2 Pita 3 - Kaa n Kəzə̀ n fəghə mə

Ghəə zey zə i shiənə n tsuʼ fey Mûkəbii i bəghə dzəŋŋənə ibam

¹ Fə ghuŋ a dzuŋu ghə, màʼlə kən nya ghəŋŋə ndow umàʼlə ubəghə n tɔ̀ɔ bənə tə̀ ghaa. N màʼlə wən ubəghə n tɔ̀ɔ bənə ni maŋ zəŋŋə bə ghaa n ghəə ghey ghaa khə dzənə, loʼ ni ghəŋə nə̀ ghaa i tɔʼɔ moʼlə tsu ghəə a tii ghə n fə̀ŋ tə zow tə.

² N ləghə nə̀ ghaa i moʼlə tsu ghɔɔmə zey tûm tə Kəzə̀ tə zow tə â dza naŋanə tə̀ ghaa n num tə ibam tə, ghaa i moʼlə tsu soʼo laŋ wey ngəd tə Yeso tə â fuunə tə̀ ghaa nə̀ u nuu bə n wɔ Mûkəbii saa nsə bəghəshi ə saa.

³ N ləghə nə̀ ghaa zowkeeli tsu nə̀ n tsuʼu mən mbi may bənə, ghə̂ a loʼ ghə i bəghənu nə̀ ghə muu tən kə muu zey gow uwû ghə ləghənə. Ghə nə tsoʼo ghaa.

⁴ Ghə nə bəbə nə̀, “N dza Yeso mâ dza naŋa nə̀ tə i kəm bəghənu ə? Tə ghee?” Ni ney nuu bə tə̀ mbi a nə kaʼnə, ghə bày bày a saa ghə n bə kpuulə, aghəə adzəm a ndow kə ighələ tə ghə â loʼnə nə nzeyyə.

⁵ À ndzəm sày kɔʼ ghə ni kii maʼa nə̀ n num tə ibam tə, Zə̀ kə â bɔm kədəŋ nsə ghəlitsə kə nə̀ tə maŋ tsəʼlə tsu kə kəlaŋ. Tə n faalə shi kɔʼ ghəlikətsə nə mmuu, ghəŋə soʼo nə̀ ghəlitsə kə doʼo tsu n nəŋ ghi mmuu mə.

⁶ À loʼ soʼo mmuu Zə̀ kə â neynə ni ləŋi maʼa ghə̂ a mbi i wey zey nghee tə â ghəŋə nə̀ dzuu tə kuŋ shi.

⁷ Zə a kee loʼ nə̀ n ghɔɔmə i wi i mɔʼɔ zən, Zə̀ kə n baʼ naŋa shi bə dəŋ key kə loʼnə nya nsə ghəlitsə kə nə̀ ghə i ləmmə tsu nəŋə zey tə i saʼanə ghə̂ ghey ghə ngɔɔmə way wi. Tə i ləŋi maʼa ghə nə uvələ.

⁸ Fə ghuŋ a dzuŋu ghə, ghə i loʼ i loʼ fa n ləghə way nə̀ ghaa neyzəə! Ghə i tii i loʼ nə̀, n sə kə Mûkəbii, fətsuʼ fəmɔʼ, fə loʼ tə a loʼ tənum kam. Tənum kam a loʼ soʼo tə a loʼ fətsuʼ fəmɔʼ.

⁹ Mûkəbii lasə dzə way ni luulə ghəə zey tə â təb naŋanə tə̀ ghə̂ a loʼ a moʼlənə. I fəd loʼ nə̀ tə kow fə̀ŋ ghi ghaa n təŋkey tə ləghə way nə̀ Zə̀ kə ləŋi maʼa wù ghaa umɔʼ. Tə kee ləghə nə̀ aghə̂ adzəm a kweyyə nuu bə n ghəə a ghə a bəbə ghə.

¹⁰ A kee loʼ soʼo nə̀ tsuʼ fey Mûkəbii i bəghənə tii, wù loʼ i keeli naŋa way. Tə i bəghə nə̀ ghaa ka keeli naŋa tə̀ wù tsɔŋɔ nə bəghə nə̀ ghaa ka keeli. N tsuʼ fə tii fə, dəm kə nə kwɔɔ nghee dəŋ kə saŋa nuulə nyiə ndownə. Zə̀ kə nə ləŋi maʼa fə wən udzəm u loʼnə idəŋ nə uvələ. Ghəlikətsə nsə fə wən udzəm u loʼnə tii i saŋ nuu tsu.

