Chi dii 7 - Kaa n Kəzə̀ n fəghə mə

Ghə̂ ghə Izree 144,000

¹ Ambə n koʼ may tsunə jim mən bòʼ mə̀ŋ tey, mə n koʼ ndow tsətəndəghə tə Kəzə̀ təkaykə tə teynə n bow tən təkaykə fa a ghəlitsə. Ghə n fìi naŋ tsu zəŋ tən təkaykə tə tsəghənə a ghəlitsə ni ghəŋə nə̀ kə zəŋ nə tsəghənə a ghəlitsə nkee n nali kədzuu nsə nə nkaʼ.

² Mə n daŋŋə koʼ ndow tsəndəghə ə Kəzə̀ u loʼ wə tə nuu bə n bad key nyi i shiə kɔʼ bənə a tii nə̀ tə n kwu keeli tsəə zey Zə̀ kə idəŋ kə tsəələ naŋŋə ghə̂ ghə a tii. Tə n tɔŋɔ shi kɔʼ n dzə̂ i taw zə tə tsətəndəghə tey təkaykə, Zə̀ kə fuu naŋa ghə n daʼa kə ni nyimmə ghəlikətsə nsə nali kə dzuu.

³ Tsəndəghə ə Kəzə̀ zey n buʼ shi kɔʼ kəbɔŋ dza nə̀, “Kə wə i nyimmə bəəbə ghəlikətsə, nali kə dzuu nkee nkaʼ nə ghə ka kam kuu tsəə n tûm usə̂ u ghə̂ a kəfwaʼ a Zə̀ kə ghey.”

⁴ Sey, mə n zow taŋ aghə̂ ghey ghə a khənə tsə̀ə, zə n loʼ aghə̂ təkam fəbɔm nsə kam tə nghəm kaykə kam tə təkaykə (144,000) ghə shi n sali ndaw tən ighəm nsə ghii tə təbəghə n naʼ zə Izree.

⁵ N sali ndaw i Juda, a n loʼ aghə̂ tə kam ighəm nsə kam tə tə bəghə (12,000), n sali ndaw i Ruben, à n loʼ aghə̂ təkam ighəm nsə kam tə tə bəghə (12,000), n sali ndaw i Gad, a n loʼ aghə̂ tə kam ighəm nsə kam tə tə bəghə (12,000).

⁶ N sali ndaw i Asha aghə̂ təkam ighəm nsə kam tə tə bəghə (12,000), n sali ndaw i Naftali, à loʼ aghə̂ təkam ighəm nsə kam tə təbəghə (12,000), n sali ndaw i Manase, aghə̂ təkam ighəm nsə kam tə təbəghə (12,000),

⁷ N sali ndaw i Simiɔŋ, aghə̂ təkam ighəm nsə kam tə təbəghə (12,000), n sali ndaw i Levi, aghə̂ təkam ighəm nsə kam tə təbəghə (12,000), n sali ndaw i Isaka, aghə̂ təkam ighəm nsə kam tə təbəghə (12,000),

⁸ n sali ndaw i Zebulun, aghə̂ təkam ighəm nsə kam tə təbəghə (12,000), n sali ndaw i Yosef, aghə̂ tə kam ighəm nsə kam tə təbəghə (12,000), n sali ndaw i Benjamin, aghə̂ təkam ighəm nsə kam tə təbəghə (12,000).

Nɔɔ kə aghə̂ kə nii kə loʼ idəŋ

⁹ Ambə jim wən i tsəghə tsunə, mə n koʼ ndow n sə̂ kuŋ nɔɔ kə aghə̂ kən wù way ni taŋ ghə shinə n sali ndaw tədzəm, naʼa tədzəm, nə təluʼu tədzəm nsə n ghɔɔmə tə naʼa tə tətûm tədzəm. Ghə n tey n sə kə kuu kə fɔɔ key nsə Waa Nji zey nə̀ ghə n dzəŋə keeli ndzə̂ tə fəmə tə nə uwû, khə soʼo utsəghə nə awɔɔ.

¹⁰ Ghə n dza shiə kɔʼɔ n dzə i taw zə nə̀, “À loʼ Zə̀ kə saa key kə doʼnə n kuu kə fɔɔ idəŋ nsə Waa Nji zey, ghə bəghəshiənə ghə̂ ghə!”

¹¹ Tsətəndəghə tə Kəzə̀ tey tədzəm n təmi dzəŋ tsəghə bə kuu kə fɔɔ key, ngəd tey nsə fə wey ukaykə u loʼnə utaw. Ghə n daŋŋə bwu fəə ndow tûm n təsə̂ a ghəlitsə, fuu ndow nkɔʼlə Zə̀ kə.

¹² Ghə n dza, “Zə i loʼ kə sey. Ukali nsə kɔʼlə mə, utɔb, nsə zɔŋŋə kə fuu kə, nsə ngɔɔmə zə, kədaʼa nsə taw zə a khə Zə̀ kə ghey tə̀ mbi nə bə may. Zə i loʼ sey!”

¹³ Sey, ngəd u loʼ wə n bəb bə tə mə nə̀, “À wən loʼ ghə ndee sa ghə khə ndzə tə fəmmə tə ə? Ghə nuu bə ghee?”

¹⁴ Mə n beeli ndow wi dza “Mûkəbii, wə khənu.” Tə n dza, “À wən loʼ ghə̂ ghən ghə nɔb shi bənə n ngoʼ i nii zə. Ghə n ney kɔʼ kaŋ tə Waa Nji tən tə â fəələnə, sow kɔʼ ndzə̂ tə ghə tii nə̀ tə i fəmə.

¹⁵ Sey, ghə loʼ n sə̂ kə kuu kə fɔɔ u Kəzə̀, fwaʼa tə Zə̀ kə n tsə tə nsə n tsuʼu n fəə kə wi. Wù wey tə doʼnə n kuu kə fɔɔ key, tə i laalə tə ghə nghee tə doʼ dzə ghi ghə.

¹⁶ Dzəŋ nə kəm zab koʼ way ghə, fə̀ŋ ə mmuu nə kəm zuʼlə koʼ soʼo way ghə. Tsə̂ nə kəm zuʼ koʼ way ghə, zuʼ kə num kə nə kəm fɔɔ koʼ soʼo way ghə,

¹⁷ n təŋkey, Waa Nji wən tə baa loʼ kuu kə fɔɔ kə tii kə, tə i laalə tə ghə tə wù baʼa u tənjì u laalənə tə njì tə wi tə. Tə i ney ndow ghə n tɔŋ n tədzuu mən mmuu n tii n fuunə muu zə. Zə̀ kə i zəd maʼa sə̂ mey n dzəm n sə̂ a ghə.”