Chi dii 14 - Kaa n Kəzə̀ n fəghə mə

Ujim bòʼ Waa Nji nsə ghə̂ a wi ghə

¹ Mə n baŋ laalə i ndow, koʼ tsu Waa Nji i tey n Kaʼ u Zayɔn. Zə n loʼ ghi ghə̂ ghə 144,000 (təkam fəbɔm nsə kam tə nghəm nkaykə nsə kam tə təkaykə). Ghə n tɔ̀ɔ naŋa zəd i Waa Nji zən nsə zəd i Bày wi zə n kaʼ n sə n ghə.

² Mə n zow ndow dzə̀ i fuŋunə idəŋ tə a loʼ ibwabwa i taanə, fuŋu soʼo tə a loʼ ighow i kəmənə. Bɔŋ mey mə â zow, mə n loʼ tə a loʼ bəghəm kə fətii ghə buʼunə.

³ Ghə̂ ghən təkam fəbɔm nsə kam tə nghəm nkaykə nsə kam tə təkaykə n zhim ndzaŋ i fəghə zə n sə kə kuu kə fɔɔ nsə n sə kə fə wey ukaykə u loʼnə utaw nsə ngəd tey. Wù n way ni zoʼlə ndzaŋ zey ghə zhimnə, à may kə ghə̂ ghən təkam fəbɔm nsə kam tə nghəm nkaykə nsə kam tə təkaykə ghə â bəghəshi ghə fa a ghəlitsə.

⁴ À wən loʼ ghə̂ ghən ghə â ka dzəələ wû i ghə ghi gheyzən ghə, boʼnə ghə â doʼo tən kə nə̀ ghə ka nyəŋi koʼ ghi weyzən. Ghə n dzûmə Waa Nji zey n luʼu tey tədzəm tə ndownə. Ghə loʼ ghə̂ ghən ghə bəghəshi bənə ghə n wɔɔ kə wù sɔŋtsuʼ. Ghə loʼ fə u sə isə wən u fən bə nə usum, saa fuu ndownə tə̀ Zə̀ kə nsə tə̀ Waa Nji.

⁵ Ghə ka dza koʼ tsə ghəə a badla ghə, ghə khə soʼo way bwu i loʼ zə.

Ujim bòʼ tsətəndəghə tə Kəzə̀ tətəghə

⁶ Mə n daŋŋə koʼ ndow tsəndəghə Kəzə̀ u loʼ wə tə zəʼlə kaabənə idəŋ idəŋ, tə khə tûm i dzuŋu zən i fuunə muu zən i may way ni naʼa tə̀ ghə̂ ghən adzəm ghə muunə a ghəlitsə. Zə i naʼlə tûm i dzuŋu zə tə̀ sali ndaw tə tədzəm, təghɔɔmə tədzəm, təluʼu tədzəm nsə naʼa tə tədzəm.

⁷ Tə n dza n dzə̀ i taw zə nə̀, “Ngɔɔmə na Zə̀ kə, ghaa fuu soʼo nkɔʼlə tə wi, n təŋkey, nəŋə zey tə khə ni saʼ aghə̂ tii n kpi. Ghaa ngɔɔmə wù wən tə â bɔm bikighow kə, ghəlikətsə, nali kə dzuu nsə tɔŋ n tədzuu mən mmuu n bənə shiənə tii.”

⁸ Tsəndəghə Kəzə̀ zey nə ulii ubəghə â dzûmə ndow u sə isə wey n dza, “Babilɔn n bwu tsu bə! Tə n tsuu bwu! Wù səŋi wən tə â ghəŋənə naʼa tə tədzəm nə̀ tə mə̂ lə n wi. Lə n wi mən â ghəŋŋə nə̀ ghə̂ ghey ghə mə̂nə lə n tii mə, ghə i ghəŋŋə ghəə a laŋŋə ghə.”

⁹ Tsəndəghə Kəzə̀ zey nə ulii utəghə n dzûmə bə tə sə isə tey təbəghə, n naʼlə bə n dzə̀ i taw zə nə̀, “Ghə̂ ghən ghə ngɔɔmə faalə kə nyam mbvən kən nsə muʼu fən ghə bɔm kɔʼnə nə̀ fə fiilə wi nsə ghə̂ ghən ghə neynə tsə̀ə wi n kaʼ usə u ghə nkee nə kəkpii,

¹⁰ ghə i məə soʼonu lə n Kəzə̀ mən n loʼnə nəghə u fəə wə, tə feeli tsunə udzəm nə̀ ghə ka nyɔɔmə n wɔɔ nəghə u Kəzə̀ u fəə wə. Ghə i chɔdlɔ ghə n faalə kə uvələ kən sɔlfɔ ghəŋə nə̀ wə i ndəŋə bəʼlə n sə kə tsətəndəghə tə Kəzə̀ tə zow tə nsə n sə kə Waa Nji zey.

