Chi dii 1 - Kaa n Kəzə̀ n fəghə mə

Ghɔɔmə i sə isə zə

¹ À wən loʼ màʼlə kə ghəə ghən Yeso Klisto a chi diinə tə̀ Jɔn. Zə̀ kə â fuu ghəə a tii ghə tə wi, nə̀ tə dii nduŋə ndow tə ghə̂ a kəfwaʼ wi ghə. Ghəə a tii a loʼ ghəə ghey ghə i kuʼlə neynə bənə kə. Ni ghəŋə nə̀ ghə keeli ghəə ghən, Klisto n tûm bə tsəndəghə wi tə wù kəfwaʼ wi tɔŋŋə Jɔn.

² Sey, Jɔn loʼ wù wən tə tiilə dza may bənə ghəə ghey adzəm tə â koʼnə. Ghəə a tii a loʼ kuum ghɔɔmə i Kəzə̀ nsə ghəə asəŋ ghey Yeso Klisto â diinə tə̀ wi.

³ Wù wən tə i tɔŋɔnə ghɔɔmə zən nə̀ ghə̂ a zow, tə i keeli ibuulə. Ghə̂ ghəy ghə zow ghəə ghən a tɔ̀ɔ doʼonə fa, ghəŋə ndow ghəə a tii ghə, ghə i keeli soʼo ibuulə, n təŋkey nəŋə zə n shɔd tə ghəə a tii ghə ni ney kəbənə.

Jɔn tɔŋɔ zow dzəŋi u dzûmə tə Klisto usəghəmbəghə

⁴ À loʼ mə Jɔn n tɔɔnə màʼlə kən. N tɔ̀ɔ bə tə̀ dzəŋi u dzûmə tə Klisto wən usəghəmbəghə u loʼnə n mboʼo Eshya. N gɔŋŋə nə̀ Zə̀ kə mə dii ghaa n ndzuŋ ə wi, tə fuu soʼo ghaa n buulə zə. À loʼ wi tə â loʼnə nə nzeyyə, tə loʼnə nyisa, à loʼ soʼo wi tə i bəghənə. N gɔŋŋə soʼo nə̀ zày u Kəzə̀ wən usəghəmbəghə u loʼnə n sə kə ndaŋ ə kədə̀ŋ ə Kəzə̀ dii ghaa n ndzuŋ, u fuu soʼo ghaa n buulə zə.

⁵ N gɔŋŋə nə̀ Yeso Klisto wən tə dii bənə isəŋə zən saa loʼ ni gaʼ fə̀ŋ tii, tə loʼnə wù sə isə ni zhəm dzəŋŋə bə nə ivə, tə saʼa soʼonə dəŋ wə fa a ghəlitsə, dii ghaa n ndzuŋ ə wi, tə fuu soʼo ghaa n buulə zə. Tə ləghənu saa, tə u bəghəshi saa n ghəə a saa a bəbə ghə, nghee tə â fuu ndow wû u wi wə n tow u saa n kaŋ tə wi tən tə â fəələnə n zat kə fəkaʼ.

⁶ A loʼ wi tə ghəŋənə nə̀ saa doʼo bə ghə̂ a wi, saa doʼo soʼo ghə fɔɔngili ni fwaʼa tə Zə̀ kə tə loʼ Bày wi. Nkɔʼlə n dzəm nsə daʼa wə udzəm n mbi loʼ u wi wə tə̀ mbi nə bə may. Zə i loʼ sey.

⁷ Koʼo na! Tə wey tə bəghənə nə təmbaʼ! Ghə̂ adzəm i koʼo wi, ghə̂ ghey ghə â tsuʼnə wi, i koʼ daŋŋə soʼo wi. Ghə̂ adzəm fa n mbi ghə i deyyə bòʼ wi. Zə i bɔɔmə doʼo kə sey! I doʼo sey.

⁸ Mûkəbii tə loʼnə Zə̀ kə, dza nə̀, “N loʼ ney kəsə̂ nsə fii kəbam. Mə â loʼ nə̀ nzeyyə, mə n loʼ nə nyisa, à loʼ soʼo mə, n khənə ni kəm bə. À khə mə daʼa wə udzəm.”

