1 Pita 4 - Kaa n Kəzə̀ n fəghə mə

Saa khə ni muu n jìi zey Zə̀ kə ləghənə

¹ Nghee i loʼnə nə̀ Klisto â fəghə tə a loʼ wù sɔŋtsuʼ fa n mbi, ghaa khə ni teeli keeli tsu soʼo ndzoʼo fə̀ŋ zey tə â khənə n nəŋə zey tə â bəghəmnə ni fəghə, n təŋkey, wù wey tə fəghənə tə a loʼ wù sɔŋtsuʼ fa n mbi, kəm way ni ghəŋə ghəə a bəbə ghey tə â buʼu ghəŋŋə tsənə.

² Sey, ni ney nuu tsu nya, ndow n sə kə, ghaa khə ni teeli muu muu i ghaa zə n nəŋə zən ghaa nam khənə fa n mbi n jìi zey Zə̀ kə ləghənə, a way dzə n jìi zey gow uwû ləghənə.

³ Ghaa n ngii bəəbə kɔʼ bə nəŋə zə ni ghəŋŋə ghey ghə̂ ghən ghə khə way Zə̀ kə ləghənə ni ghəŋŋə. Ghaa muu kɔʼ bə muu i ghaa ni ghəŋŋə dzəə dzəə tə aghəə tə, shiə n sə ghə n kow gheyzən ghə, məə khəə kaabə tsə nlə, ngii zəə kaabə tsə uzə̂, məə kɔʼɔ nlə bwey buʼlə kaabə tsə nbɔŋ, ngɔɔmə soʼo mmuʼu nə̀ Zə̀ kə n bàa tən.

⁴ Dzuu i nya zum ghə̂ ghən ghə khə way Zə̀ kə nghee ghaa kəm təmə dzəŋi way ghə n dzəə dzəə kə imuu key ghə muunə ghii kə, à wey loʼ ghə i tii zə ghə kpaalə kaabə tsənə ghaa.

⁵ À kee loʼ kə nə̀ ghə nə tiilə dza kɔʼɔ bənu nghee ghə muu kɔʼ bənə muu i ghə zə tii tə̀ Zə̀ kə, tə tey tən kə ni saʼ aghə̂ adzəm. Tə i saʼa ghə̂ ghey ghə loʼnə utaw nsə a ghey ghə kpu dzənə.

⁶ À wən loʼ ghə i tii zə ghə â naʼa soʼo tûm i dzuŋu zə tə ghə̂ ghən ghə kpu dzənə, tə ghə̂ ghən ghə â saʼ dzə ghə nə̀ ghə nam loʼ utaw. Ghə â naʼa tə ghə sey nə̀ Zay K-a-zə̀ kə loʼ ni ghəŋə nə̀ ghə muu muu zən Zə̀ kə muunə.

Ghə̂ ghey ghə fwaʼa dzɔbə n fə key Zə̀ kə naamə ghə tii

⁷ Nəŋə zə n kuʼlə tə̀ fə wə udzəm ni bə may. Sey ghaa khə ni kwu keeli tsu wû i ghaa, ghaa təmi kɔʼ n fuu zə, sey nə̀, ghaa i loʼ ni tɔʼ gɔŋŋə.

⁸ Ghə i səŋi zey i tsəghəshinə ghəə ghə adzəm loʼ nə̀, ghaa i ləghə wû i ghaa zə n fə̀ŋ tə ghaa tə tədzəm n təŋkey, ghaa khənu nə̀ ləghə i tsədlə naŋŋə ndəmə ghəə a bəbə ghə.

⁹ Ghaa i kpii ney ghə̂ ghey ghə bwey bəghənə n səə ghaa nə̀ ghaa sənnə way.

¹⁰ Nghee i loʼ nə̀ Zə̀ kə n fuu kay wù ghaa n naamə kə, ghaa khə ni ney naamə kən Zə̀ kə diinə fə̀ŋ ə wi i dzuŋu zə ni fuu tə ghaa, ghaa i laalə ndow ghə̂ a loʼ ghə tii.

