Chi dii 4 - Kaa n Kəzə̀ n fəghə mə

Jɔn koʼ nghee ghə ngɔɔmə Zə̀ kə a tii idəŋ nə ujim

¹ Ambə n koʼ may tsu ghəə ghən, mə n kəm keeli jim u loʼ wə, n jim u tii wə, mə n koʼ fuʼ u ndaw u chi doʼonə idəŋ. Mə zow ndow dzə i loʼ zə i ghɔɔmə bə nə tə mə, nə̀ i fuŋu tə a loʼ isɔŋ, zə n dza nə̀, “Kɔʼ bə fa tə n dii bə wɔ n ghəə ghən a khə ni teeli shi.”

² N nəŋə i tii zə kə, Zay kə Zow kə n nyi bə n kow mə, mə n koʼ ndow kuu kə fɔɔ idəŋ nə wù loʼ doʼ tii.

³ Wù wey tə â doʼnə tii, koʼ i wi zə n nyiəllə tə a loʼ unyiə ghə fwaʼ kɔʼnə n tay n loʼ mə wən i tawnə ghə tɔŋŋə nə̀ a loʼ jaspa nsə n kanelian. Gboongəm kə n dzəŋŋə ngəə kɔʼ kuu kə fɔɔ kə tii kə, nə kə nyiələ tə a loʼ tay i wən i taw zən ghə tɔŋŋə nə̀ à loʼ emera.

⁴ Kuu wə u təfɔɔ nghəm bəghə n ghii wə ukaykə n taʼ dzəŋ tsəghə bə n kuu kə fɔɔ key. N kuu u təfɔɔ wən, a n doʼ təngəd nghəm nbəghə n ghii tə təkaykə, nə̀ ghə n dzəŋə keeli ndzə tə fəmə tə nsə taŋŋə u təfɔɔ wə nə kətow nə̀ ghə faalə nə itsàa.

⁵ N kuu kə fɔɔ key, ghow zə n mwallə shiə bə, bɔŋ mə n kwɔɔ shiə bə soʼo fu, ghow zə kəmə shiə bə soʼo fu. N sə kə kuu kə fɔɔ kə tii kə, saalə tə n bəʼlə fu təsəghəmbəghə. Saalə tən təsəghəmbəghə â loʼ Zày u Kəzə̀ wən usəghəmbəghə.

⁶ Fə kə loʼ kə n loʼ n sə kə kuu kə fɔɔ key tə a loʼ dzuu kəlungali nə̀ u zow tsaʼi tsaʼi tə a loʼ tay i wən i taw zə ghə tɔŋŋə nə̀ à loʼ krista. Fə u loʼ wə n taʼ dzəŋ tsəghə bə kuu kə fɔɔ kə tii kə ukaykə nə̀ u loʼ utaw. Wə n loʼ n sə̂ ghə n ndəm isə nsə ibam.

⁷ Kə sə̂ isə key n loʼ tə a loʼ dəmow, kə key nə ulii ubəghə n loʼ tə a loʼ mbɔŋɔlɔʼ i num zə, kə key nə ulii utəghə n khə tûm usə̂ tə a loʼ wù sɔŋtsuʼ, kə key nə ulii ukaykə n loʼ tə a loʼ nən fə nii fən ghə tɔŋŋə nə̀ a loʼ boʼo tûm fə zəʼlənə.

⁸ Kay n fə̂ wən ukaykə n khə təghaw tətuubə nə̀ sə̂ ghə n tsəd dzəŋ tsəghə bə a bii nsə n tənə təghaw. N tsə̂ tə nsə n tsuʼu tə, ghə n buu doʼo way ni zhim nə̀, “Izow, izow, izow i loʼ Mûkəbii Zə̀ kən kə khənə daʼa wə udzəm tə wən tə â loʼ nə nzeyyə, tə loʼ nyisa, tə wən tə i kəm bəghənə.”

⁹ Nəŋə tədzəm fə̂ wey u ukaykə u loʼnə utaw n zhim tədzaŋa, fuu nkɔʼlə, ngɔɔmə, fuu soʼo kəzɔŋŋə tə wù wən tə doʼnə n kuu kə fɔɔ kə tii kə, nə̀ tə nə kpu koʼ way tə mbi nə bə may.

¹⁰ Ngəd tey nghəm nbəghə n ghii tə təkaykə n təm ndow tənguʼ n sə kə wù wən tə doʼnə n kuu kə fɔɔ key. Ghə ngɔɔmə wù wən tə loʼnə utaw nəŋə tədzəm. Ghə n tsɔʼ maʼa taŋŋə u təfɔɔ u ghə n sə kə kuu kə fɔɔ dzaa tsu nə̀,

¹¹ “Mûkəbii ghey nsə Zə̀ kə ghey kə, wə kɔʼ kpiinu nə̀ ghə̂ ghə i fuu wɔ n kɔʼlə mə, ngɔɔmə soʼo wɔ n daʼa key wə khənə. Â bɔm wɔ fə wə udzəm, â tsəm soʼo wɔ nə̀ fə wən i loʼ, u keeli soʼo imuu.”