1 Kɔrint 16 - Kaa n Kəzə̀ n fəghə mə

Ghəə a zuŋŋə ghə ukhəə tə̀ dzûmə tə Klisto tə

¹ Nyisa, n ləghə ni ghɔɔmə bòʼ ghəə ghən ghaa â tɔ̀ɔ bəb bənə bòʼ khəə wey ghaa â zuŋŋənə ni fuu tə̀ dzûmə tə Klisto tey n naʼ i Yerosalem. Ghaa khə ni bɔɔmə dzûmə ndow ghəə ghey mə â dzanə tə̀ dzəŋi u dzûmə tə Klisto wə n naʼ i Galeshya.

² N tsuʼu mə inaʼ mə nkala, kay wù khə ni ney naŋŋə kɔʼɔ bəghə fə fəghə fə n khəə wey tə keelinə nə iwən, tə n nyì naŋa ndow, sey nə̀, abə mə i bənə, ghaa i ka kəm fəmmə wû i ghaa ni zuŋŋə khəə u tii wə.

³ Abə mə i bənə, mə i tɔ̀ɔ tsu màʼlə kə dzuŋu kə n tow u ghə̂ ghey ghaa i sày kɔʼɔnə, n fuu tsu tə̀ ghə nə̀ ghə ndow fuu ndow gaamə zən n Yerosalem.

⁴ Nə̀ n bə koʼ tsu nə̀ i dzɔbənu tə̀ mə ni ndow soʼo, mə i ndow dzəŋi ghi ghə.

Jìi zey Pɔl bayyə naŋa bwey i wi zə tii

⁵ Mə i bəghə kə n səə ghaa nə̀ mə n ndow taa dzə n Masedonya, n təŋkey, n moʼlə ni tsəghə jii fu n Masedonya.

⁶ Abə mə i bənə, n nəŋə i loʼ zə, mə i ndəŋə doʼlə kəŋŋə bənu fey ghi ghaa. N moʼlə nə̀, ndzɔŋɔ tən fəb u ngii loʼnə tii tədzəm, mə i loʼ fey ghi ghaa sey nə̀, ghaa loʼ ni gaamə mə n bwey zuŋ zən n khə ni bwey kaabə.

⁷ Zuŋ key n ləghə way ni bə koʼ ghaa nya nə̀ n tsəghə daŋŋənu loʼ nə̀, n khə imoʼlə ni bə ndəŋ doʼo kəŋə bə ghi ghaa abə Mûkəbii kpaʼi bəghəmnə.

⁸ À kee loʼ nə̀ n doʼlə kəŋŋə ndow dzə fa n Efesus, zə̂ kə Pentikɔs kə tsəghə kɔʼ dzə.

⁹ Zuŋ kə tii kə loʼ nə̀, Zə̀ kə n fuu mə fa n bùʼ kə tə̀ mə ni fwaʼ fwaʼ kə səŋi kə, nghee i tsəm loʼ kə nə̀ ndəmə aghə̂ a təʼlənu mə.

¹⁰ Abə Timoti kpaʼi bənə fey n səə ghaa, ghaa ney naŋa wi n wɔɔ a dzuŋu ghə n fəŋŋə kə ghaa n təŋkey, tə bɔɔmə fwaʼa soʼo fwaʼ kə Mûkəbii kən n fwaʼanə.

¹¹ Sey, kə wù loʼ nə koʼo kìinə wi. Ghaa khə ni fəd gaamə wi nə̀ tə bwey kədzuŋ abə tə bəghə dzəŋŋənə n təŋkey, n ləmmə wi fa ghi dzûmə tə Klisto tə loʼ tey.

¹² A kee bə n ghəə ghən ghaa â tɔ̀ɔ bənə kuum Apolos, n mâ dza tə̀ wi nə̀ tə bə koʼ ghaa ghi dzûmə tə Klisto tə loʼ tey. À kee loʼ nə̀ tə kam ləghə way ni bə nya. Tə i bə koʼo kənu ghaa abə tə keeli kɔʼnə bùʼ kə.

Nghee Pɔl guŋ kɔʼ ghɔɔmə i wi zə tii

¹³ Təmi kɔʼ na n fuu zə. Kə wù loʼ nə təʼlənə ghaa. Ghaa təmi taw tsu n bəghəm i fə̀ŋ i ghaa. Kə ghaa nə tsəŋənə ghə i loʼ zə. I taw dzɔbə n na.

¹⁴ Ghəə ghey ghaa ghəŋŋənə adzəm, ghaa khə ni ghəŋŋə ndow kə nə iləghə.

¹⁵ Waazə ghə, ghaa khənu nə̀ Stefanas ghi ghə̂ ghey n ndaw wi â loʼ ghə̂ a sə isə ghə ni fəd doʼo bə dzûmə tə Klisto n mboʼo Akaya. Ghə a fuu may ndownə wû i ghə zə ni fwaʼa tə̀ ghə̂ a Kəzə̀ ghə.

¹⁶ N buʼu bə kəwɔɔ nə̀ ghaa i zow ndow tə̀ ndzoʼo ghə̂ ghən nsə ghə̂ ghən adzəm ghə fwaʼanə, fəʼlə dzəŋi soʼo ghi ghə.

¹⁷ N ngii duʼlənu nghee Stefanas, Fɔchunatus nsə Akaykus bənə fa, n təŋkey, ghə n mə fa ngii gaamə nghee ghaa â way fa.

¹⁸ Ghə n kuu soʼo fə̀ŋ zuŋ ighələ tə̀ ghə kuunə fə̀ŋ tə ghaa tə. I ndzəm kpiinu ni fuu ndzoʼo ghə̂ ghən n kɔʼləmə.

¹⁹ Dzəŋi u dzûmə tə Klisto tey n mboʼo Eshya tɔŋŋə zow bə ghaa. Akwila nsə Prisila tɔŋŋə zow bə ghaa n fə̀ŋ tə ghə tə tədzəm n zəd i Mûkəbii. Dzûmə tə Klisto tey tə nyiənə n ndaw ghə tɔŋŋə zow bə soʼo ghaa.

²⁰ Dzûmə tə Klisto tən tədzəm tə loʼnə fa ghi mə tɔŋŋə zow bə ghaa. Ghaa tɔʼ tɔŋɔ zow ndow wû i ghaa n fə̀ŋ tə zow tə tə̀ a loʼ dzûmə tə Klisto.

²¹ À wən kee loʼ tɔŋɔ zow zuŋ nya, mə Pɔl, n tɔ̀ɔ tsunə n wɔɔ kuŋ kə.

²² Ngoʼ loʼ n kôw wù wey tə ləghə way Mûkəbii. Bəghə a Mûkəbii ghey!

²³ N gɔŋŋə nə̀ Mûkəbii Yeso fuu ghaa n ndzuŋ ə wi.

²⁴ N ləghə ghaa ghən adzəm ghaa loʼnə nə kəfə kəmɔʼ ghi Yeso Klisto. À may kuum kə sey.