2 Jɔn 1 - Kaa n Kəzə̀ n fəghə mə

¹ À màʼlə kən tɔ̀ɔ bə mə Jɔn wən n loʼnə ngəd. N tɔ̀ɔ bə tə weyzən wən Zə̀ kə sày naŋa kɔʼnə nsə waa a wi ghə. N tɔ̀ɔ bə boʼnə n ngii ləghə wi. A way kə mə n ləghənə wi, ghə̂ ghey adzəm ghə khənə isəŋə, ləghə soʼonu wi.

² N ləghə wi təŋkey, isəŋə loʼ ghi ghey, zə i doʼlə soʼo ghi ghey nə tənəŋə tədzəm.

³ N gɔŋŋə nə̀, Zə̀ kə, Bày saa, ghi Waa wi Yeso Klisto mə fuu saa n buulə zə, nsə ndzuŋ ə wi, tə dii soʼo saa n sî i kwɔɔlə zə, sey nə̀ tə doʼo dzəŋi bə kə ghi saa, saa dzəŋi keeli isəŋə i loʼnə bòʼ Kəzə̀, saa i ləghə soʼo wû i saa zə.

Isəŋə nsə ləghə zə

⁴ Mə â duʼlənu ni koʼ nə̀ waa a ghaa a loʼ a muu nə isəŋə, ighələ tə Bày tsəʼlə naŋa nə kəlaŋ tə̀ saa.

⁵ Mə, n tsəə bə wɔ iwaa nə saa adzəm i ləghə tiilə wû zə. À wən way dzə laŋ kə fəghə kə n tɔ̀ɔ bənə tə ghaa, a loʼ laŋ key ghaa â keeli zey dzənə.

⁶ Ləghə zən n dzaanə fa, loʼ ni zə̀ŋŋə̀ bə saa nə̀ saa i muu n laŋ K-a-zə̀. Laŋ kən, tə̀ ghaa â zow zey dzənə, loʼ nə, ghaa adzəm teeli khə ni ləghə wû i ghaa zə.

⁷ Ndəm aghə̂ n shi ndow n mbi ni nəb kaabə tsə aghə̂ nə̀, Yeso â ka bə dzə n wû u wù sɔŋtsuʼ. Ndzoʼo wù wən loʼ wù nəbə wə aghə̂ wə, loʼ soʼo wù təngəmə ə Klisto.

⁸ Ghə̂mə na nə kə ghaa nə guŋŋənə fə kə loʼ kə n fwaʼ kən ghey fwaʼanə, kuu nyi ndow na sə̀ŋ zə, sey nə̀, ghaa loʼ ni keeli kənaamə naʼ idzəm.

⁹ Wù wən tə ndow kə n sə kə, nə tə bɔɔmə bwey ndow way tə Klisto diinə, wù tii way dzə nə kəfə kəmɔʼ ghi Zə̀ kə. Wù wey tə dzûmənə dii i Klisto zə, tə loʼ nə kəfə kəmɔʼ ghi Bày nsə Waa.

¹⁰ Sey, abə wù loʼ bənə n səə ghaa nə tə ka bə nsə dii zən, kə ghaa nə kpiineynə wi n ndaw tə ghaa, kə ghaa nə buʼu tɔŋɔ zow wù tii tə̀ a loʼ wù Kəzə̀.

¹¹ Təŋkey, wù wey tə tɔŋɔ zownə wi, tə sey təmdzəŋi dzə wi n ghəə a bəbə ghən tə ghəŋŋənə.

Ghɔɔmə zən Jɔn guŋ kɔʼ tii

¹² N khə ndəmə tə aghəə ni dza tə ghaa, n kee ləghə way ni tɔ̀ɔ nə kəmàʼlə. N fədlə moʼo ni bwey bə koʼ ghaa, tə n ghɔɔmə tiilə bə ghi ghaa, sey nə̀ saa loʼ ni duʼlə naʼ idzəm.

¹³ Waa a waazu ghən Zə̀ kə sàynə, tûm bə ghaa n tɔŋɔ zow zə.