Chi dii 18 - Kaa n Kəzə̀ n fəghə mə

Ujim bòʼ Babilɔn ghə saʼ maʼanə

¹ Ambə ghəə ghən tsəghə tsunə, mə n koʼ ndow tsəndəghə Kəzə̀ u loʼ tə shiə tsu bənə idəŋ. Tə n khə daʼa kə nii kə, nyiələ zey tə â nyiəllənə n ghəŋə soʼo nə̀ luʼu tə zow kaabə ndow tədzəm a ghəlitsə.

² Tə n naʼa shi kɔʼ n dzə̂ i taw zə nə̀, “Babilɔn u nii wə n bwu tsu bə! Tə n tsuu bwu! Naʼ i tii zə fəd doʼo luʼu key vəətsəə a muunə tii nsə zay u bwu wə. À naʼ i tii nya khə kə nnən n dzəə mə, fə̂ u dzəə wə udzəm nsə nyam tən wù tsəm ləghə way ni koʼ.

³ Ghə̂ ghey ghə loʼnə nə tənaʼa tədzəm n mɔʼ mə̂ nlə n wi mə. Ghə n mə̂ nlə n wi n taw mən n ghəŋŋənə nə̀ ghə̂ ghə i ghəŋŋə ghəə a laŋŋə ghə. Də̀ŋ wən u loʼnə a ghəlitsə n nyəŋi tsəghə kaabə bə ghi wi, ghə̂ ghən ghə fillə bikiwən kə fa a ghəlitsə n kûm daŋŋə n bam i wi n təŋkey tə ngii ləghə fə̂ u mbi.”

⁴ Mə n daŋŋə zow ndow dzə̀ i loʼ zə i nuu bənə idəŋ. Zə n dza nə̀, “Nuu shi bə na a ghə̂ ghuŋ ghə! Nuu shi bə n na n kow weyzən wey Ghaa khə way ni ghəŋŋə dzəŋi ghəə a bəbə ghə ghi wi. Gha khə way ni keeli ngoʼ zən i loʼ tə wi.

⁵ Ghəə a bəbə ghey ghə ghəŋŋənə n ndɔŋŋə kɔʼ bə tə̀ ghə i kɔʼ mɔm bikighow, Zə̀ kə moʼlə soʼonu ghəə a bəbə ghey tə ghəŋŋənə.

⁶ Ghaa ghəŋə ndow aghəə tə wi, ighələ tə̀ tə â ghəŋŋənə n kow ghaa, Ghaa tsə dzəŋŋə ndow wi tənəŋə təbəghə tsəghəshi nghee tə â ghəŋənə tə ghaa. Ghaa kuu tsu wɔɔ nlə ə wi i taw tsəghə tsu i zey tə â fuunə tə̀ ghaa nə tənəŋə təbəghə, Ghaa fuu ndow tə̀ wi.

⁷ Ghaa ghəŋə tsu tə zow ifɔɔbə, tə mow soʼo Ighələ tə̀ tə â kɔʼlənə wû wə, zəələ soʼo uwû. Tə â tsɔbə fə̀ŋ ə wi nə̀, ‘Mə wən n doʼnə, n loʼ naʼtum! N way dzə wey kpusə, mə i dey koʼ way.’

⁸ Sey, n tsuʼ fə loʼ fə, zəŋ i loʼ zə i taw tsəghə tsu wi. Zəŋ i tii zə i ghəŋə nə̀ tə koʼ ivə, tə mow, tə koʼ soʼo dzəŋ i faalə zə. Vəllə wə i fəə wi, N təŋkey Mûkəbii tə loʼnə Zə̀ kə, tə ngii khənə kədaʼa, i saʼanu wi.”

⁹ Də̀ŋ wən fa a ghəlitsə, wə â ghəŋənə ghəə a laŋŋə ghə ghi wi, zəələ soʼo iwû ghi wi, ghə i deyyənu, ghə mowwə soʼo abə ghə i koʼnə nyoʼ key kə shiənə n vəllə wey tə fəənə tii.

¹⁰ Ghə i səŋ təmi nay ndow, ghə i deyyə nə̀, “Ohooo! Ohooo! Naʼ i səŋi zə, Naʼ i nii i Babilɔn zə! N nəŋə zə izow imɔʼ kələ, ghə n wɔ ləŋi maʼa!”

¹¹ Ghə̂ ghən ghə ghəŋŋənə bikiwən kə fa a ghəlitsə, ghə i deyyə, ghə mow soʼo wi n təŋkey, wù kəm way ni zuu fə̂ u ghə.

¹² Wù i kəm way ni zuu fə̂ wey ghə fìilənə nə̀ ghə ghəŋə nə itsàa, tsaʼ zə ishɔ̀lɔ̀, tay mən wən i tii i tawnə nsə fəghə n nyiəllə mə. Wù i kəm way ni zuu ndzə̂ tey ghə faalənə n ndzə̂ tə niilə tə, ndzə̂ tə tə baŋa tə, ndzə̂ tə nyiələ tə nsə ndzə̂ tən ghə faalənə nə ulisəə. Wù i kəm way ni zuu lii tə nkaʼ nsə ndzoʼo fə̂ wən ghə faalənə n sɔŋ a nyaadzə nsə n kaʼ mən n ləmmə dzɔbənə, nsə kaʼ mən ghə faalənə n fə wən i tii tawnə. Wù i kəm way ni zuu fə wən ghə faalənə n tsaʼ i kəbwu, uvuʼ, tay n nyiələ mə.

