2 Tesalonika 3 - Kaa n Kəzə̀ n fəghə mə

Pɔl nɔɔ igɔŋŋə

¹ Ni guŋ kɔʼ waazə ghə, ghaa i gɔŋŋə tə ghey. Ghaa i gɔŋŋə nə̀ ghɔɔmə i Mûkəbii zam ndow luʼu tədzəm, nsə nə̀ ghə̂ ghə i loʼ ni ngɔɔmə naŋa ghɔɔmə i tii zə tə̀ zə â loʼ nə ghi ghaa.

² Ghaa i gɔŋŋə soʼo nə Zə̀ kə gaamə ghey tə̀ ghey nɔb shi n wɔɔ kə ghə̂ a bəbə ghə, n təŋkey a way dzə aghə̂ adzəm ghə ndzəm khənə bəghəm i fə̀ŋ zə.

³ Zə̀ kə kee naŋŋənu ghɔɔmə i wi, tə i fuu ghaa n daʼa kə, tə keyyə ghaa kə Satan nə mɔmnə ghaa.

⁴ Ghey khənu n fə̀ŋ tə ghey nə Mûkəbii loʼ ghi ghaa. Ghey khənu nə̀ ghaa ghəŋənu ghəə ghey ghey dzanə tə̀ ghaa, ghey u khə soʼo nə̀ ghaa i ndow kənu n sə kə ni ghəŋə ghəə a tii ghə.

⁵ Ghey gɔŋŋə nə̀ Mûkəbii ghəŋə tsu nə ghaa tɔʼ zowkeeli ləghə zey Zə̀ kə khənə n kow ghaa. Ghey gɔŋŋə soʼonə nə̀ Klisto ghəŋə nə̀ ghaa i loʼ ni kow fə̀ŋ nə̀ aghəə adzəm.

Kay wû khə ni fwaʼa ni keeli fə̂ kə zəə kə

⁶ Waazə ghə, ghey dza bə tə̀ ghaa n zəd i Mûkəbii saa Yeso Klisto nə̀ kə̂ ghaa i təmə dzəŋi ghi dzûmə tə klisto tən ghə laynə, ləghə way ni dzûmə ghəə ghən ghey diinə tə ghaa n jìi zey ghaa khə ni muu a tii.

⁷ N dza sey n təŋkey, ghaa khənu n wù i ghaa nə̀ ghaa khə ni dzûmə kɔʼɔ bə ghôw kə ibwey kə ghey. Ghey â lay way n muu i ghey n nəŋə zey ghey loʼ ghi ghaa.

⁸ Ghey ka zə̂ dzə fə̂ kə wù kə kənunu. Ghey fəllə fwaʼanu nəŋə tədzəm n tsuʼu tə nsə n tsə̂ tə sey nə̀ kə̂ ghey nə̂ doʼlənə tə̀ a loʼ kəfəmmə tə wù ghaa u loʼ wə.

⁹ Â loʼ buʼ kə ghaa ni laalə tə̀ ghey kənunu. À kee loʼ nə̀ ghey â ləghə ni moʼ dii bə ghaa n jìi zey ghaa khənə ni muu ti.

¹⁰ N sey dza n təŋkey, n nəŋə zey ghey â loʼ nə ghi ghaa, ghey dza tsənu tə̀ ghaa nə̀, “wù wey tə tuunə ni fwaʼ, khə soʼo way ni zəə.”

¹¹ Ghey dza ghəə ghən n təŋkey ghey zow nə̀ ghə̂ a loʼ ghə n fəŋŋə kə ghaa ləghə way ni fwaʼ. Ghə ləghə kə ni bwey nyiə kaabə n ghəə a ghə̂.

¹² N zəd i Mûkəbii Yeso Klisto ghey dza bə tə̀ ghə̂ ghən kpaa tənə bə ghə nə̀ ghə zuŋ tsu iwû, ghə i fwaʼa ndow ni keeli fə̂ kə zəə kə.

¹³ Abə ghaa waazə ghə i khə ghaa nə̂ buu doʼonə ni ghəŋə ghəə a dzuŋu ghə.

¹⁴ Ney na ghə̂mə zə ghi ghə̂ ghey ghə tuu ni naŋa ghəə ghən ghey tɔ̀ɔ bənə n maʼlə kən. Kə ghaa i təmə dzəŋi ghi ghə, sey nə̀ ghə keeli tow kə dədlə kə.

¹⁵ A kee loʼ nə̀ kə̂ ghaa nə̂ ghəŋənə ghi ghə tə̀ ghaa khə təngəmə, ghaa i fəllə kpaa ndow ghə tə a loʼ waazə a ghaa.

Ghɔɔmə i guŋŋə zə

¹⁶ Ghey gɔŋŋə nə̀ Mûkəbii n wù u wi wə, tə loʼ wù wey tə fuunə buulə zə tə̀ ghə̂ a wi ghə, tə fuu ghaa n buulə zə nəŋə tədzəm. Ghey gɔŋŋə soʼo nə̀ Zə̀ kə i loʼ ghi ghaa.

¹⁷ A loʼ mə Pɔl n tɔ̀ɔ bənə tɔŋŋə zow zən n wɔ̀ kuŋ kə. A wey loʼ nghee n kuunə tsə̀ə n màʼlə wuŋ udzəm. N ghəŋə sey nə̀ ghə̂ a keeli nə̀ a màʼlə kə tii kə tɔ̀ɔ mə.

¹⁸ N gɔŋŋə nə̀ Mûkəbii saa Yeso Klisto dii fə̀ŋ ə wi i dzuŋu zə tə̀ ghaa adzəm.