2 Pita 1 - Kaa n Kəzə̀ n fəghə mə

Tɔŋɔ zow i Pita tə̀ ghə̂ a Kəzə̀ ghə

¹ À màʼlə kən tɔ̀ɔ bə mə Shimun tɔŋŋə Pita wən n loʼnə wù kəfwaʼ nsə ngəd ə Yeso Klisto. N tɔ̀ɔ bə tə̀ ghaa ghən Zə̀ kə ghəŋənə nə̀ ghaa bəghəm tə Klisto tə a loʼ ghey. À loʼ bòʼ ndzuŋ ə Zə̀ kə saa nsə bəghəshi ə saa Yeso Klisto i ghəŋənə nə saa i khə ndzoʼo bəghəm i fə̀ŋ zən.

² N gɔŋŋə nə̀ Zə̀ kə dii ghaa n fə̀ŋ ə wi i dzuŋu zə, kə ghəŋə soʼo nə̀ ghaa i loʼ nə ibuulə naʼ idzəm n təŋkey ghaa ndzəm khənu Zə̀ kə nsə Yeso tə loʼnə Mûkəbii saa.

Ghaa khə ni muu tə a loʼ ghə̂ ghey Zə̀ kə tɔŋɔnə ghə

³ Zə̀ kə n fuu saa n fə wən udzəm saa khə ni keeli n daʼa key tə khənə ni muu muu zey Zə̀ kə ləghənə. Tə fuu saa n fə u tii wə n təŋkey saa khənu wi. À tɔŋɔ soʼo wi saa nə̀ saa keeli soʼo kɔʼlə mey tə khənə, saa i zow soʼo kədzuŋ tə a loʼ wi.

⁴ À loʼ n jìi i zən tə â fuunə saa n naamə u səŋi wey tə â təb naŋanə tə̀ saa. À loʼ naamə u səŋi wən u ghəŋŋənə nə̀ ghaa tyi nuu shi bə n ghəə a bəbə ghey gow uwû ləghənə fa n mbi, sey nə̀, ghaa loʼ ni mbɔŋ keeli soʼo muu zey Zə̀ kə khənə.

⁵ À wən loʼ ghə i tii zə, ghaa khə ni ngii dəm tsu ni koʼ nə̀ nghee ghaa khənə bəghəm i fə̀ŋ zə, ghaa keeli tsu soʼo fə̀ŋ i dzuŋu zə, nghee ghaa khənə fə̀ŋ i dzuŋu zə, ghaa keeli tsu soʼo ghəə a Kəzə̀.

⁶ N ghəə a Kəzə̀ ghey ghaa khənə, ghaa khə soʼo ni kwu keeli wû i ghaa. Nghee ghaa khə ni kwu keeli wû i ghaa, ghaa khə soʼo ni kow fə̀ŋ tə n nəŋə zə uchɔd. Nghee ghaa khə ni kow fə̀ŋ tə n nəŋə zə uchɔd, ghaa khə soʼo ni ghəŋŋə ndow kə ghəə ghey Zə̀ kə ləghənə.

⁷ Nghee ghaa ghəŋŋə kə ghəə ghey Zə̀ kə ləghənə, ghaa khə soʼo ni ləghə ndow waazu ghə. Nghee ghaa ləghənə waazu ghə, ghaa khə ni ləghə ndow soʼo ghə̂ ghə adzəm.

⁸ Abə ghaa ndəŋə keeli kɔʼɔ ndownə ghəə ghən n taŋŋə tsu bənə fa, ghə i ghəŋŋənu ghaa nə̀ ghaa i fwaʼa dzɔbə, məə bə soʼ tam u dzuŋu wə. Ghəə a tii a nə dii tsu nə̀ ghaa khənu Mûkəbii saa Yeso Klisto.

⁹ A kee bə wù wey tə ghəŋŋə way ghəə ghən n taŋŋə tsu bənə fa, tə sey tɔʼɔ koʼo way luʼu tə tə̀ a loʼ wù fəbə. Ghə n neyzəə soʼo nə̀ ghə mâ sow maʼa ghəə a bəbə ghey ghə â buʼu ghəŋŋə tsənə.

