1 Timoti 4 - Kaa n Kəzə̀ n fəghə mə

Pɔl dza nə̀ Timoti ney ghə̂mə zə ghi ghə̂ a dii a tsɔŋɔ ghə

¹ Zay kə Zow kə n ghəŋə nə̀ təjìi tədzəm nə̀ saa keeli nə̀ abə mbi nə may bənə, ndəmə aghə̂ a nə tuu ni bəghəm ghəə ghən dzûmə tə Klisto tə diinə, ghə nə fədlə dzûmə ndow ghəə a badla ghey vəətsəə a diinə.

² Ndzoʼo ghəə a tsɔŋɔ ghən, a dii ghə nəb ityim, ghə loʼ nə̀ ghə n fii fuu fə̀ŋ tə ghə tə tə̀ vəətsəə ghə.

³ Ndzoʼo ghə̂ ghən dii nə̀ kə ghə̂ a nə neynə wû zə, tuu soʼo nə̀ kə ghə̂ a nə zəənə ndzoʼo fəzəə n loʼ mə, loʼ sey nə̀ Zə̀ kə ghəŋə fəzəə n tii mə nə̀ abə ghə̂ ghən ghə bəghəmnə tə Klisto, keeli soʼo isəŋə n ghəə a tii ghə dza i zə̂, ghə n zə̂ nə̀ ghə n fuu kɔʼ dzə zɔŋŋə kə tə Zə̀ kə nə igɔŋŋə.

⁴ I loʼ sey n təŋkey, fə wən udzəm Zə̀ kə bɔmnə, u dzɔbənu, kə loʼ kə way dzə tii ni tuu maʼa, abə saa ney ndow dzə nə̀ saa n fuu kɔʼ zɔŋŋə kə tə Zə̀ kə.

⁵ I loʼ nə̀, ghɔɔmə i Kəzə̀ zən nsə gɔŋŋə zən wə ghəŋə tsunə n fəzəə u tii wə, zə n ghəŋə nə̀ wə i zow.

Wù kəfwaʼ a Yeso Klisto u dzuŋu wə

⁶ Abə wə tiillə dza ndownə ghəə ghən n dii kɔʼ bənə tə wɔ tə̀ dzûmə tə Klisto tə, ney soʼo fə̀ŋ zə n ghɔɔmə i Kəzə̀ zən wə bəghəmnə tii nsə isəŋə zən wə bweynə tii, wə i doʼo wù kəfwaʼ a Yeso Klisto u dzuŋu wə.

⁷ Kə wə nə bəəbənə nəŋə zə zə̀ ni zəllə zeeli zəzəə n wey mey gheyzən a khəənə nə̀ n khə way ghə i loʼ zə ni ghəŋə ghi Zə̀ kə. Fət dəŋ naŋa tsu wû wə wə̀ ni muu n jìi zey Zə̀ kə ləghənə.

⁸ I dzɔbənu ni dəŋ naŋa wû wə ni naalə wû wə, a kee loʼ nə̀, a dzɔb tsəghəshi ni dəŋ naŋa wû wə n ghəə a Kəzə̀, n təŋkey, ghəə a Kəzə̀ a khə təb key kə khənə muu zən nya nsə i zey zə i nam khə ni bə.

⁹ À wən loʼ ghɔɔmə zən i loʼnə isəŋə, zə u ndzəm kpii soʼonə tə ghə̂ ghə adzəm ni bəghəm fuu.

¹⁰ À wən loʼ zuŋ key saa fwaʼanə, dəmə soʼo ni keeli ghəə ghən, n təŋkey, saa gaʼ fə̀ŋ tə saa n kow Zə̀ kən kə loʼnə utaw, tə loʼnə bəghəshi tə ghə̂ ghə adzəm, a ka tsəm dza ghə̂ ghən ghə bəghəm fuunə tə wi.

¹¹ Dii ndow ghəə ghən tə ghə̂ ghə, wə tɔʼ laalə nyi tsu soʼo ni koʼ nə̀ aghə̂ adzəm a dzûmənu ghəə ghey wə diinə.

¹² I kə wə nə bəghəmnə nə̀ wù loʼ koʼ kìi wɔ a dza wə loʼ winətəghə. Wə khə ni fəd loʼ wù wey wə moʼo diinə ghəə ghə tə ghə̂ ghən ghə bəghəm tə Zə̀ kə, n ghɔɔmə zə, n mwam wə, n jìi zey wə ləghənə ghə̂ ghə tii, n bəghəm i fə̀ŋ zey wə khənə, nsə n jìi zey muu zə i zownə tii.

¹³ Ni ney nuu tsu nya, ndow kuum n nəŋə zey mə i bəghənə tii, wə khə ni tɔŋɔ màʼlə K-a-zə̀ kə tə ghə̂ ghə, naʼlə ndow ghɔɔmə i Kəzə̀ tə ghə, dii soʼo aghə̂ nghee ghə khə ni muu tii.

¹⁴ I kə wə koʼo kìinə daʼa key Zay kə Zow kə â fuunə tə wɔ n nəŋə zey tûm tə Kəzə̀ nsə ngəd tə dzûmə tə Klisto tə â gɔŋŋənə, gaʼ bə wɔɔ a ghə n tow kə.

¹⁵ Kuu nyi ndow fə̀ŋ zə idzəm ni ghəŋə ghəə ghən, wə fuu nyi ndow wû wə udzəm ni fwaʼ fwaʼ kən, sey nə̀ aghə̂ adzəm ghə i koʼ nghee fwaʼ kə kə̀ nyîmmə kɔʼɔ bənə tii.

¹⁶ Ney ghə̂mə zə n jìi zey wə muunə tii nsə ghəə ghey wə diinə ghə̂ ghə tii. Təmi taw tsu kə n ghəə ghey a kpiilənə, n təŋkey, abə wə ghəŋŋə dzənə sey, wə i keeli ibəghəshi, ghə̂ ghey ghə zownə ghəə ghey wə dzanə i keeli soʼo ibəghəshi.