Jɔn koʼ Klisto nə ujim

⁹ N loʼ Jɔn waazə ghaa wən tə fəʼlə dzəŋinə ghi ghaa n ghəə a fɔɔ u Kəzə̀, kow soʼonə fə̀ŋ tə̀ aloʼ ghaa n təŋkey saa loʼ nə kəfə kəmɔʼ ghi Yeso. Ghə â kwu naŋa mə n naʼ i loʼ zə dzuu dzəŋ tsəghə kɔʼnə n təŋkey mə â naʼlə ghɔɔmə i Kəzə̀, dza soʼo isəŋə zey Yeso â dza naŋanə. Ghə tɔŋŋə naʼ i tiizə nə̀ à loʼ Patmus.

¹⁰ A n bə n tsuʼ inaʼ wə nkala u loʼ wə, Zay kə Zow kə nyi bə n kow mə, mə n zow ndow dzə i taw i loʼ zə i fuŋunə n baa mə tə aloʼ isɔŋ ghə tɔŋɔnə.

¹¹ Zə n dza bə tə̀ mə nə̀, “Tɔ̀ɔ tsu ghəə ghən wə i koʼonə nə̀ kəmàʼlə, wə tûm ndow tə dzəŋi u dzûmə tə Klisto wən usəghəmbəghə. Tum ndow màʼlə kə tii kə tə̀ dzəŋi kə dzûmə tə Klisto key n Efesus, Smayna, Pegamum, Tyatira, Sadis, Filadefya, nsə Lodishya.”

¹² Nghee n khə̂mə tsəghə ndownə ni koʼ wù wey tə ghɔɔmənə tə̀ mə, mə n koʼ ndow nyəllə u kədaa ghə faalənə itsàa usəghəmbəghə.

¹³ N fəŋŋə kə nyəllə u kədaa wey, mə n koʼ ndow fə kə loʼ kə n tey fuu tə a loʼ wù sɔŋtsuʼ nə̀ tə n dzəŋə keeli sàŋ i kuum tsu ndownə n fuu i wi nsə kwɔɔ fə itsàa fə nə̀ tə baŋ tsəghə bə n kəmmə kə wi.

¹⁴ Nyuŋ tə kətow tə wi tə n fəmə fùŋ tə aloʼ mbaʼ tə fəmə tə. Sə̂ a wi ghə n baŋa tə à loʼ uvələ u bəʼlənə.

¹⁵ Fuu i wi zə n nyiəllə tə a loʼ kəvuʼ ghə tsə tsunə nə kənam, tsoʼlə tsu. Dzə̀ ə wi n shiə bə tə a loʼ bwabwa i dzuu i taa tsuu bənə.

¹⁶ Tə n khə nsəghəbələ nsəghəmbəghə n wɔɔ kə wi kə zəə kə. Kɔb nə̀ i tɔbə badla təbəghə, zə n shi bə n dzuu i wi. Tum-usə̂ u wi wə n nyiəllə tə aloʼ mgbala kə tsə.

¹⁷ Ambə n koʼ ndow wi, mə n bwu ndow n tənə fuu i wi, doʼo ndow tə a loʼ wù kpuu. Sey, tə n gaʼ tsu wɔ̀ kə wi kə zəə kə n kow mə, dza tsu nə̀, “Ka tsəŋ, aloʼ mə tɔŋŋə ney kəsə̂ nsə fii kəbam.

¹⁸ N loʼ wù wey tə loʼnə utaw. N mâ kpu, nyisa n khə muu zən i nə may koʼ way. À loʼ mə n khənə daʼa kə n kow və zə nsə n kow naʼ zə ivə zə.

¹⁹ Tɔ̀ɔ tsu nə kəmàʼlə ghəə ghey wə koʼonə, ghəə ghən a neynə bənə kə nyisa nsə a ghey ghə i neynə bənə n nəŋə zə ibam zə.

²⁰ Ghəə zey i nyi doʼonə n səghəbələ mən nsəghəmbəghə wə â koʼnə n wɔɔ kuŋ kə zəə kə nsə nyəllə u kədaa wən usəghəmbəghə nə̀ ghə faalə nə itsaa dii nə̀, səghəbələ mən nsəghəmbəghə tey n tow u tsətəndəghə tən tə keyyənə dzəŋi u dzûmə tə Klisto wən usəghəmbəghə, nyəllə u kədaa wən a tey n tow u dzəŋi u dzûmə tə Klisto wən usəghəmbəghə.”