¹¹ Wù wey tə naʼlənə ghɔɔmə i Kəzə̀ zə, tə khə ni bɔɔmə naʼlə kə ghəə ghey Zə̀ kə dzanə. Wù wey tə fwaʼanə tə̀ ghə̂ ghə, tə khə ni fwaʼa n daʼa key Zə̀ kə fuunə tə̀ wi, sey nə̀, nə aghəə adzəm, ghə̂ ghə i loʼ ni fuu kɔʼlə mə tə̀ Zə̀ kə n bam i Yeso Klisto. À loʼ tə̀ wi tə khənə kɔʼlə mə n dzəm, a loʼ soʼo wi tə khənə daʼa wə udzəm saʼa nəŋə tədzəm. Zə i loʼ sey.

Ghaa khə ni fəʼlə tə a loʼ dzûmə tə Klisto

¹² Fə ghuŋ a dzuŋu ghə, kə dzuu zə i zum ghaa n ngaamə kə ifəghə kən ghaa fəʼlənə nya. Ghəə a tii a maŋ loʼ kə ni mɔm koʼ bəghəm i fə̀ŋ i ghaa. Ghaa loʼ ni moʼlə nə̀ à loʼ ghəə i fəghə i loʼ zə i shiənə n kow ghaa.

¹³ Ghaa khə ni fədlə duʼlə nə̀ ghaa fəʼlə soʼo ndzoʼo fəghə zey Klisto â fəghənə, sey nə̀, ghaa i loʼ ni ngii duʼlə abə tə i kəm bənə n daʼa kə wi kə səŋi kə.

¹⁴ Zə̀ kə i buulə wù wey ghə kpaalənə wi a dza tə loʼ dzûmə Klisto, n təŋkey, Zay kə səŋi kən kə loʼnə Zay K-a-zə̀ kə, loʼ n kow wi.

¹⁵ Abə ghaa fəʼlənə, kə wù ghaa u loʼ u nə fəʼlənə a dza tə weyyə aghə̂, nkee tə loʼ wù tsɔŋɔ, nkee wù wey tə ghəŋŋə ghəə a bəbə ghə, nkee tə nyiəllə kaabə kəwɔɔ n ghəə ghə aghə̂.

¹⁶ Abə i loʼ kə nə̀ wə fəʼlə n təŋkey wə loʼ dzûmə Klisto, kə wə i dədlə n tow kə, wə i fədlə fuu kali wə tə̀ Zə̀ kə nə̀ wə bəghəmmə zəd i Klisto.

¹⁷ N dza sey n təŋkey, nəŋə zə n kpii tə Zə̀ kə ni saʼ mbi. Tə i zey tsu dzə ni saʼ ghə̂ a Kəzə̀ isə. Abə tə khə ni kaʼ nuu tsu ni saʼ saa ghən saa loʼnə waa a Kəzə̀ ghə, zə i boʼo bəbə ngee n kow ghə̂ ghey ghə loʼ nə̀ ghə bəghəm way tûm i dzuŋu zən Zə̀ kə tûm bənə ə?

¹⁸ I tɔ̀ɔ doʼo n màʼlə K-a-zə̀ nə̀, “Abə i loʼ ni taw tə ghə̂ a dzuŋu ghə ni keeli ibəghəshi, Zə i boʼo taw ngee tə ghə̂ a bəbə ghən ghə khə way Zə̀ kə ni keeli ibəghəshi ə?”

¹⁹ Sey dzûmə tə Klisto tey tə fəʼlənə nə̀ a ləghə Kəzə̀ nə̀ ghə fəghə, ghə khə ni fwaʼa ndow kə fwaʼ kə ghə kə dzuŋu kə, fuu may ndow wû i ghə tə̀ Zə̀ key kə bɔmnə ghə n təŋkey kə taw naŋŋənu dzuu i wi zə.