1 Kɔrint 6 - Kaa n Kəzə̀ n fəghə mə

Ghəə a təsaʼ n fəŋŋə kə dzûmə tə Klisto

¹ Abə wù ghaa u loʼ u khənə chɔd wə ghi waazə u loʼ wə tə loʼ soʼo dzûmə Klisto, tə khə way ni ndow sɔmi wi n səə ghə̂ ghən ghə ka bəghəm tə̀ Zə̀ kə nə̀ ghə saʼ saʼa tii. Ghaa khə ni fəd ney ndow chɔd u tii wə tə̀ dzûmə tə Klisto tə, tə̀ ghə bayyə chɔd u tii wə.

² Ghaa khə way nə̀ nəŋə zə i bəghənu, a i loʼ ghə̂ a Kəzə̀ ghə i saʼanə mbi zən ə? Abə à loʼnə ghaa, ghaa i saʼanə mbi, ghaa ka kɔʼ kpii ni saʼa nyaŋi mə nghəələ mən n fəŋŋə kə ghaa ə?

³ Ghaa khə way nə̀ a loʼ saa, saa nə̂ saʼa tsətəndəghə tə Kəzə̀ tə ə? Abə saa loʼ ni saʼ tsətəndəghə tə Kəzə̀, nyaŋi mə nghəələ mən fa n muu i mbi loʼ kə kee tə̀ saa ni saʼ a?

⁴ Sey abə ghaa khənə ghəə zə ni saʼ, ghaa fəd loʼ ngee ni ney ndòw n səə ghə̂ ghey dzûmə tə Klisto tə fuu way ghə n kɔʼlə mə ə?

⁵ À wən ngii loʼ tow kə dədlə kə tə̀ ghaa! Abə à loʼnə nə̀ wù umɔʼ way n fəŋŋə kə ghaa dzûmə Klisto, tə khənə tɔb wə ni saʼ chɔd wey ghaa khənə n wû i ghaa.

⁶ Ghaa dzûmə tə Klisto, ghaa fədlə ney ndow a waazu n tay i saʼ. I zey i buʼ bəb tsəghəshinə loʼ nə̀, ghaa ney ndow chɔd n ghaa tə̀ ghə̂ ghən ghə ka bəghəm tə̀ Zə̀ kə nə̀ ghə bayyə.

⁷ Abə ghaa keeli kaabənə saʼ tə n wû i ghaa, i sey dii nə̀ ghaa muu dzə way tə a loʼ ghə̂ ghey ghə bəghəmnə tə̀ Klisto. Ghaa way ni baa bəghəm ndow kə nə̀ abə wù ghəŋə bəəbənə tə̀ ghaa, ghaa n zəghə maʼa ndow kənu ə? Ghaa way ni maŋ zəghə maʼa ndow kənu nə̀ ghə i baa tsìi ndow kə ghaa ə?

⁸ Wû i ghaa, ghaa a ghəŋŋə bəəbə soʼonə, tsìi aghə̂, buʼu tsìi daŋŋə soʼo dzûmə tə Klisto.

⁹ Ghaa khə way nə̀ ghə̂ ghey ghə ghəŋŋənə ghəə a bəbə ghə, ghə î zə̂ way Fɔɔ u Kəzə̀ wə ə? Kə̂ wù loʼ nə nəbənə ghaa! N dza bə tə̀ ghaa nə̀, ghə̂ a laŋŋə ghə, ghə̂ ghey ghə ngɔɔmənə muʼu mə, ghə̂ ghən ghə taa zaʼa wû zə, gheynum ghən ghə nyəŋinə n wû i ghə,

¹⁰ ghə̂ a tsɔŋɔ ghə, ghə̂ ghey ghə shiənə n sə ghə n fə u mbi, ghə̂ a khəə ghə nlə ghə, ghə̂ ghey ghə khəə kaabənə fəghəm tə, nsə ghə̂ a tsɔŋɔ ghə. Ghə̂ ghən adzəm nə̂ way ni zə̂ koʼ Fɔɔ u Kəzə̀.

