Chi dii 11 - Kaa n Kəzə̀ n fəghə mə

Ujim bòʼ aghə̂ abəghə nə̀ ghə bə təmi tiilə

¹ Jim wə n bə mə nə̀, ghə fuu bə mə n mbaŋ zə â loʼnə tə a loʼ mbaŋ ni fòʼlə təluʼu, dza bə tə mə nə̀, “Ndow, wə fòʼlə tsu ndaw Kəzə̀ i nii zə nsə tsə zey ghə fəələnə maʼlə wə tii, wə ney kɔʼ soʼo taŋ ə ghə̂ ghey ghə ngɔɔmənə Zə̀ kə n ndaw Kəzə̀ i nii i tii zə.

² Ka kee fòʼ dzə bii key kə loʼnə fu n ndaw Kəzə̀ i nii zə, n təŋkey ghə n fuu tə̀ ghə̂ ghən ghə way ghə̂ a Təjuu ghə. Ghə i dəʼlə naʼ i zow zə nə aghow nə̀ təndzɔŋɔ nghəm nkaykə nsə ndzɔŋɔ tə təbəghə.

³ Mə i daŋŋə tûm bə aghə̂ abəghə nə̀ ghə n dzəŋə keeli ndzə̂ tə ivə tə nə̀ ghə bə tiilə dza aghəə bòʼ mə. Ghə i dza ghəə ghən n dzanə tə ghə. Ghə i ghəŋŋə sey nə̀ ntsuʼu kam nsə bɔm mə nbəghə nsə ghəm mə ntuubə.”

⁴ Ghə təmi tiilə ghən abəghə loʼ kaʼ n olif mən nbəghə nsə nyiəllə u kədaa wən ubəghə u teynə n sə kə Mûkəbii wən tə khənə ghəlitsə kən.

⁵ Abə wù moʼlə tsu ni nyîmmə ghə, vəllə wə i shi bə n dzuu a ghə, u ləŋi maʼa ghə̂ a təngəmə a ghə. À wən loʼ jìi zey ghə i weynə wù wey tə fòʼlə tsu ni nyimmə ghə.

⁶ Ghə̂ ghən khə kədaʼa ni kwu naŋa bikighow nə̀ ghow i ka tsu n nəŋə zey ghə i naʼlənə tûm Kəzə̀ tii. Ghə khə soʼo kədaʼa ni fəd kɔʼ mmuu nə təkaŋ nsə ni ghəŋə nə̀ faalə kə izəŋ kə bə fa n ghəlikətsə n nəŋə zey ghə ləghənə.

⁷ Abə ghə i tiilə dza may tsunə tûm ghə, faalə kə nyam mbvən zən i nuu shi kɔʼ bə n fɔŋŋə k-a-bùʼ kən kə kuʼu way, i bə zùu ballə ghi ghə. Zə i təm zə̂ kɔʼ ghə, i wey maʼa soʼo ghə.

⁸ Vən a ghə ghə i nyəŋi doʼo n jii naʼ i səŋi zən ghə â weynə Mûkəbii ə ghə tii n zat kə fəkaʼ. Zəd i ndzɔŋ zə inaʼ i tii i loʼ Sodom nsə Ijip.

⁹ Nə ntsuʼ ntəghə nsə bòʼ kə, aghə̂ a nə tənaʼa tədzəm, sali ndaw tədzəm, naʼa tətûm, ghə̂ a ghɔɔmə tədzəm i nyəŋ laalə vən a ghə, ghə tûmmə naŋa daŋŋə ghə nə̀ ghə tsəllə way.

¹⁰ Ghə̂ ghən ghə muunə fa a ghəlitsə i duʼlənu bòʼ və i ghə̂ ghən abəghə. Ghə̂ ghə i zəə, ghə tûm kaabə soʼo unaamə n wû i ghə, ni dii tsu nə̀ ghə duʼlənu n və i tûm tə Kəzə̀ tən təbəghə n təŋkey ghə mâ ghəŋə nə̀ ghə̂ ghey ghə muunə fa a ghəlitsə ngii fəghə.

