Efesus 1 - Kaa n Kəzə̀ n fəghə mə

Tɔŋɔ zow i Pɔl tə̀ ghə̂ a Efesus ghə

¹ À màʼlə kən tɔ̀ɔ bə mə Pɔl. Zə̀ kə n say mə nə̀ n doʼo ngəd ə Yeso Klisto. N tɔ̀ɔ bə tə̀ ghə̂ a Kəzə̀ ghən n naʼ i Efesus ghə bəghəmnə tə̀ Yeso Klisto, taw dzɔbə n bəghəm i fə̀ŋ i ghə.

² N gɔŋŋə nə̀ Zə̀ kə, tə loʼnə Bày saa nsə Mûkəbii Yeso Klisto fuu ghaa n ndzuŋ nsə buulə.

Buulə zey ghə̂ a Kəzə̀ a keelinə abə ghə loʼ ghi Klisto

³ Kɔʼlə n loʼ tə Zə̀ kə, Bày Mûkəbii saa Yeso Klisto. Tə n fuu saa n buulə i Zay kə Zow kən kə nuu bə idəŋ nghee saa loʼnə nə kəfə kəmɔʼ ghi Klisto.

⁴ Zə̀ kə mâ khə sày saa nə̀ ghə ka mbi kam bɔm, nə̀ saa i loʼ ghə̂ a wi ghə nghee saa loʼ nə kəfə kəmɔʼ ghi Klisto, sey nə̀ saa i zow, khə way dzə u loʼ wə n sə kə wi. Bòʼ ləghə zən tə khənə n kow saa,

⁵ tə mâ khə bayyə naŋa nə̀ saa i bə doʼlə waa a wi n bam i Yeso Klisto, n təŋkey, â loʼ ghəə zey tə â tsəm tsu ni fwaʼ n fə̀ŋ ə wi i dzuŋu zə.

⁶ Tə â ghəə ghən ghəŋə sey nə̀, saa i kɔʼlə wi bòʼ ndzuŋ ə wi i nii zən tə funə tə saa naʼ idzəm n bam i Waa wi wən tə gaʼnə fə̀ŋ.

⁷ A loʼ Klisto tə kùmshinə saa n kàŋ tə wi tən tə â fəələnə n zat kə fəkaʼ, neyzəə ghəə a saa a bəbə ghə. Zə̀ kə ghəə ghən ghəŋŋə bòʼ ndzuŋ ə wi zən i downə naʼ idzəm.

⁸ Zə̀ kə n maŋ feeli fuu saa n ndzuŋ ə wi idzəm, fuu saa n tɔb wə nsə zowkeeli zə.

⁹ Tə chi dii bə ghəə a wi ghey ghə â nyì doʼonə tə̀ saa, tə̀ tə â bayyə naŋa n ləghə i fə̀ŋ i wi ni fwaʼ n bam i Klisto.

¹⁰ Zə̀ kə â bayyə naŋa nə̀, abə nəŋə zey tə sàynə î kpii tsunə, tə i ney naŋa bə fə udzəm fa n mbi n tənnə Klisto, tɔŋŋə, fə wey u loʼnə idəŋ nsə u wən u loʼnə fa a ghəlitsə.

¹¹ À loʼ nghee saa loʼnə nə kəfə kəmɔʼ ghi Klisto, Zə̀ kə say soʼonə saa nə̀ saa keeli naamə key tə â naʼa naŋanə. Tə n bɔɔmə fwaʼ kɔʼ bə aghəə adzəm tə̀ tə â moʼlə naŋanə ni fwaʼ, tə n bayyə naŋa i tsu.

¹² Tə ghəə ghən ghəŋə sey nə̀, saa ghən saa loʼnə ghə̂ a sə̂ isə ghə ni gaʼ fə̀ŋ n kow Klisto, saa i muu ni fuu nkɔʼlə tə wi kuum ghaʼ i wi.

¹³ Ghaa â zow soʼonu isəŋə, tɔŋŋə tûm i dzuŋu zən i fuunə ghaa n bəghəshi zə. Ambə ghaa bəghəmnə tə̀ Klisto, Zə̀ kə n fuu ghaa n tsəə zey tə â təb naŋanə, tɔŋŋə Zay kə Zow kə, ni dii nə̀ ghaa loʼ ghə̂ a wi.

¹⁴ Zə̀ kə fuu saa n Zay kə Zow kə tə̀ a loʼ tsəə nə saa i keelinu naamə key nsə bəghəshi zey Zə̀ kə təb naŋanə, sey nə̀, saa i kɔʼlə wi bòʼ ghaʼ i wi.

Pɔl gɔŋŋə tə̀ ghə̂ a dzəŋi kə dzûmə tə Klisto n Efesus

¹⁵ Ni ney nuu bə n nəŋə zey mə â zownə nə̀ ghaa n bəghəm tə̀ Mûkəbii Yeso, zow soʼo ləghə zey ghaa khənə n kow ghə̂ a Kəzə̀ ghə,

¹⁶ N ka kam buu doʼo tsə ni gɔŋŋə tə̀ ghaa, fuu kəzɔŋŋə tə̀ Zə̀ kə bòʼ ghaa.

¹⁷ N gɔŋŋə nə̀ Zə̀ kə, tə khənə ghaʼ zə idzəm, tɔŋŋə bày Mûkəbii saa Yeso Klisto fuu ghaa n zay kən kə fuu tɔb wə nsə zay kən kə chiə diinə ghəə a Kəzə̀ ghə sey nə̀, ghaa tɔʼ keeli tsu wi.

¹⁸ N gɔŋŋə soʼo nə̀ fə̀ŋ tə ghaa tə chi kɔʼ ni koʼ tsə ə Kəzə̀, sey nə̀, ghaa i loʼ ni tɔʼ zowkeeli ghəə ghey ghaa gaʼnə fə̀ŋ tii tə̀ a loʼ ghə̂ a Kəzə̀. N ləghə nə̀ ghaa zowkeeli tsu naamə kə nii key nsə buulə zey tə â təb naŋanə ni fu tə̀ ghə̂ a wi ghə.

¹⁹ N gɔŋŋə soʼo nə̀ ghaa zowkeeli tsu ndzoʼo daʼa kə nii kən Zə̀ kə khənə, nə̀ wù ndɔm way ni fòʼlə. À loʼ daʼa kə tii kə, kə fwaʼanə n kow saa ghən saa bəghəmnə tə̀ wi,

²⁰ kə key tə â diinə n kow Klisto nghee tə â zhəm dzəŋŋə bənə wi nə ivə. Ney naŋa kɔʼ wi n kpii u wi u təmə wə n fɔ̀ɔ u wi idəŋ.

²¹ Fu tii idəŋ, Klisto tsəghəshi udə̀ŋ udzəm, daʼa kə wi kə tsəghəshi udaʼa udzəm, saʼ i wi i tsəghəshi isaʼ idzəm fa mbi, zəd zey tə khənə, tsəghəshi azəd adzəm fa n mbi nsə n mbi zən i nə̂ bəghənə.

²² Sey, Zə̀ kə n ney naŋa bə fə wə udzəm n tənnə Klisto, tsuʼ naŋa kɔʼ wi tə̀ a loʼ kətow n dzəŋi kə dzûmə tə Klisto nə̀ tə i saʼa fə wə udzəm.

²³ Ndaw Kəzə̀ loʼ wû u Klisto, i ghəŋŋə nə̀ tə i loʼ may n wû u wi ighələ tə̀ tə kwɔɔ keelinə fə wə udzəm fa n mbi nə zə i loʼ may idzəm.