Chi dii 21 - Kaa n Kəzə̀ n fəghə mə

Ujim bòʼ dəŋ kə fəghə kə nsə ghəlitsə kə fəghə kə

¹ Mə n daŋŋə koʼ ndow dəŋ kə fəghə kə nsə ghəlitsə kə fəghə kə. Dəŋ kə sə isə key nsə ghəlikətsə kə sə isə̂ n tsəghə nuu tsu, nali kə dzuu kə n tsəghə nuu tsu soʼo.

² Mə n koʼ ndow soʼo naʼ i zow zə, nə̀ a loʼ Yerosalem i fəghə zə, i shiə tsu bənə idəŋ nə̀ a fuu tsu bə Kəzə̀, nə̀ ghə n bayyə tə a loʼ weyzən ghə lab dzɔb tsu ni ndow fuu tə num.

³ Mə n zow ndow dzə̀ i taw zə i ghɔɔmə bənə n kuu kə fɔɔ, dza nə̀, “Koʼo, luʼu key Zə̀ kə muunə tii, nya loʼ n fəŋŋə kə aghə̂! Tə i muulə dzəŋi ghi ghə, ghə i loʼ ghə̂ a wi. Zə̀ kə n wû u wi wə i loʼ ghi ghə, tə i doʼo soʼo Zə̀ kə ghə.

⁴ Tə i zə̀d maʼa tsu sə mey n dzəm n loʼnə n sə a ghə. Ghə̂ ghə i kəm kpuu way. Ghə̂ ghə i kəm mow way, dey way zow soʼo way fɔɔbə zə n təŋkey, mbi i wey zə n tsəghə nuu.”

⁵ Wù wey tə â doʼnə n kuu kə fɔɔ key n dza nə̀, “Nya, n ghəŋŋə tsu ufə̂ udzəm u doʼo bə u fəghə wə!” Tə n dza kpiʼi bə tə mə nə̀, “Tɔ̀ɔ naŋa tsu ghəə a ghən, n təŋkey ghɔɔmə zən loʼ ghɔɔmə zey ghə̂ a loʼ ni gaʼ fə̀ŋ tii, loʼ soʼo isəŋə.”

⁶ Tə n daŋŋə dza bə tə̀ mə nə̀, “Mə n ghəŋə may ghəə ghə adzəm! N loʼ ney kə sə nsə fii kə bam. À zey mə ghəə ghə adzəm, à mayyə soʼo mə ghəə ghə adzəm. Ghə̂ ghən fə̀ŋ ə mmuu zuʼlənə ghə, mə i fuu ghə n mmuu mə n shiə bənə n tɔŋ fə dzuu fey fə fuu muu zə nə̀ ghə ka fə kə tsə.

⁷ Ghə̂ ghən ghə i təmə zəənə ghəə a bəbə ghə, ghə i zəə fə̂ wən udzəm. Mə i doʼo Zə̀ kə ghə, ghə i loʼ waa ghuŋ ghə.

⁸ A kee bə ghə̂ ghən ghə tsəŋənə, khə way bəghəm i fə̀ŋ zə, ghə nəb ityim, ghə̂ ghey ghə weynə ghə̂ ghə, ghə̂ a laŋŋə ghə, ghə̂ a fənnə ghə, ghə̂ ghən ghə ngɔɔmə muʼu mə nsə ghə̂ ghey ghə badlanə ghəə ghə, luʼu kə ghə kə loʼ n nyî zə uvələ zey sɔlfɔ bəʼlənə fu. À wən loʼ və zən i dzûmə ndow i sə̂ isə zə.”

Ujim bòʼ Yerosalem i fəghə zə

⁹ Tsəndəghə Kəzə̀ umɔ̀ʼ n tsətəndəghə tə Kəzə̀ tey təsəghəmbəghə ghə â khənə bɔm tey təsəghəmbəghə nə̀ a tii luu doʼo tən kə zəŋ tən tə guŋŋə kɔʼnə təsəghəmbəghə n bə n səə mə dza tə mə nə̀, “Bə, mə i dii bə wɔ n weyzən, wey Waa Nji zey.”

