2 Timoti 4 - Kaa n Kəzə̀ n fəghə mə

Pɔl dza nə̀ Timoti kow fə̀ŋ n fwaʼ kə wi

¹ N dza bə tə wɔ a Timoti n sə K-a-zə̀ nsə Yeso Klisto wən tə i saʼanə ghə̂ ghən ghə loʼ utaw nsə ghə̂ ghən ghə kpu dzənə, abə tə i bənə ni bə saʼ mbi tə a loʼ kədə̀ŋ nə̀,

² wə naʼa tûm i dzuŋu zən. Wə i dəmə kə ni naʼa tûm i tii zə nəŋə tədzəm, abə ghə̂ a ləghə mɔ ghə ləghə way. I bɔɔ teyyə bə ghə̂ ghə n jii zən i loʼnə tsətsəghə, kpaa ndow ghə, kuu ndow fə̀ŋ tə ghə, kow tsuu soʼo fə̀ŋ abə wə diinə ghə.

³ N dza sey n təŋkey nəŋə zə i bəghənu ghə̂ ghə i ləghə way ni zəllə ghɔɔmə i Kəzə̀ zən i loʼnə isəŋə, ghə i fədlə dzûmə ndow ghəə ghən fə̀ŋ tə ghə tə ləghənə. Ghə i tɔŋɔ zuŋŋə bə n səə ghə, ghə̂ a dii ghey ghə diinə ghəə ghey tuŋŋə u ghə u ləghənə ni zow.

⁴ Ghə nə tuu maʼa ni zəllə ghɔɔmə i Kəzə̀ zən i loʼnə isəŋə, ghə nə fədlə fuu may ndow kə tuŋŋə u ghə wə n zəzəə n wey mən n maŋ loʼnə kənunu.

⁵ A kee bə wɔ a Timoti, abə à shiə kə ghə i ghaa zə, kə wə tə tsəŋŋə n wû wə. Kow tsu fə̀ŋ ni fəghə bòʼ Mûkəbii, i dəmə ndow kə ni naʼa tûm i dzuŋu zə tə ghə̂ ghə, fwaʼa fwaʼ kə kədzəm tə a loʼ wù kəfwaʼ a Kəzə̀.

⁶ A kee bə mə, mə n fuu wû wuŋ wə tə a loʼ umaʼlə tə Zə̀ kə. Nəŋə zə n shɔd tə mə ni zəghə mbi zən.

⁷ Mə n təm zə̂ ngəd kuŋ kə, mə u nyəŋ ndow kuum n luʼu key ghə ndow kuumnə tii nə n ka bwu n bəghəm i fə̀ŋ zuŋ.

⁸ Naamə kə ləmmə mə nya idəŋ n fwaʼ kə dzuŋu kən n fwaʼnə ghii kə. Naamə kə tii kə way kə tə mə, kə loʼ soʼo tə ghə̂ ghey adzəm ghə ləghənə ni koʼ tsuʼ fey Klisto i bəghə dzəŋŋənə ibam. À naamə kə tii kə naŋa Mûkəbii wən tə saʼanə ghə̂ ghə n jìi zey i loʼnə tsətsəghə.

Fwaʼ kən Pɔl fuu guŋŋənə tə̀ Timoti

⁹ Dəmə tsu ni mbad bə taa fa n səə mə,

¹⁰ n təŋkey, Demas n keeli ləghə zə n fə u mbi, tə u zəghə maʼa tsu mə, nuu ndow n Tesalonika. Kresens mâ nuu ndow n Galeshya, Taytus n nuu ndow soʼo n Damashia.

¹¹ À nya doʼo səə kə Lukas fa ghi mə. Abə wə dza i bəghənu, ney kɔʼ Mak, wə bə ghi wi n təŋkey, tə loʼnu ni gaamə mə n fwaʼ kən.

¹² N mâ tûm ndow Taychikus n naʼ i Efesus.

¹³ Abə wə bəghənə, wə ney bə saŋ zuŋ zey mə â naŋa taʼanə n ndaw Kapus n naʼ i Trowas. Wə ney bə soʼo màʼlə wuŋ wey ghə baŋ kɔʼnə, a ka ndɔm taŋ u wey ghə taŋi kɔʼnə n gow nyam.

¹⁴ Alekzanda wən tə tsəənə nam kə, â ngii ghəŋə mə n ghə i bəbə zə. Mûkəbii i tsəə dzəŋŋənu wi n ghəə ghən tə ghəŋənə.

¹⁵ Ney ghə̂mə zə ghi wi n təŋkey, tə â ngəmsə tuu maʼa bə tûm zən saa naʼlənə.

¹⁶ N nəŋə i sə̂ isə zey ghə â ney ndow mə n tay i saʼ, wu umɔʼ ka tsəm bə taʼ dzə ghi mə, ghə adzəm n fəd tûmmə naŋa mə. N gɔŋŋə nə̀ Zə̀ kə neyzəə ghəə a ghə a bəbə ghə.

¹⁷ A kee loʼ nə̀ Mûkəbii â loʼ ghi mə, tə n fuu mə n daʼa kə nə̀ mə i loʼ ni naʼa may tûm i dzuŋu zə tə ghə̂ ghən adzəm ghə way ghə̂ a Təjuu ghə. Zə̀ kə sey bəghəshinu mə n wɔɔ kə ivə.

¹⁸ Mûkəbii i bəghəshiənu mə n wɔɔ kə ghəə a bəbə ghə adzəm. Tə nə nyoʼlə ney ndow mə n fɔɔ u wi wə idəŋ wə. N gɔŋŋə nə̀ ghə̂ ghə i fuu wi n kɔʼləmə nəŋə tədzəm. À may kə sey.

Pɔl fuu guŋŋə tɔŋɔ zow i wi

¹⁹ Tɔŋɔ zow tsu Prisila ghi Akwila, nsə ghə̂ ghey adzəm ghə loʼnə n ndaw Onesiforus.

²⁰ Erastus mâ doʼo səə n naʼ i Kɔrint. Abə Trofimus, mə â naŋa taʼa wi n naʼ i Miletus nə̀ tə dzaŋanu.

²¹ Dəmə tsu nə wə bə tən nya nə̀ nəŋə zə ufəb i ka kam bə. Yubulus tûm bə wɔ n tɔŋɔ zow zə. Pudens, Laynus, Klodia nsə dzûmə tə Klisto tən fa adzəm, tûm bə soʼo itɔŋɔ zow.

²² N gɔŋŋə nə̀ Mûkəbii i loʼ ghi wɔ. N gɔŋŋə soʼo nə̀ ndzuŋ ə Kəzə̀ i loʼ ghi ghaa adzəm.