Efesus 2 - Kaa n Kəzə̀ n fəghə mə

Ghaa nya khə muu i fəghə zə

¹ Sə̂ i sə, ghaa â loʼ tsə tə̀ a loʼ ghə̂ ghey ghə kpu doʼonə boʼnə ghaa â naŋŋə way laŋ u Kəzə̀ wə, ghəŋŋə soʼo ghəə a bəbə ghə.

² Ghaa â muu tsə nə̀ ghaa dzûmə ndow ghəə a mbi a bəbə ghə, zow laŋ u Satan, Zay kə bəbə kən kə saʼanə zay u bəbə wən u loʼnə idəŋ. À loʼ wi tə fwaʼanə n kow ghə̂ ghən ghə naŋŋə way laŋ u Kəzə̀ wə.

³ Saa adzəm saa â muu tsə tə̀ a loʼ ghə nghee saa â ləghənə fə u mbi wə, ghəŋŋə ndow kə ghəə ghən wû i saa nsə fə̀ŋ tə saa tə ləghənə. Saa â maŋ loʼ tə̀ a loʼ fə u wə ivə, ləmə kə nə̀ nghee tə̀ Zə̀ kə loʼ nə̀ kə n fəələ nəghə wə ghi saa, kə chɔd saa ighələ tə kə i chɔdlɔnə ghə̂ a mbi a loʼ ghən ghə nam ghəŋŋənə ghəə a bəbə ghə.

⁴ À kee loʼ kə nə̀ Zə̀ kə ngii khə sî i kwɔɔlə zə, tə ngii ləghə saa naʼ idzəm.

⁵ Sey, nghee tə̀ saa â loʼnə tə̀ a loʼ ghə̂ ghey ghə kpu doʼonə bòʼ ghəə a saa a bəbə ghə, tə n fuu saa n muu zə nya nghee saa loʼnə nə kəfə kəmɔʼ ghi Klisto. À loʼ bòʼ ndzuŋ ə Kəzə̀, saa keelinə bəghəshi zə n bəb i saa.

⁶ Zə̀ kə zhəm nuu dzəŋŋə bə saa nə ivə nghee saa loʼnə nə kəfə kəmɔʼ ghi Yeso Klisto, tə u ghəŋə soʼo nə̀ saa doʼo ghi wi idəŋ.

⁷ Zə̀ kə â ghəŋə sey, sey nə̀, n num tən tə bəghənə, tə i loʼ ni dii ndzuŋ ə wi naʼ idzəm tə̀ ghə̂ ghə nsə ləghə i wi zən i ghəŋŋə nə̀ saa i loʼ nə kəfə kəmɔʼ ghi Yeso Klisto.

⁸ À loʼ bòʼ ndzuŋ ə Kəzə̀ ghaa keelinə bəghəshi zə n bam i bəghəm i fə̀ŋ. Â ka ghaa ghəŋə dzə, à maŋ loʼ naamə K-a-zə̀.

⁹ A way dzə bòʼ fwaʼ kə ngəŋ kə ghaa Zə̀ kə bəghəshinə ghaa, à loʼ boʼ fə̀ŋ i dzuŋu zey Zə̀kə khənə n kow ghaa, tə bəghəshinə ghaa. Sey, kə̂ wù nə ghaŋŋənə wû u wi wə.

¹⁰ À loʼ Kəzə̀ tə fwaʼ naŋa bənə saa tə̀ saa loʼnə nya boʼnə saa loʼ nə kəfə kəmɔʼ ghi Klisto. Tə saa bɔm nə̀ saa i loʼ nə kəfə kəmɔʼ ghi klisto sey nə̀ saa i loʼ ni fwaʼ fwaʼ kə dzuŋu kə, tɔŋŋə ghəə a dzuŋu ghey Zə̀ kə â khə bayyə naŋanə tə̀ saa nə̀ saa i ghəŋŋə.

Ghə̂ ghey ghə bəghəmnə tə̀ Klisto loʼ nə kəfə kəmɔʼ

¹¹ Kə ghaa nə neyzəənə nə̀ ghaa ghən ghaa way ghə̂ a Təjuu, ghaa â loʼ tsə ghə̂ a tətùm. Ghə̂ a Təjuu ghə â tɔŋŋə tsə ghaa nə̀ ghaa loʼ ghə̂ ghən ghə ka səghə tyi u ghə. Ghə̂ ghən ghə ghaŋŋənə wû zə nə̀ ghə loʼ ghə̂ a Kəzə̀ boʼnə ghə n səghə tyi u ghə wə, loʼ sey nə̀ à maŋ loʼ kə n gow uwû, a way n fə̀ŋ.

