2 Pita 2 - Kaa n Kəzə̀ n fəghə mə

Ghaa ney ighə̂mə ghi ghə̂ a dii a tsɔŋɔ ghə

¹ N num tə ibam tə, tûm tə Kəzə̀ tə tsɔŋɔ tə â loʼ tsənu n fəŋŋə kə aghə̂. N jìi i mɔʼɔ zə, ghə̂ a dii a tsɔŋɔ ghə i shiə kɔʼɔnu n fəŋŋə kə ghaa. Ghə nə tsɔŋ nyi bə n fəŋŋə kə ghaa nə̀ ghaa khə way, ghə dii ghəə ghey ghə i ghəŋŋə nə̀ ghaa nyəŋ laʼ. Ghə nə tuu maʼa daŋŋə Mûkəbii wey tə kuum nuu shi bə tow u ghə wə. À wey loʼ ghə i tii zə, ghab kə i kəm shi way tə̀ Zə̀ kə ni ləŋi maʼa ghə.

² Nghee i buʼ loʼ kə nə̀ Zə̀ kə i kuʼlə ləŋi maʼanu ghə̂ ghən, ndəmə aghə̂ i dzûmənu dzəə dzəə kə imuu kə ghə kə tii kə. Ghə nə ghəŋə nə̀ ghə̂ ghə i kpaalə tûm zən i loʼnə isəŋə bòʼ ghəə ghey ghə ghəŋŋənə.

³ N sə a ghə a shiə ghə, ghə̂ a dii a tsɔŋɔ ghən nə dza bə zəzəə mən n fiilənə isəŋə tə̀ ghaa ni nəəbə ney ukhəə n wɔ ghaa. Zə̀ kə mâ khə bayyə naŋa nə̀ tə i chɔdlɔ ghə̂ ghən, tə kam bweeli soʼo way.

⁴ Zə̀ kə â ka tsəm toʼlə naŋa dzə tsətəndəghə tə wi tən tə â ghəŋənə bəb zə, tə n fəd ney kuum tsu ghə nə tətsaʼ, say maʼa nyi tsu ndow ghə n fɔŋŋə k-a-bùʼ kən kə kùʼu way, nə̀ ghə doʼo fu nə kələm, ləmmə tsu tsuʼ fey tə i saʼanə ghə̂ ghə a tii.

⁵ Zə̀ kə â ka tsəm toʼlə naŋa dzə ghə̂ a wey ghə fa n mbi nghee tə â ghəŋənə nə̀ dzuu tə kuŋ shi, tə ləŋi maʼa ghə̂ ghey ghə â ngɔɔmə way Zə̀ kə. Tə â bəghəshi kə Noa wən tə â diinə ghəə ghey a kpiinə tə̀ Zə̀ kə ghi ghə̂ ghey asəghəmbəghə ghə loʼ dzəŋinə ghi wi.

⁶ Zə̀ kə â chɔd tsu ghə̂ a naʼ Sodom nsə naʼ i Gomora zə nghee tə à ghəŋənə nə̀ vəllə u ləŋi maʼa naʼa tə tii tə, tə fəd doʼo kɔʼ udzəm. Ghəə zey tə â ghəŋənə tə̀ ghə̂ a naʼa tən loʼ ni dii naŋa ndow tə̀ ghə̂ ghey ghə ghəŋŋənə ghəə ghey Zə̀ kə ləghə way, ndzoʼo ghəə zey zə i shiənə n kow ghə.

⁷ Zə̀ kə n kee bəghəshi tsu Lɔd wən tə â loʼnə wù tsətsəghə. Fə̀ŋ â ngii fəmmə Lɔd boʼnə ghə̂ ghən ghə naŋŋə way laŋ kə â ghəŋŋə dzəə dzəə tə aghəə.

⁸ Lɔd wə tə â loʼnə wù tsətsəghə â muu n fəŋŋə kə ghə, tsuʼu n dzəm, tə n ngii zow ifɔɔbə n fə̀ŋ nghee tə â ngii koʼo zeeli, zow zeeli soʼo ghəə a bəbə ghey ghə ghəŋŋənə.

⁹ Abə i loʼnə sey, i sey dii nə̀ Mûkəbii khənu jìi zey tə i bəghəshiənə ghə̂ ghey ghə ghəŋŋənə ghəə ghey a kpiinə tə̀ Zə̀ kə abə ghə keelinə mɔʼ koʼ kə, tə u khə soʼo jìi zey tə loʼ ni chɔdlɔ ghə̂ ghey ghə ghəŋŋə ghəə ghey a kpiilə way tə̀ Zə̀ kə ni ndow kuum n nəŋə zey tə i saʼanə ghə̂ ghə a tii.

¹⁰ Tə i chɔdlɔ tsəghəshiə ghə̂ ghey ghə ghəŋŋənə dzəə dzəə tə aghəə tey gow uwû ghə ləghənə, koʼo kìi soʼo daʼa K-a-zə̀. Ghə̂ ghən ghə diinə ghəə a badla ghən tsəŋə way ghə i loʼ zə, ngii kɔʼlə soʼo iwû. Ghə buʼu tsəŋə way ni tsayyə zay wey u loʼnə idəŋ.

¹¹ Loʼ sey nə̀ tsətəndəghə tə Kəzə̀ tey tə tsəmə taw kənu, khə soʼo kədaʼa tsəghəshi ghə̂ a dii a tsɔŋɔ ghən, tə buʼu kwɔɔ way ghə̂ ghən ni kpaalə ghə n ghə i loʼ zə n sə kə Mûkəbii.