¹¹ Nghee i loʼ nə̀ Zə̀ kə i ləŋi maʼa fə wən udzəm n jìi i zən, i sey dii nə̀ ghaa khə ni muu ndzoʼo muu i ghaa zə ə? Ghaa khə ni muu muu i zow zə, ngɔɔmə soʼo Kəzə̀ nəŋə tədzəm,

¹² nghee ghaa ləmmə tənə tsuʼ fey Zə̀ kə naŋanə nə̀ Yeso i bə dzəŋŋə, kə ghəŋə nə̀ tsuʼ fə tii fə mbad bə. N tsuʼ fə tii fə, vəllə u nə ləŋi maʼa kɔʼ kədəŋ, zuʼ kə uvəllə kə nə ghəŋə nə̀ fə wey udzəm u loʼnə idəŋ, nyə̀ŋ nuu tsu.

¹³ Saa kee ləmmə kə təb key Zə̀ kə â təb naŋanə tə̀ saa. Tə â təb naŋa saa n dəŋ kə fəghə kə nsə ghəlitsə kə fəghə kə. À fu tii muu tən kə ghə̂ ghey ghə ghəŋŋə ghəə ghey a kpiinə tə̀ Zə̀ kə.

¹⁴ Sey, fə ghuŋ a dzuŋu ghə, nghee ghaa ləmmənə tsuʼ fən, dəmə tən tsu n na ni koʼ nə̀ ghaa i zow, khə soʼo way bwu i loʼ zə n sə K-a-zə̀, loʼ soʼo nə ibuulə ghi wi.

¹⁵ Ghaa keeli tsu nə̀ nghee tə Mûkəbii saa kownə fə̀ŋ sa ghi saa loʼ ni fuu ghaa n buʼ kə nə̀ ghaa keeli ibəghəshi. À bɔɔmə loʼ ighələ tə̀ waazə saa u dzuŋu wə tɔŋŋə Pɔl â tɔ̀ɔ bənə tə̀ ghaa n tɔb wey Zə̀ kə â fuunə tə̀ wi.

¹⁶ Tə tɔ̀ɔ kə n jìi i mɔʼɔ zə n màʼlə u wi udzəm. Ghəə a loʼ a loʼnu tə tɔɔnə n màʼlə u wi nə̀ a tawnu ni zowkeeli. Ghə̂ ghey ghə tɔʼ khə way Zə̀ kə nsə ghə̂ ghey ghə ka kam tɔʼ beyyə n bəghəm i fə̀ŋ i ghə a ney bɔɔ naŋa ndow ghəə a tii ghə n jii tə ghə, ighələ tə̀ ghə ghəŋŋənə n dəŋə tə loʼ tə n màʼlə K-a-zə̀. Ghəə a tii ghə a ghəŋŋə nə̀ ghə ghəŋə nə̀ Zə̀ kə ləŋi maʼa ghə.

¹⁷ Waazə ghuŋ a dzuŋu ghə nghee i nyɔʼ loʼ nə̀ ghaa n keeli zey ghəə ghən, ghaa ney kɔʼ ighə̂mə, sey nə̀ kə ghə̂ a bəbə ghey nə nəbənə ghaa n ghəə ghey ghə dzanə nə̀ a kpii way, a ghəŋŋənə nə̀ ghaa zəghə maʼa jìi Kəzə̀, ghaa nyəŋ laʼ.

¹⁸ Nyisa i loʼ kə nə̀ ghaa ndow kə n sə kə ni muu n jìi zey Mûkəbii saa nsə bəghəshi ə saa Yeso Klisto i ndəŋə dii bənə ghaa n fə̀ŋ ə wi i dzuŋu zə nsə n jìi zey ghaa i tɔʼɔ ndəŋə keelinə wi. N gɔŋŋə nə̀ ghaa i ngɔɔmə Yeso Klisto nya nsə nə tənəŋə tədzəm! Zə i loʼ sey.