1 Kɔrint 1 - Kaa n Kəzə̀ n fəghə mə

Tɔŋɔ zow i Pɔl

¹ À màʼlə kən tɔ̀ɔ bə mə Pɔl wən Zə̀ kə say kɔʼnə n ləghə i wi nə̀ n doʼo ngəd ə Yeso Klisto. N loʼ fa ghi waazə saa, tɔŋŋə Sɔstenes.

² N tɔ̀ɔ bə màʼlə kən tə ghə̂ a Kəzə̀ ghey n naʼ i Kɔrint, ghə̂ ghən Zə̀ kə sày naŋanə nə̀ ghə doʼo ghə̂ a wi a zow ghə nsə ghə̂ ghən adzəm ghə loʼnə nə kəfə kəmɔʼ ghi Mûkəbii Yeso Klisto nə təluʼu tədzəm. Tə loʼ Mûkəbii ə ghə, loʼ soʼo Mûkəbii ə saa.

³ N gɔŋŋə nə̀ Zə̀ kə, tə loʼnə Bày saa, nsə Mûkəbii saa Yeso Klisto fuu ghaa n ndzuŋ nsə buulə i wi zə.

Pɔl fuu kəzɔŋŋə tə̀ Zə̀ kə

⁴ N fuu kəzɔŋŋə tə̀ Zə̀ kuŋ kə nəŋə tədzəm bòʼ ndzuŋ ə wi zən tə fuunə tə̀ ghaa n bam i Yeso Klisto.

⁵ Nghee tə̀ ghaa loʼnə nə kəfə kəmɔʼ ghi Klisto, tə n fuu ghaa n kuum zə nə ufə̂ udzəm, ghəŋə nə̀ ghaa i khə ghɔɔmə tə dzuŋu tə nə idzuu ni naʼa tûm wi, ghəŋə soʼo nə̀ ghaa i khə tɔb wə n ghəə a Kəzə̀ adzəm.

⁶ Zə̀ kə n ghəŋə nə̀ tûm i dzuŋu zən bòʼ Klisto, mə â naʼanə tə̀ ghaa, i nyi taw tsu n kow ghaa.

⁷ Sey, ghaa khə maynu naamə wey Zay kə Zow kə fuunə, nghee tə̀ ghaa ləmmə tənə nə tsuʼ fey Mûkəbii ə saa Yeso Klisto i bəghə dzəŋŋənə tii.

⁸ Tə i keyyə ghaa nə̀ ghaa i taw n bəghəm i fə̀ŋ i ghaa ni ndòw kùm ndow, sey nə̀, ghaa i khə way bwu i loʼ zə n muu i ghaa n tsuʼ fey Mûkəbii saa Yeso Klisto i bəghə dzəŋŋənə tii.

⁹ Zə̀ key kə â tɔŋɔnə ghaa nə̀ ghaa i loʼ nə kəfə kəmɔʼ ghi waa wi tɔŋŋə Mûkəbii saa Yeso Klisto, bwuulə maʼa way wù n ghəə zey tə bəghəm naŋanə ni ghəŋə.

Dzûmə tə Klisto tə khə way ni dzawwə doʼo

¹⁰ Waazə ghə, n buʼu bə kəwɔɔ tə̀ ghaa n zəd i Mûkəbii saa Yeso Klisto nə̀ ghaa adzəm, ghaa i loʼ n dzə̂ imɔʼ, kə̂ ghaa nə dzawwə doʼo soʼonə n wû i ghaa. Ghaa khə ni fəd loʼ nə kəfə kəmɔʼ n fə̀ŋ tə ghaa tədzəm nsə n moʼlə tə ghaa tədzəm.

¹¹ Waazə ghə, n ghəə ghən sa dza n təŋkey ghə̂ a loʼ ghə n ndaw Klo, ghə n dza tə̀ mə nə̀ ghaa zuulə n wû i ghaa.

¹² Ghəə zey n baa dzanə loʼ nə̀, ghə̂ a loʼ ghə n fəŋŋə kə ghaa a dza nə̀, “N dzûmə Pɔl”, a loʼ ghə a dza nə̀, “N dzûmə Apolos.” À loʼ ghə a dza nə̀, “N dzûmə Pita.” Ghə̂ a loʼ a loʼ soʼonu ghə dzanə nə̀, “N dzûmə Klisto.”

