1 Pita 1 - Kaa n Kəzə̀ n fəghə mə

Tɔŋɔ zow i Pita tə̀ ghə̂ a Kəzə̀ ghə

¹ À màʼlə kən tɔ̀ɔ bə mə Pita, n loʼnə ngəd ə Yeso Klisto. N tɔ̀ɔ bə tə̀ ghaa ghən Zə̀ kə sàynə, ghaa tyi nyi doʼo kaabə tsənə n mboʼo tə Pontus, Galeshya, Kapadoshya, Eshya, nsə n Bitinya.

² Zə̀ kən kə loʼnə Bày saa â sày ghaa tə̀ tə â bayyə naŋa zeynə, Zày kə Zow kə wi kə a sow maʼa tsunə ghaa ni ghəŋə nə̀ ghaa i naŋŋə laŋ u Yeso Klisto wə nsə nə̀ kaŋ tə wi tən tə â fəələnə n zat kə fəkaʼ, tə ghəŋə nə̀ ghaa i loʼ ghə̂ a zow ghə. N gɔŋŋə nə̀ Zə̀ kə dii ghaa n fə̀ŋ ə wi i dzuŋu zə, tə fuu soʼo ghaa n buulə zə naʼ idzəm.

Kə saa nə buu doʼlənə ni ləmə fə key Zə̀ kə təb naŋanə tə̀ saa

³ Saa fuu kəzɔŋŋə tə̀ Zə̀ kə tə loʼnə Bày tə Mûkəbii saa Yeso Klisto! Nghee tə ngii khənə sî i kwɔɔlə zə, tə n ghəŋə nə̀ saa i khə muu i fəghə zə nghee tə zhəm dzəŋŋə bənə Yeso Klisto nə ivə. À wən loʼ ghə i tii zə, saa muunə, ləmmə tənə nə̀ Zə̀ kə i fuunu saa n fə key tə â təb naŋanə tə̀ saa.

⁴ Tə n ghəŋə nə̀ saa i ləmmə tənə nə̀ saa i keelinu fə wey tə â bayyə naŋanə tə̀ ghə̂ a wi ghə. Tə bayyə naŋa fə u tii wə tə̀ ghaa idəŋ n luʼu key fə u tii u way ni fway, way ni bəb, way soʼo ni fəd koʼ.

⁵ Nghee tə̀ ghaa bəghəmnə tə̀ Klisto, Zə̀ kə i keyyə ghaa n daʼa kə wi kən tə khənə ni ndow kuum n nəŋə zey Klisto i bəghənə. À loʼ n nəŋə i tii zə ghə i bəghəshiənə ghaa n nəŋə zey Zə̀ kə i saʼanə mbi tii.

⁶ À wən loʼ ghəə ghən a khə ni ghəŋə nə̀ ghaa i ngii duʼlə nghee i tsəm loʼ kə nə̀ ghaa i dzəə mow kəŋŋə ndownu bòʼ ndəmə chɔd mən ghaa i keelinə.

⁷ Chɔt mən loʼ ni dii bə nə̀ bəghəm i fə̀ŋ i ghaa i ndzəm loʼnu. Kasə tsaa zən i loʼ ni bəb, ghə nam mɔm koʼonu nə uvələ. Nghee bəghəm i fə̀ŋ i ghaa i tsəghəshi kə tsaa zə, ghə khə soʼonu ni mɔm koʼ, sey nə̀ ghaa loʼ ni taw tsəghə ghəə a mbi. Abə ghaa ghəŋənə sey, Zə̀ kə i ghəŋə nə̀ ghə̂ a kali ghaa, ghə fuu ghaa n kɔʼlə mə nsə ngɔɔmə zə n tsuʼ fey Yeso klisto i bəghənə a tii.

⁸ Nghee ghaa loʼ kə nə̀ ghaa ka kam buʼ koʼ wi, ghaa a nam ləghə wi. Nghee ghaa koʼo kə way wi ghaa a nam bəghəm fuu kə tə wi, ghaa a khə soʼo duʼlə i nii zə n jìi zey wù way ni buʼ tiilə dza.

⁹ Nghee ghaa bəghəmnə tə̀ Zə̀ kə, naamə kə tii kə loʼ nə̀ Zə̀ kə i bəghəshiə fə̀ŋ tə ghaa.

¹⁰ Â loʼ bòʼ bəghəshi zən tûm tə Kəzə̀ tə â ney kɔʼ nəŋə zə, ni tɔʼ kəŋ shi kɔʼ, ghə n dza naŋa zey bə nghee Zə̀ kə i dii ndzuŋ ə wi tii tə̀ ghaa ghən ghaa loʼ nə̀ ghaa n bwu khə̂mə.

¹¹ Ghə n dəm tsu ni kəŋ keeli shi kɔʼ nəŋə i tii zə nsə jìi zey ghəə a tii ghə i neynə bənə kə. Â wən loʼ nəŋə zey Zay kə Klisto key kə loʼnə n kow ghə â dii naŋa ndownə ghə nghee wù wən Zə̀ kə â dza naŋa nə̀ i tûm bənu, i bə fəʼlənə tii nsə kɔʼlə mey tə i bə keelinə.

