YAWSUX 6 - Wa Common Language Translation

Grawng Laux Veng Yerikho

¹ Yam in, veng Yerikho hoik nyeep tix tom kaux kheu jao kawn praix ceu pui Isarelax khankix. Pui pa lih hu mai pui pa laig ka daux, ang koe pie tix kaux kawx.

² Siyiex leeing ju ah nin ka Yawsux. “Aux hoik tawx veng Yerikho ka daux tawm taix maix, khawm simiang nawh mai khawm pui naing pa ting riang nawh khankix khawmuik.”

³ “Maix mai pui naing khankix tak hu lai lawm ti cawng hawt vung viang veng an tix ngaix tix bawg mai tak yuh nin noag liah ngaix heue.

⁴ “Cao giex kaing li aliah kaux tak teei ti viex teettawng rung yung mhaing khankix, ka plak sivoe khwi bwan sijax mukheu heue. Yam hoek ka daux aliah singaix maix tak lai lawm cawng hawt vung viang veng aliah bawg mai cao giex kaing li khankix tak phlu teettawng heue.”

⁵ Yam phlu kix lox teettawng rung yung mhaing tom lang mai yam mhong pex ka lox teettawng, pui khankix tak yo lox tix tau mai lox pa kied ting sinum heue. Khaix an guh veng tak khrup khawmuik heue. Pui khankix tak yaog ti haok see ku kaux ka sivoe heue.

⁶ Mawh kheu nan, Yawsux pa mawh kawn simex Nun, kok ka cao giex kaing li khankix ah nin ka kix. “Yaog ti klawm khwi bwan sijax mukheu mai kieh cao giex kaing li aliah kaux viex teettawng pa yuh tix ka rung yung mhaing khankix aliah mu mai hu ka plak sivoe khwi bwan sijax mukheu Siyiex leeing ju heue.”

⁷ Nawh baox ah nin ka pui khankix. “Hu plak sivoe mai lai lawm ti cawng hawt vung viang veng mai kieh pui giex kraung naing khankix hu ka plak sivoe khwi sijax mukheu Siyiex leeing ju heue.”

⁸ Yam hoik krai Yawsux ka pui khankix mai cao giex kaing li pa viex teettawng rung yung mhaing khankix pa koe ka plak sivoe Siyiex leeing ju, lih hu plak sivoe mai phlu teettawng khankix heue. Khwi bwan sijax mukheu Siyiex leeing ju tak hawt ka plak khaix kix.

⁹ Pui pa giex kraung naing khankix, lih hu ka plak sivoe cao giex kaing li pa phlu teettawng khankix heue. Cub lien pa giex kraung naing khankix hawt hu khaix khwi bwan sijax mukheu glang kawn phlu cao giex kaing li ka teettawng heue.

¹⁰ Yawsux tawx lox ah nin. “Ang pon ti lih lox, ang pon ti kieh lox tix sinum, ang pon ti sikah tom hoek bawg yam singaix pa kieh aux pex deeh kok yo, khaix an pex tak pon ti kok yo heue.”

¹¹ Mawh kheu nan, nawh kieh khwi bwan sijax mukheu Siyiex leeing ju cawng ka veng mai hu hawt vung viang veng been tix bawg heue. Khaix an, kix laig ka dee pan tix mai ot ka daux nyiex bang tix heue.

¹² Yawsux yaog ti kaoh caocao ka plak ponngawb mai cao giex kaing li khankix yaog ti klawm khwi bwan sijax mukheu Siyiex leeing ju heue.

¹³ Khaix an, cao giex kaing li aliah kaux pa viex ka rung teettawng yung mhaing aliah mu, pa koe ka plak sivoe khwi bwan sijax mukheu Siyiex, nied ti hu ka plak sivoe mai phlu lox teettawng khankix luah heue. Pui pa giex kraung naing khankix hu sivoe kix. Viang mawh nan, cub lien pa giex kraung naing khankix, hawt ti hu ka plak khaix khwi bwan sijax mukheu Siyiex leeing ju glang kawn phlu cao giex kaing li khankix ka teettawng heue.

¹⁴ Ka daux singaix an, kix baox lih hu mai lai lawm tix cawng hawt vung viang veng baox tix bawg mai kix deeh ing ka dee pan dee peung tix heue. Mawh kheu nan kix yuh ceu ankix noag liah gaix heue.