¹¹ À wən bɔɔmə loʼ ndzoʼo ghəə ghey ghaa a loʼ ghə â buʼu ghəŋŋə tsənə. Mûkəbii Yeso Klisto nsə Zay kə Zow kə n kee sow maʼa tsu ghaa n ghəə a ghaa a bəbə ghə, ghəŋə nə̀ ghaa i zow n sə K-a-zə̀, ghəŋə soʼo nə̀ ghaa i loʼ tsətsəghə n sə̂ K-a-zə̀.

Wû i ghaa i loʼ ni fuu nkɔʼlə tə̀ Zə̀ kə

¹² Ghə̂ a loʼ a loʼnu n fəŋŋə kə ghaa ghə dzanə nə̀, “Laŋ kə loʼ kə way dzə kə tuunə nə̀ ghey ka ghəŋə ghəə zey ghey ləghənə ni ghəŋə.” N kee dza bə tə̀ ghaa nə̀, à way dzə aghəə adzəm a dzɔbənə tə̀ ghaa. À loʼ kənu isəŋə nə̀, “Laŋ kə loʼ kə way dzə kə tuunə nə̀ n ka ghəŋə ghəə zey n ləghənə ni ghəŋə.” À kee loʼ nə̀ mə i bəghəm naŋa way nə̀ fə̂ kə loʼ kə ghəŋə mə nə̀ n doʼo kəkɔd tə̀ ghii kə.

¹³ Ghə̂ a loʼ ghə a dza soʼo nə̀, “Ghə â ghəŋə ufəzəə tə̀ nəghə wə, ghəŋə soʼo unəghə tə̀ fəzəə wə.” Ow a loʼ isəŋə! A kee loʼ nə̀, Zə̀ kə î ləŋi maʼanu fə̂ u tii wə udzəm. Ghaa khə way ni ney wû i ghaa, ghaa i ghəŋŋə ghəə a laŋŋə ghə tii, ghaa khə ni fəd ney wû i ghaa, ghaa i kɔʼlə Mûkəbii tii. A loʼ Mûkəbii tə fuunə fə key wû u ləghənə.

¹⁴ Zə̀ kə i zhəm dzəŋŋə bə saa nə ivə n daʼa kə wi, ighələ tə̀ tə â zhəm dzəŋŋə bənə Mûkəbii nə̀ ivə.

¹⁵ Ghaa khə way nə̀ wû i ghaa i loʼ zuŋ u wû u Klisto ə? N loʼnu ni ney kɔʼ zuŋ kə uwû kə Klisto, n təmdzəŋi ndow ghi wû u wù wey tə loʼnə kpala kə ə? I way ni doʼo koʼ sey!

¹⁶ Ghaa khə way nə̀ wù wey tə təm dzəŋinə wû wə ghi kpala kə, sey doʼo dzə gow uwû imɔʼ ghi wi ə? I tɔ̀ɔ doʼo n màʼlə K-a-zə̀ nə̀, “Tow ghə ubəghə ghə i doʼlə bə uwû umɔʼ.”

¹⁷ Wù wey tə kee təm dzəŋinə wû u wi wə ghi Mûkəbii, zay kə wi ghi kə Mûkəbii kə, loʼ kəfə kəmɔʼ.

¹⁸ Zəghə maʼa na ghəə a laŋŋə ghə. Bəb i loʼ i way dzə wù ghəŋŋənə i mɔmnə gow uwû, wù wey tə ghəŋŋə ghəə a laŋŋə ghə kee ghəŋŋə ibəb n wû u wi.

¹⁹ Ghaa khə way nə̀ wû i ghaa i loʼ Ndaw Kəzə̀ zey Zay kə Zow kə muunə tii nə̀ a fuu bə Kəzə̀ tə ghaa ə? À way dzə ghaa, ghaa khənə wû i ghaa zə, à loʼ Kəzə̀ kə khənə wû i ghaa zə.

²⁰ Zə̀ kə mâ kùmshi tow u ghaa wə n wən i taw zə. Sey, ghaa khə ni ney naŋa tsu vən fə uwû fə ghaa ni kɔʼlə Zə̀ kə a tii.