Chi dii 19 - Kaa n Kəzə̀ n fəghə mə

Ujim bòʼ kɔʼlə mey ghə̂ ghə â fuunə tə̀ Zə̀ kə nghee Babilɔn bwu tsu

¹ Ambə tsəndəghə Kəzə̀ u nii nii wey ghɔɔmə may tsu ghəə a ghən, mə zow ndow dəm kə loʼ kə, kə kwɔɔ bənə idəŋ tə a loʼ nɔɔ kə aghə̂. Ghə n dza shiə kɔʼɔ n dzə̂ tə taw tə nə̀, “Ukali tə Zə̀ kə! À loʼ wi tə bəghəshiənə ghə̂ ghə, Aghə̂ adzəm fuu nkɔʼlə tə wi, À loʼ Zə̀ kə saa kə khənə daʼa wə udzəm

² Jìi zey tə saʼanə tii kpiinu loʼ soʼo tsətsəghə! Tə n tsəʼlə saʼ nə̀ kpala kə nii kən Kə â sii ndzəŋnə ghə̂ ghə a ghəlitsə ghi ghəə wi a laŋŋə ghə, nə̀ tə i fəʼlənu. Tə n dey fuu ngəmə tə ghə̂ a kəfwaʼ a wi ghən tə â weynə n kow wi.”

³ Ghə n kəm dza shi kɔʼ nə̀, “Kali u Kəzə̀! Nyoʼ key kə shiə kɔʼɔnə n vəllə wey tə fəənə tii i shiə tsə kə nəŋə tədzəm.”

⁴ Ngəd tey nghəm nbəghə nsə ghii tə təkaykə nsə fə̂ wey ukaykə u loʼnə utaw n bwu ndow a ghəlitsə, fuu ndow ingɔɔmə tə̀ Zə̀ kə, tə doʼnə n kuu kə fɔɔ, dza tsu nə̀, “Zə i loʼ kə sey! Kali u loʼ u Kəzə̀ wə!”

Ujim bòʼ Zə̂ kə ney zə iwû kə Waa Nji zey

⁵ Mə n daŋŋə zow dzə̀ i loʼ dza shi bənə fu n kuu fɔɔ key nə̀, “Ghaa fuu nkɔʼlə n loʼ tə̀ Zə̀ kə saa kə, Ghə̂ a kəfwaʼ a wi adzəm nsə ghaa ghən ghaa tsəŋənə wi, Ghə̂ a səŋi ghə nsə ghə̂ ghən ghə way ghə səŋi ghə!”

⁶ Mə n daŋŋə zow ndow nbɔŋ tə a loʼ nɔɔ kə aghə̂ kə nii kə, kə kwɔɔ bənə tə a loʼ dzuu i taanə, tə a loʼ soʼo ighow i kəmənə. Mə n zow ghə dzanə nə̀, “Kali u Kəzə̀! Kali u loʼ tə̀ Zə̀ kə n təŋkey, Mûkəbii tə loʼnə Zə̀ kə, tə khənə daʼa wə udzəm loʼ kədə̀ŋ.

⁷ Bə na tə saa saŋŋə, saa duʼlə ni fuu n nkɔʼlə tə wi! Təŋkey tsuʼ fə Waa Nji fə n kpi ni ney wey wi, wey wi n bayyə naŋa tən soʼo wû u wi wə.

⁸ Ghə n fuu wi n ndzə̂ tə niilə nə̀ tə zowwə tənə tsaʼi tsaʼi nə̀ tə dzəŋə.” (Ndzə̂ tə niilə tən loʼ ghəə a dzuŋu ghən ghə̂ a Kəzə̀ a ghəŋŋənə).

⁹ Tsəndəghə Kəzə̀ zey n dza tə mə nə̀, “Tɔ̀ɔ naŋa tsu nə̀, Zə̀ kə i buulə ghə̂ ghən ghə tɔŋɔnə n zə̂ kə ney zə iwû i Waa Nji zey!” Tə n dza kpiʼi bə tə̀ mə nə̀, “À wən loʼ ghɔɔmə zən i loʼnə isəŋə, i nuu bə n wɔ Zə̀ kə.”

¹⁰ Mə n bwu ndow n tənə fuu i wi ni ngɔɔmə wi. Tə n fəd dza tə mə nə̀, “Ngaŋ ka ghəŋə sey! N loʼ soʼo wù kəfwaʼ tə a loʼ wɔ ghi ghə̂ ghən ghə bəghəmnə tə̀ Yeso. I ngɔɔmə Zə̀ kə! Boʼnə à loʼ Zay kə Zow kə, kə chi dii ghəə ghə tə̀ tûm tə Kəzə̀ tə kuum Yeso.”