¹² Ghə̂ ghən ghəŋŋə aghəə nə̀ ghə moʼlə way tə a loʼ nyam tə mbvən tə ghə â jinə ghə nə̀ ghə i kwu ləŋi maʼa. Ghə maŋa tsayyə aghəə nə̀ ghə buʼ tɔʼ khə way ghəə a tii ghə. À wey loʼ ghə i tii zə Zə̀ kə i ləŋi maʼanə ghə tə̀ ghə nə ləŋi maʼanə nyam tə mbvən tə.

¹³ Zə̀ kə i chɔdlɔ ghə̂ ghən ni tsə dzəŋŋə ghə n ghəə a bəbə ghən ghə ghəŋŋənə. Ghə ney nə̀ à loʼ ghə i dzuŋu zə tə̀ ghə ni zəələ wû i ghə zə, ghəŋŋə kaabə tsə dzəə dzəə tə aghəə n mgbala tsə tə. Ghə loʼ tə a loʼ tɔɔlə tə dzəə tə, tə ngii ney bənə tow kə dədlə kə n fəŋŋə kə ghaa abə ghə zəələnə wû zə n ghəələ n ghə n tsɔŋɔ mey.

¹⁴ Sə̂ a ghə a baa kə n kow gheyzən a laŋŋə ghə. Ghə buu way ni ghəŋŋə ghəə a bəbə ghə. Ghə təəbə fuu ghə̂ ghən bəghəm i fə̀ŋ i ghə i ka kam tɔʼ beyyə nə̀ ghə nyəŋ laʼ. À n fə̀ŋ tə ghə bəghə doʼo kə umə̂. Zə̀ kə n ləŋ naŋa ghə!

¹⁵ Ghə n zəghə maʼa jìi i dzuŋu zə, fədlə laʼa nay ndow. Ghə n ney ghow kə ibwey kə Balam wən tə loʼnə waa Beyɔ. Balam loʼ wù wey tə â ləghənə khəə wey ghə̂ a təngəmə a Təjuu ghə â tsənə wi tii nə̀ tə dza nə̀ Zə̀ kə ləŋ naŋa ghə̂ a Təjuu.

¹⁶ Zə̀ kə n kpaa ndow wi nghee tə ghəŋə tsunə ghəə zey i kpiilə way. Nghee tə njakas fə tsəmə ghɔɔmə kə way, Zə̀ kə n ghəŋə nə̀ fə ghɔɔmə shi bə tə a loʼ wù sɔŋtsuʼ, buu naŋa ndow ghəə a zəghə ghey wù tûm Kəzə̀ u tsɔŋɔ wey tɔŋŋə Balam â dza i ghəŋə.

¹⁷ Ghə̂ ghən loʼ tə̀ a loʼ tɔŋ n tədzuu mən mmuu n zumi nuu shi kɔʼ tii nə̀ n kəm khə way fwaʼ kə. Ghə loʼ tə̀ a loʼ mbaʼ tə ighow, zəŋ maŋa tənnə kaabənə. Zə̀ kə bayyə naŋa luʼu kə tə ghə itən itən n luʼu key ləm kə loʼnə fu tsəghəshi təluʼu tədzəm.

¹⁸ Ghə kɔʼlə kaabə tsə iwû, ghɔɔmə ilaʼlə, ney kɔʼɔ ghəə a laŋŋə ghey ghə ghəŋŋənə ni nəəbə ghə̂ ghey ghə kuʼlə tyi nuu shi bənə n fəŋŋə kə ghə̂ ghey ghə muunə n ghəə a bəbə ghə nə̀ ghə i ghəŋŋə dzəə dzəə tə aghəə tey gow uwû ghə ləghənə nə̀ ghə i ghəŋŋə.

¹⁹ Ghə̂ a dii a tsɔŋɔ ghən dza tə ghə nə̀, ghə loʼ ni ghəŋə ghəə zey ghə ləghənə nə̀ ghə ka bəb zow, loʼ sey nə̀ wû i ghə loʼ ukɔd tə̀ bəb zə. I loʼ sey n təŋkey, fə key kə taw tsəghə dzənə wù, wù tii sey loʼ kəkɔd tə̀ fə kə tii kə.

²⁰ Abə ghə̂ a nɔb shi bə n wɔ bəb i mbi zən bòʼ nə̀ ghə n keeli Mûkəbii saa nsə bəghəshi ə saa Yeso Klisto, kəm bə bwu dzəŋŋə nyi ndow ni ghəŋŋə ghəə a bəbə ghə, ndzoʼo ghə̂ a tii ghə loʼ ghə̂ a bəbə ghə nya tsəghəshi nghee ghə â loʼ nə̀ ghə ka kam keeli Klisto.

²¹ I mə loʼ ni nyaŋ dzɔb tə ghə abə ghə mə doʼlə tənə kə nə̀ ghə khə way muu zey i ghəŋŋənə nə̀ wù doʼo tsətsəghə, tsəghəshi tə̀ ghə ni keeli tsu, ghə kəm tuu maʼa ni zow ghəə ghey Zə̀ kə dzanə nə̀ ghə̂ ghə i ghəŋŋə tə̀ ghə a diinə tə̀ ghə.

²² Mwam u ghə u dii bənu nə̀ ghɔɔmə i fənkəfən zən loʼ isəŋə nə̀, “Bvə kəm ndow dzəŋŋə ibam ni zə̂ zaa u wən i mə zaa maʼanə.” Wə a dza soʼo nə̀, “Feelibu kən ghə sow dzənə dzəŋŋə ndow kə nə kətsaʼ ni nyuʼ uwû.”