Chi dii 5 - Kaa n Kəzə̀ n fəghə mə

Waa njì zìilə chi kɔʼ màʼlə kən ghə nəmi kɔʼnə

¹ Sey mə n koʼ ndow kəmàʼlə nə̀ ghə n nəm n wɔɔ kə zəə kə wù wən tə doʼnə n kuu kə fɔɔ key. Màʼlə kə tii kə n loʼ nə̀ ghə n tɔ̀ɔ tii nə badla tədzəm, zɔʼ tsu mə̀ŋ tii nə təluʼu təsəghəmbəghə.

² Mə n koʼ ndow tsəndəghə u nii u loʼ wə tə naʼlə shiə kɔʼɔ n dzə i taw zə nə̀, “À loʼ ndee tə kɔʼ kpiinə ni zhwey nuu kɔʼ mə̀ŋ zən, tə zìilə chi kɔʼ màʼlə kə kən ə?”

³ Wù umɔʼ n way idəŋ nkee n ghəlikətsə nkee n tənə ghəlikətsə, tə loʼ ni zìilə chi kɔʼ màʼlə kə tii kə nkee ni bùʼ laalə nyi tsu tii.

⁴ Mə n ngii dey, n təŋkey, wù umɔʼ â way ni chi màʼlə kə tii kə nkee ni bùʼ laalə nyi tsu kə tii.

⁵ Sey, ngəd u loʼ wə n dza bə tə̀ mə nə̀ “Ka dey, koʼo! Dəmow wən n sali ndaw i Juda, waa waa fɔɔ Devid, tə n təm zə̂, tə loʼnu ni chi màʼlə kən tə zhweyyə nuu kɔʼ soʼo mə̀ŋ tən təsəghəmbəghə.”

⁶ Mə n koʼ ndow waa njì i teynə n fə̀ŋ ə kuu kə fɔɔ key tə̀ ghə n wey, nə̀ fə wən u loʼnə utaw ukaykə nsə ngəd tə n taʼ dzəŋ tsəghə bə. Waa njì ə tii n khə təndɔŋ təsəghəmbəghə nsə sə̂ ghə asəghəmbəghə. Sə̂ ghən asəghəmbəghə loʼ zày u Kəzə̀ wən ghə tûm shi ndownə n badla tədzəm fa a ghəlitsə.

⁷ Waa njì zey n bə ney kɔʼ nəmi k-a-màʼlə key n wɔɔ kə zəə kə wù wey tə â doʼnə n kuu kə fɔɔ key.

⁸ Ambə i ney kɔʼnə, fə wey ukaykə u loʼnə utaw nsə ngəd tey nghəm nbəghə n ghii tə təkaykə n təm bə tənguʼ n tənə waa njì zey. Kay n khə bəghəm kə fətii nsə bɔm tə itsàa tə n wɔɔ nə̀ à tii luu doʼo kə inəŋ i loʼnə gɔŋŋə tə ghə̂ a Kəzə̀ ghə.

⁹ Ghə n zhim ndzaŋ i fəghə zə nə̀, “Wə kɔʼ kpiinu ni ney màʼlə kə nəmi kən, nsə ni zhweyyə nuu kɔʼ mə̀ŋ tən tii, n təŋkey, ghə mâ wɔ wey, wə n ney kaŋ tə, kuum shi tsu tow wə aghə̂ tii fuu bə tə̀ Zə̀ kə. Wə â kuum nuu shi bə aghə̂ n sali ndaw tədzəm, təghɔɔmə tədzəm, təluʼu tədzəm nsə naʼa tə tədzəm.

¹⁰ Wə n ghəŋə nə̀ ghə doʼo bə fɔɔ wey fɔɔngili tə shiənə tii ni fwaʼ tə̀ Zə̀ kə saa kə ghə i saʼa aghə̂ adzəm fa a ghəlitsə.”

¹¹ Mə n laalə kpiʼi ndow, zow ndow, dzə̂ tə tsətəndəghə tə Kəzə̀, kam tə təkam nsə bɔm tə təndangaŋ, nə wù way ni taŋ, n taʼ dzəŋ tsəghə bə kuu kə fɔɔ key, fə wey ukaykə u loʼnə utaw nsə ngəd tey.

¹² Ghə n zhim shiə kɔʼɔ idəŋ nə̀, “A kɔʼ kpi waa njì zən ghə â weynə ni keeli kədaʼa, ikum, utɔb, nsə nùŋ wə ingɔɔmə, ibuulə nsə kɔʼlə mə!”

¹³ Mə n zow ndow fə̂ wən udzəm Zə̀ kə â bɔm idəŋ, n ghəlikətsə, n tənə ghəlikətsə nsə n nali kə dzuu u zhimnə nə̀, “Tə wù wən tə doʼnə n kuu kə fɔɔ nsə tə waa njì, ibuulə, ingɔɔmə, ukali nsə daʼa kə loʼ u ghə wə, tə̀ mbi nə bə may.”

¹⁴ Fə wey ukaykə u loʼnə utaw n dza tsu nə̀, “Zə i loʼ sey.” Ngəd tey n təm ndow tənguʼ aghəd, fuu ndow ingɔɔmə tə̀ wù wey tə â doʼnə n kuu kə fɔɔ key nsə Waa Nji zey.