¹⁰ Zay kə Zow kə nyi bə n kow mə, tsəndəghə Kəzə̀ zey n boʼo kɔʼ ndow mə n kaʼ u dabə wə. Tə n dii ndow naʼ i zow zə tə mə, i loʼnə Yerosalem. Naʼ i tii zə n shiə tsu idəŋ nə̀ à fuu tsu bə Kəzə̀.

¹¹ Naʼ i tii zə n nyiələ tənə ghi daa kən kə baŋa shiə bənə n kow Zə̀ kə. Naʼ i tii zə n nyiələ tə a loʼ tay i wən i tii i tawnə, nyiələ tə a loʼ tay n loʼ mə ghə tɔŋŋə nə̀ a loʼ jaspa, zowwə soʼo tə a loʼ kəlungali.

¹² Naʼ i tii zə n khə mbàa i nii zə i dab nay kɔʼ ndow idəŋ ghi fuʼu n təmbaa mə ighəm n ghii mə nbəghə ghi tsətəndəghə tə Kəzə̀ tə ighəm n ghii təbəghə tə keyyənə fuʼu n təmbaa n tii mə. Ghə n tɔ̀ɔ naŋa zəd a naʼa tə Izree tən ighəm n ghii tə təbəghə n fuʼu n təmbaa n tii mə.

¹³ N bad key nyi i shiə kɔʼɔ bənə tii, fuʼu n təmbaa ntəghə, n bad kə idəŋ kə, fuʼu n təmbaa ntəghə, n bad kə itən kə fuʼu n təmbaa ntəghə, n bad key nyi i bəŋə nyiə tsuu ndownə a tii, fuʼu n təmbaa ntəghə soʼo.

¹⁴ Ghə â bɔm mbàa naʼ i tii zə n tay a tsə kə ndaw ighəm n ghii tə təbəghə. Ghə tɔ̀ɔ naŋa tsəghə ndow zəd a ngəd tə Waa Nji tey ighəm n ghii tə təbəghə n tay a tii ghə.

¹⁵ Tsəndəghə Kəzə̀ zey zə â ghɔɔmə bənə tə mə n khə mbaŋ zey ghə fòʼlənə luʼu tə tii nə̀ ghə faalə nə itsàa. Tə â dza i foʼlə naʼ i tii, fuʼu n təmbàa n naʼ i tii zə nsə mbàa tə naʼ i tii zə n mbaŋ fə tii fə.

¹⁶ Baʼ u naʼ i tii zə n bɔɔmə keeli tsəghə bə foʼ imɔʼ. Zə n dab kəŋə ndow ighələ tə i dow shi ndownə. Tsəndəghə Kəzə̀ ə tii n foʼlə tsu naʼ i tii zə ghi mbaŋ fə foʼlə fə təluʼu fə. Ni dab kəŋə ndow, à n loʼ tam təjìi, təkam təbəghə nsə bɔm mə nkaykə, bɔɔmə loʼ soʼo tam təjìi təkam təbəghə nsə bɔm mə nkaykə ni dow shi ndow nsə tam təjìi tə təkam təbəghə nsə bɔm mə nkaykə ni dab shi kɔʼ.

¹⁷ Tsəndəghə Kəzə̀ zey n foʼlə tsu baʼ kə mbàa key ni dab shi kɔʼ, kə n loʼ tam tə ifuu nghəm ntuubə, nghee ghə̂ a foʼlə fə wə a tii.

¹⁸ Ghə â bɔm mbàa i tii zə n tay ghən wən i tii i tawnə, ghə tɔŋŋə nə̀ à loʼ jaspa. Ghə n bəghə naʼ i tii n baa baa kə itsàa nə i zowwə tənə kə tə a loʼ kəlungali.

