1 Pita 3 - Kaa n Kəzə̀ n fəghə mə

Jìi zey ghə̂ ghey ghə neynə wû zə khə ni muu tii

¹ Ghaa gheyzən ghən ghaa bəghəmnə tə̀ Zə̀ kə, khə ni zow tə nûm a ghaa ghə, sey nə̀, abə wù ghə u loʼ u ka bəghəm ghɔɔmə i Kəzə̀ zə, mwam u ghaa wə i ghəŋə nə̀ tə bəghəm tə̀ Zə̀ kə nə̀ wù loʼ ka dza ghə zə tə̀ wi,

² tə bəghəm tə Klisto n təŋkey tə koʼo bənu nghee tə̀ wə ngɔɔmənə wi tii nsə nghee muu zə i zownə tii.

³ I kə wə nə ngii faalənə wû wə wə̀ a bii ni ghəŋə nə̀ wə i dzɔbə tə a loʼ ni ngii faalə tsəghə tsu kətow, ni dzəŋə kɔb kə təndzə nkee nyiə n dzəŋŋə mən wən i tii i ngii tawnə.

⁴ Ghaa khə ni fəd ghəŋə nə̀ fə̀ŋ tə ghaa tə i dzɔbə n mwam u dzuŋu wey ghaa khənə nə u kweyyə way. Ghaa khə ni khə zuŋ kə umwam kə nsə fə̀ŋ i dzuŋu zə n təŋkey, à loʼ ghəə ghey a ngii dzɔbənə tə̀ Zə̀ kə.

⁵ N dza sey n təŋkey à wən loʼ mwam wən gheyzən a wey wey ghey ghə â gaʼnə fə̀ŋ ə ghə n kow Zə̀ kə â khə tsənə tə̀ ghə ni dzɔbə. Ghə n zow tsə soʼo tə̀ num a ghə ghə.

⁶ Sara â loʼ tsə soʼo sey, tə n zow tsə tə nûm wi Abraham, tə n ngɔm tənə soʼo wi nə à loʼ mûkəbii. Abə ghaa ghəŋŋənə ghəə ghey a dzɔbənə, tsəŋə soʼo way ghə i loʼ zə, ghaa sey nya loʼ waa a wi.

⁷ N jii i mɔʼɔ zə, ghaa gheynum ghən ghaa bəghəmnə tə̀ Klisto, ghaa khə ni muu ghi ghey a ghaa ghə nə̀ ghaa zowkeeli tsuunu ghə nghee i loʼ nə̀ ghə taw way tə a loʼ ghaa. Ghaa i fuu ndow ghə n ngɔɔmə zə nghee i loʼ nə̀ Zə̀ kə i dzəŋi diinu ghaa n fə̀ŋ ə wi i dzuŋu zə ni fuu ghaa n muu zən i may way. Ghaa i ghəŋŋə ndow ghəə ghən sey nə̀, kə fə kə loʼ kə nə təʼlə maʼa gɔŋŋə i ghaa zə.

Fəghə zey ghaa fəʼlənə bòʼ fwaʼ kə ghaa kə dzuŋu kə

⁸ Ni guŋ kɔʼ, ghaa adzəm khə ni teeli khə mwam wə umɔʼ, khə soʼo fə̀ŋ imɔʼ. Ghaa khə ni ləghə wû i ghaa zə tə a loʼ awaazə, dii fə̀ŋ i dzuŋu zə tə̀ ghə̂ ghə, khə soʼo zuŋ kə umwam n wû i ghaa.

⁹ Kə ghaa nə kûmmənə bəb zə nə ibəb, nkee abə wù tsɔɔmənə ghaa, kə ghaa nə tsɔɔmə soʼonə wi. Ghaa khə ni fəd dza nə̀ Zə̀ kə buulə wù tii n təŋkey à wey loʼ ghəə zey Zə̀ kə â tɔŋɔnə ghaa nə̀ ghaa i ghəŋŋə sey nə̀, ghaa i loʼ ni keeli ibuulə n wɔ wi.

¹⁰ I loʼ tə̀ i tɔ̀ɔ doʼonə n màʼlə K-a-zə̀ nə̀, “Wù wey tə ləghənə ni muu nə iduʼlə Ləghə soʼo nə̀ ghəə a dzuŋu ghə i shiə tə̀ wi tsuʼu n dzəm, Tə khə ni buu naŋa ni ghɔɔmə ghəə a bəbə ghə Tə buu naŋa soʼo ni badla ghəə ghə.

