1 Pita 2 - Kaa n Kəzə̀ n fəghə mə

Mûkəbii loʼ tə a loʼ tay zən i loʼnə utaw

¹ Nghee i loʼ nə̀ Zə̀ kə n fuu ghaa n muu i fəghə zə, i sey dii nə̀ ghaa khə ni kweyyə nuu bə n fə̀ŋ tə ghaa tə n ghəə a bəbə ghə adzəm, ghaa maʼa ghəə a nəbə ghə ityim ghə, ghaa maʼa ghəə a badla ghə, ghaa maʼa kəghoʼ, kə ghaa nə tsayyə soʼonə wù.

² Ghaa i mbuŋŋə ni nyɔŋ ghii n Zay kə Zow kə n loʼnə ghɔɔmə i Kəzə̀ zə tə̀ waa nə mbuŋŋənə ni nyɔŋ ghii n nay wi, sey nə̀, abə ghaa məənə ghii n tii mə, ghaa i loʼ ni tɔʼ beyyə taw tsu n bəghəm i fə̀ŋ i ghaa, Zə̀ kə i bəghəshi soʼo ghaa.

³ I tɔ̀ɔ doʼo n màʼlə K-a-zə̀ nə̀, “Ghaa n zoʼlə keeli n nəŋə ghaa, ndzoʼo fə̀ŋ i dzuŋu zey Mûkəbii khənə.”

⁴ I bəghə n na n səə Mûkəbii, tə loʼnə tay zən i loʼnə utaw nə̀ ghə̂ a mbi ghə n tuu maʼa nə̀ i khə way fwaʼ kə, Zə̀ kə a kee sày kɔʼnə wi nə̀ tə khə fwaʼ kə səŋi kə.

⁵ Bə n na n səə Mûkəbii tə a loʼ tay ghey a loʼnə utaw, ghə ney kɔʼ ghaa, ghə bəghə teyyə kɔʼ ndaw Kəzə̀ i nii zə a tii, ghaa i fwaʼa tə a loʼ fɔɔngili tə Zow tə ni fəələ maʼlə u Zay kə Zow kə Zə̀ kə ləghənə n bam i Yeso Klisto.

⁶ N dza sey n təŋkey i tɔ̀ɔ doʼo n màʼlə K-a-zə̀ nə̀, “Koʼo n na, mə n sày tay i səŋi zə, À loʼ i ghii n gaʼa nyiə tsunə tə a loʼ tay i bow i ndaw n Zayɔn, Wù wey tə bəghəm fuu soʼonə tə̀ wi, Tə nə dey koʼ tsə way wû wə.”

⁷ Tay zən loʼ tay i səŋi zə tə ghaa ghey ghaa bəghəm fuunə tə Klisto. A kee bə ghə̂ ghey ghə ka bəghəm fuu, i tɔ̀ɔ doʼo n màʼlə K-a-zə̀ nə̀, “Tay i mɔʼɔ zey ghə̂ a bəghə a təndaw ghə â tuu maʼanə nə̀ i way kəfə, N kəm bə doʼo tay i səŋi zə tsəghəshi atay adzəm.”

⁸ I tɔ̀ɔ doʼo soʼo n màʼlə K-a-zə̀ nə̀, “À wən loʼ tay zən ghə̂ ghə i taŋŋə bwunə tii, Naa key kə i ghəŋŋənə nə̀ ghə̂ a bwu.” Ghə i taŋŋə bwu n təŋkey ghə â ka bəghəm ghɔɔmə i Kəzə̀ zə. À wən bɔɔmə loʼ ghəə zey Zə̀ kə â bayyə naŋanə tə̀ ghə.

⁹ A kee bə ghaa, ghaa loʼ ghə̂ ghən ghə sày kɔʼnə, ghaa loʼ ghə fɔɔngili tə̀ də̀ŋ kə, kə loʼnə Zə̀ kə, ghaa loʼ naʼ i zow zə, ghaa loʼ ghə̂ a Kəzə̀, ghaa loʼ ghə̂ ghən tə sày kɔʼ nə̀ ghə naʼa ghəə a wi a dzuŋu ghən tə ghəŋŋənə. Tə tɔŋɔ nuu shi bə ghaa nə kələm, naŋa bə ghaa n dzɔbə dzɔbə kə tsə kə wi.

¹⁰ Sə isə, ghaa â buʼ way tsə ghə̂ a Kəzə̀, a kee bə nya, ghaa a loʼ ghə̂ a wi ghə. Sə isə, Zə̀ kə â ka dii dzə sî i wi kwɔɔlə zə n kow ghaa, a kee bə nya, tə n kwɔɔlə sî zə n kow ghaa.

I muu n na tə a loʼ ghə̂ a kəfwaʼ a Kəzə̀

¹¹ Fə ghuŋ a dzuŋu ghə, n buʼu bə kəwɔɔ tə̀ ghaa nə̀, tə a loʼ ghə̂ ghey ghə bwey nyi bənə fa n mbi nsə ghə̂ ghən ghə tyi nyì doʼonə, kə ghaa nə ghəŋŋənə ghəə ghey gow uwû ghaa ləghənə, n təŋkey, u zuulə baalə fə̀ŋ tə ghaa.

