3 Jɔn 1 - Kaa n Kəzə̀ n fəghə mə

¹ À maʼlə kən tɔ̀ɔ bə mə Jɔn wən n loʼnə ngəd. N tɔ̀ɔ bə tə wù fə wuŋ u dzuŋu wən, tɔŋŋə Gayɔs, n ndzəmə ləghənə wi.

² Fə̂ wuŋ u dzuŋu wə, n gɔŋŋə nə̀ wə i taw nsə nə̀ ghəə ghə ghə̀ i bwey dzɔbə, nghee tə̀ fə̀ŋ zə loʼ nə̀ i dzɔbənu ghi Zə̀ kə.

³ N ngii khə iduʼlə nghee ghə̂ a Kəzə̀ a loʼ ghə â bə dza bənə tə̀ mə nə̀, wə bɔɔmə muu kə nə isəŋə zən i loʼnə bòʼ Kəzə̀. Mə n ndzəm khə nə̀ wə muu nə isəŋə zey.

⁴ Ghə i loʼ i way i fuu mə n duʼlə zə tsəghəshi ni zow nə̀ waa ghuŋ a muu nə isəŋə.

Jɔn kali Gayɔs

⁵ Fə̂ wuŋ u dzuŋu wə, bəghəm i fə̀ŋ zə i loʼ tən kə n ghəə ghən wə ghəŋŋənə tə waazə a saa ghə n dzəŋi kə dzûmə tə Klisto, nsə ni gaamə ghə̂ ghey ghə bwey bənə.

⁶ Ghə n tiilə dza fa n dzəŋi kə dzûmə tə Klisto kuum ləghə zey wə diinə tə̀ ghə. N buʼu bə kəwɔɔ nə wə ndow kə n sə kə ni fuu ndow ghə n gaamə zə n bwey i ghə, tə̀ zə i fuu ngɔɔmə zə tə Zə̀ kə.

⁷ Boʼnə à loʼ n zəd i Klisto ghə â bwey fwaʼanə fwaʼ kən, nə ghə ney way fə kə n wɔ ghə̂ ghən ghə bəghəm way tə̀ Klisto

⁸ Saa ghən saa bəghəmnə tə Klisto, khə ni gaamə ndzoʼo ghə̂ ghən tə saa doʼo ghi ghə nə kəfə kəmɔʼ nə isəŋə zən ghə diinə.

Mwam u Diotefes nsə Demitrus

⁹ N mâ tɔ̀ɔ ndow tə dzəŋi kə dzûmə tə Klisto bòʼ ghəə zən, Diotefes wən tə ləghə ni doʼo wù nii, n tuu, dza nə̀ tə khə way ghə i loʼ zə ni ghəŋə ghi saa.

¹⁰ Abə mə i bənə, mə i tiilə dza bə ghəə a bəbə a loʼ ghən tə ghəŋənə nsə ghəə badla a loʼ ghən tə ghɔɔmənə bòʼ ghey. Tə ghəŋŋə kə way ghəə a ghən, tə tsəmə ləghə way ni kpiney ghə̂ a dii ghən ghə bwey bəghənə n dzəŋi kə dzûmə tə Klisto, tuu soʼo nə kə waazə a loʼ ghey nə kpiney bə ghə. Tə n dzùm shi daŋŋə ghə n dzəŋi kə dzûmə tə Klisto abə ghə ləghə ni kpiney bə ghə.

¹¹ N fə̂, kə wə nə dzûmə ndzoʼo mwam u bəbə wən, i dzûmə ndow ghəə a dzuŋu ghə. Wə keeli tsu nə ghə̂ ghən ghə ghəŋŋə ndzuŋ, dii bə nə ghə loʼ waa a Kəzə̀. A ghey ghə ghəŋŋə ghəə a bəbə ghə, ghə khə way Zə̀ kə.

¹² Ghə̂ adzəm, ghə ghɔɔmə ghəə a dzuŋu ghə bòʼ Demitrus, zə a ndzəm loʼ isəŋə nə tə loʼ wù dzuŋu. Ghey dza soʼo sey, ghaa khə soʼonu nə̀ abə ghey dzanə ghəə zə, a sey loʼ isəŋə.

Tɔŋɔ zow i Jɔn zən i guŋ kɔʼ

¹³ N khə ndəmə aghəə ni dza tə ghaa, a kee loʼ nə̀ n ləghə way ni tɔ̀ɔ nə kəmàʼlə.

¹⁴ N təŋkey n moʼo nə̀ mə i kuʼlə bə koʼonu ghaa, saa i ghɔɔmə dzəŋi.

¹⁵ Buulə i Kəzə̀ zə i loʼ ghi ghaa. Fə a ghaa ghən fa adzəm tɔŋŋə zow bə ghaa. Fuu ndow n na tɔŋɔ zow zuŋ zə tə̀ fə a saa ghey fey adzəm.