YOHAN 12 - Wa Common Language Translation

Groi Sidah Bhawng Ka Yesux

¹ Ka sang yuh pawie Pasakha liah singaix Yesux deeh hoek ka yaong Betanix, dee ot Lazarux kaw pa hoik kieh Yesux nawh deeh kaoh im khaing krax yum.

² Mawh kheu nan kix khre priex bo son Nawh tan Mathax khan priex. Viang Lazarux kawx, mawh pa viex daux kix pa ngawm tau mai Nawh heue.

³ Yam an Marix teei sidah bhawng Nadu tix paong, pa kied ngawh tete kraix ka caong Yesux mai teei hauk kaing tix awt ka caong Nawh Cao. Pa sioe baux sidah bhawng an naog ka daux nyiex khawmuik heue.

⁴ Yam an Yudax Isakariut, pa mawh kawncau Nawh tix kaux, pa sang tik tawx Nawh, ah nin,

⁵ “Khex ang coh sidah bhawng in loe yieh denari tawx ka pui pa hot sia lie?”

⁶ Nawh ah nin kheu keud nawh son pui hot sia ang mawh, viang mawh nan hoik mawh kheu mawh nawh pui briex pa viex hau mau sax teei mau pa sau ka hau an heue.

⁷ Kheu nan Yesux ah nin, “Paw lai chuh ka nawh, kieh nawh priex sidah bhawng in son singaix yam sipaung Aux heue.

⁸ Grawh grawng nawh pui hot sia ot mai pex jheung jheung,viang mawh nan Aux ot mai pex jheung jheung ang mawh”

Kum Sonsang Pah Lazarux

⁹ Mawh kheu nan pui hun Yudax tawng ka grawng ot Yesux tan, kix hoek kheu Yesux khaing ang mawh, viang mawh nan hoek kheu simie kix ti yaox Lazarux pa hoik kieh Nawh Cao kaoh khaing krax yum.

¹⁰ Cao giex kaing li pa ting khankix, kum paox tix ka grawng sang pah khawm Lazarux yum.

¹¹ Kheu jao nawh pui hun Yudax hoik lih hu mai yum rhawm ka Yesux heue.

Brug La Laig Daux Veng

¹² Singaix pasax pui hun pa hoek haok ka pawie, yam mhong kix grawng sang hoek Yesux ka veng Yerusaliem,

¹³ Kix teei lhax khaox jhie yaong hu rieb Nawh Cao mai kok yo ah nin, “Hosanna, Kaw pa hoek ka daux ceu kaux Simiang ting bwanson, pa mawh Simiang Isarelax”

¹⁴ Khaix hoik yaox Yesux la awn ju tix mu, Nawh ngawm piang la an, awm pa hoik tiiem daux lai sigang khri ah nin,

¹⁵ “Kawn bun Zion eue, paw lhat, jhak heue, Simiang maix ngawm ka piang kawn la mai hoek ka maix heue.”

¹⁶ Pha ka kawncau Nawh khankix, ang lai tawng grawng ceu an khankix, viang mawh nan khaix hoik yaog min pakngai Yesux, kix doh keud ka pa hoik tiiem grawng Nawh Cao mai grawng pa hoik yu kix ceu an khankix ka Nawh heue.

¹⁷ Pui hun pa hoik ot mai Nawh Cao yam kok Nawh Lazarux lih khaing daux simeeig kieh nawh kaoh khaing krax yum, kham mhai rug heue.

¹⁸ Hoik mawh kheu khawm jao in cub pui hun an hoek ti rieb Nawh Cao, kheu hoik mhong kix grawng mhai pa daox am pa yuh Nawh an heue.

¹⁹ Mawh kheu nan Pharishie khankix tix kaux lai tix kaux ah nin ka paox tix, “Pex jhak heue, ang pex tie pon yuh tidtix, haktiex in hoik hawt Nawh khawmuik heue.”

Pui Helasax Sawg Ka Yesux

²⁰ Ka daux pui khankix pa haok ti krub daux pawie, koe pui Helasax tix blah,

²¹ Mawh kheu nan inkix hoek ka Philipux pa mawh pui veng Biesedax meung Galilie ah nin, “Simiang eue, ex simie ti yaox Yesux heue.”

²² Philipux hu krai ka Andare, Andare mai Philipux hu krai ka Yesux heue.

²³ Yesux deeh ah nin, “Bawg yam nari pa sang yaog min pakngai Kawn kawn pui hoik hoek.

²⁴ Aux krai lox tete ka pax, phan simie nghox ca ang rau piang tiex mai ang laux kienie, ca mawh simie nghox tix mu khaing, viang mawh nan, phan laux, chix plix haoh hun.

²⁵ Kaw pa moh ju tokaux tix tak sang som ju, kaw pa koeng ka ju tix piang haktiex in, tak sang priex ju son leeing ju heue.

²⁶ Pui mawx ang ah phan nawh yuh kaing Aux, kieh hawt khaix Aux dee ot Aux kawncau Aux kawx, tak sang pon ti ot tan heue. Pui mawh ang ah, phan yuh son Aux Keeing Cao tak yaog nawh ting heue.