¹² N tsuʼu n tii mə, ghaa â buʼ khə way Klisto, ghaa â way dzə n taŋ a ghə̂ ghey Zə̀ kə sàynə, tɔŋŋə ghə̂ ghə Izree. Ghaa n khə way ghə i loʼ zə kuum kaa n tii mə nsə təb key Zə̀ kə â təb naŋanə tə̀ ghə̂ a wi ghə. Ghaa n muu fa n mbi nə̀ ghaa khə way Zə̀ kə, ghaa n buʼ khə way moʼlə zə ni kɔʼ idəŋ n səə Kəzə̀.

¹³ À kee loʼ nə nghee ghaa loʼnə nə kəfə kəmɔʼ ghi Yeso Klisto, ghaa ghən ghaa â lɔʼlə loʼnə, ghaa n kuʼlə doʼo bə nyisa n səə Kəzə̀ n bam i kaŋ tə Klisto.

¹⁴ Klisto loʼ wù wən tə ney bə buulə zə n fəŋŋə kə saa. À loʼ wi tə təm naŋa dzəŋi bə ghə̂ a Təjuu ghə ghi ghə̂ ghən ghə way ghə̂ a Təjuu ghə nə kəfə kəmɔʼ. À saʼ maʼa wi fə key kə â ghəŋŋə nə̀ ghə dzawwə doʼo nsə nə̀ ghə i khə ngəmə tə n wû i ghə.

¹⁵ Tə a buu naŋa ndow laŋ u ghə̂ a Təjuu nghee tə â kpunə n zat kə fəkaʼ. Sey tə ney kɔʼ naʼa tən təbəghə, təm naŋa dzəŋi bə ghə nə̀ ghə doʼo bə kəfə kəmɔʼ ghi wi. À wən loʼ nghee tə â bayyə naŋa bənə ghə nə kəfə kəmɔʼ nə̀ ghə i loʼ nə ibuulə.

¹⁶ A loʼ n və i wi n zat kə fəkaʼ tə ghəŋə nə̀ baa zə iwû zey ghə a khənə i may. A loʼ n bam i və i wi n zat kə fəkaʼ tə ghəŋə nə̀ naʼa tən təbəghə, tə doʼo bə nə kəfə kəmɔʼ, ney dzəŋŋə bə ghə n səə Kəzə̀.

¹⁷ Sey Klisto bə ni bə naʼa tûm i dzuŋu zən i fuunə buulə zə tə̀ ghə̂ ghə adzəm. Tə̀ ghaa ghən ghaa way ghə̂ a Təjuu ghə, ghaa kam tɔʼ khə way Zə̀ kə nsə tə ghə̂ a Təjuu ghə, ghə loʼ dzənə waa a dzəŋi kə dzûmə tə Klisto ghə.

¹⁸ À loʼ n bam i Klisto saa dzəŋi loʼnə ni bə n sə̂ K-a-zə̀ n daʼa kə Zay kə Zow kə.

¹⁹ Sey, ghaa kəm way dzə ghə̂ a tətûm nkee ghə̂ a bwey bəghə ghə. Ghaa nya loʼ ghə̂ ghə inaʼ ghi ghə̂ a Kəzə̀ ghə, ghaa shinə n sad i kəbii i Kəzə̀.

²⁰ Ghaa loʼ soʼo dzəŋi kə dzûmə tə Klisto kə səd doʼonə n tsə̂ kə ngəd tə Yeso nsə tûm tə Kəzə̀ tə. Yeso Klisto n wû u wi wə, loʼ tə a loʼ tay i bow i ndaw n ndaw tii.

²¹ À loʼ wi tə kwu keelinə ndaw tii, ghəŋŋə nə̀ zə i nyîmmə kɔʼɔ tə̀ a loʼ dzəŋi kə dzûmə tə Klisto kə zow kə ghə səd naŋanə ni ngɔɔmə Mûkəbii.

²² A loʼ soʼo n kow wi Zə̀ kə təm naŋa dzəŋi bənə ghaa ghi ghə̂ a Təjuu ghə, nə̀ ghaa i loʼ ndaw imɔʼ zey Zə̀ kə muunə tii n zay kə wi.