1 Kɔrint 4 - Kaa n Kəzə̀ n fəghə mə

Wù wey tə kpiinə ni doʼo wù Kəfwaʼ a Klisto

¹ Ghaa khə ni koʼo bə ghey tə̀ a loʼ ghə̂ a kəfwaʼ a Klisto ghən Zə̀ kə fuunə ghə n daʼa kə nə̀ ghə i tiilə dza bə isəŋə zey i nyi doʼonə n ghəə a Kəzə̀.

² Ghəə zey ghə ləghənə n wɔ wù wey ghə fuunə wi n daʼa kə ni fwaʼ kəfwaʼ, loʼ nə̀, tə khə ni teeli fwaʼa kə tə̀ mûkəbii ə wi n fə̀ŋ ə wi idzəm.

³ Abə mə, n tsəmə naŋŋə dzə way sə̂ zə abə ghaa saʼanə mə nkee abə wù sɔŋtsuʼ u loʼ u saʼanə mə. Isəŋə loʼ nə̀, wû wuŋ, n saʼa soʼo way wû wuŋ wə.

⁴ N way ni moʼlə dzə ghə i loʼ zə n loʼ nə̀ mə n ghəŋə bəəbə. I zən kee dii dzə way nə̀ n khə way bəb i loʼ zə. À may kə Mûkəbii tə i saʼanə mə, tə dza nə̀ n khənu bəb zə mɔ n khə way ə.

⁵ Sey, kə ghaa nə tsəʼlənə saʼ n kow wù nə̀ nəŋə i ka kam kpii. Ghaa khə ni ləmə ni ndow kuum n nəŋə zey Mûkəbii i bəghənə tii. À loʼ wi tə i ney naŋŋə bənə ghəə ghey adzəm a nyi doʼonə nə kələm n mgbaŋ, tə i chi dii bə soʼo moʼlə tə bəbə tey ghə̂ a khənə n fə̀ŋ tə ghə. N nəŋə i tii zə, Zə̀ kə i fuu kə kay wù n kɔʼlə mey n kpiinə tə̀ wi.

⁶ Waazə ghə, n ney kɔʼɔ wû wuŋ ghi Apolos tə a loʼ ghə̂ ghey ghə moʼo dii bənə ghəə ghə tə̀ ghaa, sey nə̀, ghaa i loʼ ni koʼ ney kɔʼ n wɔ ghey ghəə zey i diinə nə̀, “Wə khə way ni ghəŋə ghə i loʼ zə nə̀ i ka tɔ̀ɔ doʼo n màʼlə K-a-zə̀.” Sey, wù ghaa u loʼ u khə way ni ghaŋŋə wû wə nə̀ n dzûmə wù wən, kee koʼo kii u loʼ wey.

⁷ À loʼ ndee tə ghəŋənə nə̀ ghaa a loʼ ghə i loʼ n nəŋ n fəŋŋə kə ghə̂ a loʼ ghey ə? À loʼ fə̂ kə ghaa kə ghaa keeli koʼ tsənə nə̀ à way Kəzə̀ kə fuunə tə̀ ghaa ə? Abə à loʼ nə̀ a loʼ Kəzə̀ kə fuunə fə̂ u tii wə udzəm tə̀ ghaa, a loʼ kee ghaa ghaŋŋənə wû zə tə a ka fuu wi fə u tii wə tə̀ ghaa ə?

⁸ Ghaa n keeli may fə̂ wey udzəm ghaa â ləghənə ni keeli ə? N dza ghaa n doʼo tən ghə̂ a kûum ghə? Ghaa nya loʼ udəŋ nə̀ ghey ka kam doʼo də̀ŋ wə ə? Tə̂ n mə duʼlə abə ghaa mə̂ ndzəm loʼnə də̀ŋ wə, sey ghey mə mbɔŋ loʼ ni doʼo bə udə̀ŋ ghi ghaa.

⁹ N koʼo kə sa tə̀ Zə̀ kə n sày saa ghən saa loʼnə ngəd tə Yeso tə, naŋa ndow n bùʼ kə ulən n fəŋŋə kə ghə̂ adzəm, tə̀ a loʼ ghə̂ ghey ghə tsəʼlənə saʼ n tow u ghə nə̀ ghə khə ni kpu. Ghə n ghey tɔŋ zaa tə̀ mbi idzəm, n sə̂ kə aghə̂ nsə tsətəndəghə tə Kəzə̀ tə.