¹² Zə̀ kə mâ dii naŋa zey bə tə̀ tûm tə wi tə nə̀ fwaʼ kə ghə kə â way dzə ni gaamə wû i ghə, â fəd loʼ ni gaamə ghaa. I loʼ soʼo tə̀ nghee tûm tə Kəzə̀ tən â dza naŋa zey bənə ghəə ghey ghaa zownə nya n wɔ ghə̂ ghey ghə naʼlə bə tûm i dzuŋu zən tə̀ ghaa n daʼa kə Zay kə Zow key Zə̀ kə tûm tsu bənə tə̀ ghaa idəŋ. À wən loʼ aghəə nə̀ tsətəndəghə tə Kəzə̀ tə buʼu dəmə soʼo ni zowkeeli.

Jìi zey saa khə ni muu muu i zow zə tii

¹³ Sey ghaa khə ni bayyə naŋa tsu fə̀ŋ tə ghaa ni fwaʼ. Ghaa teyyə kɔʼ kətow idəŋ, naŋŋə tsu soʼo ghow kə ibwey kə ghaa ni fwaʼ fwaʼ key Zə̀ kə ləghənə. Ghaa i ləmmə tənə ndzuŋ zey ghaa i keelinə abə Klisto i dzəŋŋə bənə.

¹⁴ Tə̀ a loʼ waa ghey ghə zownə laŋ K-a-zə̀ kə, kə ghaa nə kəm ghəŋŋə ghəə a bəbə ghey ghaa â khənə zay ni ghəŋŋə n nəŋə zey ghaa â kam khə way Zə̀ kə.

¹⁵ Nghee i kee loʼ nə̀ wù wey tə tɔŋɔnə ghaa zownu, ghaa khə ni zow soʼo tə a loʼ wi n ghəə a ghaa a ghəŋŋə ghə adzəm

¹⁶ N dza sey n təŋkey, i tɔ̀ɔ doʼo n màʼlə K-a-zə̀ nə̀, “Wə khə ni zow n təŋkey, n zownu.”

¹⁷ Ghaa tɔŋŋə Kəzə̀ nə̀ a loʼ Bày ghey abə ghaa gɔŋŋə tə̀ wi wən tə saʼanə ghə̂ ghə nə̀ tə laalə way tûm usə u wù wə. Tə saʼa kə kay wù n ghəə ghey tə ghəŋənə. Sey, ghaa khə ni muu tən kə ni ngɔɔmə Zə̀ kə n nəŋə zən ghaa nam khənə nghee ghaa tyi nyi doʼonə fa.

¹⁸ N dza sey n təŋkey, ghaa khənu nə̀ ghə â tsə tsəghə ndow fə kə səŋi kə kuum nuu shi bə tow u ghaa n ghəə a bəbə ghey ghaa â koʼ neynə n wɔ ghə bày bày a ghaa. Â way dzə nə kəfə nə kə loʼ ni bəb tə a loʼ itsaa nkee tsaa zə ishɔ̀lɔ̀.

¹⁹ Ghə â fəd kuum nuu shi bə tow u ghaa n kɔb kə kaŋ tə Klisto tən ghə fəələnə n zat kə fəkaʼ, tə a loʼ kaŋ tə waa njì zən ghə fəələnə nə̀ i khə way fəmmə kə loʼ kə khə soʼo way dzə u loʼ wə n kow wi.

²⁰ Zə̀ kə â sày wi nə̀ mbi ka kam doʼo zey, ghə n ney dii shi bə wi n tsuʼu mən mbi may kəŋŋə bənə tii bòʼ ghaa.

²¹ À loʼ n bam i Klisto i ghəŋənə nə̀ ghaa bəghəm tə̀ Zə̀ kən kə â zhəm dzəŋŋə bənə wi nə ivə, kɔʼlə naŋa kɔʼ wi idəŋ. À wey loʼ ghə i tii zə ghaa khənə bəghəm i fə̀ŋ zə, ləmmə tənə soʼo nə̀ Zə̀ kə i ghəŋə ghəə a səŋi ghə tə̀ ghaa.

²² Nya wən ghaa sow maʼa dzənə wû i ghaa zə nghee ghaa naŋŋənə isəŋə, sey nə̀, ghaa i ndzəmə ləghə wû i ghaa zə tə a loʼ a awaazə, i ndzəmə ləghə na wû i ghaa zə n fə̀ŋ tə ghaa tə tədzəm.

²³ N dza sey n təŋkey n bam i ghɔɔmə i Kəzə̀ zən i fuunə muu zə, i loʼ soʼonə nəŋə tədzəm, ghə n ji kuulə ghaa tə a loʼ waa a wù wey tə kpuu way, nə̀ à way dzə tə a loʼ waa a wù sɔŋtsuʼ wey tə loʼ nə̀ tə kpuunu.

²⁴ I loʼ tə i tɔ̀ɔ doʼonə n màʼlə K-a-zə̀ nə̀, “Wù sɔŋtsuʼ maŋ loʼ kə tə a loʼ kəghìi, Nyiələ i ghə i maŋ loʼ kə tə a loʼ bəllə u ghii u mbvən wə. Ghii u tii u fɔɔ zum nuu kɔʼɔnu, bəllə u tii wə n zəʼlə nuu tsu.

²⁵ À kee loʼ nə̀ ghɔɔmə i Mûkəbii i doʼlə tənənu.” Ghɔɔmə i tii i loʼ tûm i dzuŋu zən ghə â naʼanə tə ghaa.