Chi dii 15 - Kaa n Kəzə̀ n fəghə mə

Ujim bòʼ tsətəndəghə tə Kəzə̀ ghi zəŋ tən tə i bəghə guŋŋənə

¹ Mə n koʼ ndow faalə faalə kə tsəə i loʼ zə n bikighow nə̀ wù way ni tiilə. Mə n koʼ ndow soʼo tsətəndəghə tə Kəzə̀ təsəghəmbəghə tə kwu keelinə zəŋ tən təsəghəmbəghə tə bəghə guŋŋənə. Zəŋ tən təsəghəmbəghə loʼ nəghə u fəə u Kəzə̀. Abə zəŋ tən təsəghəmbəghə i tsəghə nuu tsunə, Zə̀ kə i kəm fəələ way n nəghə wə.

² Mə n daŋŋə koʼ ndow soʼo fə kə loʼ kə tə a loʼ dzuu kəlungali nə vələ u bəʼlə tii. Mə n koʼ ndow soʼo ghə̂ ghən ghə təm zə̂ dzə faalə kə nyam mbvən key, muʼu fən ghə bɔmnə nə̀ fə fiilə wi nsə taŋ ə zəd i wi. Ghə n tey fu n səə dzuu kəlungali zey n bəghəm u fətii wə n wɔɔ nə̀ à fuu Kəzə̀ tə ghə.

³ Ghə n zhim dzaŋ ə Mushi wən tə loʼnə wù kəfwaʼ a Kəzə̀ nsə ndzaŋ ə Waa Nji zey. Ghə â zhim nə̀ “Mûkəbii Zə̀ kə, wə khə udaʼa udzəm, Ghəə ghey wə ghəŋŋənə loʼ ghəə a səŋi ngii dzɔbə soʼo! Wə loʼ də̀ŋ kə tənaʼa tədzəm, Wə ghəŋŋə ghəə ghey a kpiilənə, dza soʼo isəŋə nəŋə tədzəm!

⁴ A loʼ ndee tə i tsəŋə way wɔ a Mûkəbii? À loʼ ndee tə i tuunə ni ney bə nkɔʼlə n zəd zə ə? À may kə wɔ wə zownə Naʼa tədzəm i bəghənu Ghə fuu wɔ n kɔʼlə mə, N təŋkey aghə̂ adzəm n koʼ nə̀ wə ghəŋŋə ghəə a loʼnə tsətsəghə.”

⁵ Ambə ghəə ghən tsəghə tsunə mə n laalə, koʼ ndow ndaw Kəzə̀ i nii zə idəŋ chi tsunə, fəə fə Kəzə̀ fə n loʼ fu.

⁶ Tsətəndəghə tə Kəzə̀ tey tə â khə zəŋ tey təsəghəmbəghə n shi bə fu n fəə key idəŋ. Ghə n dzəŋə keeli ndzə̂ tə zow nyiələ tə nə uwû, wab keeli tsu soʼo bad kə ndzə̂ kə itsàa n kəmmə kə ghə.

⁷ Kəfə kəmɔʼ n fə wey ukaykə u loʼnə utaw n fuu ndow ndzəŋ tə itsàa təsəghəmbəghə tə tsətəndəghə tə Kəzə̀ tey təsəghəmbəghə. N ndzəŋ tə itsàa tə tii tə, â luu doʼo tən kə nəghə u fəə u Zə̀ kən kə muunə nəŋə tədzəm.

⁸ Nyoʼ kə n nyi luu tsu fu n ndaw Kəzə̀ i nii zey idəŋ nə̀ kə nuu bə n ghaʼ i Kəzə̀ nsə n daʼa kə wi. Wù tsəm way ni nyi fu n ndaw Kəzə̀ i nii zə nə̀ zəŋ tey təsəghəmbəghə tsətəndəghə tə Kəzə̀ tey ney bənə ka kam tsəghə nuu.