2 Timoti 1 - Kaa n Kəzə̀ n fəghə mə

Tɔŋɔ zow i Pɔl tə Timoti

¹ A loʼ mə Pɔl n tɔ̀ɔ bənə màʼlə kən. Â tsəm kɔʼ Kəzə̀ ni sày mə nə̀ n doʼo ngəd tə Yeso Klisto. Tə tûm bə mə nə̀ n bə naʼa tûm i dzuŋu zə tə ghə̂ ghə bòʼ muu zən tə â təb naŋa tə ghə̂ ghən ghə loʼnə nə kəfə kəmɔʼ ghi Yeso Klisto.

² N màʼlə kən tɔ̀ɔ bə tə wɔ a Timoti, wə loʼnə waa wuŋ u tsuʼu wə. N gɔŋŋə nə̀ Zə̀ kə, tə loʼnə Bày saa nsə Yeso Klisto, tə loʼnə Mûkəbii saa, fuu wɔ n daʼa kə, tə keeli fə̀ŋ i dzuŋu zə n kow wɔ, tə ghəŋə soʼo nə̀ wə i muu nə ibuulə.

Pɔl fuu zɔŋŋə K-a-zə̀ kuu soʼo fə̀ŋ ə Timoti

³ N fuu kəzɔŋŋə tə Zə̀ kən n fwaʼanə tə wi n fə̀ŋ i zow zə ighələ tə ghə bày a bày ghuŋ ghə â ghəŋŋə tsənə. Nəŋə tədzəm abə n gɔŋŋənə, mə n gɔŋŋə soʼo n tow kə.

⁴ Abə n moʼlə bənə nghee wə â deynə tii n nəŋə zey saa â sàli nuu tsunə, fə̀ŋ n baŋa mə ni koʼ wɔ, sey nə̀, mə i loʼ ni keeli iduʼlə naʼ idzəm.

⁵ N moʼlənu nghee wə ndzəm bəghəmnə tii n kow Klisto ighələ tə này này wə Lɔys nsə này wə Yunis a khənə. N khə nə̀ wə bɔɔmə khə soʼo bəghəm i fə̀ŋ zey ghə â khənə.

⁶ À wən loʼ zuŋ key n zəŋŋə bənə wɔ nə̀ wə i nûmə zeeli naamə key Zə̀ kə â fuunə tə wɔ n nəŋə zey mə a gaʼnə wɔɔ ghuŋ ghə n kow wɔ, gɔŋŋə tsu n tow kə.

⁷ N dza sey n təŋkey, Zay key Zə̀ kə â fuunə tə saa ghəŋŋə dzə way nə̀ saa i tsəŋə ghəə ghə. Tə â fəd fuu saa n Zày key kə ghəŋŋənə nə̀ saa i khə daʼa kə, saa i ləghə wû i saa zə, saa i loʼ soʼo ni tɔʼ kwu keeli wû i saa.

⁸ Sey, kə wə i dədlə n tow kə ni təmi tiillə bòʼ Mûkəbii saa, kə wə nə dədlə soʼo n tow kə ni dza ndow nə̀ wə khənu mə wən n loʼ fa n ndaw tsaʼ bòʼ Klisto. Fət təmdzəŋi bə mə ni fəghə bòʼ tûm i dzuŋu zən. Wə khə ni fəghə n təŋkey Zə̀ kə n fuu wɔ n daʼa kə tii kə.

⁹ Zə̀ kə â bəghəshi saa, sày soʼo saa nə saa doʼo ghə̂ a wi. Tə â ka sey ghəŋə dzə bòʼ ghə i dzuŋu i loʼ zə saa â ghəŋə nə̀ tə wi, â fəd loʼ n təŋkey, à loʼ ghəə ghey tə â khə bayyə naŋa zeynə bòʼ ndzuŋ ə wi tə saa. Tə â tsəghə n kow Yeso Klisto ni fuu saa n ndzuŋ zən nə̀ mbi ka kam kaʼ.

¹⁰ Zə̀ kə â chi dii bə ghəə ghən adzəm tə saa n nəŋə zey Yeso Klisto wən tə loʼnə bəghəshi ə saa â bənə. Tə n ghəŋə və zə u kəm khə way daʼa kə n kow saa, tə u ghəŋə soʼo nə̀ saa i khə muu zə itsali zə n bam i tûm i dzuŋu zən tə diinə tə saa.

¹¹ Zə̀ kə n sày kɔʼ mə nə̀ n doʼo ngəd ə Klisto, wù dii wə, nsə wù wən tə naʼlənə tûm i dzuŋu zə.

¹² A wey loʼ zuŋ key n fəʼlə fa tii n ndaw tsaʼ. N kee dədlə dzə way n tow kə a dza n loʼ n ndaw tsaʼ n təŋkey n khənu wù wey n bəghəm fuunə tə wi, mə n tɔʼ khə soʼo nə̀ tə i kwɔɔ keelinu fə key tə â fuunə tə mə ni ndow kuum n tsuʼ fey tə i bəghə dzəŋŋənə ibam.

¹³ Tɔʼɔ kwu keeli dzɔb tsu ghəə ghən adzəm mə â dii bənə tə wɔ, tə a loʼ jìi zey i kpiinə tə wɔ ni dzûmə. Nghee wə bəghəmnə tə Klisto, khə soʼo iləghə n kow ghə̂ ghə, wə i loʼnu ni dzûmə jii zən n təŋkey wə loʼ nə kəfə kəmɔʼ ghi Yeso Klisto.

¹⁴ N gɔŋŋə nə̀ Zay kə Zow kən kə loʼnə n kow saa, kə fuu wɔ n daʼa kə ni tɔʼ kwu keeli isəŋə zən Zay kə Zow kə fuu naŋanə tə wɔ.

¹⁵ Wə khənu nə̀ aghə̂ adzəm n mboʼo Eshya n tyi zəghə mə. Fijelus ghi Hemojenis u tyi zəghə daŋŋə soʼonə mə.

¹⁶ N gɔŋŋə nə̀ Zə̀ kə kwɔɔlə isî n kow Onesiforus nsə ghə̂ ghey adzəm ghə loʼnə n ndaw wi n təŋkey, tə â bə tsəmmə zeeli tsə mə n ndaw tsaʼ, tə n ka dədlə soʼo n tow kə ni bə koʼ mə.

¹⁷ Ambə tə bənə n Rom, tə n kəŋ mə nə təluʼu tədzəm, bə kəŋ koʼ bə mə.

¹⁸ N gɔŋŋə nə̀ Zə̀ kə kwɔɔlə isî n kow wi n tsuʼ fey Mûkəbii i bəghənə tii. Wə tɔʼ khənu nghee tə â gaamənə mə tii n naʼ i Efesus.