¹⁹ Ghə â lab tən kə tay a tsə kə ndaw kə mbàa naʼ i tii zə n lii tə ntay mən n dzəm, ngii kwɔɔnə wən zə. Ghə â lab tsu tay i tsə kə ndaw i sə isə zey ghi tay mən ghə tɔŋŋə nə̀ à loʼ jaspa, kə key nə ulii ubəghə, ghə n lab tsu n tay mən ghə tɔŋŋə nə̀ à loʼ safi, kə key nə ulii utəghə, ghə n lab tsu n tay mən ghə tɔŋŋə nə̀ à loʼ agate, kə key nə ulii ukaykə, ghə n lab tsu n tay mən ghə tɔŋŋə nə̀ à loʼ emera.

²⁰ Kə key nə ulii utaa, ghə n lab tsu n tay mən ghə tɔŋŋə nə̀ à loʼ oniks, kə key nə ulii utuubə, ghə n lab tsu n tay mən ghə tɔŋŋə nə̀ a loʼ kanelian, kə key nə ulii usəghəmbəghə ghə n lab tsu n tay mən ghə tɔŋŋə nə̀ à loʼ kwas, kə key nə ulii ifam, ghə n lab tsu n tay mən ghə tɔŋŋə nə̀ a loʼ beri, kə key nə ulii utaandzuu, ghə n lab tsu n tay mən ghə tɔŋŋə nə̀ à loʼ topas, kə key nə ulii ighəm, ghə n lab tsu n tay mən ghə tɔŋŋə nə̀ a loʼ chalsidoni, kə key nə ulii ighəm nsə ghii zə imɔʼ, ghə n lab tsu n tay mən ghə tɔŋŋə nə̀ a loʼ tukwas, kə key nə ulii ighəm nsə ghii mə nbəghə, ghə n lab tsu n tay mən ghə tɔŋŋə nə̀ à loʼ ametis.

²¹ Ghə à fwaʼ fuʼu n təmbaa mey ighəm nsə ghii mə nbəghə n tay n nyiələ mə ighəm nsə ghii mə nbəghə ghə tɔŋŋə nə̀ à loʼ peel. Ghə â faalə kay fuʼ u mbàa n peel imɔʼ. Ghə a faalə jii tə naʼ i tii zə n baa baa kə itsaa, nə̀ i zowwə tənə kə tə à loʼ lungali kən kə zowwə tɔɔlə nyi daŋŋə ndownə.

²² N ka kee koʼ dzə fəə fə n naʼ i tii zə, n təŋkey, fəə fə wi fə i loʼ Mûkəbii, Zə̀ kən kə khənə daʼa wə udzəm nsə Waa Nji zey.

²³ Inyi nsə ndzɔŋ khə way fwaʼ kə loʼ kə fu inaʼ, n təŋkey, daa kən kə baŋa shiə bənə n kow Zə̀ kə baŋa fu inaʼ, Waa Nji zey u loʼ soʼonə daa kə naʼ i tii zə.

²⁴ Ghə̂ a tənaʼa tədzəm ghə i bwey n luʼu tə baŋa tə nə̀ a kaʼi dii bə naʼ i tii zə daa kə, dəŋ wən fa a ghəlitsə i ney bə fə u ghə u zəələ wə iwû wə n naʼ i tii zə.

²⁵ Fuʼ u mbàa u tii u nə doʼlə tənə kə təghə nəŋə tədzəm. Ghə nə fìi naŋa koʼ way n təŋkey tsuʼ u nə dzə̂ koʼ way fu.

²⁶ Ghə nə ney bə fə u səŋi wə n naʼa tən tədzəm nsə kûm i ghə, ghə bə n ghii wə fu n naʼ i tii zə.

²⁷ Fə kə dzəə kə loʼ kə nə nyi koʼ way n naʼ i tii zə, nkee wù wən tə ghəŋŋə ləbi tə aghəə nkee ghəə tow kə dədlə kə nkee ghə̂ a badla ghə aghəə ghə. A fəd loʼ ghə̂ ghən zəd a ghə tɔ̀ɔ doʼo n màʼlə kə Waa Nji key, ghə̂ ghey ghə i keelinə muu zə itsali zə loʼnə tii, ghə i nyiənə fu n naʼ i tii zə.