2 Timoti 3 - Kaa n Kəzə̀ n fəghə mə

Tsəə tey tə diinə nə̀ mbi nya may bənu

¹ Keeli tsu na nə̀ abə mbi nə may bənə, ghəə a nə ngii tawnu.

² Ghə̂ ghə i bɔɔmə ləghə kə wû i ghə zə, shiə n sə̂ ghə n ghəə ghə ukhəə, ghaŋŋə iwû, kpaalə aghə̂, zow way tə ghə bày a ghə ghə, ney way wù n taŋ, fuu way zɔŋŋə kə tə ghə̂ ghey ghə gaamənə ghə, ghə nə ney way ghəə a Kəzə̀ ghə n taŋ,

³ ghə nə khə way ləghə zə n kow wù loʼ, neyzəə way bəb i wù zə, khəə kaabə tsə təfəghəm n kow ghə̂ ghə, way ni kow fə̀ŋ, khə mbwu kə fə̀ŋ, ghə nə ləghə way ni koʼ ghə i dzuŋu i loʼ zə,

⁴ ghə nə fìilə fuu shiə ghə̂ ghə, ghəŋŋə zɔ̀ʼ tə aghəə, ghə nə khə nə̀ a bɔɔmə may kə ghə, ghə nə ləghə ghəə ghən a dzɔbənə tə ghə, kee ləghə way Zə̀ kə,

⁵ ghə nə nəŋŋə ghəŋŋə nə̀ ghə loʼ ghə̂ a Kəzə̀, kee tuu maʼa daʼa key kə loʼ ni ghəŋə ghə nə̀ ghə doʼo ghə̂ a Kəzə̀. Kə wə nə keeli ghə i loʼ zə ni ghəŋə ghi ndzoʼo ghə̂ ghən.

⁶ Ghə loʼ ndzoʼo ghə̂ ghən ghə tsɔŋɔ nyiənə n ndaw tə ghə̂, ghə tsìi gheyzən ghən fə̀ŋ tə ghə tə taw way, gheyzən ghən ghə loʼ nə̀ bəb i ghə zə n ghə tsəghəshi, moʼlə tə bəbə tə a sìi ndzəŋŋə kaabə soʼonə ghə.

⁷ Gheyzən ghən dəmə zeeli tsə kə nəŋə tədzəm ni zoʼlə ghəə a fəghə ghə, loʼ sey nə̀ ghə way ni zowkeeli koʼ isəŋə.

⁸ Nghee tə Janis ghi Jambris â təʼlənə Mushi, à loʼ soʼo sey ghə̂ ghən təʼlənə isəŋə. À wən loʼ aghə̂ nə̀ ghə khə dzî u təfə̀ŋ, nə̀ ghə n bwù khə̂mə soʼo n bəghəm i fə̀ŋ i ghə.

⁹ À kee loʼ nə̀ ghə nə ghəŋə tsuŋŋə way ghəə ghən n təŋkey, aghə̂ adzəm i koʼo keelinu laʼlə i ghə zə, ighələ tə zə â shinə tə Janis ghi Jambris.

Pɔl tsə̀ Timoti nə̀ tə ney ghow kə ibwey kə wi

¹⁰ A kee bə wɔ a Timoti, wə khənu ghəə ghey mə â diinə ghə̂ ghə tii nsə muu zuŋ zə idzəm. Wə khənu jìi zey n bəghəmnə tii tə̀ Klisto nsə fə key n kəŋənə fa n mbi, ləghə zey n khənə n kow ghə̂ ghə, nsə nə̀ n khənu ni kow fə̀ŋ n fwaʼ K-a-zə̀ abə ghəə a taw kə ngee.

¹¹ Wə khənu nghee ghə â chɔdnə mə tii nsə nghee mə â fəghənə tii. Wə khə soʼonu chɔd mey mə â keelinə n naʼ i Antyɔk, Ikonum, nsə n Listra. Nghee tə ghəə ghən â shinə n kow mə, Mûkəbii n nam bəghəshi mə n ghəə a tii ghə adzəm.

¹² Isəŋə loʼ nə̀, wù wey tə ləghə ni muu muu i Kəzə̀ zən i loʼnə nə kəfə kəmɔʼ ghi Yeso Klisto, ghə i chɔdlɔnu wi.

¹³ Ghə̂ a bəbə ghə nsə ghə nəb ityim nə faalə bəb njaʼ may ndow. Ghə nə nəbə ghə̂ ghə, ghə̂ a nə nəbə soʼo ghə.

¹⁴ A kee bə wɔ, təmi taw tsu kə nə isəŋə zey wə zoʼlə kɔʼ bənə nsə n ghəə zey wə bəghəmnə tii n təŋkey, wə khənu fə key ndzoʼo ghə̂ ghey wə koʼ neynə ghəə ghən n wɔ ghə loʼnə ghii kə.

¹⁵ Keeli tsu soʼo nə̀ wə â khə keeli tənu ghɔɔmə i Kəzə̀ zə nə̀ wə nam loʼ wiinətəghə. À loʼ ghɔɔmə i Kəzə̀ zən i fuunə wɔ n tɔb wə, ghəŋə nə̀ keeli ibəghəshi nghee wə bəghəmnə tə Yeso Klisto.

¹⁶ À loʼ Kəzə̀ kə ghəŋŋənə nə̀ ghə̂ a tɔ̀ɔ ghəə ghey a tɔ̀ɔ doʼonə n màʼlə K-a-zə̀. Ghɔɔmə i Kəzə̀ zən loʼ ni dii ghə̂ ghə nə̀ isəŋə tii, kpaa ghə̂ ghey ghə ghəŋŋənə ghəə a bəbə ghə tii, ni dza ndow ghəə ghey ghə̂ a ghəŋə bəəbənə sey nə̀, ghə loʼ ni ghəŋə ghəə a dzuŋu ghə tii. Ghɔɔmə i Kəzə̀ i tii i loʼ soʼo ni tsə̀ə ghə̂ ghə tii nə̀ ghə i muu n jìi zey i loʼnə tsətsəghə.

¹⁷ Zə̀ kə ney ghɔɔmə i wi zən ni tɔʼ bayyə ghə̂ a wi tii ni fwaʼ fwaʼa tə wi tə dzuŋu tə tədzəm.