¹¹ Nghee tsuʼu mən ntəghə nsə bòʼ kə tsəghə tsunə, Zə̀ kə n tûm bə zay kən kə fuunə muu zə, nyi bə n kow ghə. Sey ghə n doʼo bə utaw, nuu təmi kɔʼ nə ifuu. Tsəŋ i faalə zə n kwu ghə̂ ghey ghə â koʼnə ghə.

¹² Sey, tûm tə Kəzə̀ tən təbəghə n zow ndow wù loʼ dza tsu bənə tə ghə idəŋ n dzə̀ i taw zə nə̀, “Kɔʼ bə na fa.” Ghə n nuu kɔʼ ndow idəŋ n mbaʼ. Ghə̂ a təngəmə a ghə ghə n koʼo ndow nghee ghə kɔʼɔ ndownə.

¹³ N nəŋə i tii zə kə, ghəlikətsə kə daŋŋə noʼlə tsu nə kədaʼa. Bat kəmɔʼ nə tədzawwə ighəm tə loʼnə ighələ n naʼ i tii zə məllə nyi tsu ndow, ghə̂ ghə n kpu soʼo tii təkam təsəghəmbəghə. Tsəŋ zə i faalə zə n kwu ghə̂ a loʼ ghey ghə â ka kpu, ghə n ngii fuu nkɔʼlə tə Zə̀ kə idəŋ kə.

¹⁴ Zəŋ zən nə ulii ubəghə n tsəghə nuu i tsu. Zəŋ zey nə ulii utəghə kùʼlə bəghənu.

Ujim bòʼ sɔŋ zey nə ulii usəghəmbəghə

¹⁵ Jim wə n kəm bə mə. N jim u tii wə, tsəndəghə Kəzə̀ zey nə ulii usəghəmbəghə n tɔŋ tsu sɔŋ i wi, mə n zow ndow dzə̀ tə taw tə loʼ tə, tə fuŋunə idəŋ, dza bə nə̀, “Daʼa key ni saʼ fɔɔ u mbi zən Loʼ n wɔɔ kə Zə̀ kə saa ghi wù wey tə â dza naŋa nə̀ i tûm bənu, Tə i saʼa saa tə̀ mbi nə bə may.”

¹⁶ Ngəd tey nghəm nbəghə nsə ghə̂ ghə akaykə, ghə â doʼnə n kuu u təfɔɔ u ghə n sə K-a-zə̀, n bwu fəə ndow tûm n təsə̂ n ghə a ghəlitsə, ngɔɔmə ndow Kəzə̀.

¹⁷ Ghə n dza nə̀, “Mûkəbii, Zə̀ kən kə khənə daʼa wə udzəm, tə wən tə â loʼnə nə nzeyyə, loʼ nya! Ghey fuu zɔŋŋə kə nghee wə ney daʼa kə kə̀ nii kə, Zey ndow ni saʼ aghə̂.

¹⁸ Naʼa tə â ngii fəələ unəghə, N təŋkey nəŋə zey wə khə ni dii nəghə wə u fəə wə tii n bə, Nəŋə zey wə khə ni saʼ ghə̂ a kpuu ghə n bə. Nəŋə zə n bə tə̀ wɔ ni naamə ghə̂ a kəfwaʼ ghə, ghə̂ a tətûm ghə, ghə̂ ghə a zow ghə adzəm nsə ghə̂ ghən adzəm ghə ngɔɔmənə zəd zə zə̀, Ghə̂ a səŋi ghə nsə ghə̂ ghən ghə way ghə̂ a səŋi ghə Nəŋə zə n bə tə̀ wɔ ni ləŋi maʼa ghə̂ ghən ghə ləŋi maʼanə ghəlitsə kən.”

¹⁹ Ndaw Kəzə̀ i nii zə idəŋ n daŋŋə chi kɔʼ. Mə n koʼo nyiə ndow tətaalə kə nkaa n wi fu tii. Ghow zə n mwaalə, kwɔɔ, kəmmə, ghəlikətsə kə n noʼlə nə kədaʼa, tətay mə n ngii tsɔʼlə soʼo.