¹¹ Nyoʼ kə uvələ key kə chɔdlɔnə ghə nə may koʼ way tə mbi nə bə may. Ghə̂ ghey adzəm ghə ngɔɔmənə faalə kə nyam mbvən zən nsə muʼu fey fə fiilənə wi, nsə ghə̂ ghey adzəm ghə khənə tsəə zəd i wi, nə doʼo koʼ way nə ghə fəʼlə way n tsə tə nsə n tsuʼu.”

¹² Ghəə ghən dii tsu nə̀ ghə̂ a Kəzə̀ a khə ni kow tsu fə̀ŋ, tɔŋŋə ghə̂ ghən ghə naŋŋə laŋ u Kəzə̀ bəghəm tən soʼo tə̀ Yeso.

¹³ Sey, mə n zow dzə̀ i loʼ zə idəŋ i ghɔɔmə nə̀, “Tɔ̀ɔ naŋa tsu nə̀, ni ney nuu tsu nya, ndow n sə kə, Zə̀ kə i buulə ghə̂ ghən ghə kpunə nə̀ ghə fwaʼa fwaʼ kə Mûkəbii!” Zay kə Zow kə dza nə̀, “Ndzəm ndzəm, ghə i keelinu zayyə zə n fwaʼ kə taw kən ghə fwaʼanə, n təŋkey, ghəə a dzuŋu ghey ghə ghəŋŋənə dii bə fə key ghə loʼnə ghii kə.”

Ujim bòʼ fə wən u fən bənə n ghəlikətsə

¹⁴ Mə n laalə ndow, koʼ ndow mbaʼ tə fəmə tə n sə kuŋ nə̀ wù loʼ doʼ tii tə̀ a loʼ waa wù sɔŋtsuʼ nə̀ tə n dzəŋə keeli taŋŋə kə fɔɔ kə, nə̀ ghə faalə nə itsàa n tow kə wi nsə kɔb fə ngɔli fə n wɔɔ.

¹⁵ Tsəndəghə Kəzə̀ u loʼ wə n shi kpiʼi bə n ndaw Kəzə̀ i nii zə idəŋ, tɔŋɔ ndow wù wey tə â doʼ n mbaʼ tey n dzə̀ i taw zə nə̀, “Ney kɔʼ kɔb fə ngɔli fey, wə zey ndow ni kpey ufə, n təŋkey nəŋə i kpey zə n kpii. Fə wə n beyyə a ghəlitsə ni kpey fən.

¹⁶ Sey wù wən tə doʼnə n tow kə mbaʼ n wəd ndow kɔb fə wi fə ngɔli fey n ghəlikətsə, kpey nuu kɔʼ ufə tii.”

¹⁷ Mə n kəm koʼ ndow tsəndəghə Kəzə̀ u loʼ wə tə shi bə n ndaw Kəzə̀ i nii zə idəŋ, tə n khə soʼo kɔb fə ngɔli fə nə̀ ghə n say dzɔb tsu.

¹⁸ Tsəndəghə Kəzə̀ u loʼ wə n nam shi bə, tə wən tə laalənə vələ wey u nuu bə nə n tsə zey ghə fəələnə maʼlə wə tii. Zə n naʼa shi kɔʼ n dzə̀ i taw zə nə̀, “Ney kɔʼ kɔb fə tɔɔbə fə fey, wə kɔy zuŋŋə bə kaʼ u təlami n sûm ghəlikətsə, n təŋkey tə n baŋ ni kɔy.”

¹⁹ Tsəndəghə Kəzə̀ zey n wəd ndow kɔb fə ngɔli fey n ghəlikətsə zuŋŋə bə lami tey nə nkaʼ, feeli nyi tsu n nyùʼ key ghə kammənə lə mən n shiə bənə nə təlami. Lə mən loʼ nəghə u Kəzə̀ u fəə wə.

²⁰ Ghə n dəʼlə kɔʼ ndow lami tə tii tə nə aghow naʼ inaʼ. Kaŋ tə n kuŋu shiə bə n bùʼ key ghə kammənə lə mən n shiə bənə nə təlami, kuum kɔʼɔ ndow tam tə jii nbɔm ntəghə nə idab, məllə nyi tsu soʼo tə a loʼ tam tə ifuu təbəghə.