¹⁰ Sey waazə ghuŋ ghə, ghaa ngii dəm tsu ni dii tsu nə̀ Zə̀ kə sày shi bənu ghaa nə̀ ghaa bə doʼo ghə̂ a wi. Abə ghaa ghəŋŋə dzənə sey, ghaa nə bwu koʼ way n bəghəm i fə̀ŋ i ghaa.

¹¹ A loʼ n jii i zən Zə̀ kə i fuu ghaa n daʼa kə ni nyi n fɔ̀ɔ wey Mûkəbii saa tə loʼnə Bəghəshi ə saa tɔŋŋə Yeso Klisto saʼanə tii nəŋə tədzəm.

¹² Sey, mə i tsəm buu doʼo way ni zəŋŋə zeeli ghaa bòʼ ghəə ghən, nghee i buʼ loʼ kə nə̀ ghaa khə zeynu ghəə a tii ghə, tɔʼ khə soʼo nə̀ ghəə a tii a loʼ isəŋə.

¹³ N moʼo nə̀ i ndzəm kpiinu tə mə ni zəŋŋə zeeli bə ghaa nya wən n nam loʼnə n tow kə nə̀ kə wù ghaa u loʼ u nə neyzəənə ghəə a tii ghə.

¹⁴ N khənu nə̀ fəkəmə sa, mə i kəm way dzə n tow kə, nghee tə Mûkəbii saa Yeso Klisto â tɔʼ dii fuu bənə tə̀ mə.

¹⁵ Sey, mə i dəmə tsunu nə təjìi tədzəm ni dii naŋa tsu jìi zey ghaa khə ni taa moʼlə ghəə a tii ghə nəŋə tədzəm abə mə i bow.

Ghə̂ ghey ghə â koʼnə daʼa key Klisto khənə

¹⁶ Nghee ghey â dza bənə tə̀ ghaa ndzoʼo daʼa kə səŋi key Mûkəbii saa Yeso Klisto i bəghənə n ghii kə, â maŋ way dzə nzəzəə ghə̂ ghə â bəghə kɔʼnə, â ndzəm loʼ ghəə a səŋi ghey wû i ghey â koʼ ndownə n sə̂ a ghey ghə.

¹⁷ Ghey â loʼnu fu n nəŋə zey Zə̀ kə tə loʼnə Bày â fuu wi ngɔɔmə zə nsə kɔʼlə mə. Dzə̀ i loʼ zə n dəb dza shi tsu bə fu idəŋ nə̀, “À wən loʼ waa wuŋ wən n ngii ləghənə, n ngii duʼlənu ghi wi!”

¹⁸ Wû i ghey, ghey mâ zow dzə̂ zey zə â shi tsu bənə idəŋ n nəŋə zey ghey â loʼnə ghi wi n kaʼ wey ghə ngɔɔmənə Zə̀ kə a tii.

¹⁹ Sey, ghey n baa bəghəm fuu nya nə̀ ghəə ghey tûm tə Kəzə̀ tə â naʼa naŋanə bòʼ Klisto loʼ isəŋə. I dzɔbə nə̀ ghaa tɔʼ gaʼ tsu fə̀ŋ tə ghaa n ghəə a tii ghə, n təŋkey, ghəə a tii a loʼ tə a loʼ kədaa kə baŋanə nə kələm ni ndow kuum ndow n nəŋə zey tsuʼ wə i zownə tə̀ Klisto ni bə. Klisto loʼ tə a loʼ səghəbələ fə n bələbələ tə fə i baŋa soʼo n fə̀ŋ tə ghaa.

²⁰ N ghəə ghən adzəm, i dzɔbənu nə̀ ghaa zowkeeli tsu nə̀ wù loʼ way dzə tə loʼ ni tɔʼ tiilə dza ghəə ghey tûm tə Kəzə̀ tə â tɔ̀ɔ naŋanə n màʼlə K-a-zə̀ n ngəŋ ə wi nə̀ zay K-a-zə̀ kə ka wi gaamə.

²¹ N dza sey n təŋkey, wù sɔŋtsuʼ u loʼ u way dzə tə â tsə̀m koʼ kɔʼnə n nəŋə wi ni dza ghəə ghey a nuu bənə n wɔ Zə̀ kə. Â fəd loʼ Zay kə Zow kə, kə â ghəŋənə nə̀ ghə i dza bə ghəə ghey a nuu bənə n wɔ Zə̀ kə.