Chi dii 17 - Kaa n Kəzə̀ n fəghə mə

Ujim bòʼ kpala kən zɔŋ u wi u ngii fuŋunə

¹ Tsəndəghə umɔ̀ʼ n tsətəndəghə tə Kəzə̀ tey təsəghəmbəghə ghə â khənə bɔm tə təsəghəmbəghə n bə dza bə tə mə nə̀, “Bə, mə i dii tə wɔ nghee ghə i chɔdlɔnə kpala kən zɔŋ u wi u ngii fuŋunə, tə muunə n səə ndəmə tədzuu.

² Də̀ŋ wən fa a ghəlitsə n nyəŋi tsəghə kaabə ndow ghi wi, ghə̂ a mbi ghə n khəə doʼo kɔʼ soʼo n nlə wi mey tə â fuunə tə̀ ghə nə̀ ghə i nyəŋi ghi wi.”

³ Zay kə Zow kə, kə nyi bə n kow mə, sey tsəndəghə Kəzə̀ zey daŋŋə boʼo nuu ndow mə n mbvən ə ntsaŋ. Nghee N loʼ fu, mə n koʼ weyzən u loʼ wə tə nyaʼa doʼonə n faalə kə nyam mbvən i baŋa nyiəllə zə, nə ghə tɔ̀ɔ naŋa kaabə zəd ghey a tsayyənə Zə̀ kə n kow nyam tii. Nyam mbvən i tii n khə utow usəghəmbəghə nsə ndɔŋ tə ighəm.

⁴ Weyzən wey â dzəŋə keeli təndzə nə̀ tə baŋa nyiəllənu nə̀ wən i tii i tawnu, nyiələ tənə soʼo. Tə n lab keeli soʼo uwû n fə̂ u dzəŋŋə wə nə̀ ghə faalə nə itsàa, tay mən wən i ngii tawnə nsə fəghə n nyiəllə mə. Tə n khə wɔɔ itsàa n wɔɔ kə wi nə̀ i luu doʼo tən kə n ghəə a bəbə ghə nsə ləbi tə aghəə tə wi tə laŋŋə tən.

⁵ Zəd i fənnə i loʼ zə n loʼ n kaʼ usə u wi ghə tɔ̀ɔ naŋanə nə̀, “Babilɔn, weyzən u nii wə, nay tə kpala wə udzəm nsə tə ghəə a dzəə ghə adzəm n ghəlikətsə.”

⁶ Mə n koʼ ndow nə̀ weyzən wey mə̂ khəə kaŋ tə ghə̂ a Kəzə̀ a zow ghə, nsə kaŋ tə ghə̂ ghən ghə â weynə ghə boʼnə ghə bəghəm tə̀ Yeso. Dzuu zə n ngii zum mə nghee n koʼ ndow wi.

⁷ Tsəndəghə Kəzə̀ zey n dza bə tə mə nə̀, “Dzuu i zum wɔ n kee? Mə i tiilə dza bənu tə wɔ ghəə zey i nyi doʼonə bòʼ weyzən wən nsə faalə kə nyam mbvən zən weyzən wən doʼnə tii, nyam zən i khənə tow wə usəghəmbəghə nsə ndɔŋ tə ighəm.

⁸ Nyam mbvən zən â buʼ loʼ tsə utaw, nyisa, i kee kəm way dzə utaw. Fəkəmə, zə i shi kɔʼ bə n fɔŋŋə k-a-bùʼ key kə kùʼu way, i ndow n luʼu key ghə i ləŋi maʼanə wi tii. Dzuu zə i zum ghə̂ ghən ghə muu n ghəlikətsə, ghə â ka kam tɔ̀ɔ naŋa zəd a ghə n màʼlə key ghə̂ ghey ghə i keelinə muu zə itsali zə loʼnə tii tə̀ mbi ni kaʼ. Dzuu zə i zum ghə ni koʼ faalə kə nyam mbvən key n təŋkey zə â buʼ loʼ tsə utaw, nyisa i kəm way dzə utaw, zə i nam bəghənu.

⁹ Ghə i zən diinə wù khə ni khə fə̀ŋ nsə tɔb wə. Tow wey usəghəmbəghə, loʼ kaʼa tey təsəghəmbəghə, wey weyzən wən doʼnə a tii.

¹⁰ Dəŋ u loʼ səghəmbəghə, dəŋ utaa wə n kpuulə, kəmɔʼ nam loʼnu utaw, kə loʼ kə ka kam bə dzə. Abə kə kən kə ka kam bə i bənə, tə i doʼlə tsu kə n tɔŋɔ fə inəŋə.

¹¹ Abə faalə kə nyam mbvən kən kə â buʼ loʼnə utaw, zə a kəm way nyisa, a loʼ kədəŋ nə ulii ifam. Tə loʼ dzəŋi ghi də̀ŋ u loʼ wey usəghəmbəghə, kə ndow n luʼu key ghə khə ləŋi maʼa wi tii.

¹² Ndɔŋ tey ighəm wə â koʼnə loʼ udəŋ ighəm ghə kam khə way fɔɔ wə ni saʼ. Ghə i kee fuu ghə n daʼa kə ni saʼ tə a loʼ udəŋ n nəŋə zə izow imɔʼ ghi faalə kə nyam mbvən key.

¹³ Ghə khə ghə i mɔ̀ʼɔ zə ni ghəŋə, ni ney daʼa u ghə nsə saʼ i ghə fuu ndow tə faalə kə nyam mbvən key.

¹⁴ Ghə i zuu ballə Waa Nji zey. Waa njì zey i kee təm zə̂ kɔʼ ghə n təŋkey tə loʼ Mûkəbii tə̀ ghə mûkəbii adzəm, loʼ Kədəŋ tə̀ də̀ŋ wə udzəm. Ghə̂ ghey ghə i təmə dzəŋinə wi ni təm zə̂ wi, à i loʼ ghə̂ ghey tə â tɔŋɔnə, ghə̂ ghey tə â sàynə nsə ghə̂ ghey ghə dzûmənə wi n fə̀ŋ tə ghə tə tədzəm.”

¹⁵ Tsəndəghə Kəzə̀ zey n dzaa bə soʼo tə mə nə̀, “Dzùu tey wə â koʼnə kpala key nyaʼa doʼonə tii, loʼ aghə̂, nɔɔ wə aghə̂, tənaʼa nsə ndəmə ghɔɔmə tə tətûm.

¹⁶ Faalə kə nyam mbvən key nsə ndɔŋ tey ighəm wə â koʼnə i baa kpala key. Ghə ney nuu fə̂ wən udzəm tə khənə, ghə naŋa wi n wû zum wə. Ghə i fə nyam wi ghə kpəghə maʼa soʼo sad u wû u wi wən wə i doʼlə səənə nə uvələ.

¹⁷ Zə i shiə sey n təŋkey, Zə̀ kə n kuu naŋa n fə̀ŋ tə ghə nə̀ ghə ghəŋə ghəə zey Zə̀ kə ləghənə. Tə ghəŋə nə̀ ghə dzəŋi bəghəm kɔʼ ni fuu tsəghə ndow daʼa u ghə tə̀ faalə kə nyam mbvən zey ni ndow kuum n nəŋə zey ghəə zey Zə̀ kə â dza naŋanə i neynə bənə kə.

¹⁸ Weyzən wən wə â koʼnə loʼ naʼ i nii zey i saʼa fɔɔ wə udəŋ wey a ghəlitsə.”