Chi dii 9 - Kaa n Kəzə̀ n fəghə mə

Tsəndəghə Kəzə̀ zey nə ulii utaa tɔŋ sɔŋ i wi

¹ Tsəndəghə Kəzə̀ zey zə â loʼ nə ulii utaa n tɔŋ tsu sɔŋ i wi. Mə n koʼ tsu fəsəghəbələ fə â nuu bə n bikighow bwu tsu bə n ghəlikətsə. Ghə n fuu ndow wi n chi kə fɔŋŋə k-a-buʼ key kə kuʼu way.

² Ambə tə chi kɔʼ fɔŋŋə k-a-bùʼ kə tii kə, dəm kə unyoʼ kə n shi kɔʼ tə a loʼ nyoʼ kən kə shiənə abə kaʼ u fəənə n num. Nyoʼ key kə â shiənə n fɔŋŋə k-a-buʼ kə key n ghəŋə nə̀ ləm kə bwu kəŋ naŋa kɔʼ inyi nsə bikighow kə.

³ Bii tə n shi tsu bə n nyoʼ kə tii kə, tsu bə n ghəlikətsə nə̀ ghə n fuu ghə n ndzoʼo daʼa key naŋ tə ghəlikətsə tə khənə.

⁴ Ghə n dza tə ghə nə̀ kə ghə nə nyîmmənə ghii wə fa a ghəlitsə nkee nkaʼ nkee fə̂ kə loʼ kə, kə nyimmənə fa a ghəlitsə. Ghə loʼ kə ni nyimmə ghə̂ ghən ghə khə way tsə̀ə Kəzə̀ n tûm usə u ghə.

⁵ Ghə ka fuu dzə bii tey n daʼa kə ni wey aghə̂, ghə â kee fuu kə ghə n daʼa kə ni fuu ghə n fɔɔbə zə nə uwû nə təndzɔŋɔ tətaa. Fɔɔbə zey bii tən â fuunə n loʼ tə a loʼ i zey wù keelinə abə naŋ təghə tsunə wù.

⁶ N ndzɔŋɔ tən tətaa, ghə̂ ghə i nɔɔ ndow və zə, ghə i koʼo way, ghə i mbuŋŋə ni kpu, və zə i tyi ghə.

⁷ Bii tə tii tə â loʼ tə a loʼ ukhinyam ghə bayyə naŋa ni zuu tsam. Ghə n dzəŋə keeli fə u loʼ wə tə a loʼ taŋŋə kə fɔɔ nə̀ ghə faalə tsu ni itsàa, tûm təsə n ghə mə n fiilə tûm usə u wù sɔŋtsuʼ.

⁸ Nyuŋ tə ghə tə n daabə tə a loʼ nyuŋ tə agheyzən, sɔŋ a ghə ghə n loʼ tə a loʼ sɔŋ i dəmow.

⁹ Ghə n dzəŋə keeli fə̂ u loʼ wə n kəmmə u ghə ghə faalə nə kəvuʼ. Ghaw tə ghə tə n fuŋu tə a loʼ dəm kə ukhinyam nsə kaya tə ukhinyam ghə nyəŋə ndownə n bəghə i tsam.

¹⁰ Kuu tə ghə nsə fəd tə ghə tə n loʼ tə a loʼ kuu tə naŋ nsə fəd tə naŋ tə. Tə n khə kədaʼa ni təghə wù tə zow ifɔɔbə nə təndzɔŋɔ tətaa.

¹¹ Ghə n khə də̀ŋ kə ghə nə a loʼ tsəndəghə zey i laalə fɔŋŋə k-a-bùʼ key kə kuʼu way. Zəd i wi n ghɔɔmə Hibru n loʼ nə̀ a loʼ Abadɔn. N ghɔɔmə i Grik, zə n loʼ nə̀ a loʼ Apoliɔn i diinə nə̀ a loʼ wù wey tə ləŋi maʼanə ghə̂ ghə.

