Chi dii 6 - Kaa n Kəzə̀ n fəghə mə

Ujim bòʼ mə̀ŋ tə sə isə tən tətuubə

¹ Nya, mə n koʼ ndow nghee Waa Nji zhwey nuu kɔʼ mə̀ŋ i sə̂ isə zə n luʼu key ghə nɔm naŋanə n mə̀ŋ tey təsəghəmbəghə. Mə n zow ndow soʼo kəfə kəmɔ̀ʼ n fə̂ wey ukaykə u loʼnə utaw kə dza shiə kɔʼɔ n dzə̀ i loʼ zə i kəmənə tə a loʼ ighow nə̀, “Bəghə!”

² Mə n laalə, daŋŋə koʼ ndow khinyam kə fəmə kə. Wù wey tə nyəŋənə bənə tii n khə mwàa n wɔɔ. Ghə n fuu ndow wi n taŋŋə kə fɔɔ kə. Tə n nyəŋ shi ndow tə a loʼ wù tə təm zə̂ khəələnə tsam tə ni ndow təm zə̂.

³ Ambə Waa Nji zey zhwey nuu kɔʼ mə̀ŋ zey nə ulii ubəghə, mə n zow ndow fə key kə loʼnə utaw nə ulii ubəghə, dza tsu nə̀, “Bəghə!”

⁴ Khinyam kə loʼ kə n shi bə, nə̀ kə baŋanu. Ghə n fuu tsu kədaʼa tə wù wey tə nyəŋənə, nə̀ tə ney nuu kɔʼ ibuulə fa a ghəlitsə, tə ghəŋə soʼo nə̀ ghə̂ ghə i weyyə wû i ghə zə. Ghə n fu wi n kɔb i nii zə.

⁵ Ambə Waa Nji zey zhwey nuu kɔʼ mə̀ŋ zey nə ulii utəghə, mə n zow ndow fə key kə loʼnə utaw nə ulii utəghə kə dza tsu nə̀, “Bəghə!” Mə n laalə, koʼ ndow khinyam kə ləŋə kə. Wù wey tə â nyəŋənə khinyam kə tii kə n khə təfoʼ təbəghə n wɔ̀ kə wi.

⁶ Mə n daŋŋə zow dzə̀ i fuŋunə tə a loʼ dzə̀ i nuu bənə n fəŋŋə kə fə wey ukaykə u loʼnə utaw. Zə n dza nə̀, “Kaŋa fə asəb fə i kwɔɔ wən i wù kəfwaʼ nə fətsuʼ, wɔɔ tə akuu tətəghə tə kwɔɔ soʼo wən i wù kəfwaʼ nə fətsuʼ. I kə wə nə kee bəəbə maʼanə mbvə mə nsə nlə mə.”

⁷ Ambə Waa Nji zey zhwey nuu kɔʼ mə̀ŋ zey nə ulii ukaykə, mə n zow ndow fə key kə loʼnə utaw nə ulii ukaykə kə dza tsunə nə̀, “Bəghə!”

⁸ Mə n laalə, koʼ ndow kəkhinyam kə fiilə gow shwɔlizuu. Zəd i wù wey tə â nyəŋənə khinyam kə tii kə â loʼ Ivə, Naʼ zə ivə zə n kùʼlə bəghə soʼo n baa wi. Ghə n fu ndow ghə n daʼa kə nə kəbad kəmɔ̀ʼ nə tədzawwə təkaykə fa a ghəlitsə, nə̀ ghə wey aghə̂ n kɔb, dzəŋ i faalə zə, tədzaŋa nsə nyam tə mbvən fa a ghəlitsə.

⁹ Sey, Waa Nji zey n zhwey nuu kɔʼ mə̀ŋ zey nə ulii utaa. Mə n koʼ ndow n tənə tsə zey ghə fəələnə maʼlə wə tii, zay u ghə̂ ghən ghə â weynə ghə bòʼ bəghəm i fə̀ŋ i ghə təŋkey ghə a naʼlə ghɔɔmə i Kəzə̀, təmi taw tsu soʼo ni dza ghəə a Kəzə̀.

¹⁰ Ghə n naʼlə shiə kɔʼɔ n dzə̀ tə taw tə nə̀, “Mûkəbii u ngii taw wə, wə zownu, ghey a loʼ soʼo ni gaʼ fə̀ŋ n kow wɔ. À loʼ zeeli wə i saʼanə ghə̂ ghən fa a ghəlitsə ni dey fuu ngəmə tə ghey nghee ghə weyyə kaabənə ghey ə?”

¹¹ Ghə n daŋŋə fuu ndow kay wù ghə n ndzə̂ tə fəmə tə, dza tə ghə nə ghə dzə ləmə tsu tə taŋ ə ghə̂ a kəfwaʼ ghən ghə loʼ dzəŋi ghi ghə n kɔʼ kpii tsu, ghə weyyə tsu soʼo dzûmə tə Klisto tey ghə â dzəŋi loʼnə ghi ghə tə̀ ghə â weynə ghə.

¹² Mə n daŋŋə koʼ ndow Waa Nji zey i zhwey nuu kɔʼ mə̀ŋ zey nə lii utuubə, ghəlikətsə kə n noʼlə tsu nə kədaʼa, nyî zə n nuu ləŋ tsu tə a loʼ ndzə̂ tə ivə, ndzɔŋ n baŋa tə a loʼ təkaŋ.

¹³ Səghəbələ n bikighow mə n tsɔʼlə tsuu bə a ghəlitsə tə à loʼ tam wə nkaʼ wən u tsɔʼlə tsu nə u ka kam beyyə abə zəŋ i taw i tsəghənə.

¹⁴ Bikighow kə n saŋa nuulə ndow tə a loʼ kəmàʼlə ghə gɔy nuulə kɔʼɔ ndownə. Ghə n ney nuu kɔʼ təkaʼa tədzəm nsə naʼa tən dzuu dzəŋŋə ngəə kɔʼnə tədzəm n bənə u ghə.

¹⁵ Dəŋ wən fa a ghəlitsə, ghə̂ a səŋi ghə nsə ghə̂ a nii a təsawgoʼ ghə, ghə̂ a kûm ghə nsə ghə̂ ghey ghə khə daʼa wə nsə ghə̂ ghə adzəm, ukɔd nsə ghə̂ ghən ghə way kɔd wə, ghə n tyi nyi doʼo kaabə ndow nə ubuʼ nsə n tənə unaa nə təkaʼa.

¹⁶ Ghə n dza ndow tə̀ kaʼa tə nsə naa u tii wə nə̀, “Bwu tsu bə n kow ghey, wə nyi naŋa tsu ghey, kə wù wey tə doʼnə n kuu kə fɔɔ nə koʼonə ghey, nsə nə̀ kə nəghə u fəə u Waa Nji wey i bwu n kow ghey,

¹⁷ n təŋkey, faalə kə fətsuʼ fey ghə i fəələnə nəghə wə a tii n bə, nə̀ wù loʼ way ni tyi shi n wɔ ghə.”