¹³ Wù i way ni kəm zuu shəshiə fən ghə tɔŋŋə nə̀ a loʼ sinamon, nsə fəghə n ləmmə mə. Wù i way ni zuu inəŋ, nəŋ zən ghə tɔŋŋə nə̀ a loʼ məə nsə frankənsəns. Wù i way ni zuu nlə nsə mbvə n zəə mə. Wù i way ni zuu nfuŋ nsə səb ghə. Wù i way ni zuu təmbɔŋɔlɔʼ nsə njì tə. Wù i way ni zuu ukhinyam nsə kaya tə kəkhinyam tə. Wù i kəm way ni zuu ukɔd nsə ghə̂ ghə.

¹⁴ Ghə̂ a bikiwən ghey i dza tə wi nə̀, “Fə̂ u dzuŋu wən udzəm wə â deynə ni keeli n may. Wû wən wə â zəələnə n may, nyiəllə zə zey zə u may soʼo. Wə i kəm keeli koʼ way fə u tii wə.

¹⁵ Ghə̂ ghən ghə â kuum kɔʼɔ ndownə bòʼ bikiwən key ghə ghəŋŋənə n naʼ i tii zə i səŋ təmi nay ndow n təŋkey ghə tsəŋə nə̀ kə ghə nə fəʼlə soʼonə tə a loʼ wi. Ghə i deyyə, ghə mowwə soʼo.

¹⁶ Ghə i deyyə nə̀, ‘Ohooo! Ohooo! Naʼ i səŋi zə Wə â dzəŋŋə tsə ndzə̂ tə niilə tə, tə baŋa tə, nsə tə baŋa nyiələ tə, Wə â dzəŋŋə tsə fəghə n nyiələ mən ghə faalənə nə itsàa, tay mən wən i tii i tawnə nsə fəghə n nyiələ mən wən i tii i tawnə!’

¹⁷ N nəŋə zə izow imɔʼ kələ kûm i wi zey idzəm zə n may! Ghə muu a kəfən ghə, nsə ghə̂ ghən ghə bwey nə kəfən, ghə̂ ghən ghə fwaʼa tii, nsə ghə̂ ghən kəŋŋə zəə n fwaʼ kə dzuu, ghə i səŋ təmi nay ndow.

¹⁸ Abə ghə i koʼ ndownə nyoʼ key kə shiə kɔʼɔnə n vələ wey tə fəənə tii, ghə i deyyə nə̀, ‘Naʼ i loʼ i ka kam doʼo koʼ tsə i dzɔb kuumnə naʼ zə tə a loʼ naʼ i səŋi zən!’

¹⁹ Ghə i waŋŋə kɔʼɔ bvə kə n tow u ghə, ghə i mowwə, deyyə n dzə tə taw tə nə̀, ‘Ohooo! Ohooo! Naʼ i səŋi zə! Naʼ zey ghə̂ ghey adzəm ghə khənə fən wə n nali kə dzuu Ghə kûm nə a loʼ wɔ! N nəŋə zə izow imɔʼ kələ, kûm zə zey idzəm zə n may!

²⁰ Duʼlə n na a bikighow kə, duʼlə n na bòʼ və i weyzən wən! Ghaa ghən ghaa loʼnə ghə̂ a Kəzə̀, duʼlə n na! Ghaa ngəd tə Yeso nsə tûm tə Kəzə̀ tə, duʼlə n na! Ghaa duʼlə n təŋkey Zə̀ kə n wi saʼ Ghəŋə nə̀ tə fəghə ighələ tə̀ tə â ghəŋənə nə̀ ghaa fəghə.’”

²¹ Tsəndəghə Kəzə̀ u nii nii wə n daŋŋə boʼo kɔʼ itay nə̀ i dow tə a loʼ tay i gwɔɔlə zə, maʼa nyi tsu n nali kə dzuu, dza tsu nə̀, “À wən bɔɔmə loʼ nghee ghə i saʼa maʼanə naʼ i Babilɔn i səŋi zən tii nə kədaʼa. Ghə nə way ni kəm koʼ naʼ i tii zə.

²² Fə̂ kə loʼ kə nə kəm fuŋu way fu tə a loʼ kəbəghəm nkee ndɔŋ nkee mbule ghə tɔŋɔnə nkee aghə̂ ghə zhim ghəə ghə. Ghə̂ ghən ghə khə wɔɔ a kəfwaʼ ghə i kəm way fu inaʼ, kəgwɔ kə nə kəm fuŋu way fu!

²³ Ghə nə kəm koʼ koʼ way daa kə baŋnə fu tii inaʼ. Ghə nə kəm zow koʼ way dzə̂ tə gheyzən ghən nkee gheynum ghən n zə̂ kən ghə neynə wû zə tii fuŋ nə fu inaʼ. Ghə̂ a bikiwən ghey ghə â loʼnə n naʼ zə â loʼ ghə̂ a səŋi ghə n mbi, wə n sìi ndzəŋ tsu ghə̂ a naʼa tə mbi adzəm n fənnə zey wə â khənə.

²⁴ Ghə â Chɔt Babilɔn n təŋkey tə â khə kəwɔɔ n kaŋ tə tûm tə Kəzə̀ nsə ghə̂ a Kəzə̀ ghey ghə â weynə fu inaʼ. Tə â ndzəm khənu wɔɔ kə n ghə̂ ghey adzəm ghə â weynə a ghəlitsə.”