1 Kɔrint 11 - Kaa n Kəzə̀ n fəghə mə

¹ Ney na ghow kə ibwey kuŋ kə nghee tə n neynə ghow kə ibwey kə Klisto kə.

Itsə̀ boʼ ghəə a tsədlə a kətow ghə abə ghə ngɔɔmənə Zə̀ kə

² N fuu kali u ghaa nghee ghaa moʼlənə mə nə aghəə adzəm. N fuu soʼo kali u ghaa nghee ghaa naŋŋə kɔʼɔ bənə ghəə ghən mə â dii tsəghə bənə tə ghaa.

³ N kee ləghə nə̀ ghaa zowkeeli tsu nə̀ Klisto loʼ kətow tə̀ gheynum ghə adzəm, weynum u loʼnə tow kə tə̀ wey wi, Zə̀ kə a loʼnə tow kə tə̀ Klisto.

⁴ Sey, weynum wey tə gɔŋŋənə nkee tə naʼlənə ghɔɔmə i Kəzə̀ zə nə̀ tə n tsəd naŋa tow kə wi kə, sey ngɔɔmə way Klisto wən tə loʼnə tow kə wi.

⁵ A kee bə weyzən wey tə gɔŋŋənə nkee tə naʼlənə ghɔɔmə i Kəzə̀ zə nə̀ tə ka tow kə tsəd naŋa, tə sey ngɔɔmə way num wi. Weyzən ə tii ghi weyzən wən tə loʼ nə̀ tə n tow kə kɔm, kweyyə kə loʼ kə way dzə.

⁶ Abə weyzən ləghə way ni tsəd naŋa tow kə wi, dzɔb baa loʼ nə̀ tə kɔm maʼa tsu tow kə tii kə. Nghee tə a kee loʼnə nə̀ à ngii loʼ tow kə dədlə kə tə̀ weyzən ni kɔm tow kə wi nkee tə̀ ghə ni kɔm tow kə wi, dzɔb loʼ nə̀ tə baa tsəd naŋa tow kə tii kə.

⁷ I ka kpii dzə tə̀ weynum ni tsəd kətow, n təŋkey tə dii bə fə key Zə̀ kə loʼnə ghii kə n koʼ i wi, tə u dii soʼonə kɔʼlə mey Zə̀ kə khənə, weyzən u kee diinə kɔʼlə mey weynum khənə.

⁸ Zə̀ kə â ka ney dzə weyzən ni bɔm weynum, tə â fəd ney weynum ni bɔm weyzən.

⁹ I loʼ soʼo nə̀, Zə̀ kə â ka bɔm dzə weynum tə̀ weyzən, tə â fəd bɔm weyzən tə̀ weynum.

¹⁰ À wən loʼ zuŋ key weyzən khə ni teeli tsəd keeli tow kə wi ni dii nə̀ tə loʼ n tənə num wi, nsə nə̀ tsətəndəghə tə Kəzə̀ tə i koʼo bə.

¹¹ A kee bə n doʼo i saa ghi Mûkəbii, weyzən way ni doʼo n ngəŋ ə wi nə̀ weynum way, weynum u way soʼo ni muu n ngəŋ ə wi nə̀ weyzən way.

¹² Nghee tə̀ i loʼ nə̀ Zə̀ kə â ney weynum ni bɔm weyzən, a loʼ soʼo ighələ weynum loʼ nə à wi ji bə weyzən, à kee loʼ nə̀ ufə udzəm nuu bə n wɔ Zə̀ kə.

¹³ Wû i ghaa, ghaa moʼlə nə̀ i kpiinu tə̀ weyzən ni gɔŋŋə tə̀ Zə̀ kə n sə kə aghə̂ nə̀ tə ka tow kə tsəd naŋa ə?

¹⁴ Ghəə ghən Zə̀ kə â səd naŋanə fa n mbi mgbaŋa dii may bənu nə̀ à loʼ tow kə dədlə kə tə̀ weynum ni tsuʼ naŋa kətow.

¹⁵ Nyuŋ tə dabə tə kee loʼ nkɔʼlə tə̀ weyzən. À loʼ Kəzə̀ kə â fuunə wi n nyuŋ tə dabə tə, nə̀ tə i tsədlə tow kə wi kə tii.

¹⁶ Wù wey tə way ni bəghəm ghəə ghən n dzanə, ghey, nkee dzəŋi u dzûmə tə Klisto u kəm khə way ghə i loʼ zə ni kuu kpiʼi n jìi zey ghə loʼ ni kɔʼlə Kəzə̀ tii.

Jìi zey ghə̂ a khə ni ney baa K-a-zə̀ tii

¹⁷ N ghəə ghən n dza i ghɔɔmə bə tə̀ ghaa nya, n kali dzə way ghaa tii, n dza i fəd kii naŋa bə ghaa, n təŋkey, abə ghaa dzəŋi bənə tə a loʼ ghə̂ a Kəzə̀, à n shiə kə ghəə a bəbə ghə loʼ sey nə̀ a mə khə ni loʼ ghəə a dzuŋu ghə.

¹⁸ Ghə i sə̂ i sə i loʼ nə̀, n zow nə̀ abə ghaa dzəŋi bənə tə̀ à loʼ dzûmə tə Klisto, ghaa n way dzə n dzə̀ imɔʼ. Ghəə a tii ghə u loʼ tə̀ mə i bəghəm nə̀ a loʼ isəŋə.