¹² À wən loʼ ngoʼ i sə̂ isə i tsəghə nuu ndownə. Tə doʼo səə təbəghə tə nam bəghənə.

¹³ Tsəndəghə Kəzə̀ zey nə ulii utuubə n tɔŋ tsu sɔŋ i wi. Mə n zow ndow dzə i nuu bənə n ndɔŋ tey təkaykə tə â loʼnə n ngaŋŋə tey n tsə zey ghə fəələnə maʼlə wə tii nə̀ ghə faalə nə itsàa n sə kə Zə̀ kə.

¹⁴ Dzə̀ ə tii n dza ndow tə tsəndəghə Kəzə̀ zey nə ulii utuubə i khənə sɔŋ zə nə̀, “Zii zəghə tsu tsətəndəghə tə Kəzə̀ tey təkaykə ghə kow naŋanə n dzuu i nii zey ghə tɔŋŋə nə̀ a loʼ Yufratis!”

¹⁵ Sey, ghə n zii zəghə tsu tsətəndəghə tə Kəzə̀ tey təkaykə. Ghə a ney naŋa tsətəndəghə tə Kəzə̀ tən nə̀ ghə i ləŋi maʼa kəbad kəmɔʼ nə tədzawwə tətəghə fa a ghəlitsə n nəŋə zən, tsuʼ fə fən, ndzɔŋ i zən nsə n num kə kən.

¹⁶ Ghə n dza bə taŋ ə sawgoʼ tən tə nyəŋənə khinyam wən tə mə. Taŋ ə tii loʼ bɔm tə ndangaŋ nbɔm nbəghə (200,000,000).

¹⁷ N jim wuŋ, mə n koʼ ndow khinyam wey nsə ghə̂ ghey ghə nyəŋənə khinyam u tii wə. Ndzə̂ tə tsam tey ghə̂ ghey ghə â nyəŋənə khinyam u tii wə â dzəŋə keelinə n kəmmə u ghə â baŋa tə a loʼ uvələ, ləŋə tə a loʼ bikighow, zowwə tə a loʼ Sɔlfɔ. Tow wə ukhinyam wey n loʼ tə a loʼ tow u dəmow. Uvələ, kənyoʼ nsə Sɔlfɔ n shiə bə n dzuu i khinyam kə tii kə.

¹⁸ Ghə n weyyə maʼa tsu kəbad kəmɔʼ nə tədzawwə tətəghə tə loʼnə ighələ nə aghə̂ fa a ghəlitsə bòʼ zəŋ tən tətəghə. Zəŋ tən tətəghə tɔŋŋə uvəllə, kənyoʼ nsə Sɔlfɔ â shiə bə n dzuu zə ukhinyam wey.

¹⁹ Daʼa kə ukhinyam u tii wə â loʼ n dzuu a ghə nsə n kuu tə ghə. Kuu tə ghə tə loʼ tə a loʼ tə zuu tən tə khənə tow wə ni tsowwə ghə̂ ghə a tii nə̀ ghə zow ifɔɔbə.

²⁰ Taŋ aghə̂ ghən ghə â doʼo səə nə̀ ghə ka kpu n zəŋ tən, n ka tsəm kwey fə̀ŋ tə ghə ni ngɔɔmə muʼu mən ghə faalə kɔʼnə. Ghə n ka buu doʼo soʼo ni ngɔɔmə avəətsəə nsə muʼu mən ghə bɔm kɔʼ nə itsàa, tsâa zə shɔlɔ, tsâa i kəbwu, nə atay nsə muʼu mən ghə kɔm kɔʼ nə nkaʼ. Fə wən udzəm koʼo way sə̂ ghə, zow soʼo way tuŋŋə wə, bwey soʼo way.

²¹ Ghə n ka kwey fə̀ŋ tə ghə ni weyyə ghə̂ ghə, ni ghəŋŋə ghəə fənnə ghə, ghəə laŋŋə ghə nsə ghəə tsɔŋɔ ghə.