ghi ghə̂ a Kəzə̀ ghə adzəm i loʼ ni zowkeeli ndzoʼo ləghə i nii nii zey Klisto khənə n kow ghaa.

¹⁹ Nsə sey, ghaa i loʼ ni tɔʼ zowkeeli tsu ləghə i Klisto zən i tsəghəshinə tɔb wə udzəm, sey nə̀ ghaa i loʼ ni keeli mwam u Kəzə̀ udzəm.

²⁰ Kɔʼlə n ndzəm n loʼ tə̀ Zə̀ kə, Zə̀ kən kə loʼnə ni ghəŋə aghəə adzəm n bam i Zay kə Zow kən kə muunə n fə̀ŋ, tə buʼ ghəŋə tsəghəshinə ghəə ghey adzəm saa â bəbnə nkee saa â moʼlənə.

²¹ Kɔʼləmə i loʼ tə̀ wi n dzəŋi kə dzûmə tə Klisto, kɔʼlə mə i loʼ tə̀ wi n doʼo i saa ghi Yeso Klisto num tə num, tə̀ mbi nə bə may! Zə i loʼ sey.