¹² Ghaa ndow kə n sə kə ni ghəŋŋə ghəə a dzuŋu ghə n fəŋŋə kə ghə̂ ghey ghə kam khə way Zə̀ kə, sey nə̀, abə ghə tsəm dza i kwu kə ghaa nə̀ ghaa ghəŋŋə ghəə a bəbə ghə, ghə i loʼ ni dza nə̀ ghaa ghəŋŋə ghəə ghey a dzɔbənə. Sey ghə i loʼ ni fuu nkɔʼlə tə Zə̀ kə n tsuʼ fey tə i kəm bəghənə tii ni bə saʼ aghə̂.

¹³ N zəd i Mûkəbii, i zow ndow n na tə ghə̂ ghən adzəm ghə tsuʼ naŋa kɔʼnə nə̀ ghə i laalə tə̀ ghə̂ ghə. Nə̀ a loʼ kə də̀ŋ kən kə tsəghəshinə də̀ŋ wə udzəm,

¹⁴ nkee tsoʼ tə ukɔli tən tə sày naŋa kaabə bənə nə̀ ghə i chɔdlɔ ghə̂ ghən ghə ghəŋə bəəbə, kɔʼlə soʼo ghə̂ ghey ghə fwaʼa dzɔbənə.

¹⁵ Ghəə zey Zə̀ kə ləghənə loʼ nə̀, ghəə a dzuŋu ghey ghaa ghəŋŋənə i ghəŋə nə̀ ghə̂ a laʼlə ghey ghə buʼ khə way ghəə ghey ghə ghɔɔmənə, i laʼ kii ghə i bəbə zey ghə loʼ ni kwu ghaa tii.

¹⁶ Ghaa khə muu tə a loʼ ghə̂ ghən ghə way n tənə wù. Kə ghaa nə kee taa daŋanə n ndzoʼo muu zən ni ghəŋŋə ghəə a bəbə ghə. Ghaa khə ni fəd muu tə a loʼ ghə̂ a kəfwaʼ a Kəzə̀.

¹⁷ Ghaa i fuu ngɔɔmə zə tə̀ ghə̂ ghə adzəm, ləghə tillə iwû n fəŋŋə kə ghə̂ ghən ghə bəghəmnə tə̀ Zə̀ kə, fuu ingɔɔmə tə̀ Zə̀ kə nsə tə də̀ŋ kə nii kə inaʼ.

Kow n na fə̀ŋ tə abə ghaa fəʼlənə tə Klisto â fəghənə

¹⁸ Ghə̂ ghən ghə fwaʼanə n tənə ghə mûkəbii ghə, khə ni zow tə ghə mûkəbii a ghə ghə, fuu ndow soʼo ghə n ngɔɔmə zə n fə̀ŋ tə ghaa tə tədzəm. Ghaa khə dzə way ni fuu kə ngɔɔmə zə tə̀ ghə mûkəbii ghey ghə diinə ghaa n fə̀ŋ i dzuŋu zə, zowkeeli soʼo aghəə, ghaa khə ni fuu ndow soʼo ngɔɔmə zə tə̀ ghə mûkəbii ghey ghə tɔɔbə ghɔɔmənə tə̀ ghaa.

¹⁹ N dza sey n təŋkey, Zə̀ kə i dii fə̀ŋ ə wi i dzuŋu zə tə wɔ abə wə kownə fə̀ŋ ni fəghə nə ighəə nə̀ wə ka ghəŋə bəəbə, bòʼ nə̀ wə khənu ghəə zey Zə̀ kə ləghənə.

²⁰ Abə wə kownə fə̀ŋ abə ghə bwɔdlɔnə wɔ nə ighəə nə̀ wə n ghəŋə bəəbə, Zə̀ kə way dzə ni dii fə̀ŋ ə wi i dzuŋu zə tə wɔ. Abə wə kee kownə fə̀ŋ ni fəghə nə ighəə nə̀ wə ghəŋə dzɔbnu, Zə̀ kə i diinu fə̀ŋ ə wi i dzuŋu zə tə̀ wɔ bòʼ ghə i tii zə.

²¹ À wən loʼ ghəə zey Zə̀ kə â tɔŋɔnə ghaa tii n təŋkey, Klisto n wû u wi wə mâ fəghə soʼo n tow u ghaa, dii naŋa tsu ghaa n jìi zey ghaa khə ni ghəŋŋə ghəə ghə tii, sey nə̀ ghaa loʼ ni ney ghow kə ibwey kə wi.

²² Tə â ka ghəŋə koʼ tsə ghə i bəbə i loʼ zə, tə n ka bad koʼ tsə soʼo aghəə.

²³ Ambə ghə kpaalənə wi, tə ka kpaalə dzəŋŋə dzə ghə. Ambə tə fəghənə n wɔ ghə tə n ka bii naŋa dzə ghə. Tə n fəd zəghə maʼa ndow saʼ a wi tə̀ Zə̀ kən kə saʼanə ghə̂ ghə n jìi zey i kpiinə.

²⁴ Yeso n wû u wi wə mâ boʼo bəb i saa zə n zat kə fəkaʼ, sey nə̀, saa i way ni kəm ghəŋə ghəə a bəbə ghey saa khənə zày ni ghəŋŋə, saa i muu muu zey i loʼnə tsətsəghə. A loʼ fəŋ ghən tə â keelinə, a baŋŋənə ghaa.

²⁵ I loʼ sey n təŋkey, ghaa â loʼ tsə tə a loʼ tənjì tə laʼa nay ndownə, a kee bə nya ghə n ghaa ney dzəŋŋə bə nə̀ ghaa i dzûmə ndow wù baʼa u tənjì wə nsə wù wən tə laalənə fə̀ŋ tə ghaa tə.