1 Timoti 1 - Kaa n Kəzə̀ n fəghə mə

Pɔl tûm itɔŋɔzow tə Timoti

¹ A màʼlə kən tɔ̀ɔ bə mə Pɔl, n loʼnə ngəd ə Yeso Klisto. N doʼonə tsəndəghə ə wi nə̀ a mə sày Zə̀ kən kə loʼnə bəghəshi ə saa nsə Yeso Klisto wən saa gaʼnə fə̀ŋ n kow wi.

² N màʼlə kən tɔ̀ɔ bə tə wɔ a Timoti, wə ndzəm loʼnə tə a loʼ waa wuŋ n təŋkey saa dzəŋi bəghəm tə Klisto. N gɔŋŋə nə̀ Zə̀ kə, tə loʼnə Bày saa nsə Yeso Klisto tə loʼnə mûkəbii saa, dii wɔ n ndzuŋ, tə dii wɔ n sî i kwɔɔlə zə, tə ghəŋə soʼo nə̀ wə i muu nə ibuulə.

Ney ghə̂mə zə ghi ghə̂ ghən ghə sii ndzəŋŋənə ghə̂ ghə

³ N ləghə nə̀ wə doʼo tsu n Efesus tə̀ mə â dza nə̀ tə wɔ nghee mə â dza i nuu ndow n Masedonya. Ghə̂ a loʼ a loʼ fey, ghə sii ndzəŋŋənə ghə̂ ghə, sey, n ləghə nə̀ wə buu naŋa ndow ghə.

⁴ Dza ndow tə ghə nə̀ ghə buu naŋa ni taŋŋə kaabə zəzəə n wey mey tɔb u loʼ u way tii nsə ni taŋŋə zəd a ghə bày bày a ghə ghə. Ghəə a tii a ghəŋŋənu ghə n maŋa fəə adzuu nə kənunu. Ghəə a tii a gaamə way wù nə̀ tə fwaʼ fwaʼ K-a-zə̀, loʼ sey nə̀ a loʼ kə wù wey tə bəghəmnə tə̀ Zə̀ kə, tə loʼnə ni fwaʼ fwaʼ kə tii kə.

⁵ Zuŋ key wə khənə ni fuu ghə n laŋ kən lo nə̀, dzûmə tə Klisto tədzəm tə i ləghə wû i ghə zə. Ghə i ndzəm khə ləghə zən i nuu bənə n fə̀ŋ tə ghə tə dzuŋu tə, i nuu bənə n moʼlə tə dzuŋu tə, i nuu bə soʼo n ndzəm ndzəm kə bəghəm n kow Klisto.

⁶ Ghə̂ a loʼ ghə n zəghə maʼa ghəə ghən, fəd nyi ndow ni ghɔɔmə kaabə ghɔɔmə i laʼlə zə.

⁷ Ghə dəmə ni doʼo ghə̂ ghən ghə diinə laŋ kə Mushi kə, loʼ sey nə̀ ghəə ghey ghə dzanə, ghə buʼu zowkeeli soʼo way, nkee ghəə ghey ghə tsɔbənə fə̀ŋ tii.

⁸ Saa khənu nə̀ laŋ K-a-zə̀ kə loʼ fə kə dzuŋu kə abə saa ghəŋŋənə ghəə ghə tə̀ laŋ kə diinə.

⁹ Saa khə soʼonu nə Zə̀ kə ka laŋ kə ghəŋə dzə tə ghə̂ ghən ghə loʼ tsətsəghə. Â fəd loʼ tə ghə̂ ghən ghə bwuulə maʼa laŋ kə nsə ghə̂ ghey ghə ney way n wɔ Zə̀ kə, ghə̂ ghən ghə khə way Zə̀ kə nsə ghə̂ a bəbə ghə, ghə̂ ghən ghə khə way Zay kə Zow kə nsə ghə̂ ghən ghə ngɔɔmə way Zə̀ kə, ghə̂ ghən ghə weyyənə ghə bày a ghə ghə nkee ghə này ghə ghə, ghə̂ ghən ghə weyyənə ghə̂ ghə.

¹⁰ Laŋ kə loʼ tə ghə̂ ghən ghə laŋŋənə, gheynum ghən ghə nyəŋinə n wû i ghə, ghə̂ ghən ghə kwɔɔ fìilənə ghə̂ ghə tə a loʼ ukɔd, ghə̂ ghən ghə badla ghəə ghə nsə ghə̂ ghən ghə kàanə zəd i Kəzə̀ zə nə kənunu nsə ghə̂ ghən ghə ghəŋŋənə ghəə ghən a kpiilə way ghi ghəə a Kəzə̀ ghə.