¹³ N dza i bəb bə tə̀ ghaa nə̀, Klisto dzawwə doʼonu ə? Â kpaʼi loʼ Pɔl tə â kpunə n tow u ghaa n zat kə fəkaʼ a? Ghə â kpaʼi fuunu wù ghaa u loʼ u wə n mmuu n Kəzə̀ mə n zəd i Pɔl ə?

¹⁴ N fuu zɔŋŋə K-a-zə̀ nə̀ n ka fuu dzə mmuu n Kəzə̀ mə tə̀ wù ghaa u loʼ wə, mə â fuu kə n wɔ Krispus nsə Gayɔs.

¹⁵ Wù ghaa u loʼ u way dzə tə loʼ ni dza nə̀ tə â ney mmuu n Kəzə̀ n zəd zuŋ.

¹⁶ N moʼlə soʼonu nə̀ n mâ fuu soʼo mmuu n Kəzə̀ mə tə̀ ghə̂ ghey n ndaw Stefanas. À may kə ghə̂ ghən n taŋŋə tsunə fa, mə â fuunə ghə n mmuu n Kəzə̀ mə, n moʼo nə̀ wù loʼ kəm way dzə.

¹⁷ Klisto â ka tûm bə dzə mə nə̀ n bə, mə i fuu mmuu n Kəzə̀ mə. Tə â tûm bə mə nə̀ n bə naʼa tûm i dzuŋu zə. Tə â tûm bə mə nə̀ n bə naʼa tûm i dzuŋu zə nə̀ a way dzə n tɔb u wù sɔŋtsuʼ nsə n dzə̀ ə wù sɔŋtsuʼ, sey nə̀ kə̂ və zən Klisto â kpuunə n zat kə fəkaʼ nə doʼlənə kənunu.

Zə̀ kə dii daʼa kə wi nsə tɔb u wi n bam i Yeso Klisto

¹⁸ Tûm zən bòʼ və i Yeso Klisto n zat kə fəkaʼ loʼ ilaʼlə tə̀ ghə̂ ghey ghə laʼa nay ndòwnə. A kee bə tə̀ ghey ghən ghey keelinə bəghəshi zə n wɔ Klisto, tûm ə tii dii bə daʼa K-a-zə̀.

¹⁹ I tɔ̀ɔ doʼo n màʼlə K-a-zə̀ nə̀, “Mə i ghəŋŋə ghə̂ ghən ghə moʼlə nə̀ ghə khə tɔb u nii wə, Ghə keeli tsu nə̀ tɔb u tii u maŋ loʼ kənunu. N ghəŋə nə̀ ghə̂ ghən ghə moʼlə nə̀ ghə ngii tɔbənu, Ghə keeli tsu nə̀, tɔb u ghə u tii u khə way fwaʼ kə loʼ kə.”

²⁰ Sey, ghə̂ ghey ghə moʼlə nə̀ ghə tɔbənu, ghə loʼ ghee? Ghə̂ a dii a kəlaŋ ghə, ghə loʼ ghee? Ghə̂ ghey ghə dza nə̀ ghə tɔʼ khə ni khəə ghəə ghə, ghə loʼ ghee? Zə̀ kə n mgbaŋ dii nə̀ tɔb wən ghə̂ a mbi a moʼlə nə̀ ghə khənu loʼ ilaʼlə.

²¹ I loʼ sey n təŋkey, Zə̀ kə n ghəŋə n tɔb u wi nə̀ ghə̂ a way dzə ni keeli wi n tɔb u ghə. Zə̀ kə n ghəŋə nə̀ ghə̂ a mbi a fəd keeli wi n bam i tûm i dzuŋu zən ghə naʼlənə ghə tɔŋŋənə nə̀ a loʼ ilaʼlə. Zə̀ kə n tsəm tsu ni bəghəshi ghə̂ ghey ghə bəghəmnə tə̀ tûm i dzuŋu zən ghə̂ a mbi a tɔŋŋə nə̀ a loʼ ilaʼlə.