¹⁹ À loʼ kənu ghə i dzuŋu zə nə̀ ghaa khənu ni dzawwə doʼo n wû i ghaa, sey nə̀, ghə loʼ ni tɔʼɔ koʼo keeli bə ghə̂ ghey ghə ndzəm loʼnə dzûmə tə Klisto tə.

²⁰ Abə ghaa təmə dzəŋinə, jìi zey ghaa zə̂ənə tii, way dzə jìi zey ghə zə̂ənə baa K-a-zə̀ kə.

²¹ N sey dza n təŋkey abə ghaa dzəŋi bənə ni zə̂ baa K-a-zə̀, kay wù n ndow kə n sə kə ni zə̂ fəzəə u wi nə̀ tə ka ləmə ghə̂ a loʼ ghə, sey, ghə̂ a loʼ ghə n shi fu n dzəŋ, a loʼ ghə n shi fu nə̀ ghə khəə nlə.

²² Ghaa way ni doʼo n ndaw tə ghaa, ghaa i zə̂ə, mə̂ə soʼo fu ə? Nkee ghaa maŋ ləghə kə ni koʼ kìi dzəŋi kə ghə̂ a Kəzə̀, ghaa i lənnə ghə̂ ghən ghə loʼ nə̀ ghə khə way fə kə̂ ə? Ghaa moʼlə nə̀ à wən loʼ ghəə ghən n loʼ ni kaali bə ghaa tii ə? Ngaŋ, n tsəm way ni kali ghaa nə i zən.

²³ N dza i dza bə tə̀ ghaa nə̀, ghəə ghən n dza bənə tə̀ ghaa, à loʼ ghəə ghey Mûkəbii â dza bənə tə̀ mə n wû u wi wə. I loʼ nə̀, n tsuʼ fey ghə â fìi fuunə Mûkəbii Yeso tii, n tsuʼu tə tii tə, Yeso n ney kɔʼ boʼo fə baa,

²⁴ tə n buulə i tsu, boʼlə fuu ndow tə̀ ngəd tə wi tə, dza tə̀ ghə nə̀, “À wən loʼ wû wuŋ n fuu ndownə n tow u ghaa. À wən loʼ ghəə zey ghaa khə ni ghəŋŋə nəŋə tədzəm ni moʼlə tsuu mə a tii.”

²⁵ Ambə ghə zə̂ may kɔʼnə, tə n ney kɔʼ wɔ̀ɔ nlə fuu ndow tə̀ ghə, dza tsu nə̀, ney na lə mən, “À wən loʼ kaŋ tuŋ, tə loʼnə ni bayyə kaa n fəghə mən Zə̀ kə sədnə ghi ghə̂ a wi ghə.” Nəŋə tədzəm abə ghaa mə̂ənə n wɔ̀ zən, ghaa sey ghəŋŋə ni moʼlə mə.

²⁶ I sey dii nə̀, nəŋə tədzəm ghaa zə̂ənə baa kən mə̂ə soʼo lə mən, ghaa sey naʼlə ndow tə̀ ghə̂ a loʼ ghə nə̀ Yeso â kpu n tow u ghaa. Ghaa i naʼlə sa ni ndow kuum n tsuʼ fey tə i bəghə dzəŋŋənə tii.

²⁷ Sey, abə wù zə̂nə baa kə Mûkəbii kən, mə̂ soʼo n wɔ̀ɔ wi zən n jìi zey i kpiilə way, tə n sey ghəŋŋə bəəbə tə̀ wû u Mûkəbii wə nsə tə̀ kaŋ tə wi tə.

²⁸ À wey loʼ ghə i tii zə, kay wù khə ni tɔʼ laalə tsu wû u wi ni koʼ nə̀ tə khə way bwu i loʼ zə tə̀ wi ni zə̂ baa kə Mûkəbii, tə mə̂ soʼo n wɔ̀ɔ wi.

²⁹ N sey dza n təŋkey, wù wey tə zə̂ənə baa kə Mûkəbii kə, mə̂ə soʼo lə n wi nə̀ tə fuu way ngɔɔmə zə tə̀ wû u Klisto wə, tə sey ney bə uchɔd n wû u wi nghee tə mə̂ənə sey, zə̂ə soʼo.

³⁰ À wey loʼ ghə i tii zə ndəmə aghə̂ n fəŋŋə kə ghaa loʼnə nə̀ ghə khə way nuŋ wə, dzaŋa, à loʼ ghə a loʼ nə̀ ghə n kpuulə.

³¹ Abə saa kee tɔʼ laalə tsunə wû i saa zə ni koʼ nə̀ saa khə way bwu i loʼ zə, Zə̀ kə i chɔd dzə way saa.

³² Abə Mûkəbii tsəm buʼ chɔd kənə saa, tə teyyə naŋŋə bə saa tsətsəghə sey nə̀ kə Zə̀ kə nə chɔdlɔ dzəŋinə saa ghi ghə̂ a bəbə ghən fa n mbi.

³³ À wey loʼ ghə i tii zə a waazə ghə, n dza bənə tə̀ ghaa nə̀ abə ghaa təmdzəŋi bənə ni zə̂ baa K-a-zə̀, ghaa n ləmə may tsu awaazu.

³⁴ Wù wey dzəŋ zabənə wi, wù tii n zə̂ tən kɔʼ n ndaw wi, sey nə̀ kə Zə̀ kə nə chɔdlɔnə ghə a dza ghə ka ləmə waazə ghə. N khənu nə̀ ghəə a loʼ a loʼnu n ka kam mɔm, a tii ghə, abə mə i bənə, mə i tiilə dza may bə tə̀ ghaa.