¹¹ Dii zən bəghəm dzəŋi ghi tûm i dzuŋu zən Zə̀ kə â fuu naŋa tə mə nə̀ n naʼa. À wən loʼ tûm i dzuŋu zən, i nuu bənə n wɔ Zə̀ kən kə khənə daʼa kə, ghə̂ fuunə wi n kɔʼləmə.

Pɔl fuu kəzɔŋŋə tə Zə̀ kə nghee tə diinə wi n sii i kwɔɔlə zə

¹² N fuu kəzɔŋŋə tə Yeso Klisto Mûkəbii saa, tə fuunə mə n daʼa kə nə n fwaʼ fwàʼ kuŋ. N fuu zɔŋŋə kə wi nghee tə koʼ tsu nə̀ n loʼnu tsətsəghə, tə u say kɔʼnə mə nə̀ n fwaʼ tə wi.

¹³ Nghee mə â loʼ nə̀ n ka kam bəghəm tə Klisto, mə â ghɔɔmə bəəbə tsə bòʼ wi, tsayyə wi, chɔdlɔ tsə soʼo wi. Zə̀ kə n kee kwɔɔlə isî n kow mə boʼnə mə â ka kam keeli dzə bəghəm i fə̀ŋ zə, mə n khə soʼo way ghəə ghey mə â ghəŋŋənə.

¹⁴ Mûkəbii ə saa n dii bə ndzuŋ ə wi tə mə naʼ idzəm. Tə n ghəŋə soʼo nə̀ n keeli bəghəm i fə̀ŋ nsə ləghə zən i loʼnə i saa zə abə saa loʼnə nə kəfə kəmɔʼ ghi Yeso Klisto.

¹⁵ Ghɔɔmə zən nə̀, “Yeso Klisto â bə fa n mbi ni bə bəghəshi ghə̂ a bəbə ghə.” Loʼ isəŋə, saa khə ni ndzəm ney ghɔɔmə i tii zə, saa bəghəm soʼo. Mə â ney kəsə n ghə̂ ghən adzəm ghə ghəŋŋənə ghəə a bəbə ghə.

¹⁶ Zə̀ kə n kee kwɔɔlə isî n kow mə sey nə̀ Yeso Klisto loʼ ni ney mə tə a loʼ tsəə, tə dii tə ghə̂ ghən ghə nam khə ni bəghəm fuu tə wi, nə̀ ghə loʼ soʼonu ni keeli muu zə itsali abə tə lɔʼlə loʼ ni kow fə̀ŋ ghi mə wən n bəb tsəghəshinə ghə̂ a bəbə ghə adzəm.

¹⁷ N gɔŋŋə nə̀ ghə̂ a mə fuu ngɔɔmə zə nsə kɔʼləmə tə Zə̀ kə nəŋə tədzəm. Tə loʼ də̀ŋ kən kə loʼnə nya, loʼ nə tənəŋə tədzəm, də̀ŋ key kə kpuu koʼo tsə way, kə key wù loʼ ka kam koʼ koʼ tsə. A may kə wi tə mbi nə bə may. Zə i loʼ sey.

Pɔl tsə̀ Timoti

¹⁸ N waa, Timoti, n ghəə ghən dza bə tə wɔ n təŋkey a bəghəm dzəŋi ghi ghəə ghey wù tûm Kəzə̀ â naʼa naŋanə kuum wɔ, sey nə̀ wə i loʼ ni ney ghɔɔmə i tii zə, wə təm zə̂ ghə̂ ghey ghə diinə ghəə a badla ghə.

¹⁹ Tɔʼɔ təmi taw tsu kə n bəghəm i fə̀ŋ zey wə khənə n kow Klisto, wə i khə soʼo fə̀ŋ i zow zə. Ghə̂ a loʼnu nə̀ ghə n ndzəm tuu ni keeli fə̀ŋ tə zow tə, sey, ghə a bəəbə maʼa kɔʼ bəghəm i fə̀ŋ i ghə zə.

²⁰ Hemenus nsə Alekzanda loʼ ndzoʼo ghə̂ a tii ghə, Mə n ghə fuu tsəghə ndow tə Satan nə̀ tə ghəŋə ghəə zey tə loʼ ni ghəŋə tə ghə. Zə i ghəŋŋənu tə ghə zoʼlə tsu nə̀ ghə khə way ni tsayyə Zə̀ kə.