¹⁵ Yam hoik noag aliah gaix, kix yaog ti kaoh caocao yam bah riang praix mai kix lih hu lai lawm ti cawng hawt vung viang veng aliah bawg awm krax pa hoik yuh kix heue. Mawh ngie singaix an kix cawng hawt vung viang veng aliah bawg heue.

¹⁶ Yam hoik naog aliah bawg, cao giex kaing li phlu teettawng mai Yawsux ah nin ka pui khankix, “Kok yo heue. Grawh grawng nawh, Siyiex leeing ju hoik tawx veng in ka pex.”

¹⁷ Yam in veng an mai can pa koe ka daux nawh khankix, tak hoek krax laux sivoe Siyiex leeing ju heue. Mawh ngie Rahap pa mawh bun pa coh kaux pa pon ti im ju khawm nawh tau mai can pa koe tau mai nawh daux nyiex khankix, kheu jao hoik mox nawh kawncau pa hoik ploi ex heue.

¹⁸ Pex tak rien rhawm tokaux cao tix paw teei kraung can ceu pa hoik jhax lawg khankix, phan ang mawh nan, pex tak hoek ka daux krax pa jhax lawg yam teei pex ceu pa hoik jhax lawg khankix mai tak yuh nyiex pan ceu pui Isarelax khankix hoek ka daux krax pa jhax lawg mai an tak mawh pa khi rawm ka pex heue.

¹⁹ Viang mawh nan, can pa mawh mau, khri, aw, klong pa yuh tix ka tawng mai rhiem khankix, tak mawh pa deuh tix singax singeh son Siyiex leeing ju heue. Ceu ankix tak mawh pa sau ka daux sinngao cie Siyiex leeing ju heue.

²⁰ Mawh kheu nan pui khankix yo lox tix mai phlu teettawng. Yam hoik mhong pui ka lox teettawng mai pui yo lox tix tau mai pa kied ting sinum, guh veng khankix hoik khrup khawmuik heue. Khaix an pui khankix hu laig ka daux veng ku kaux daux pui, see ka plak sivoe mai kix hoik rhim ti teei veng an heue.

²¹ Kix yuh can ceu pa koe daux veng khankix laux khawmuik, khawm simex mai bun khawm pui awn ju mai pa riex ju, khawm mawie mai yung, la khankix ka lawm vaid heue.

²² Khaix an Yawsux ah nin ka pui an ra kaux pa hoik hu jiang ti yaox ka haktiex. “Hu laig ka daux nyiex bun coh kaux an mai teei bun an lih khaing tan khawm can ceu kraung pa koe nawh khawmuik awm pa hoik tiextu pax ka nawh heue.”

²³ Pui awn ju ankiex pa hoik hu jiang ti yaox ka haktiex, hoik laig ka daux nyiex mai viex Rahap khawm miex keeing nawh, puxaik puxo nawh mai can ceu pa koe nawh khankix lih hu heue. Mawh kheu nan, kix baox viex paox nyiex nawh khankix lih hu mai deuh kix ka plak praix dee pan ceu pui Isarelax khankix heue.

²⁴ Khaix an kix gleeing veng khawmuik ka ngu heue. Mawh ngie kraung khri, mau, aw klong pa yuh ka tawng mai rhiem khankix khaing pa sau kix laig ka daux sinngao nyiex bwan Siyiex leeing ju heue.

²⁵ Yawsux tawx krax klawd ju ka Rahap, pa mawh bun coh kaux mai can ceu pa koe nawh khawmuik heue. Mawh kheu nan, nawh ot tau mai ceu pui Isarelax khankix tom hoek ka daux in singaix kheu jao hoik mox nawh ti deuh kawncau pa hoik ploi Yawsux nawh hu jiang ti yaox ka veng Yerikho heue.

²⁶ Khaix an, Yawsux tiextu ka kix ka daux bawg yam an ah nin. “Kieh pa jhax lawg koe ka piang kaw pa yaog ti kaoh mai deeh sum ka veng in pa mawh veng Yerikho, ka plak sivoe ngai Siyiex, yam sum nawh num riah veng an, nawh tak mawh pa som ka kawn Ai tix, yam sum nawh ka siviex guh veng, nawh tak som kawn ghoik nawh an heue.

²⁷ Mawh kheu nan, Siyiex leeing ju hoik ot tau mai Yawsux mai pa ao min nawh hoik mawh pa tah hu ka daux haktiex khawmuik heue.