YOHAN 10 - Wa Common Language Translation

Grawng Cao Liang Yung

¹ “Aux krai lox tete telai ka pex, kaw pa ang laig daux siviex kawg yung mai haok laig tang dah mawh pui briex heue.

² Kaw pa laig ka daux siviex mawh cao pa liang yung heue.

³ Pui pau siviex chix paoh son nawh, yung khankix kawx nghiet ka lox nawh, nawh kok ceu kaux yung cie nawh mai thong kix lih.

⁴ Khaix hoik kieh Nawh yung cie tix lih khawmuik Nawh hu sivoe kix kheu yung khankix tawng lox Nawh kix tom hawt nawh heue.

⁵ Viang mawh nan, kix ang hawt khaix pui pa ang kix tawng, kix to khaing, kheu ang kix tawng lox nawh heue.”

⁶ Yesux krai lox tiag in ka kix, viang mawh nan ang kix tawng dee bleeh lox ceu pa krai Nawh ka kix heue.

Cao Liang Yung Pa Mhawm

⁷ Kheu nan Yesux baox ah nin ka kix, “Aux krai lox tete ka pex, Aux mawh siviex yung heue.

⁸ Can pui pa hoek ka sang hoek Aux khawmuik mawh pui briex, pui tud rhim, viang mawh nan yung khankix ang nghiet lox kix.

⁹ Aux mawh siviex, pui mawx ang ah phan nawh laig daux Aux, nawh tak hoek krax taoh mai laig laig lih lih yaox dee pon ti ih.

¹⁰ Pui briex hoek ngie sonsang briex mai pah yum yuh laux khaing. Aux hoek sonsang pon kix pa im ju mai sonsang pon kix ju pa im pa nie lheu khaing in heue.

¹¹ Aux mawh cao pa liang yung pa mhawm heue. Cao liang yung pa mhawm pa tik ju tix yum son yung khankix.

¹² Pui cang pa ang mawh cao liang yung, yam yaox nawh hoek sox la nawh grham yung khankix mai to khaing, kheu ang mawh cie nawh, Sox la kiied yung kieh prung prang tang to heue.

¹³ Nawh to kheu mawh nawh pui cang ang keud son yung khankix heue.

¹⁴ Aux mawh cao liang yung pa mhawm heue. Aux tawng cie Aux mai cie Aux tawng Aux.

¹⁵ Awm tawng Keeing Cao ka Aux, Aux tawng ka Keeing Cao mai Aux tik ju tix yum son yung khankix heue.

¹⁶ Aux kawn koe yung pa ang neuex daux kawg yung in, Aux tak viex kix hoek, kix tak nghiet ka lox Aux, tak sang mawh yung tix cub, cao liang yung tix kaux khaing.

¹⁷ Keeing Cao moh Aux kheu tik Aux ju tix yum, sonsang baox deeh teei Aux tix bawg heue.

¹⁸ Ang pui teei ju khaing Aux tix kaux kawx, viang mawh nan mawh Aux pa tang tik. Aux koe siawp ti tik. Mai Aux koe siawp ti deeh teei ju Aux heue. In mawh lox tawm pa pon Aux khaing Keeing Aux heue.”

¹⁹ Mawh kheu lox ceu inkix pui Yudax khankix baox tang lox siyox moing ang khaw paox tix heue.

²⁰ Kix Pui hun ah nin, “Nawh koe phi caox mai yhot heue, pex lai nghiet lox Nawh yuh ka mawx?”

²¹ Tang kaux ah nin, “Lox Nawh in ang mawh lox pui pa laig phi caox. Phi caox khex chix cox pui dug ngai blah ngai lie?”

Yesux Yaox Ti Kham

²² Mawh yam yuh kix pawie tawx pong ka daux veng Yerusaliem daux bawg yam kwat,

²³ Yesux hu lailing daux nyiex bwan piang grah Sawlamon.

²⁴ Mawh kheu nan pui Yudax khankix hoek ti ot vung viang Nawh Cao mai ah nin ka Nawh, “Pa ang Maix sang kieh ex tawng grawng Maix sidawng tak sang koe miex grheung? Phan Maix mawh Cao Khrit krai ka ex sidawng heue.”

²⁵ Yesux deeh ah nin ka kix, “Aux hoik krai ka pex, ang pex yum rhawm kah Kaing pa yuh Aux ka daux ceu kaux Keeing Cao mawh mhai rug grawng Aux heue.

²⁶ Viang mawh nan, awm hoik krai Aux ka pex ang pex yum rhawm kheu ang pex mawh yung Aux.

²⁷ Yung Aux nghiet lox Aux mai Aux tawng ka kix, kix hawt khaix Aux heue.

²⁸ Aux tawx ju leeing ju ka kix, kix ang hoek krax laux leeing tix bawg kawx. Lheu khaing an pui tix kaux kawx ang pon rud ti teei kix khaing daux tawm taix Aux heue.

²⁹ Keeing Aux pa tawx yung khankix ka Aux, mawh pa lheu ting khaing khawmuik pui tix kaux kawx ang pon rud ti teei kix khaing daux tawm taix Keeing Aux.

Mawh tix Kaux Khaing

³⁰ Aux mai Keeing Aux mawh tix kaux khaing”

³¹ Yam an pui Yudax khankix baox deeh teei simaox sonsang dheem ka Nawh Cao.

³² Yesux baox pawk lox mai ah nin ka kix, “Aux hoik yuh pex yaox kaing pa mhawm pa kaoh khaing Keeing Aux kied nie tete. Ka daux kaing pa yuh Aux khankix an, mawh kheu grawh grawng kaing patix, pex tom sang teei simaox dheem ka Aux?”

³³ Pui Yudax khankix deeh ah nin ka Nawh Cao, “Ex sang dheem Maix ka simaox kheu kaing pa mhawm ang mawh. Kheu salao Maix ka Siyiex kheu Maix pa mawh kawn yuh tokaux tix mawh Siyiex heue.”

³⁴ Yesux deeh ah nin ka kix, “Daux lai been giex gang pex, Aux ah pex mawh siyiex heue ang mawh lie?

³⁵ Phan Nawh Cao kok pui pa hoik pon lox khaing Siyiex mawh siyiex, lox lai sigang khri ang doh chix laux leeing,

³⁶ Pex sang ah ka grawng Kaw pa hoik kieh Siyiex nawh singax mai ploi hoek piang haktiex, Maix salao ka Siyiex, kheu hoik krai Aux, Aux mawh Kawn Siyiex, lie?

³⁷ Phan Aux ang yuh kaing Keeing Aux paw yum rhawm ka Aux.

³⁸ Viang mawh nan, phan Aux yuh, viang pex ang yum rhawm ka Aux kawx, yum rhawm ka kaing khankix, sonsang tawng pex mai yum rhawm grawng ot Keeing Aux ka daux Aux mai grawng ot Aux ka daux Keeing Cao”

³⁹ Kheu nan kix baox deeh sawg ti giex Nawh tix bawg, viang mawh nan Nawh Cao luan khaing daux tawm taix kix heue.

⁴⁰ Nawh Cao baox deeh hu plak toi rawm Yawdan ka dee cubcom Yohan phao ka mai Nawh ot tan heue.

⁴¹ Pui hun hoek ka Nawh mai kix ah nin, “Yohan ang yuh mhai pa daox am, viang mawh nan, lox pa krai nawh grawng Pui in khawmuik mawh tete heue.”

⁴² Ka dee an pui hun yum rhawm ka Nawh Cao heue.