²² I loʼ nə, ghə̂ a Təjuu a ləghə ni koʼ tsu dzə tətsəə ni dii tsu nə̀ tûm zən nuu bə n wɔ Zə̀ kə, ghə̂ ghən ghə way ghə̂ a Təjuu ghə a kee ləghə ni zow ghɔɔmə zey i diinə tɔb u nii wə.

²³ A kee bə ghey, ghey naʼlə tûm nə̀ Klisto â kpu n zat kə fəkaʼ. Ghə̂ a Təjuu ghə a ləghə way ni zow tûm zən ghey naʼlənə, ghə̂ ghən ghə way ghə̂ a Təjuu ghə a kee dza nə̀ tɔb u loʼ u way n ghəə a tii ghə.

²⁴ A kee bə tə̀ ghə̂ ghən Zə̀ kə tɔŋɔnə nə̀ ghə keeli ibəghəshi, nə̀ à loʼ kə ghə̂ a Təjuu nkee ghə̂ ghən ghə way ghə̂ a Təjuu ghə, tûm tii loʼ nə̀, Zə̀ kə dii bə daʼa kə wi nsə tɔb u wi wə n bam i Yeso Klisto.

²⁵ Ghəə ghən Zə̀ kə ghəŋŋənə, ghə̂ a moʼlənə nə̀ a loʼ ilaʼlə, a khə utɔb tsəghəshi tɔb u wù sɔŋtsuʼ. Ghəə ghən Zə̀ kə ghəŋŋənə, ghə̂ a koʼo soʼonə nə̀ a loʼ ghəə a lay ghə, a khə kədaʼa tsəghəshi daʼa kə wù sɔŋtsuʼ.

²⁶ Waazə ghuŋ ghə, moʼlə tsu na fə key ghaa â loʼnə ghii kə n nəŋə zey Zə̀ kə â tɔŋɔnə ghaa nə̀ ghaa doʼo ghə̂ a wi. Ndəmə ghaa â way dzə ghə̂ a tɔbə ghə n sə kə wù sɔŋtsuʼ, ndəmə ghaa n khə way daʼa kə, ndəmə ghaa n way soʼo ghə̂ a səŋi ghə.

²⁷ Zə̀ kə n kee ndzəm sày kɔʼ ghəə ghey wù sɔŋtsuʼ ney nə̀ a loʼ ghəə a laʼlə ghə ni dədlə tow kə ghə̂ ghey ghə moʼlə nə̀ ghə tɔbənu, sày kɔʼ soʼo ghəə ghey wù sɔŋtsuʼ neynə nə̀ à loʼ ghəə a lay ghə ni dədlə tow kə ghə̂ ghey ghə moʼlənə nə̀ ghə khə kədaʼa.

²⁸ Zə̀ kə sày kɔʼ ghə̂ ghən ghə̂ a mbi a koʼo kiinə, ney ghə nə ghə maŋ loʼ kənunu, ni ghəŋə nə̀ ghə̂ ghən ghə̂ a mbi a neynə nə̀ a loʼ ghə̂ a səŋi ghə, ghə doʼo bə kənunu.

²⁹ Zə̀ kə â ghəŋə sey ni ghəŋə nə̀ kə wù sɔŋtsuʼ u loʼ u nə ghaŋŋə wû n səə wi.

³⁰ À loʼ Kəzə̀ kə ghəŋənə nə̀ ghaa i loʼ nə kəfə kəmɔʼ ghi Yeso Klisto. Zə̀ kə n ghəŋə nə̀ saa i khə tɔb wə n bam i Klisto. Klisto n ghəŋə nə̀ saa i loʼ tsətsəghə n sə K-a-zə̀, ghəŋə soʼo nə̀ saa i loʼ ghə̂ a Kəzə̀ a zow ghə. À loʼ wi tə bəghəshinə saa n ghəə a saa a bəbə ghə.

³¹ À wey loʼ ghə i tii zə ghə tɔ̀ɔ naŋanə n màʼlə K-a-zə̀ nə̀, “Wù wey tə ləghə ni ghaŋŋə uwû, tə khə ni ghaŋŋə wû wə n ghəə ghey Mûkəbii ghəŋənə n muu i wi.”