Ujim bòʼ wù wey tə â nyəŋənə khinyam kə fəmə key

¹¹ Mə n koʼ ndow bikighow kə chi kɔʼnə, mə koʼ tsu soʼo khinyam kə fəmə kə, kə teynə n sə kuŋ. Zəd i wù wey tə â nyəŋənə khinyam kə tii kə n loʼ nə̀ a loʼ Wù wey tə naŋŋə dzuu i wi zə, nsə Wù wən tə dzanə isəŋə. Tə saʼa n jìi zey i kpiinə, zuulə soʼo tsam n jìi zey i kpiinə.

¹² Sə̂ a wi a loʼ tə a loʼ uvələ u bəʼlənə, nə̀ tə n dzəŋə keeli soʼo taŋŋə u fɔɔ wə n ndəm n tow kə wi. Tə khə izəd ghə tɔ̀ɔ naŋa n kow wi nə̀ wù loʼ khə way zəd i tii zə, a may kə wi.

¹³ Tə dzəŋə keeli saŋ nə̀ ghə n fùu nyi tsu nə təkaŋ. Zəd i wi loʼ “Ghɔɔmə i Kəzə̀.”

¹⁴ Sawgoʼ tə idəŋ tə n dzûmə bə wi ibam, nə ghə doʼ n khinyam u fəmə wə nə ghə lab wû zə n ndzə̂ tə niilə tə zow tə nə̀ tə fə̀mənu.

¹⁵ Kɔb i tɔbə zə n shi bə n dzuu i wi. A loʼ n kɔb ə tii, tə i təmə zəənə naʼa tə. Tə i saʼa ghə n wɔɔ a taw ghə, tə i dəʼlə soʼo ghə n nəghə u fəə u Zə̀ kən kə khənə daʼa wə udzəm tə ghə nə dəʼlənə lami tə n nyùʼ key ghə kammənə nlə n təlami mə tii.

¹⁶ Zəd i tii zə â tɔ̀ɔ doʼo n saŋ ə wi nsə n bey kə wi. Zəd i tii i loʼ nə à loʼ, “Dəŋ kə udəŋ nsə nə Mûkəbii tə ghə Mûkəbii adzəm.”

¹⁷ Mə n daŋŋə koʼ ndow tsəndəghə Kəzə̀ i loʼ zə i teynə nə inyi. Tə n tɔŋɔ ndow nnən mən n dzəm n zəʼlənə idəŋ n dzə i taw zə nə̀, “Bə na, ghaa zuŋŋə dzəŋi bə n zə̂ kə səŋi Zə̀ kə tɔŋɔnə!

¹⁸ Bə na, ghaa bə fə nyam tə udəŋ, nyam tə ghə̂ a nii a təsawgoʼ nsə nyam tə təsawgoʼ tə. Ghaa bə fə nyam tə ukhinyam nsə nyam tə ghə̂ ghey ghə nyəŋənə khinyam u tii wə. Ghaa bə fə nyam tə ghə̂ adzəm, nyam tə ukɔd nsə nyam tə ghə̂ ghən ghə way kɔd wə, nyam tə ghə̂ səŋi ghə nsə nyam tə ghə̂ ghən ghə way ghə̂ a səŋi ghə!”

¹⁹ Mə n daŋŋə koʼ ndow faalə kə nyam mbvən zey, koʼ ndow soʼo dəŋ u ghəlikətsə nsə sawgoʼ tə ghə tə nə̀ ghə n zuŋŋə bə ni zuu ballə wù wey tə â nyəŋənə khinyam key nsə sawgoʼ tə wi tə.

²⁰ Ghə n fəd kwu fìi naŋa ndow faalə kə nyam mbvən key ghi tûm tə Kəzə̀ tə tsɔŋɔ tən tə â ghəŋŋənə faalə n tsɔŋɔ mə n sə kə wi. (À loʼ faalə n tsɔŋɔ mən tə a diinə, mə â ghəŋənə nə̀ ghə̂ ghən ghə â neynə tsə̀ə faalə kə nyam mbvən kən nsə ghə̂ ghən ghə â ngɔɔmənə muʼu fən fə fiilənə wi nə̀ ghə nyəŋ laʼ n baa wi). Ghə n kwu tsu faalə kə nyam mbvən key ghi tûm tə Kəzə̀ tə tsɔŋɔ tən maʼa nyi tsu utaw n nyî zə uvələ u bəʼlə ghi fə kə loʼ ghə tɔŋŋə nə̀ a loʼ sɔlfɔ.

²¹ A ghey ghə â doʼo səənə, ghə n wey n maʼa ghə n kɔb zey zə a shiə bə n dzuu i wù wən tə â nyəŋənə khinyam key. Nnən ndzəm mə bə fə nuu kɔʼ nyam tə ghə tə ghə loʼ ni fə.