¹¹ Tə khə ni kweyyə nuu bə ni ghəŋŋə ghəə a bəbə ghə, tə i ghəŋŋə ndow ghəə a dzuŋu ghə. Tə khə ni khə zày ni ghəŋə nə̀ ghə̂ ghə i ghəŋŋə ghəə ghə nə ibuulə n fə̀ŋ tə ghə tə tədzəm,

¹² N təŋkey Mûkəbii koʼonu ghəə ghey ghə̂ ghey ghə loʼnə tsətsəghə ghəŋŋənə, Tuŋŋə u wi wə a chi doʼo soʼo ni zow gɔŋŋə i ghə. Tə kee bəghəm naŋŋə way ghə̂ ghey ghə ghəŋŋənə ghəə a bəbə ghə.”

¹³ A loʼ ndee ni nyîmmə ghaa abə ghaa khənə zày ni ghəŋŋə ghəə a dzuŋu ghə ə?

¹⁴ Abə i buʼ kee loʼ kə nə̀ ghaa khə ni fəghə a dza ghaa ghəŋŋə ghəə ghey a kpiilənə, Zə̀ kə i buulə ghaa. Kə ghaa nə tsəŋənə wù loʼ, kə wù loʼ nə bəmi soʼonə ghaa.

¹⁵ Ghaa i kee fuu kə kɔʼlə mə tə Klisto n fə̀ŋ tə ghaa, ngɔɔmə soʼo wi tə a loʼ Mûkəbii. Tey tən nəŋə tədzəm ni beeli wù wey tə ləghənə ni keeli fə key wə ləmmənə nə̀ Zə̀ kə ghəŋə tə ghaa.

¹⁶ Ghaa i maʼlə tsu wû zə ni beeli ndow ghə n jii i dzuŋu zə. Ghaa tɔʼ laalə nyi tsu ni koʼ nə̀ fə̀ŋ tə ghaa tə zownu n ghəə ghey ghaa ghəŋŋənə, sey nə̀, tow kə i dəd ghə̂ ghey ghə ghɔɔmənə ghəə a bəbə ghə bòʼ ghaa abə ghə koʼnə mwam u dzuŋu wey ghaa khənə n təŋkey ghaa loʼ nə kəfə kəmɔʼ ghi Klisto.

¹⁷ I loʼ sey n təŋkey, i dzɔbənu ni fəghə a dza wə ghəŋə ghə i dzuŋu zə abə a loʼ nə a loʼ ghəə zey Zə̀ kə ləghənə, tsəghəshi tə wɔ ni fəghə a dza wə ghəŋə ghə i bəbə zə.

¹⁸ N dza sey n təŋkey, Klisto â kpu kə nəŋə imɔʼ ni ney nuu tən ghəə a ghə̂ a bəbə ghə adzəm. Tə â ka ghəŋə koʼ tsə ghə i bəbə i loʼ zə, tə n kee bə kpu n tow u ghə̂ a bəbə ghə, sey nə̀ tə loʼ ni ney bə saa tə̀ Zə̀ kə. Ghə â wey wi nə̀ tə loʼ wù sɔŋtsuʼ, Zay kə Zow kə n kee ghəŋə nə̀ tə doʼo dzəŋŋə bə utaw,

¹⁹ Zay kə Zow kə tii kə n ghəŋə nə̀ tə ndow naʼa ghɔɔmə i Kəzə̀ tə̀ zay u ghə̂ ghey ghə â kpu dzənə.

²⁰ À wən â loʼ zay u ghə̂ ghey ghə â zow way tə Zə̀ kə n nəŋə zey tə â kownə fə̀ŋ ni ləmə n tsuʼu mey Noa â bəghənə fə̀n kə wi kə. Zə̀ kə â bəghəshi kə sə fə aghə̂ tii n fən kə tii kə. Â loʼ kə aghə̂ ifam Zə̀ kə â bəghəshinə n mmuu n tii mə.

²¹ Mmuu mən mə â bəghəshinə ghə̂ ghən ifam, loʼ tə a loʼ mmuu n Kəzə̀ mən ghə fuunə nya tə̀ ghaa, n bəghəshiənə ghaa. Mmuu n Kəzə̀ mən ghaa neynə, sow maʼa dzə way dzə wə n wû i saa, n fəd loʼ ni dii nə̀ fə̀ŋ tə saa tə zownu n sə K-a-zə̀. Muu n tii n bəghəshiə ghaa n bam i zhəm dzəŋŋə zə ivə i Yeso Klisto.

²² Klisto n kɔʼ idəŋ, tə u doʼnə n kpi u Kəzə̀ u təmə wə, saʼa tsətəndəghə tə Kəzə̀ nsə daʼa wey udzəm u loʼnə idəŋ.