¹⁰ Ghey loʼ tə̀ a loʼ ghə̂ a laʼlə ghə nghee ghey fwaʼanə tə̀ Klisto, ghaa a kee loʼnə ghə̂ a tɔbə ghə nghee ghaa loʼnə nə kəfə kəmɔʼ ghi Klisto! Ghey loʼ ghə̂ a lay ghə, ghaa a loʼnə ghə̂ a taw ghə. Ghə̂ a ngɔɔmə ghaa, kee tsayyə ghey!

¹¹ Ni bə kuum nya, ghey sa loʼ kə n dzəŋ, fə̀ŋ ə mmuu i zuʼlənə ghey. Ghey tsəghə kaabə n saʼ u fə̂ wə nə uwû, ghə a bwɔdlɔnə ghey nəŋə tədzəm. Kasə luʼu kə muulə kə, ghey khə way.

¹² Ghey ndeemi iwû ni fwaʼ, fwaʼa n wɔɔ a ghey. Abə ghə̂ a tsɔɔmənə ghey, ghey n fəd fuu ghə n buulə zə. Abə ghə chɔdlɔnə ghey, ghey n kee kow tsu kə təfə̀ŋ.

¹³ Abə ghə kpaalənə ghey, ghey n kee beeli ndòw kə n dzə̀ i dzuŋu zə. Ghey maŋ loʼ tə̀ a loʼ fə̂ u kənunu tə̀ mbi. Ni bə kuum bə nya, ghey nya maŋ loʼ tə a loʼ dzə̂ u mbi ghə feeli maʼanə.

Tsə̀ i Pɔl tə ghə̂ a Kɔrint ghə

¹⁴ N ka ghəə ghən tɔ̀ɔ bə dzə ni dədlə tow kə ghaa, a fəd loʼ ni tsə̀ naŋa bə ghaa tə̀ a loʼ waa ghuŋ ghən n ləghənə.

¹⁵ Abə ghaa bùʼ khə kənə ghə̂ ghə tə a loʼ təkam ighəm ghə dəŋənə ghaa nə̀ ghaa i loʼ nə kəfə kəmɔʼ ghi Klisto, ghaa khə kə bày umɔʼ. A may kə mə, mə â doʼo bə tə̀ a loʼ bày ghaa n təŋkey, ghaa â doʼo bə nə kəfə kəmɔʼ ghi Klisto nə̀ à loʼ mə n ney bənə tûm i dzuŋu zə tə̀ ghaa.

¹⁶ Sey, n buʼu bə kəwɔɔ tə̀ ghaa nə̀ ghaa ney ghow kə ibwey kuŋ.

¹⁷ À wən loʼ zuŋ key n tûm bənu Timoti tə̀ ghaa. Tə loʼ tə̀ a loʼ waa wuŋ wən n ngii ləghənə, tə u ngii gaʼ soʼonə fə̀ŋ n kow Mûkəbii. Tə i zəŋŋə bə ghaa n jìi zey n muu kɔʼ bənə tii tə̀ a loʼ dzûmə Yeso Klisto. À loʼ n jìi i mɔʼɔ zə n diinə n dzəŋi u dzûmə tə Klisto tə udzəm, nə təluʼu tədzəm.

¹⁸ Ghə̂ a loʼ ghə n fəŋŋə kə ghaa â moʼlə kə nə̀ mə i kəm bə way n fəŋŋə kə ghaa, sey, ghə u kaʼ ndow ni ghaŋŋə iwû.

¹⁹ N khənu moʼlə zə ni kuʼlə bə taa fey n səə ghaa abə Mûkəbii kpaʼi bəghəmnə. Abə mə i bənə, mə i kəŋ keeli shi kɔʼ nə̀ ghə̂ ghən ghə ghaŋŋənə wû zə maŋ khə kə idzuu mɔ Zə̀ kə n ndzəm fuu ghə n daʼa kə ə.

²⁰ N dza sey n təŋkey, ni muu n jìi zey wù khə ni muu tii n fɔɔ u Kəzə̀, loʼ n daʼa key wə khənə ni ghəŋŋə ghəə ghey Zə̀ kə ləghənə, à way dzə n ghəə ghey tə ghɔɔmənə.

²¹ Ghaa ləghə ghə i ghaa zə nə̀ n ghəŋə tə̀ ghaa ə? Abə mə i bənə, zə i kpiinu tə̀ mə ni chɔd ghaa nkee zə i kpiinu tə̀ mə ni dii ləghə zuŋ tə̀ ghaa, n dii soʼo ghaa n mwam u dzuŋu wə ə?