²⁷ Bawg yam in Aux koe krax khi rhawm Aux tak sang ah ka mawx? Sang ah, Keeing eue. Taoh Aux khaing bawg yam nari in liak, lie? Viang mawh nan pa hoik hoek Aux mawh son bawg yam nari in heue.

²⁸ Keeing eue, kieh yaog yaw ceu kaux Maix heue.” Yam an lox lih khaing raoma ah nin, “Aux hoik yaog yaw kah, Aux tak sang baox deeh yaog yaw kah tix bawg heue.”

²⁹ Pui haoh pui hun pa cung dex tan mhong lox an ah nin, “mawh sinum praix heue.” Tang kaux khankix ah, “Mawh kawncau Siyiex pa sikah mai Nawh Cao” heue.

Krai Grawng Sang Kham Geu

³⁰ Yesux pawk ah nin, “Lox an hoek son Aux ang mawh, hoek son pex heue.

³¹ Yam in hoik hoek bawg yam pa sang prawng ciyang ka haktiex, bawg yam in tak sang grheu simiang haktiex in lih heue.

³² Phan yaog Aux khaing haktiex in, Aux tak sang bluh pui khawmuik hoek ka Aux heue.”

³³ Pa ah Nawh nan, Nawh Cao jhi grawng sang yum Nawh yuh ka mawx heue.

³⁴ Pui hun khankix tom baox pawk lox ah nin ka Nawh Cao, “Ex mhong khaing daux lai beenli grawng tak sang ot Cao Khrit jheung jheung. Phan mawh nan, Maix lai ah tak sang yaog Kawn kawn pui? Kawn kawn pui mawh mawx?”

³⁵ Mawh kheu nan Yesux pawk lox ah nin ka kix, “Pa riang kawn ot mai pex tivud khaing. Pex hu yam kawn koe pa riang awx. Phan ang mawh nan ha pa faik kox krup ka pex. Grawh grawng nawh kaw pa hu ka daux pa faik ang tawng dee hu tokaux tix.

³⁶ Yum rhawm ka pa riang, Yam kawn koe pa riang pex, sonsang lih mawh pex kawn pa riang heue.” Khaix hoik ah Yesux ceu an, Nawh lih hu mai mox tokaux tix khaing kix heue.

Pa Ang Yum rhawm

³⁷ Viang Nawh hoik yuh mhai pa daox am nie ding nie dod plak sivoe kix kawx kix ang yum rhawm ka Nawh Cao.

³⁸ Kheu nan lox pa krai cao jhai Isayax pa ah nin hoik naog, “Simiang eue, pui mawx hoik yum rhawm ka lox sidiex gau ex? Simiang hoik plak jhi sibrawm Nawh ka pui mawx?”

³⁹ Mawh kheu nan kix tom ang pon ti yum rhawm kah, kheu hoik krai Isayax ah nin,

⁴⁰ “Nawh tak kieh ngai kix dug, yuh rhawm kix kiien, son ang ngai kix chix yaox, son ang rhawm kix chix tawng mai son ang kix chix deeh hoek ka Aux, sonsang cox Aux ti kieh kix moi”

⁴¹ Isayax ah lox in mawh kheu hoik yaox nawh min pakngai Nawh Cao nawh tom hoik krai grawh grawng Nawh.

⁴² Pie simiang khankix kawx yum rhawm ka Nawh, viang mawh nan kheu lhat kix Pharishie, grheu kix lih khaing daux nyiex sidiex, ang kix kieh sidawng grawng pa rieb kix ka Nawh Cao.

⁴³ Mawh kheu moh kix min pakngai pa tawx kawn pui nie lheu khaing min pakngai pa tawx Siyiex heue.

Kheu Gumlox Yesux

⁴⁴ Yesux kok yo ah nin, “Pui pa yum rhawm ka Aux, yum rhawm ka Aux khaing ang mawh, yum rhawm ka Kaw pa ploi Aux hoek heue.

⁴⁵ Pui pa yaox ka Aux, yaox ka Kaw pa ploi Aux hoek heue.

⁴⁶ Aux mawh pa riang pa hoek piang haktiex, pui pa yum rhawm ka Aux ku kaux daux pui tak ang lai sang ot ka daux pa faik heue.

⁴⁷ Pui mawx ang ah, phan mhong lox Aux khankix ang priex ti hawt kah, Aux ang prawng ang ciyang ka nawh, mawh kheu hoek Aux ti ciyang haktiex ang mawh, viang mawh nan hoek sonsang taoh haktiex in heue.

⁴⁸ Pui pa tik ka Aux pa ang rieb ti teei lox sidiex gau Aux, Kaw pa sang prawng sang ciyang ka nawh hoik koe tix kaux. Gumlox pa krai Aux in mawh pa tak sang prawng sang ciyang ka nawh singaix sidah sax.

⁴⁹ Mawh kheu lox pa krai Aux, ang mawh lox pa kaoh khaing tokaux tix. Mawh Keeing Cao pa ploi Aux hoek, tawm lox ka Aux grawng ceu pa sang krai sang sidiex Aux heue.

⁵⁰ Aux tawng grawng lox pa tawm Nawh mawh ju leeing ju. Mawh kheu nan ceu pa krai pa sidiex Aux, mawh lox tawm jhawm krai Keeing Cao ka Aux heue.”